Luka 5

Badɔkpasɛ Tɛtɔpu Tɛkuklu

1Kiwui tirikpo Yesu alɔ kititi nɛ Genesarɛtɛ Kɛvɔ nɛ tɔ, banɔɛza akanɛ yɛ atsya tɛ be nu Kpayabui, 2amɔ keniabha ipupu tɛbha nɛ kɛgbigbe nɛ tɔ, gɛ ba gɛ bu kenimɛdzya ba shɛ̃ alɔ, klɛ be plu balɛ kenimɛdzikle. 3Ewuku keniabha opupu torikpoe mɛ, gɛ lɔ nu Simɔn ɔyɛ, klɛ etsre yɛ asɛ etsunɔ lɛ nɛ butɔ avɛnɔ keni nɛ mɛ bɔɛ. Ɔkɛlɛ Yesu aza kesi nɛ opupu nɛ mɛ klɛ akasɛ banɔ nɛ dɔ.

4Gɛ aɖɔaɖɔ nɛ beke, etsre Simɔn asɛ, “Kpɛ dzikle nɛ buni nɛ́ odzudzu ɔkɔ klɛ tɛ ozhi nɔɛ kpɛ kesi tɛ nɔ vu adzya.”

5Simɔn ebushunu asɛ, “Apalete, buwaxwɛ gɛganɛ nɛ elishi petee mɛ klɛ bɔ dɛ bu kɛdɔnyɛdɔ. Pɔ alasɛ wɔ ɖɔ so, ɛba kpɛ dzikle.” 6Gɛ ba bhɛtɛ ana so, be bu adzya gelee gɛ balɛ bedzikle betɛnɔ atswɛ̃. 7So bakasɛ ahwɛ balɛ ɔhaglɔ nɛ opupu bhla nɛ mɛ sɛ ba ba plɛnɔ alɛ, klɛ ba vɛ debu adzya akpɛ ipupu tɛbha mɛ klɛ lɛ yuku gɛ lɛpɛɛ sɛ tɛ lɛ zhiesi.

8Gɛ Simɔn Petro amɔ ebuia nɛ, ezhi akpla ekuisiesi kɔ Yesu, klɛ aɖɔ asɛ, “Shɛ̃ nɛ mɛ ɔbha, Apalete, enu kanɔ gɛ abhɛtɛ buzizi!” 9Alasɛ kɛyinɔ yɛ nɛ yɛ ɔhayɛalɛ anɛ adzya nɛ gɛ be bu nɛ shu, 10kanake Yakobo anɛ Yohanɛsɛ gɛ benu Zebeɖi ye yialɛ gɛ benu Simɔn axwɛwuwa elete na bhɛtɛ.

Nɛlɛede Yesu etsre Simɔn asɛ, “Tɛ sifu, denɔ ɔtsɔnɛ ɔvɛnɔ ɔbo bu banɔ.” 11So be bu balɛ ipupu nɛ atrɔ kɛgbigbe nɛabha, ba shɛ̃ lɔ kɛdɔnyɛdɔ klɛ ba tɔnɔ Yesu.

Anɔ Nɛ Gɛ Bunyadzɛdzã Lɛ Yɛ Shu

12Kɛbelɛlɛ Yesu aza ɔma nɛ toli mɛ, anyɛ teli aba ɔkɛlɛ gɛ bunyadzɛdzã lɛ yɛ shu. Gɛ amɔ Yesu, ekumu amɛesi klɛ akpɛ kɛtɔkpuesi kɔ yɛ aɖɔ sɛ, “Apalete, onu gɛ ɔdɛmɛ, bhɛtɛ mɛ tɛ mɛ shu bhui.”

