Axwɛwɛwa 24

Kebhui Kuklu Nɛ Felikisi Amɛ

1Nɛ ewi tetie de nɛ Kpayanɔ gbla Ananias ezhi avɛ ede ku Sizeria yɛnɛ yɛ banɔ shishe nɛ teli anɛ ɔshãelete teli gɛ beklua sɛ Tɛtullus, klɛ ba ba yɛkɔ ebui nɛ gɛ ba yɛkɔ nɛ Paolo shu nɛ elu amaŋagbla naa mɛ. 2Kibe lɛ gɛ be klu Paolo nɛ kebhui nɛ mɛ, Tɛtulusɛ ayɛkɔ ebui nɛ gɛ ba yɛkɔ nɛ Paolo shu nɛ elu Amaŋagbla Felikisi amɛ: “Blɔ bɔ lɛ wɔesi nɛ ishu yuyɔm kibe dzidze nɛɛ, wɔ ebui mumɔ putɔnɔ nɛ mɛna tɛtsyitsyina nɛ ɔma nɛ mɛ. 3Ganɔ ɔkɔnyɔkɔ anɛ kidzo nyɛdzoa bha, wɔ amaŋagbla Felikisi, bɔ ɖɔ ebuia nɛ nɛ ahwɛhuhu gelee kɔ wɔ. 4Pɔ tɛ bɔ tɛ kpɛ wɔ bunuhu fanɔ, ɛba pɛ sɛ tɛ ɔtatɔ nɛ lɔ kplita.

5“Bɔ ba mɔ sɛ anyɛa nɛɛ enu anɔ gɛ akpɛ bunuhu, akpɛ ozi nɛ Yuɖanɛ nɛ kishi kana kanɔm petee. Enu otugbanɔ kɔ Nazarɛtɛanɛ ɔshɛ 6klɛ abhɛtɛ sɛ tɛ ezi bulɔ busɔlɛvu nɛ shu; klɛso pɛ be vu yɛ. 7Pɔ Lisias gɛ enu Romanɛ behudugbani akagbla nɛ aba yɛkɛ yɛ tɛgɛganɛ nɛ blɔa hwɛ klɛ ayɛkɔ yɛ akpɛ wɔ ahwɛ sɛ tɛ bagɛ ayɛkɔ ebui nɛ yɛ shu nɛ be bu alɛesi nɛ wɔa mɛ. 8Ganɔ yɛ tɛluluawɔ̃dim wɔnahwɛ obo ti kɛgbɛagba nɛ ebui nɛ petee mɛ gɛ lɔɔ yɛkɔ nɛ yɛ shu.”

9Yuɖanɛ nɛ tsyɛ ba plɛnɔ nɛ ebui nɛ gɛ bayɛkɔ nɛ yɛ shu, sɛ la lɛɛ lɛm.

10Kibe lɛ gɛ amaŋagbla nɛ akɔ yɛ kidzo sɛ aɖɔ kaɖɔ, Paolo ehunu asɛ: “Inyi sɛ agɔ gelee na nɛ gɛ onu ebhuiklu kɔ kɛmadi nɛ; so nɛɛ samem mɛkɔ bu mɛ ishui nɛ nu. 11Obɔna bisi onu klɛ ɔbɔ mɔ sɛ aka fla ewi lɔfɔntabha gɛ ɛba fla vɛ Yerusalɛm kɔ kɛtɔkpuesi kpɛkpɛ kɔ Kpaya. 12Bagɛ ba yɛkɔ kibui nɛ mɛ shu na dɛ mɔ mɛ ihe bui nɛ anɔnyanɔ nɛ busɔlɛvu nɛm, ɔdɔgɔsɛ ixogo banɔɛza kanyaka nɛ oxogokɔevu ɔdɔgɔsɛ nɛ ɔkɔnyɔkɔ nɛ ɔmagbla nɛm. 13Klɛ ba tɛ ba na ebui nɛ petee gɛ ba yɛkɔ nɛ mɛ shu nɛ bunu bu nɛ wɔa mɛ. 14Pɔ nɛɛ, ɛdɛmɛ sɛ ɛklu blɔakalɛ Kpaya anasɛ anɔ gɛ alɛ balɛ kidzo nɛede, gɛ be klua sɛ ɔshɛ. Ɛyɛkɛ kɛbuinyɛbui dia bha ŋa gɛ kɛ lɛ Ɔshã nɛ nu gɛ batɔnu nɛ aŋlɔmɛ, 15klɛ kabha yɛyɛkɛŋa lɛ mɛ ahwɛ nɛ Kpayam anasɛ banɔa nɛ, sɛ tɛlulɔ ba za kɔ banɔ dzyɔgo anɛ atɔkpum gɛganɛ elete. 16Klɛso nɛ kibenyɛbe nɛɛ ɛlɛ nɛ kitem dɛdanɛ nɛ Kpaya anɛ Anɔdzyrame amɛ.

