Marko 12

Kɛkpalɛ Nɛ Bagɛ Bedi Buya Kabha Shu

1Yesu etenɔ kaɖɔ ɖɔ tsre alɛ ganɔ akpalɛ mɛ, “Anyɛ teli adɛ vãyɛ̃ buya. Abhɔ kidri akana buya, ebu kizi kɔ bulu nɛ tɛkɛka klɛ edzu opokɔvu. Klɛ ayɛkɔ buya nɛ akpɛ ahwɛ kɔ bayadɛ teli klɛ aga kidzo. 2Nɛ kɛdɔɛ gɔ be, akpɛ axwɛdɛ teli asɛsɛ bagɛ balɛ ahwɛ mɛ buya nɛ kpasɛ nɛ asɛ, ba yɛkɛ eyuyu teli edenɔ buya nɛ mɛ amɛna yɛ. 3Pɔ be vu yɛ, be tu yɛ klɛ ba kɛka yɛ ashɛ̃nɔ nɛ ahwɛ kpɛkpa. 4Klɛ aza kpɛ axwɛdɛ bhlatɔ asɛsɛ balɛ, anyɛ alɛlɛ nɛ xũ be hu yɛ kɛdɔ nɛ kɛtɔkpu, klɛ ba kpɛ yɛ butsɔ. 5Aza kpɛ abhlatɔ, klɛ yalɛlɛ nɛ be yi yɛ. Aza kpɛ banɔ gelee bhlatɔ, balɛlɛ nɛ mɛ beteli tsyɛ be tua lɛ, beteli be yi alɛ.

6“Anɔ terikpo aka gɔ gɛ aba kpɛ, gɛ enu yɛ eyianyɛ nɛ gɛ adɛmɛ yɛ bui. Aba kpɛ yɛ gɔgɔɛ, klɛ aɖɔ asɛ, ‘Baa yɛkɛ yɛ ansɛ mɛ eyi.’

7“Pɔ baxwɛwa nɛ aɖɔ nɛ aglɔmɛ asɛ, ‘Agɛ yɛ abaa za yɛ kinyi mɛ nɛ naa. Nɔ ba nɔ kɔ lɔ yi yɛ, tɛ ɔŋakɔ nɛ obo dzi bulɔ yɛ.’ 8So be vui klɛ be yi yɛ, klɛ ba yɛkɔ atɛ̃ akpɛ buya nɛe de.

9“Kidee klɛ lɛ sɛ tɛ Ayalete nɛ abhɛtɛ? Aba ba ebe yi baxwɛwa lɛlɛ klɛ aba yɛkɔ buya nɛ akpɛ ahwɛ kɔ banɔ bhlatɔ. 10Nɔ kɔ kla kibui nɛ Kpaya keplukpa nɛ mɛ odi sɛ,

“ ‘Kɛklãgbu nɛ gɛ bevudzu na dɛ pɛɛ nɛ

klɛ ba dzi ɔxãkɔɛ kɛklãgbu.

11Apalete nɛ ya bhɛtɛ kɛlɛ kana,

ki yinɔ lɔ nɛ bulɔ kɛdɔmumɔ nu.’ ”

12Klɛ banɔ na kpa kidzo pɛɛ nɛ yɛ shu kɔ tɛvuvu, alasɛ benyi asɛ balɛ shu akpɛ kɛkpalɛ. Pɔ bee si banɔɛza nɛ ɔkɛlɛ nɛ kifu, so ba shɛnahwɛ yɛ shu klɛ ba shɛ.

Kadzyɔ Kɔ Kaɛzaro

13Klɛe de nɛ ba kpɛ Farisianɛ anɛ Heroɖesɛanɛ teli sɛ tɛ be de vu Yesu aganɔ yɛ ebui ɖuɖɔ shu. 14Ba ebe ku yɛ ɔbha klɛ la ɖɔ asɛ, “Adɔkasɛ, bunyi sɛ onu anɔ gɛ ɔna. Anɔdzyrame ataa na wɔ tsyina, alasɛ wɔ otoo di banɔ nɛ di gɛ be nu nɛ ɔkɔ, pɔ ɔkasɛ Kpaya kidzo nɛ kɛgbɛagba nɛ nu. Kɛbɔ sɛ tɛ ba kɔ kadzyɔ Kaɛzaro pɛnɔɔ kɛmɛtã? 15Bu buya pɛnɔɔ bɔtɛ buya?”

Pɔ Yesu enyi balɛ butsutsɔmɔ. Ebisi alɛ asɛ, “Kide so pɛ nɔ tɔ kɛgba kɔ mɛ?” “Nɔ yɛkɔ wɔnɔ kɔba nɛ tili ɔmɛna tɛ idi.” 16Ba yɛkɔ kɔba nɛ amɛna, klɛ ebisi alɛ asɛ, “Anee kɛtɔkpu klɛ tsri yɛa bha? Klɛ anee kɛdɔ ŋuŋlɔmɛ klɛ tsri?” Be bu klɛ nu asɛ,

“Kaɛzaro yɛ.”