13Yesu ebu ɔhwɛ akpɛ yɛ ɔkɔ klɛ ehunɔ anyɛ. Aɖɔ sɛ, “Ɛdɛmɛ.” “Wɔshu bhui!” Klɛ tsyiɔ̃ ko bunya nɛ shɛ nɛ yɛ shu. 14Ɔkɛlɛ Yesu akpɛ yɛ ɔshã sɛ, “Tɛ ɖɔ tsre anɔnyanɔ, pɔ vɛ tɛ ɔdɔ yɛkɔ ishu ɔkasɛ kpayaɔzakɔanɔ tɛ ogu bugu nɛ gɛ Mose akpɛ lu kɔ wɔnɔshu bhubhui, tɛ banɔ be ti sɛ wɔshu bhui.”

15Pɔ ebui denɔ yɛ shu le yi gelee dɛ, so banɔɛza ba sɛ tɛ ba benu yɛ ebui nɛ tɛ akɔ balɛ shu bhui tɛ ebu banya nɛ balɛ shui mɛ. 16Pɔ Yesu aganɔ ishu ebu koeyi nɛ banɔ nɛ mɛ gɛ ada za ɔkɛlɛ gɛ lɔ dɔ kranana klɛ eklukpaya.

Yesu Akɔ Kɛkpata Alɔ

17Kiwui tirikpo gɛ Yesu akasɛ dɔ, Farisianɛ anɛ ɛshãdɔkasɛ, gɛ be de bakɔxoe kanyaka mɛ nɛ Galelia, Yuɖea anɛ Yerusalem, ba zaesi nɛ ɔkɛlɛ. Klɛ Apalete nɛ kemi aza kɔ yɛ sɛ tɛ ebu bunya nɛ banyɛnya nɛ shui mɛ. 18Banɔ teli betuku anɔ gɛ agba atrɔ oputso abha amɛna klɛ ba pɛɛ asɛ tɛ ba yɛ kɔ yɛ avɛnɔ bupa nɛ mɛ tɛ ba da yɛ kɔ yɛ elu Yesu amɛ. 19Gɛ ba dɛ mɔ kidzo gɛ ba be tsoku bupa nɛ mɛ alasɛ banɔɛza nɛ tɛkpikpe mɛ so, ba vɛ ada nɛ mɛ klɛ be pu kidri gɛ ba yɛ kɔ wa buvu nɛ nɔ klɛ be zhinɔ yɛ nɛ oputso akpɛ banɔ nɛ kɛshitɛbha nɛ Yesu otugba.

20Gɛ Yesu amɔ balɛ tɛyɛyɛkɛŋa, aɖɔ sɛ, “Ɔbhɛa, bayɛkɔ wɔ ebuizizi nɛ etsye wɔ.”

21Farisianɛ anɛ ɛshã badɔkasɛ be tenɔ ishu etsi, “Ane na nɛ gɛ aɖɔ ebusobui ana? Ane gɛ aba na ebuizizi ayɛkɔ etsye gɛ odi nu Kpaya ko?”

22Yesu eti ebui nɛ gɛ ba ɖɔ nɛ balɛ mɛ klɛ ebisi asɛ, “Kɛdeso gɛ nɔ ɖɔ ebuianɛ nɛ wunɔ dzyi mɛ? 23Kiɖweɖu kɛlɛ pɛ̃ndɛ: tɛ baɖɔ sɛ, ‘Ba yɛkɔ wɔ ebuizizi etsye wɔ,’ pɛnɔ baɖɔ sɛ, ‘Lɔ tɛ ɔga’? 24Pɔ sɛ tɛ nɔ ti sɛ Anɔdzyrame Yi kabhaŋɛŋa lɛ yɛ ahwɛ nɛ kesukpa nɛabha sɛ tɛ ayɛkɔ ebuizizi etsye anɔ....” Yesu etsre anɔ nɛ gɛ agba nɛ asɛ, “Ɛtsre wɔ, lɔ, yɛkɔ wɔ oputso tɛ ɔvɛ kepi.” 25Tsiɔ̃ alɔɛ titi nɛ banɔ nɛ amɛ, ayɛkɔ yɛ kɛdɔ nɛabha gɛ awũsɔ klɛ ashɛ̃ avɛ kepi klɛ akpɛ Kpaya tɔkpu nɛabha. 26Kibui nɛ bhɛtɛ anɔnyanɔ bi klɛ bakpɛ Kpaya tɔkpu nɛabha. Kifu yuku ba lɛ mɛ klɛ baɖɔ sɛ, “Bu mɔ kibui gɛ bu tɛ ba dzɛkɛ obo.”

