Luka 14
14
Yesu Nɛ Farisi Anyɛ Teli Bupa Mɛ
1Kimuenewi tili abha, gɛ Yesu avɛ se tɛ ada ŋa kɛdɔ nɛ Farisianɔ gbɛgbla teli bupa mɛ, klɛ bee vu anhũ nɛ yɛ mɔmɔ. 2Nɛ ɔkɛlɛ anyɛ teli aza yɛ otugba gɛ anya tɛyɛyeke bunya. 3Yesu ebisi Farisianɛ nɛ̀ ɛshã badɔkasɛ nɛ asɛ, “Ɔshã kɔ kidzo sɛ tɛ ba kɔ anɔ shu bhui nɛ Kimuenewi abha, pɛnɔ lɔ dɛ kɔɛdzo?” 4Pɔ balɛ petee ba dɔ sɛɛ̃. Kɛlɛso anyɛna anɔ, akɔ yɛ shu bhui klɛ akɔ yɛ ashɛ̃.
5Ɔkɛlɛ Yesu ebisi alɛ sɛ, “Onugɛ anɔ teli nɛ wunɔɛ shi ye yi, pɛnɔ wɔ etukuaga awɔlɛ eku ozimɛ nɛ Kimuenewi abha, nɔ tɛ bɔlɔ zia obu yɛ nɛ ozi nɛ mɛ?” 6Klɛ kibuinyɛbui dɛ za balɛ ɔhwɛ gɛ ba ɖɔ.
7Gɛ amɔ kana gɛ ba gɛ aba ba kɛdɔ nɛ ɔŋakɔ gɛ ba bhɛ ɔzakɔ dzyɔgo, Yesu akpɛ kɛkpalɛ nɛ akɔ alɛ asɛ: 8“Onugɛ anɔ teli eklu wɔ kɔ adzɛ gbɛgbanɔ kɛdɔŋakɔ, tɛ dɔ pɛ ɔzakɔ gbɛgbla kɔ ishu, alasɛ ebhi be klu anɔ gbɛgbla dɛ wɔ. 9kɛbɛlɛmɛ ana, anɔ nɛ gɛ eklu wunɔ tiabha, abe tsre wɔ asɛ, ‘Yɛkɔ wɔe gbu nɛ ɔkɔ anɔa nɛ.’ Ɔkɛlɛ, nɛ kɛwɔɛ̃ mɛ, ɔbɔ tɛ za ɔgugɔɛ kɔ nɛ kede. 10Pɔ kɛbɛlɛmɛ sɛ beklu wɔ, dɔ za ɔgugɔɛ kɔ nɛ kede, sɛ tɛ kɛbenɔ gɛ agɛ eklu wɔ nɛ aba, ebe tsre wɔ asɛ, ‘Ɔbhɛa, shɛ̃ ɔvɛ ɔdzyɔgo kɔ dɛ.’ ɔkɛlɛ ba be dzu wɔ nɛ ɔɖɛɖama kɔ nɛ wunɔ agɛ be klu nɛ amɛ. 11Alasɛ anɔ gɛ efeke shu ewunɔ ba be zhinɔɛ, klɛ anɔ nɛ gɛ ezhinɔ yɛ shu ba be feke yɛ owunɔ.”
12Ɔkɛlɛ Yesu etsre anɔ nɛ gɛ eklu yɛ asɛ, “Kɛbɛlɛmɛ sɛ oklu anɔ kɔ kemuze pɛnɔ ɔwlago dɔ ŋɛŋa, tɛ klu wɔ ɛbhɛyalɛ, wɔ adzyalɛ, wɔ ɛshopoalɛ nɛ wɔ beke balɛ banya, pɛnɔ wɔ beshopo ehoeyi elete, onugɛ ɔbhɛtɛ ana, balɛ tsyɛ ba be tsodzinɛ wɔ klu klɛ so ba bɛ tsodzi buya wɔɛ bhɛ kɔ wɔ. 13Pɔ kɛbɛlɛmɛ sɛ oklu banɔ kɔ kɛdɔ ŋɛŋa, klu betsyutsyuini, bakpata, bagɛ ba ta na ga, awɔ̃hu pupu elete, 14klɛ ba ba yula wɔ. Kɛlɛlɛmɛɛ sɛ ba tɛ ba tsodzi abuya kɛbhɛ akɔ wɔ, wɔɛ bhɛ bubuya lɛ kɔ wɔ nɛ banɔ dzyɔgo tɛlɛlɔɛ wui nɛabha.”
Kɛkpalɛ Dɛ Nɔ Kɛdɔŋakɔ Gbɛgbla Shu
15Gɛ bagɛ balɛ nɛ Yesu aŋaɛ dɔ nɛ teli enu kibui nɛ, aɖɔ etsre Yesu asɛ, “Bayula anɔ nɛ gɛ aba ŋaɛdɔ nɛ kiwui ŋɛŋa nɛ Kpaya bukusŋakɔ nɛ mɛ.”
16Yesu ebulɛnu asɛ: “Anyɛ teli abala kɔ kɛdɔŋaŋa gbɛgbla tili klɛ eklu banɔ gelee. 17Kibe lɛlɛ gɛ kɛdɔɛŋa bɛ na, akpɛ yɛ axwɛdɛ nɛ sɛ avɛ tɛ ede tsre banɔ nɛ gɛ ɛtsre lu nɛ sɛ, ‘Ba, ɔtsyɔ nɛ kɛdɔnyɛdɔ xogo.’