17Klɛ Yesu etsre balɛ asɛ, “Kɛgɛ nu Kaɛzaro yɛ tɛ nɔ yɛkɔ kɔ Kaɛzaro tɛ nɔ yɛkɔ kɛgɛ nu Kpaya yɛ nɛ ɔkɔ Kpaya.”

Klɛ kɛ bhɛtɛ alɛ bi.

Adzɛ Gbɛgbanɔ Nɛ Kɛlɔwi

18Ɔkɛlɛ Sarusianɛ, gɛ baa ɖɔ sɛ tɛlulɔ ma, na ba tɔnɔ yɛ nɛ tɛbibisi. 19“Adɔkasɛ, ” “Mose aŋlɔmɛ ɔhsã kɔ bulɔ sɛ onu anɔadzya etsi alɔ yɛedzini gɛ yɛ nɛ yɛ ba dɛ mɔ eyinyeyi, alasɛ tɛ adzya nɛ gɛ alɛ nɛ ayɛkɔ adzɛ nɛ agbanɔ tɛ ba mɔ beyi akɔ agɛ eti tsi. 20Ɔtsɔ̃ nɛ badzya tiegene teli ba za. Atɛtɔpu na gbanɔ adzɛ klɛ ebe tsi eyi mamɔ-mamɔ. 21Abhla na yɛkɔ adzɛ nɛ agbanɔ, klɛ yɛ tsyɛ ebe tsi, adɛ mɔ eyi nɛ adzɛ nɛ shu. Atramɛ nɛ tsyɛ kana kɛ za kɔ yɛ. 22Kɛgba nɛ, banyɛ tiegene nɛ petee akanyaka adɛ mɔ eyi elu. Gugɔɛ nɛ, adzɛ nɛ tsyɛ ebe tsi. 23Nɛ balɛ kɛlɔwi nɛa bha ane yɛedzini adzɛ nɛ ebe dzi, gɛ balɛ petee ba tɛ gbanɔ adzɛ nɛ edi?”

24Yesu ebui lɛ nu asɛ, “Ganɛ kitoe bui nɔ zɔ ɖɔa, alasɛ no ti nyi Kpaya kibuieplukpa ɔdɔgɔsɛ yɛ kemi? 25Onu gɛ be tsitsi nɛ ba lɔ, aglɔ gbɛgbanɔ atɛa za, ɔdɔgɔsɛ ba yɛkɔ anɔ akɔ sɛ bagbanɔ, baba za ansɛ Kpaya baxwɛdɛ nɛ owũsise. 26Ɔtsɔ̃ nɛɛ, nɛ anɔ tsitsi tɛlulɔ shu, nɔ dɛ kla nɛ Mose keplukpa nɛ mɛ, denɔ yɛ ayakpa mɛ zɛza shu, nɛ kana gɛ Kpaya aɖɔ etsre yɛ asɛ, ‘Mɛ nu Abraham Kpaya, Isakɛ Kpaya, anɛ Yakobo Kpaya,’ 27Edinu betsitsi nɛ Kpaya, pɔ be lulu na yɛ enu. Nɔ ta kesi tsutsɔmɔ tsɔmɔ!”

Ɔshã Gbɛgbla Dɛ

28Ɔshãdɔkasɛ nɛ teli ebe nu kana gɛ bedzi atsrakɛ ebui nɛ akpɛ aglɔ nɛ mɛ. Gɛ amɔ sɛ Yesu akɔ balɛ kibui nu bubu dzyɔgo nɛ, ebisi yɛ asɛ, “Nɛ ɛshã nɛ petee mɛ, oɖuweɖu ɔlɛ ɖamadɛ ɔkanyaka?”

29Yesu ebui lɛ bunu asɛ, “Ɔgɛ ɔlɛ ɖamadɛ,” “ɔlɛ nu sɛ, O Izraɛl, ‘Taatɔ, Apalete blɔ Kpaya, Apalete terikpoo ko enu. 30Dɛmɛnɛ Apalete wɔ Kpaya nɛ wɔ idzyi petee, anɛ wɔ ɔfufɔɛ anɛ wɔ kɛtɔkpumɛ anɛ wɔ kemi nɛ petee.’ 31Ɔbhla nɛ ɔlɛ onu sɛ, ‘Dɛmɛnɛ wɔhayɛ ansɛ wɔ ishu.’ Ɔshã gbɛgbla kanyaka ɔvɔ ma gɛ lɔ ɖama ɔdɛ ɛnɛɛ.”

