Axwɛwɛwa 19

Paolo Nɛ Efesos

1Nɛ kibe lɛ nɛ gɛ Apollosɛ aza Kɔrintio, Paolo xũ na da ga kɛmɛ mɛ kidzo klɛ ede ku Efeso. Ɛkɛlɛ nɛ atsyanɔ badɔkpasɛ teli 2klɛ ebisi ala sɛ, “Nɔ yɛkɛ Ɔfufɔɛ Dzyɔgo gɛ nɔ yɛkɛ kibui nɛa bha ɔŋa nɛ xã?”

Be bu klɛ nu asɛ, “Owo, bu ka nu di tsyɛ sɛ Ɔfufɔɛ Dzyɔgo ɔlɛ.”

3Klɛso Paolo ebisi asɛ, “Klɛ kide bunikpɛkpɛ nɔ yɛkɛ?”

Be bu klɛ nu asɛ, “Yohanɛsɛ bunikpɛkpɛ lɔ yɛkɛ.”

4Paolo aɖɔ sɛ, “Yohanɛsɛ bunikpɛkpɛ nɛ nu kitem tsyitsyina yɛ. Etsre banɔ na sɛ ba yɛkɛ agɛ yɛa ba nɛ yɛe de nɛa bha aŋa, yɛ enu Yesu.” 5Gɛ be nu kana nɛ, ba kɔ la kpɛ buni nɛ akɔa lɛ nɛ Apalete Yesu kinyim. 6Kibe lɛ gɛ Paolo atrɔ ahwɛ nɛ balɛa bha nɛ, Ɔfufɔɛ Dzyɔgo nɛ ɔba balɛa bha, klɛ baɖɔ kaɖɔ nɛ anɛkɛvuvɔ mɛ klɛ ba ɖɔ ebui tsyɛ elu. 7Banyɛ ansɛ kɛfɔntɛabha balɛ aza ɔklɛ.

8Paolo ebe tsoku oxogokɔvu nɛ mɛ klɛ aɖɔ kaɖɔ nɛ bugɛganɛ mɛ nɛ ɔkɛlɛ wele tɛata, atsya ebui mɛ ebu nɛ Kpaya bukusiɔŋakɔ nɛ shu. 9Pɔ be teli be dzi banɔ gɛ ba dɛ kpɛ abhla kɔ kibui; ba dɛ dɛmɛ ayɛkɛ kibui klɛ nɛ anɔnyanɔ amɛ nɛɛ ba gba kɛdɔ ada klɛ Kidzo. Klɛso nɛ Paolo ashɛ̃ alɔa lɛ. Agbanɔ badɔkpasɛ nɛ aplɛnɔ ishu klɛ aga ebuim nɛ balɛ kiwinyɛwi nɛ kɛdɔ kɛkasɛvu nɛm nɛ Tirannus. 10Kɛdɔ kɛkasɛ nɛ vɛ klɛa bha agɔ tabha nyɔɔ, sɛ tɛ Yuɖanɛ anɛ Grikanɛ nɛ gɛ balɛ Asia kɛdɔ nɛ mɛ tsyɛ be nu Apalete nɛ kibui.

11Kpaya abhɛtɛ ebui gɛ ebhuso anɔ dzyɔ gelee aganɔ Paolo kabha, 12gɛ la kɔ sɛ banɔ amɛavulɔ anɛ etemɛpɔtɛ gɛ hunɔ yɛ nɛ tsyɛ dzi kɛdɔ gɛ hunɔ banyɛnya ko pɛ balɛ banya na shɛ klɛ ɛfufɔɛkpã koeyi nɛ balɛm.

13Yuɖanɛ teli gɛ ba ga fla sɛ ba kɛka ɛfufɔɛkpã ebu na pɛ sɛ tɛ be ze klu Apalete Yesu kinyi akpɛ ba gɛ ɛfufɔɛkpã tsri alɛa bha. Klɛ ba ɖɔ sɛ, “Nɛ Yesu nɛ gɛ yɛ kinyim Paolo aɖɔ Kpaya kibui, ɛtsre wɔ sɛ fla okoeyi.” 14Seva gɛ enu Yuɖanɛ Kpayanɔ yɛeyialɛ tiegene teli bala wa kɛxwɛ lɛ. 15Kiwi nɛ tili nɛ, ɔfufɔɛkpã nɛ ɔbɔ dɛmɛ ɔkɔa lɛ ɔsɛ, “Yesu nɛ inyi yɛ, klɛ inyi kibui denɔ Paolo shu, pɔ wɔ nu ane?” 16Klɛ anɔ nɛ gɛ yɛa bha ɔfufɔɛkpã nɛ otsri nɛ alɔ dɔ balɛa bha klɛ aŋa balɛ peteea bha. Anɔ nɛ etua lɛ tɛtutu gɛ kɛ kɔ sɛ be si ekoeyi nɛ bupa nɛ mɛ zholiaa anɛ dzyosu nɛ balɛ shu.

