Yohanɛsɛ 7
7
Yesu Avɛ Kiwui Ŋɛŋa Kagbaesi
1Kɛlɛlɛ nɛede Yesu avɛ ada nyɔ nɛ Galelia, yɛ tɛpɛpɛɛ kɛlɛ nu sɛ tɛ ashɛ̃ nɛ Yuɖea alasɛ Yuɖanɛ be po sɛ tɛ be yi yɛ. 2Pɔ gɛ Yuɖanɛ Kagbaesi kiwui Ŋɛŋa nɛ tsobunɔ, 3Yesu yɛ adzyalɛ nɛ tsre yɛ asɛ, “Wɔ alasɛ tɛ ɔshɛ nɛ ɔkɛnɛ ɔvɛ Yuɖea, sɛ tɛ wɔ badɔkpasɛ ba mɔ wɔ ebuiyinanɔ nɛ gɛ ɔbhɛtɛ. 4Anɔ gɛ apɛɛ asɛ tɛ banɔ be ti yɛ kɛxwɛ wuwa eti kpu. Kɛbelɛlɛ nɛ gɛ ɔbhɛtɛ ebuianɛ, yɛkɔ wɔshu ɔkasɛ kanɔ.” 5Alasɛ yɛ adzyalɛ nahwɛ tsyɛ ba dɛ yɛkɛ yɛabhaŋa.
6Kɛlɛso Yesu etsre alɛ asɛ, “Kibe dzyɔgo kɔ mɛ ka ba, kɔ nɔ kibenyɛbe nu kibe dzyɔgo. 7Kanɔ ketibe gu nɔ, pɔ ke gu mɛ alasɛ itsre kanɔ nɛ sɛ ebui nɛ gɛ ka bhɛtɛ le nu ezizi. 8Wunɔ nɔ vɛ kiwui nɛ ɔŋa kɔ. Mɛ ɛtɛ vɛ kiwuiŋɛŋa nɛ mɛ, alasɛ kibe dzyɔgo ka na kɔ mɛ.” 9Gɛ aɖɔ kibui nɛ etsre alɛ beke, awɔ Galelia. 10Nɛlɛmɛ nɛ kɛlɛede gɛ yɛ adzyalɛ nɛ ashɛ̃ avɛ kiwui nɛ mɛ, ye tsyɛ aba vɛ, anɛ sɛ tɛ ebu shu akasɛ, pɔ nɛ tɛkpukpuɛ mɛ. 11Nɛ kiwui nɛ mɛ Yuɖanɛ bevu awɔ̃hu di sɛ ba ba mɔ yɛ klɛ bè bisi asɛ, “Fakɔ anyɛa lɛ na lɛ?”
12Nɛ banɔɛza nɛ shi kaɖɔ hunihuni eyi denɔ yɛ shu. Beteli aɖɔ sɛ, “Enu anɔ dzyɔgo.”
Babhlatɔ tsyɛ asɛ, “Owo, awɔɛ banɔ.” 13Pɔ anɔnyanɔ ataɖɔ kibui nɛ nɛ yɛ shu sɛ tɛ kɛ yi, alasɛ besi Yuɖanɛ nɛ fu.
Yesu Akasɛdɔ Nɛ Kiwuiŋɛŋa Nɛ Mɛ
14Kiwuiŋɛŋa nɛ ku kɛlɛ shitɛbha flogo gɛ Yesu ewu avɛ kpayavu nɛ mɛ klɛ adakpɛ kɛdɔkɛkasɛ esi. 15Kɛbhɛtɛ Yuɖanɛ ne bi klɛ bebisi asɛ, “Kɛlɛ anyɛanɛ eti ebuianɛ gɛ adɛ kpasɛ dɔ?”
16Yesu ebuilɛnu asɛ, “Mɛ dɔ kɛkasɛ nɛ di de mɛnahwɛ ɔkɔ. Kɛde anɔ nɛ gɛ akpɛ mɛ nɛ ɔkɔ. 17Onugɛ anɔ teli apɛɛ asɛ tɛ abhɛtɛ Kpaya tɛpɛpɛɛ, aba pɛa sɛ tɛ eti asɛ mɛ̀ kɛdɔkɛkasɛ nɛ de Kpaya kɔ, pɛnɔɔ kɛ nu sɛ mɛ nahwɛ kaɖɔ mɛ ɖɔ. 18Anɔ nɛ gɛ aɖɔaɖɔ nɛ yɛ nahwɛshu ahwɛ apɛɛ tɛgbɛgbla kɔ ishu, pɔ anɔ gɛ awa kɛxwɛ kɔ agɛ akpɛ yɛ, sɛ tɛ akpɛ yɛnyi nɛabha, enu anɔ gɛ aɖɔ kibui gbɛagba, kibuinyɛbui dɛ zi nɛ yɛ shu. 19Ganɛ Mose yɛ akɔ nɔ ɛshã? Pɔ anɔ Terikpo tsyɛ atabhɛtɛ atrɔ ɔshã nɛabha. Kideso gɛ nɔ pɛɛ sɛ tɛ no yi mɛ?”