32Anyɛ nɛ ebui lɛ nu asɛ, adɔkasɛ, “Ɔɖɔ kɛlɛ mɔmɔ,” “Wɔ kibui nɛ na gɛ ɔɖɔ sɛ Kpaya nɛ terikpoo ko enu klɛ akanyaka ava ma ɔyɛkɔ dɛ yɛ. 33Tɛ ɔdɛmɛnɛ yɛ nɛ wɔ idzyi petee, nɛ wɔ kibuiesi nunu petee, anɛ wɔ bugɛganɛ petee, tɛ ɔdɛmɛnɛ wɔhayɛ ansɛ wɔnahwɛ ishu, kɛɖama dɛ ɔŋa nɛ butã tɛkukɔ Kpaya.”

34Gɛ Yesu amɔ sɛ anyɛ nɛ ebu kibui nɛ bunu mɔmɔ nɛ, etsre yɛ asɛ, “Wɔ ɔdɛ vɛ odzidzekɔ nɛ Kpaya bukusi ɔŋakɔ nɛ mɛ.” Klɛ denɔ kibelɛ nɛ ɔyɛkɔ ɔvɛnɔ nɛɛ, anɔnyanɔ adaa na yɛ kibuinyɛbui bu bisi.

Anee Yɛ Eyi Yɛ Enu Kristo?

35Kibee lɛ nɛ gɛ Yesu akasɛ kɛdɔ nɛ busɔlɛvu ka nɛ mɛ, ebisi asɛ, “Kɛlɛ lɛ lɛ so pɛ ɛshãdɔkasɛ nɛ baɖɔ sɛ Kristo nɛ enu Daviti yɛeyi? 36Deviti nahwɛ nɛ, yɛ kaɖɔɖuɖɔ ganɔ Ɔfufɔɛ Dzyɔgo nɛa bha nɛ, ebu aɖɔ sɛ,

“ ‘Apalete na ɖɔ etsre mɛ Apalete nɛ asɛ,

“Za mɛ kɛŋa nɛ mɛ

ɔdɔ nanɔ kibee lɛ gɛ ɛba yɛkɔ baga dɛ pɛɛ wɔ

nɛ ɛkpɛ wɔ butsrukpɔ kesi.”

37Daviti nahwɛ eklu yɛ asɛ, ‘Apalete.’ Klɛɛ dzi Yesu eze be dzi yɛ eyi?”

Banɔɛza nɛ bata yɛ kibui nɛ batɔ nɛ same.

38Nɛ yɛ kɛdɔ kɛkasɛ nɛ mɛ Yesu aɖɔ asɛ, “No vu awɔ̃hũ nɛ ɛshãbadɔkasɛ. Kinu balɛ tɛpɛpɛ sɛ tɛ baza balɛ bawi dzidze nɛ mɛ tɛ baza mɔ balɛ asɛnɔ nɛ budzi nɛ mɛ, 39tɛ bamɔ ɛzakɔ gbɛgbla nɛ ixogokɔvu nɛ mɛ, nɛ kinyibgla ɛzakɔ nɛ kɛdɔŋakɔ. 40Ba yɛɛ bagɛ be tsi banyɛ nɛ bapa, klɛ tɛ ba yɛkɔ akasɛ ishu so nɛ, baa za Kpayakuklu kabha dzrororo. Banɔ balɛlɛ nɛɛ di nɛ ba la mɔ batɔtɛtɛta adɛ petee.”

Anyɛtsi Kɛdɔ Kukɔ

41Yesu aza kesi nɛ ɔklɛ gɛ kɛdɔ kukɔ nɛɛ vɛ kabha nɛ kapɛ bhla, klɛ evu awɔ̃hũ nɛ banɔɛza nɛ kɛdɔkukɔ nɛ busɔlɛvu kakputɔ nɛ mɛ. Behoeyilete gelee ba kpɛ kɔba gbɛgbla nɛ kɛdɔ dzyudzyɔ kesugba nɛ mɛ. 42Pɔ anyɛtsi etsyutsyuini teli, kɔba bhli tɛabha ko evunɔ aba za ansɛ kapleapɛ aba kpɛ kɛkpɛtɛ nɛm.

43Gɛ Yesu eklu yɛ badɔkpasɛ nɛ amɛna yɛ ɔbha nɛ, klɛ etsre alɛ asɛ, “Itsre nɔ kɛgba sɛ, Anyɛtsi etsyutsyuini nɛ kɔba gɛ akpɛ nɛ kakputɔ nɛ mɛ na ŋaedzi adɛ anɔnyanɔa yɛ. 44Banɔ nɛ petee gɛ bakɔ kɛdɔ nɛ balɛ ehoeyi gelee zɛza anɔ ahwɛ nu, pɔ nɛ yɛ kitsyui nɛ nu, ayɛkɔ yɛ kɛdɔ nɛ gɛ kɛ lɛ yɛ ahwɛ nɛ ada kpɛ, kɛ gɛ kɛlɛ shu aba za nɛ petee nɛ kiwi lɛlɛ nɛm.”

Currently Selected:

Marko 12: tcd

Highlight

Copy