18“Pɔ balɛ petee be tenɔ kɛtɔkpu kɔ. Atɛtɔpu aɖɔ sɛ, ‘Ɔtsyɔ nɛ ko ɛda dzi buya kesukpa, kɛ lɛ sɛ ɛvɛ tɛ ɛdadi alɛ. Ɛkpɛ kɛtɔkpuesi kɔ wɔ ɛtɛ ba na ba.’
19Abhlatɔ aɖɔ asɛ, ‘Ɔtsɔtsiɔ̃ ɛda dzi banɔɛtsyɔɛ tsɛeti kɔ buya dɛdɛ klɛ ɛlɛ kɛdzo abha vɛ sɛ tɛ ɛda di balɛ kɛxwɛ wuwa. Ɛkpɛ kɛtɔkpuesi.’
20“Kanake abhlatɔ tsyɛ aɖɔ se, ‘Avuvɔ ko mɛ gbanɔ adzɛ so ɛtɛ ba na ba.’
21“Axwɛdɛ nɛ etsodzi aba klɛ etsre yɛ apalete ebuia nɛ. Ɔkɛlɛ bupa nɛ elete nɛ amɔ obulo klɛ akpɛ yɛ axwɛdɛ nɛ asɛ, ‘Koeyi ɔvɛ zia tɛ ɔdo di edzo nɛabha anɛ buvude edzo nɛ mɛ tɛ ɔgbanɔ betsutsuni, bagɛ buga ma balɛ shu, aŋhupupu elete nɛ bagɛ ba ta na ga.’
22“ ‘Apalete,’ axwɛdɛ nɛ aɖɔsɛ, ‘kɛxwɛ nɛ gɛ ɔkpɛ mɛ kɛ wa, pɔ ɛzakɔ ka lɛ.’
23“Ɔkɛlɛ apalete nɛ etsre axwɛdɛ nɛ asɛ, ‘Koeyi ɔvɛ edzo nɛabha anɛ ɛma edzo nɛ mɛ tɛ ɔkɔ la ba sɛ tɛ bupa nɛ mɛ yuku. 24Itsre nɔ sɛ, banɔ nɛ gɛ beklu nɛ ɔmayɛ kanyaka atɛ be mini mɛdɔŋɛŋa ne di.’ ”
Adɔkpasɛ Yɛ Kedziŋɛŋa
25Banɔɛza gelee aba ga kidzo nɛ Yesu, klɛ etsyina tɔ alɛ gɛ aɖɔ sɛ: 26Onugɛ anɔ teli aba mɛ ɔkɔ klɛ adɛ shɛnahwɛ yɛ aka nɛ ye ni, yɛedzini nɛ yɛeyialɛ, yɛadzyalɛ nɛ ya adalɛ—ee, yɛnahwɛ tsyɛ kpã—atɛ bana mɛ adɔkpasɛ edzi. 27Klɛ anɔnyanɔ gɛ edi tuku yɛ butsiosi klɛ atɔnɛ mɛ atɛ bana mɛ adɔkpasɛ dzi.
28Kɛbɛlɛmɛ sɛ wunɔ mayi teli apɛɛ asɛ tɛ edzu buvuɖɛɖama. Atɛ baza kesi tɛ edi sɛ ehoetashɛ̃ aba yɛkɔ edzu buvuɖɛɖama nɛ nɔ? 29Alasɛ onugɛ akpɛ bulɛ dzudzu esi klɛ edi dzu lɛ beke, banɔnyanɔ gɛ amɔ lɛ ba ba mɔɛ̃ yɛ, 30ba ɖɔ sɛ, ‘Anyɛ anɛ akpɛ buvuɖɛɖama dzudzu esi pɔ adɛ na bulɛ dzu beke.’
31Kɛba kɛlɛ mɛ sɛ ekusi teli apɛɛ asɛ tɛ ayikɔ keyu nɛ yɛ ekusi glɔ shu. Atá za kesi eputɔnɔ edi asɛ yɛ banɔ akpã lɔfɔ aba na keyu ta nɛ ekusi bhla nɛ banɔ akpã afɛtabha? 32Onugɛ amɔ sɛ atɛ bana, aba kpɛ banɔ nɛ ekusi bhla nɛ ɔkɔ nɛ kibelɛlɛ nɛ gɛ ba kalɛ odzroɖokɔ klɛ be bɛ bisi ishuyɛyɔɛ dzo. 33Nɛ kidzolɛlɛ nɛabha, wunɔ mayɛ nɔ nɛ gɛ adɛ shɛnahwɛ kɛdɔnyɛdɔ gɛ kɛ lɛahwɛ nɛ shu, etibe dzi mɛ adɔkpasɛ.
34“Bumɔɛ pɛ̃, pɔ onugɛ bu lɛla bulɛ ɔdzyɛ, kɛlɛ bu babhɛtɛ gɛ bu zia zã ɔdzyɛ? 35Budɛ pɛ̃ kɔ kesukpa, pɛnɔ gɛ ba ba yɛkɔ akpɛ kɛdɔ ɖɛɖa, ba ba yɛkɔ lɛ abalɛ.
“Anɔ gɛ batɔ lɛ yɛ ahwɛ sɛ tɛ enuu, kɔ yɛ enu.”
Currently Selected:
Luka 14: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