20Banɔeza baɖɔ sɛ, “ɔfufɔɛzizi lɔ kpasɛ wɔ mɛ.” “Ane yɛ apɛɛ asɛ tɛ eyi wɔ?”
21Yesu etsre alɛ asɛ, “Ɛbhɛtɛ kibuiyinanɔ tirikpo, klɛ kɛ bhɛtɛ nɔ petee bi. 22Pɔ gɛ Mose akɔ nɔ ɔshã sɛ tɛ no bhui bunyɛnyɛ (kɛlɛlɛmɛ sɛ anɛ Mose yɛ akpɛ ɛshã, pɔ wunɔ bakashishe balɛ kpɛ lɛesi), nɔ bhui bunyɛnyɛ kɔ anuvɔ nɛ Kimoene wui nɛabha. 23Ɔtsɔnɛ onugɛ nɔ na bunyɛnyɛ bhui kɔ anuvɔ nɛ Kimoene wui nɛabha so tɛ nɔ tɛta Mose ɔshã nɛesi, kideso gɛ nɔ mɔ oblo nɛ mɛ shu sɛ ebu bunya nɛ anɔ petee shu nɛ kimoene wui nɛabha? 24Nɔ zɛkɔlɔ anɔamɛ kebhui kuklu, klɛ tɛ nɔ klu kibui dzyudzyɔ.”
Yesu Yɛenu Kristo?
25Nɛ kibuilɛlɛ nɛshu Yerusalɛm banɔ teli be tenɔ bisi asɛ, “Anɛ anyɛa nɛ ba pɛɛ se tɛ lɛ yi? 26Yɛ eli ɔkɛ̃ naa, gɛ aɖɔaɖɔ nɛ banɔ nɛ shia, klɛ ba ta ɖɔ kibuinyɛbui akpɛ yɛ ɔkɔ. Bagɛ ba ŋɛabha nɛ ti bhui lɛ mɛ sɛ yɛ enu Kristo? 27Pɔ bu nyi ɔkɔnɔ gɛ anyɛa ede na, kibelɛlɛ gɛ Kristo aba, anɔnyanɔ eti be ti ɔkɔnɔ nɛ gɛ ede.”
28Kɛlɛ Yesu eke tsri kɛdɔkɛkasɛ nɛabha nɛ kpayavu oxogokɔ, akpɛ ogugu gɛganɛɛ asɛ, “Ee, nɔ nyi mɛ, klɛ nɔ nyi ɔkɛlɛ gɛ ide. Ɛma ɔkɛnɛ nɛ mɛnahwɛ shuahwɛ, pɔ anɔ nɛ gɛ akpɛ mɛ yɛ nu gbɛagba. Nɔ ti nyi yɛ, 29pɔ inyi yɛ alasɛ yɛ ɔkɔ mɛ de klɛ yɛ akpɛ mɛ.”
30Nɛ kibuilɛlɛ nɛshu ba pɛɛ sɛ tɛ bevu yɛ, pɔ anɔnyanɔ adɛ trɔ ɔhwɛ nɛ yɛ abha, alasɛ yɛ be ka na. 31Tsyɛ, banɔ gelee ba za yɛkɛ yɛabhaŋa. Ba ɖɔ asɛ, “Kɛbenɔ nɛgɛ Kristo aba, aba bhɛtɛ ebuiyinɔanɔ dɔ dɛ anyɛa nɛ?”
32Farisianɛ benu ebui nɛ di gɛ banɔ nɛ aɖɔ hunihuni denɔ yɛ shu. Ɔkɛlɛ kpayazakɔanɔ gbla anɛ Farisianɛ na kpɛ kpayavu bepupo sɛ tɛ bede vu yɛ. 33Yesu etsre alɛ sɛ, “Ɛlɛ wunɔ bha kɔ kibe kplita ko, klɛ ɛba tsodzi vɛ agɛ akpɛ mɛ nɔ ɔkɔ. 34Nɔ bɔ pɛɛ mɛ, pɔ nɔ tɛ bɔ mɔ mɛ; klɛ ɔkɛlɛ gɛ ɛlɛ, nɔ tɛ bɔna ɔkɛlɛ ba.”
