Yohanɛsɛ 1
1
Kibui Nɛ Badzi Ishuidzya
1Nɛ kesikpɛkpɛ Kibui nɛ lɛ, klɛ Kibui nɛ lɛ plɛnɔ Kpaya, klɛ Kibui nɛ kɛlɛ nu Kpaya. 2Aza plɛnɔ Kpaya nɛ kesikpɛkpɛ.
3Ganɔ yɛ abha ba bhɛtɛ kɛdɔnyɛdɔ, yɛ mazɛlɛmɛ ba gɛ ta bhɛtɛ kɛdɔnyɛdɔ gɛ ba bhɛtɛ. 4Yɛ mɛ ɛkpã za, klɛ ɛkpã lɛlɛ ba dzi kifu gɛ deke kɔ banɔ. 5Kifu nɛɛ deke nɛ otumu nɛ mɛ, pɔ otumu nɛ odi nui lɛe si.
6Ɔkɛlɛ anɔ teli ába gɛ yɛ ba kpɛ denɔ Kpaya ɔkɔ, yɛ nyi kɛlɛ dzi Yohanɛsɛ. 7Abá anasɛ ebuimɔɖɔ denɔ kifui lɛlɛ nɛ shu, sɛ tɛ ganɔ yɛ abha banɔ petee ba yɛkɛaŋa. 8Yɛ nahwɛ edinu kifu, yɛ aba anasɛ kibuimɔɖɔ kɔ kifu ko. 9Kifu gbɛagba gɛ kɛ kɔ kifu anɔnyanɔ gɛ aba kanɔ nɛ mɛ.
10Aza kanɔ nɛ mɛ, klɛ kɛbɛlɛmɛ sɛ babhɛtɛ kanɔ nɛ aganɛ yɛ abha, kanɔ nɛ kediti yɛ. 11Aba ɔkɛlɛ gɛ lɔ dzi yɛ nahwɛ ɔkɔ, pɔ yɛ nahwɛ ayɛ ba dɛ yɛkɛ yɛ. 12Pɔ kɔ bagɛ balɛ petee gɛ bayɛkɛ yɛ, kɔ bagɛ ba yɛkɛ yɛ nyi nɛa bha ŋa, akɔ alɛ kidzo sɛ tɛ ba be dzi Kpaya yɛeyialɛ— 13banuvɔ gɛ ba dɛ mɔa lɛ aganɔ tɛmumɔɛ dzo nɛa bha, ɔdɔgɔsɛ ganɔ anɔdzyrame tɛtutrɔ mɛ ɔdɔgɔsɛ adzɛenyine tɛpɛpɛɛ nu, pɔ Kpaya mɛ la mɔa lɛ.
14Kibui nɛ badzi ishuidzya klɛ abhɛtɛ yɛ ɔzakɔ nɛ bulɔɛ mɛ. Bumɔ yɛ ishubhubhui, ishubhubhui Terikpoe lɛlɛ klɛ Ɛlɛ ko, gɛ aba denɔ Aka nɛ ɔkɔ, gɛ eyuku nɛ ɛyamyuyɔ anɛ kɛgba.
15Yohanɛsɛɛ aɖɔaɖɔ denɔ yɛ shu. Akpɛ ogugu, aɖɔ sɛ, “Anyɛ anɛ yɛ bui mɛ ɖɔ, ‘Yɛ agɛ aba nɛ mɛede etri adɛ mɛ alasɛ alɛ flogo gɛ ba mɔ mɛ.’ ” 16Denɔ yɛ ɛyɛmɛyuyɔ nɛna mɛ bulɔ petee bu yɛkɛ tɛyuyula trikpo nɛ aglɔ ede. 17Alasɛ ba kɔ ɔshã ganɔ Mose abha, ɛyɛmɛyuyɔ anɛ̀ kɛgba nɛ ba ganɔ Yesu Kristoa bha. 18Anɔnyanɔ aka mɔ Kpaya edi, pɔ Kpaya Eyi nɛ̀ Terikpo, gɛ alɛ Aka nɛ wã, ye abhɛtɛ sɛ bu ti yɛ.