Lewi Yɛ Tɛkuklu

27Nɛ kɛlɛe de, Yesu ekoeyi klɛ amɔ ɔma kɔba adɔdzyɔ gɛ yɛ nyi klɛ nu Lewi gɛ edziesi nɛ yɛ kɛkpako nɛ mɛ. Yesu etsre yɛ asɛ “Za mɛede,” 28klɛ Lewi alɔ, ashɛ̃lɔ kɛdɔnyɛdɔ klɛ atɔnɛ yɛ.

29Kɛlɛe de Lewi atrɔ kɛŋɛŋawi piim kɔ Yesu nɛ yɛ bupa nɛ mɛ, klɛ kɔba badɔdzyɔ kɛha gbɛgbla nɛ̀ banɔ bhlatɔ baŋaɛ dɔ nɛ balɛ. 30Pɔ Farisianɛ anɛ ɛshã badɔkasɛ gɛ ba lɛ terikpo be bhui yɛ nu klɛ bebisi yɛ badɔkpasɛ nɛ asɛ, “Kɛdeso gɛ nɔŋaɛ dɔ klɛ nɔ wɔ̃ɛ bulu nɛ badɔdzyɔ nɛ ba gɛ bu di anasɛ ‘banɔ zizi’?”

31Yesu ebushunu akɔalɛ asɛ, “Anɛ agɛganɛ yɛ apɛɛ awani, pɔ anyɛnya yɛ apɛɛ. 32Ɛdɛ ba sɛ tɛ ɛba klu banɔ dzyɔgo, bezizi nɛ so gɛ ɛba sɛ tɛ betsyinaɛ temɛ.”

Tɛ Bibisi Yesu Denɔ Onugbunyɛnya Shu

33Be tsre Yesu asɛ, “Yohanɛsɛ badɔkpasɛ banya onugbu klɛ be klukpaya, kanake Farisianɛ badɔkpasɛ tsyɛ ba bhɛtɛ, pɔ wɔ yɛalɛ bavɛ lɛabha aŋɛdɔ klɛ bawɔɛ dɔ.”

34Yesu ebushunu sɛ, “Nɔ bɔna bhɛtɛ sɛ banɔ gɛ bɛ klu kɔ adzɛ gbɛgbanɔ ba banya onugbu nɛ kibelɛlɛ nɛ mɛ gɛ adzɛnyine alɛ balɛ ɔbha? 35Pɔ kibe ba ba gɛ adzɛnyine aba shɛ nɛ balɛ ɔbha, ewialɛlɛ nɛ mɛ ba ba nya onugbu.”

36Yesu akpɛ kikpalɛ nɛ akɔ alɛ sɛ: “Anɔnyanɔ atɛ tswɛ̃ kɛpɔtɛ vuvɔ gɛ ayɛkɔ akamɛ kɛkuku nɔ. Onugɛ akamɛ, kɛpɔtɛ vuvɔ kɛba tswɛ̃, klɛ kɛvuvɔ nɛ kɛkuku nɛ tɛ ba tsa.

Kebhuikuklu Nɛ Babhlatɔ

37Klɛ anɔnyanɔ atɛ yɛkɔ bulu vuvɔ akpɛ keluplui kuku mɛ. Onugɛ akpɛ, bulu nɛ bayɛ keluplui, bulu nɛ ba balɛ klɛ bubazi. 38Oo, bulu vuvɔ nɛ alasɛ tɛ bayɛkɔ akpɛ keluplui vuvɔɛ mɛ. 39Klɛ anɔnyanɔ atɛ wɔɛ̃ bulu kuku kɛlɛede gɛ awɔɛ̃ buvuvɔ, gɛ aba ɖɔ sɛ, ‘Bu kuku nɛ pɛ̃ndɛ.’ ”

Currently Selected:

Luka 5: tcd

Highlight

Copy