35Yuɖanɛ be bisi balɛ ɔhaglɔ asɛ, “Fakɔ anyɛa nɛ atrɔ sɛ tɛ avɛ gɛ bɔ tɛ ba mɔ yɛ? Pɛnɔ aba vɛ ɔkɛlɛ gɛ bulɔ banɔ da pɔɛhle ku Helanɛ nɛshi, gɛ ba kasɛ Hela bunuhu? 36Kɛde lɛ kasɛ gɛ aɖɔ sɛ, ‘Nɔ bɔ pɛɛ mɛ, pɔ nɔ tɛ bɔ mɔ mɛ,’ klɛ ‘Ɔkɛlɛ gɛ ɛlɛ, nɔ tɛ bɔna ɔkɛlɛ ba’?”
37Nɛ kiwui gugɔɛ gbɛgbladɛ nɛ kiwuiŋɛŋa nɛ mɛ, Yesu aɖɔ nɛ ogugu asɛ, “Onugɛ oniwɛ̃ ɔta anɔ teli, aba mɛ ɔkɔ tɛ aba wɔɛ̃ buni. 38Anɔ gɛ ayɛkɛ mɛ abhaŋa, abà mɔ kɔ. Klɛ tɛ ɔkɔ yɛ awɔɛ̃ ni, Kpayaeplukpa nɛ ɖɔ sɛ, ɛkpã keni buni, bu ba kpɛ nɛ yɛ mɛ.” 39Kibui nɛ Ɔfufɔɛ shu bui yɛ aɖɔ, bagɛ balɛ ayɛkɛ yɛ abhaŋa, balɛ tɛ yɛkɛ. Ɔdɔtɔnɔ kɛbelɛlɛ ba ka kɔ yɛ Ɔfufɔɛ, kɛlɛbe ba ka kpɛ Yesu nɛabha. 40Yɛ ebuianɛ tɛ nunuɛ mɛ, banɔ teli baɖɔ sɛ, “Kɛgbɛagba anɔa nɛ nu Atɔnu.”
41Babhlatɔ aɖɔ sɛ, “Yɛ nu Kristo.”
Banɔ bhlatɔ tsyɛ asɛ, “Kɛlɛ Kristo ebede Galelia? 42Anɛ buɖɔ kpayaeplukpa nɛ na ɖɔ sɛ Kristo ebede Daviti kɛpatsu mɛ klɛ ede Betlehem, ɔma nɛ mɛ gɛ Daviti aza?” 43Kɛkɔ sɛ banɔ na lɛ edi tabha nɛ ɛhaglɔ shu, nɛ Yesu so. 44Beteli ba pɛɛ sɛ tɛ bevu yɛ, pɔ anɔnyanɔ edi hunɔ yɛ.
Yuɖanɛ Bekusi Nɛ Mayɛkɛmayɛkɛŋa
45Gugɔɛ kpayavu bepupo be tsodzi avɛ kpayaɔzakɔanɔ gbla anɛ Farisianɛ nɔ kɔ, gɛ bebisi bepupo nɛ asɛ, “Kideso gɛ nɔ dɛ gbanɛ yɛ ɔmɛna?” 46“Anɔnyanɔ adɛɖɔ kaɖɔ kɛ bhɛtɛ gɛ anɔa abhɛtɛ, ” bepupo bebuaɖɔ. 47Farisianɛ be bisi balɛ sɛ, “Bu ɖɔ nɔ ɖɔ sɛ awɔɛ nɔ tsye dza?” 48“Nɔ tɛ mɔ sɛ bagɛ baŋɛabha, pɛnɔ Farisianɛ ba yɛkɛ yɛ abhaŋa? 49Ao! Pɔ banɔɛza beti nyi kibuinyɛbui denɔ ɔshã nɛ shu—ba ɖɔ kibui akpɛ alɛ.”
50Nikodemosɛ, anɔ gɛ atɛ dɛ Yesu ɔkɔ oputɔnɔ klɛ agɛ eti dzi balɛ mayɛ teli, ebisi asɛ, 51“Bulɔ ɔshã lɔ tɛ bu anɔ teli pɔ odi, gɛ oputɔnɔ bɛ di nu denɔ yɛ ɔkɔ tɛ benu kɛ gɛ abhɛtɛ?”
52Be bulɛnu sɛ, “Galelia wɔ tsyɛ ode? Di kɛlɛ mɛ, klɛ ɔbɔ mɔ sɛ atɔnu eti de Galelia.” 53Kɛlɛede anɔnyanɔ ashɛ̃ avɛ yɛ nahwɛ ɔma mɛ.
Currently Selected:
Yohanɛsɛ 7: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