Yohanɛsɛ Enikpɛ Adɛ Dɛmɛ Asɛ Enu Kristo
19Ɔtsyɔnɛ kɛnɛ kɛlɛ nu Yohanɛsɛ kibuimɔɖɔ kibe lɛlɛ gɛ Yuɖanɛ nɛ Yerusalɛm bakpɛ kpayazakɔ banɔ nɛ̀ Lewi banɔ sɛ be debisi yɛ anɔ nɛ gɛ enu. 20Edi gbe sɛ etebuaɖɔ, pɔ ebuaɖɔ wee sɛ, “Anɛ mɛ nu Kristo.”
21Be bisi yɛ asɛ, “Kɛlɛalɛ ane wɔ onu? Wɔ nu Eliya?”
Aɖɔ sɛ, “Anɛ yɛ mɛ nu.”
“Wɔ nu Atɔnu?”
Ebui lɛ nu asɛ “Oo.”
22Gɔgɔɛ ba ɖɔ sɛ, “Ane wo nu? Kɔ lɔ ishunu bubu tɛ bu yɛkɔ tsodzi ɔvɛnɔ bagɛ bakpɛ lɔ. Kide wɔ ɖɔ denɔ wɔ nahwɛ shu?”
23Yohanɛsɛ aɖɔ tsre alɛ nɛ atɔnu Yezaya ebuiɖuɖɔ, “Mɛ nu olimɛ gɛ lɔ klu nɛ ayakpa sɛ, ‘Nɔ bu kidzo dzyudzyɔ kɔ Apalete.’ ”
24Ɔtsyɔnɛ Farisianɛ teli gɛ ba kpɛ 25be bisi yɛ asɛ, “Kɛlɛ kide so gɛ ɔkpɛ buni onugɛ wɔ odunu Kristo, ɔdɔgɔsɛ Eliya, pɛ Atɔnu?”
26Yohanɛsɛ aɖɔ sɛ, “Mɛ ɛkɛuni nɛ buni, pɔ wunɔɛ mɛ anɔ teli alɛ gɛ nɔ ti nyi. 27Yɛ nu anɔ nɛ gɛ aba ba nɛ mɛede, klɛ yɛ ɔtsrɛklɔ ohui tsyɛ ɛtɛ bana bulɛ.”
28Anɛ petee aba lɛmɛ nɛ́ Betani nɛ Yɔdan kapɛ bhla, ɔkɛlɛ gɛ Yohanɛsɛɛ akpɛni.
Yesu Kpaya Obhoshieyi
29Kiwui bhla nɛ Yohanɛsɛ amɔ Yesu aba yɛ ɔkɔ klɛ aɖɔ sɛ, “Di, Kpaya Obhoshieyi, agɛ yɛ ayɛkɔ kanɔɛmɛ ebuizizi nɛ ashɛ̃nɔ! 30Ye nu agɛ yɛ bui mɛ ɖɔ kibelɛlɛ nɛ sɛ, ‘Anɔ nɛ gɛ àba nɛ mɛede, etriadɛ mɛ alasɛ alɛ flogo gɛ ba mɔ mɛ.’ 31Mɛ nahwɛ ɛdɛ ti yɛ, pɔ kibuinɔ nɛ so gɛ ɛkpɛuni nɛ̀ buni kɛlɛesi kɛlɛ nu sɛ tɛ be bu yɛ akasɛ Izraɛl banɔ.” 32Ɔkɛlɛ Yohanɛsɛ akɔ yɛ kibuimɔɖɔ nɔ asɛ: “Ɛmɔ Ɔfufɔɛ nɛ gɛ lɔ zhi de owũsise anasɛ kitsanɛmɛ azhɔɛ klɛ lɔ wɔ yɛ abha. 33Ɛgɛ ta ti yɛ, ɔdɛsɛ anɔ nɛ gɛ akpɛ mɛ sɛ tɛ ɛkpɛuni kɔ banɔ nɛ buni yɛ tsre mɛ, ‘Anɔ nɛ gɛ nɔ mɔ sɛ Ɔfufɔɛ nɛ zhi ba klɛ lɔ wɔ, yɛ nu agɛ aba kpɛni nɛ̀ Ɔfufɔɛ Dzyɔgo.’ 34Ɛmɔ klɛ ɛmɔɖɔ sɛ yɛe nu Kpaya yɛ Yi.”
Yesu Yɛ Badɔkpasɛ Tutɔpu
35Kiwui bhla Yohanɛsɛ aza za ɔklɛ nɛ̀ yɛ badɔkpasɛ tɛabha. 36Gɛ amɔ Yesu afla, aɖɔ asɛ, “Nodi, Kpaya Obhoshieyi!”