17Gɛ Yuɖanɛ anɛ Grikanɛ nɛ ga lɛ Efesos nɛ be nu kibui nɛɛ, kifu kua lɛ, so nɛ Apalete Yesu kinyi ba ba kpɛ lɛ nɛ kabha. 18Banɔ gelee gɛ baba yɛkɛ aŋa na ba danɛ ishum nɛ balɛ buzizi nɛshu ɔtsɔlɛ. 19Banɔ tɛkpikpem tili gɛ be dzi behuini ga ba yalɛ balɛ ihui ɛkpɛtɛ nɛ aba pɔɛ nɛ ɔtɔ. Kɛdɔ nɛ gɛ ba pɔɛ nɛ kedziŋɛŋa ganɛ kɛbɔɛ nɛ kɛlɛbe nɛm. Kɔba lɛlɛ nɛ terikpo aba na kiwi zɛzɛ kɛxwɛ wɛwa kɛbhɛ. 20Ganɔ kidzoe nɛa bha nɛ Apalete nɛ kibui nɛ ba yɛkɛ kanɔ nɛm klɛ kishe nɛ kemi.

21Nɛ anɛ nɛ petee tɛbɛba kede nɛɛ, Paolo aba trɔa sɛ aba shɛ avɛ Yerusalɛm aganɔ Makedonia anɛ Atsyaia. Klɛ aɖɔ sɛ, “Onu gɛ ɛda ku ɔklɛ nɛɛ, alasɛ tɛ ɛvɛ Roma tsyɛ.” 22Akpɛ Timotio anɛ Erastusɛ gɛ enu yɛ bapɛplɛnɔ nɛ asɛsɛ Makedonia, nɛ kibe lɛ nɛ mɛ gɛ yɛ awɔ Asis kɛdɔ nɛm kibe dzidze bɔɛ.

Kɛdɔzizi Igugu Nɛ Efesos

23Nɛ kibe lɛ nɛm nɛ tɛtutɔtɔ tili baba denɔ Apalete nɛ Kidzo shu. 24Anyɛ teli gɛ be klua sɛ Demetriusɛ gɛ enu sɛkafufuadɔnɔ, klɛ aba yɛkɔ yɛ edzu sɛkafufu ibuidi bevu nɛ Artemisɛ ɔma nɛm klɛ kidi dzi kɛxwɛ bhli kɔ ba ga wa axwɛa lɛlɛ nɛdi. 25Ekulu banɔ nɛ exogo, aplɛnɔ baxwɛwa nɛ gɛ akpɛ ɔkɔ nɛ budzigɛga lɛlɛ nɛ di, klɛ asɛ: “Banyɛ mɔ, no nyi ɔsɛ bu mɔ kɔba mɔmɔ denɔ kɛxwɛ nɛ mɛ. 26Klɛ nɔ mɔ no nu kana gɛ anɔa nɛ gɛ enu Paolo atɛ wɛɛ klɛ etsyina banɔ gelee kɛtɔkpum nɛ ɔkɛ̃ nɛ Efesos ɔma nɛm ɔyɛkɔ kana Asia kɛdɔ nɛm petee. Aɖɔa sɛ nɛ bakpaya nɛ gɛ banɔ abhɔ nɛ ahwɛ be di nu bakpaya dzyɔgo nɛ kapɛnyapɛ mɛ. 27Ganɛ blɔ kedzi tɛzizi shu ko kifu lɛ, pɔ ɔyɛkɔ plɛnɔ nɛ obudidzɛ gbla Artemisɛ busɔlɛvu nɛ shu tsyɛ ba zi, klɛ nɛ obudidzɛ nɛ nahwɛ gɛ ba kpɛ kɛtɔkpue si kɔ nɛ Asia nɛ kanɔm petee ishubhubhui gbɛgbla nɛ ba xule.”