17“Nɛ mɛ maza maza agɔ gelee de, ɛba ba Yerusalɛm sɛ tɛ ɛmɛna manɔa lɛ nɛ kɛdɔkukɔ, kɔ betsyutsyuni tɛ ɛbhɛtɛ ɔfufɔɛ mɛ kɛdɔkukɔ tsyɛ. 18Ɛza ishu bhubhui mɛ onu gɛ ba mɔm nɛ busɔlɛvu nɛ be mɛ bhɛtɛ ana. Banɔɛza kanyaka dɛ za plɛnɔ mɛ, ɔdɔgɔ sɛ ɛda kpɛ onugbu nɛ hunyahunya kanyaka mɛ. 19Pɔ nɛ Yuɖanɛ teli baza gɛ be de Asia kɛdɔ nɛm, gɛ alasɛ tɛ baza ɛkɛ̃ nɛ wɔa mɛ tɛ bamɔ kibui tili aɖɔ nɛ kititi lulɔm nɛ mɛ shu onu pɛ kɛ lɛ ana. 20Ɔdɔgɔsɛ bagɛ ba lɛ ɔkɛ̃ nɛ ba ɖɔ buzizi nɔ nɛ gɛ ba mɔ nɛ mɛ mɛ nɛ kibe lɛ gɛ ili kititi nɛ bebhuiklu na mɛ— 21gɛ odunu sɛ ogugu torikpo ko gɛ ɛkpɛ nɛ balɛ amɛ: ‘Kibui nɛ de anɔ tsitsi nɛ yɛ tɛnyɛnyɛmɛ shu gɛ klɛe kebhui mɛ kpasɛ nɛ wɔa mɛ obo.’ ”

22Ɔkɛlɛ nɛɛ, amaŋagbla Felikisi, gɛ enyi kibuinyɛbui mɔɔ mɔ denɔ Kidzo nɛ shu nɛ dzuahwɛ kebhui nɛa bha vɛvɛ. Klɛ aɖɔ sɛ, “Onu gɛ Lisias gɛ enu akagbla nɛ Yerusalɛm aba tsyɛ,” “Ɛba mɔ kana gɛ ɛba ga nɛ wɔɛ bui.” 23Akɔ sɛ yɛ behudugbani aka edi klɛ ɔkɔ sɛ akpɛ yɛ nɛ tɛpupoesi, pɔ akɔ kidzo nɛ yɛshu kɛbɔɛ sɛ tɛ yɛ ɔbhɛalɛ na mɔ yɛ ɔkɔɛ di.

24Ewi gelee de nɛɛ Felikisi aba ba nɛ yɛedzini Drusilla, gɛ edzi Yuɖadzi. Akɔ le klu Paolo klɛ atatɔ nɛ yɛ kaɖɔ ɖuɖɔ denɔ tɛyɛyɛkɛŋa nɛ Yesu Kristoa bha shu. 25Gɛ Paolo aɖɔ kaɖɔ denɔ tɛzɛzam dzyɔgo, ishua bhaŋɛŋa anɛ kebhui kuklu nɛ ga ba ba, Felikisi esi kifu klɛ aɖɔ asɛ, “Agɛ ɔɖɔa na bɔ gbɔ! Ɔbɔ shɛ faã. Kɛɛ ba dɔ kɔm tsyɛ, ɛba kpɛ anɔ nɛ wɔesi.” 26Nɛ kibe lɛ nɛm ke nɛɛ eedi kidzoenu sɛ Paolo aba kɔ yɛ ɔdzyɔ, so ebee klu yɛ zia zia klɛ aɖɔ kaɖɔ nɛ yɛ.

27Gɛ agɔ tabha aba fla, Pɔsiɔs Festusɛ aba yɛkɛ Felikisi ɔzakɔ, pɔ gɛ Felikisi apɛa sɛ tɛ atrɔ ahwɛ nɛ Paolo eshutukubui so, ashɛ̃nahwɛ yɛ shu akpɛ buvu.

Currently Selected:

Axwɛwɛwa 24: tcd

Highlight

Copy