37Gɛ badɔkpasɛ tɛabha benu sɛ aɖɔ kibui nɛ, ba tɔnɔ Yesu. 38Gɛ Yesu etsyina di ɛbha, amɔ sɛ batɔ nɛ yɛ klɛ ebisi alɛ sɛ, “Kide nɔ pɛɛ?”
Ba ɖɔ sɛ, “Rabbi” (kɛlɛesi klɛnu sɛ Adɔkasɛ), “fakɔ wɔ lɛ?”
39Klɛ etsre alɛ sɛ “Ba, klɛ nɔ bɔ mɔ.”
Kɛlɛso ba vɛ klɛ ba da mɔ ɔkɛlɛ gɛ alɛ, klɛ ba za yɛ ɔbha kiwui lɛlɛ. Kɛ za anasɛ ɔwlago ɔɖɔ tɛta tɛlɛ̃.
40Andrɛasɛ, Simɔn Petro ya dzya, gɛ enu banɔ tɛabha nɛ teli gɛ enu kibui nɛ gɛ Yohanɛsɛ aɖɔ klɛ agɛ atɔnɛ Yesu. 41Kibui tɛtɔpu gɛ Andrɛasɛ abhɛtɛ klɛ nu sɛ, tɛ apɛɛ yadzya Simɔn klɛ etsre ye asɛ, “Bu mɔ Mezaya” (ye nu, Kristo). 42Klɛ agbanɛ Simɔn avɛnɔ Yesu.
Yesu edi yɛ klɛ aɖɔ sɛ, “Wɔ nu Simɔn Yohanɛsɛ ye yi. Be be klu wɔ asɛ Kefasɛ” (gɛ, be builɛesi sɛ, Petro).
Yesu Eklu Filipo Anɛ Nataniɛl
43Kiwui bhla nɛ Yesu apɛɛ sɛ tɛ avɛ Galelia. Gɛ amɔ Filipo, aɖɔ etsre yɛ asɛ, “Za mɛede.”
44Filipo, anasɛ Andrɛasɛ anɛ Petro be de ɔma nɛ gɛ be klu asɛ Betaida. 45Filipo amɔ Nataniɛl klɛ etsre yɛ asɛ, “Bu mɔ anɔ gɛ yɛ shu Mose aŋlɔmɛ dɔ nɛ Ɛshã keplukpa nɛ mɛ, klɛ yɛ shu batɔnu tsyɛ aŋlɔmɛ—Yesu ede Nazarɛtɛ, Yosɛfu ye yi anyɛ.”
46Nataniɛl ebisi asɛ, “Nazarɛtɛ! Kibui dzyɔgo tili ba de ɔkɛlɛ?”
Filipo asɛ, “Ba tɛ ɔbo di.”
47Gɛ Yesu amɔ Nataniɛl gɛ etsoaba, aɖɔ nɛ yɛ shu asɛ, “Yɛ nu Izraɛl eyi gbɛagba, kibinyɛbi ma yɛ shu.”
48Nataniɛl ebisi Yesu asɛ, “Kɛlɛ ɔyɛkɔ nyi mɛ?”
Yesu ebuilɛnu asɛ, “Ɛmɔ wɔ kibelɛlɛ gɛ ɔza kabhɔosi nɛesi flogo gɛ Filipo eklu wɔ.”
49Ɔkɛlɛ Nataniɛl ebu aɖɔ sɛ, “Rabbi, wɔ nu Kpaya yɛ Yi, wɔ nu Ekusi nɛ Izraɛl.”
50Yesu aɖɔ asɛ, “Nɔ yɛkɛŋa alasɛ ɛtsre wɔ sɛ, ɛmɔ wɔ nɛ kabhɔosi nɛesi. Ɔbɔ mɔ ebui gbɛgbla dɛ ana.” 51Kɛlɛ azaɖɔ sɛ, “Itsre nɔ kibui gbɛagba sɛ nɔ bɔ mɔ owũsise lɔ bɔ danɛ klɛ Kpaya yɛ baxwɛdɛ ba baza ewu klɛ baza ezhi aba nɛ Anɔdzyrame Yi nɛabha.”
Currently Selected:
Yohanɛsɛ 1: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