28Gɛ be nua na nɛ, ba mɔ oblo zizi anɛ igugu kpɛkpɛ sɛ: “Artemisɛ nɛ Efesosɛ ɔgbɛgbla oo!” 29Edidze ko ɔmagbla nɛ mɛ oyuku nɛ igugu kpɛkpɛ. Edi dze klɛ be vu Gaiusɛ anɛ Aristatsyusɛ, gɛ nu Paolo yɛ beshopo denɔ Makedonia, klɛ be si eku buwɔfu ɔwɔkɔgbla ansɛ anɔ terikpo. 30Paolo apɛa sɛ tɛ awɛ̃ nɛ banɔɛza nɛ amɛ, pɔ badɔkpasɛ na dɛ kɔ yɛ kidzo. 31Otugba banɔ nɛ teli tsyɛ nɛ kɛma lɛlɛ nɛm gɛ benu Paolo yɛ ɔbhɛa lɛ na kla yɛ ɔsɔ aakɔ yɛ kɛtɔkpu sɛ atɛ pɛɛ sɛsɛ asɛ etsoku buwɔfuvu nɛm.

32Banɔ oxogokɔ nɛ petee obo futsu: Beteli bakpɛ kibui trikpo igugu, beteli kɛbhlatɔ. Banɔ gelee be ti nyi kibui nɔ nɛ so pɛ beli ɔkɛlɛ. 33Yuɖanɛ nɛ tii Alɛxanda akpɛ otugba, klɛ banɔɛza nɛ tili kpɛ ogugu klɛ be tsre yɛ kibui nɔ nɛ gɛ aba ɖɔ. Klɛ Akasɛ alɛ ahwɛ sɛ badɔfɔɔ̃ akɔɛ tɛ awɛlakɛshu nɛ banɔ nɛ amɛ. 34Pɔ gɛ bamɔ sɛ anɔ nɛ enu Yuɖaeyi nɛɛ, balɛ petee ba kpɛ igugu nɛ ketsu mɛ ɔkɔ nanɔ ɛɖatɛta tɛbha sɛ: “Artemisɛ nɛ Efesosɛ ɔgbɛgbla oo!”

35Ɔmagbla nɛ otugbanɔ nɛ ebe vu banɔɛza nɛ ibue klɛ aɖɔsɛ: “Efesosanɛ mɔ, sɛ kanɔ petee kenyia sɛ Efesos ɔmagla ɔlɛ di Artemisɛ busɔlɛvu anɛ bulɛ tɛzɛza nɛm gɛ wɔlɛ denɔ owũsise nɛa bha? 36Klɛso nɛ, nɛ kibe lɛm gɛ ba tɛ ba na ebuia nɛ otro kɔ nɛɛ, alasɛ tɛ nɔ dɔ sɛ̃ɛ tɛ nɔ tɛ nawɔ̃ ɔbhɛtɛ kibuinyɛbui. 37Nɔ gbanɔ banɔa nɛ ɔmɛna ɔkɛ̃ nɛ kibe lɛ gɛ beke zru lɔ busɔlɛvu ɔdɔgɔsɛ ba tɛ ɖɔ kibusobui kanyaka nɛ bulɔ obudidzɛ nɛ shu. 38Nɛ klɛ shu so, onu gɛ Demetrius anɛ yɛ baxwɛwa na bhɛtɛ buzizi nɛ anɔ teli shu, bubhuioklukɔ nɛ danɛ dzi klɛ bagɛ ba ŋa ɔma nɛabha na lɛ. Ba ba na kibui yɛkɔ nɛ anɔ shu. 39Onu gɛ kibui tili kɛka lɛ gɛ nɔ pɛɛ sɛ tɛ no bu oyinɔ nɛɛ, alasɛ tɛ ba nyɛna lɛ edi nɛ ɔshã oxogokɔ. 40Ansɛ gɛ kidzi nɛɛ, bu kpasɛ kifum sɛ ba ba yɛkɔ kibui nɛ bulɔ shu nɛ buhunya hunya akpɛ obo nɛ ebui nɛ so. Nɛ kibui nɛ mɛ bu tɛ ba na ishunu bu, alasɛ kibuinyɛbui ma gɛ bu ba yɛkɔ kasɛ sɛ klɛso pɛ bu bhɛtɛ buzizi nɛ.” 41Nɛ kibui nɛede nɛ akpɛ ɔzakɔ nɛ dzo.

Currently Selected:

Axwɛwɛwa 19: tcd

Highlight

Copy