Axwɛwɛwa 14

Paolo Anɛ Banabasɛ Nɛ Ikonio

1Nɛ Ikonio nɛɛ anasɛ gɛ kɛɛ za nɛɛ Paolo nɛ Banabas eze de tsoku Yuɖanɛ oxogokɔvu nɛm. Ɔkɛlɛ ba ɖɔ kaɖɔ klɛ bakasɛ kɛdɔ mɔɔ mɔ gɛ kɛ kɔ sɛ banɔ tɛkɛklam kpi gɛ be nu Yuɖanɛ anɛ bagɛ be di nu Yuɖanɛ ba yɛkɛ aŋa. 2Pɔ Yuɖanɛ nɛ gɛ adɛ pɛa sɛ tɛ ba yɛkɛ aŋa nɛ de feke bagɛ edi nu Yuɖanɛ nɛ edzu klɛ zi kɛtɔkpum kɔa lɛ sɛ tɛ ba lɔ kititi nɛ bagɛ ayɛkɛ aŋa nɛ shu. 3So Paolo anɛ Banabas be zi kibe gelee nɛ ɔkɛlɛ, klɛ ba ɖɔ kaɖɔ nɛ kitekpɛkpɛ kɔ Apalete, gɛ atrɔ kɛklãgbu nɛ yɛ ɛyamyuyɔ kibui nɛa bha ganɔ balɛ kɛdɔmumɔ anɛ ebuiyiyinɔ anɔ kɛdɔmumɔ nɛ gɛ ba bhɛtɛ nɛm. 4Banɔ nɛ ɔmagbla nɛm ba ma, be teli atrɔ Yuɖanɛ nɛa bha, ba gɔgɔɛ na trɔ banɔkpɛkpɛ nɛa bha. 5Tɛnyɛnya za bagɛ di nu Yuɖanɛ anɛ Yuɖanɛ nɛ mɛ nɛ tɛkpukpum, ɔyɛkɔ plɛnɔ bagɛ ba gbanɔa lɛ, sɛ tɛ ba nyãgba nɛ balɛ tɛ be hua lɛ aklãgbu. 6Pɔ be be ti klɛ be si ashɛ̃ avɛ Likaonianɛ ɛmagbla nɛm gɛ nu Listra anɛ Dɛbi anɛ busukpa nɛ gɛ kana kibe lɛ nɛm, 7nɛ ɔkɛlɛ gɛ ba vɛ kibui dzyɔgo nɛ tɛɖuɖɔa bha.

Banabasɛ Anɛ Paolo Ba Vɛ Listra Nɛ Dɛbi

8Nɛ Listra anyɛ teli aza ɔklɛ gɛ butsrukpɔ nɛ gba kɔɛ, gɛ enu kɛkpata denɔ ɔmɔkɔ klɛ aka ga edi. 9Anyɛ nɛ ataa tɔ nɛ kibui nɛ gɛ Paolo aaɖɔ. Paolo evu awɔ̃hũ nɛ yɛ, klɛ amɔ sɛ kabhaŋɛŋa kalɛ kɛkpata nɛ ahwɛ sɛ tɛ be beke yɛ bunya 10Paolo ekului asɛ, “Lɔza wɔ butsrukpɔa bha!” Nɛ kɛlɛ nu nɛɛ, anyɛ nɛ alɔtɛa dɔ klɛ akpaa ga.

11Gɛ banɔɛza na mɔ kɛdɔnɔ nɛ gɛ Paolo abhɛtɛ nɛɛ, ba kpɛ ogugu nɛ Likaonianɛ bunuhu mɛ asɛ, “Ibuidi nɛ zhi ba tɔnɔ lɔ nɛ anɔdzyrame tɛzɛzam!” 12Banabasɛ nɛɛ be kulua sɛ Zeusɛ, klɛ Paolo nɛɛ be kulua sɛ Hɛmisɛ alasɛ yɛenu kaɖɔekusi. 13Zeusɛ kpayanɔ, gɛ yɛ busɔlɛvu nɛ lɛ ɔmagbla nɛede ko, nɛ amɛna banɛtsyɔɛnye anɛ efufuaga nɛ ɔmagbla nɛ budunu alasɛ yɛ nɛ banɔɛza nɛ ba pɛɛ kɛdɔkukɔ kɔa lɛ.

14Pɔ gɛ Banabas anɛ Paolo be nui bui nɛɛ, ba tswɛ balɛ bawi nɛ ishu nɛ obulom klɛ be si eku banɔɛza nɛm nɛ igugu kpɛkpɛ sɛ: 15“Banɔ mɔ, kide so pɛ nɔ bhɛtɛ kana? Bulɔ tsyɛ banɔdzyrame ko lɔ nu, ansɛ wɔnɔa na. Bɔɔ mɛna nɔ kibui dzyɔgo, butsre nɔ sɛ no tsyina kede ɔkpɛ ebuia nɛdi gɛ la ma kibuinyɛbuim nɛ tɛbhɛbhɛ vɛnɔ Kpaya lulu nɛ ɔkɔ, gɛ abhɛtɛ owũsise anɛ kesukpa anɛ aƒu anɛ kɛdɔnyɛdɔ gɛ kpasɛ alɛ mɛ. 16Nɛ kibe nɛ gɛ ba fla nɛ mɛ, Kpaya akɔ sɛ amadigbla nɛ petee ayɛkɔ alɛ edzo. 17Pɔ adɛ shɛ̃nahwɛ ishu shu elu sɛ ba tɛ ba mɔ kibui aɖɔ nɛ yɛ shu: Ebu yɛ ɛyamyuyɔ akasɛ ganɔ subha kukɔ nɔ mɛ denɔ owũsise anɛ buyamɛdɔ nɛ kɛlɛ be dzyɔgo mɛ, akɔ nɔ kɛdɔŋɛŋa gelee klɛ eyuku wɔnɔ idzyim nɛ same.” 18Nɛ ebuiɖuɖɔa nɛm tsyɛ, kɛ gɛganɛ kɔa lɛ sɛ tɛ be xe banɔɛza nɛ kidzo kɔ kɛdɔ yɛyɛkɔ kɔ Banabasɛ anɛ Paolo.

19Ɔkɛlɛ Yuɖanɛ teli de Antiɔkɛ anɛ Ikonio aba klɛ ba ba wɛ̃ banɔɛza nɛ etsyina. Be hu Paolo aklãgbu klɛ be he yɛ ebu avɛnɔ ɔmagbla nɛede, be di asɛ etsi. 20Pɔ klɛede gɛ badɔkpasɛ nɛ ba kana yɛ tsya nɛɛ, evu alɔ klɛ etsodzi avɛ ede tsoku ɔmagbla nɛm. Kiwi bhla nɛɛ yɛ nɛ Banabasɛ ashɛ̃ avɛ Dɛbi.

Banɔkpɛkpɛ Nɛ Tɛtsutsodzi Vɛ Antiɔkɛ Nɛ Siria

21Baɖɔ kibui dzyɔgo nɛ ɔmagbla lɛ nɛm klɛ badɔkpasɛ nɛ tɛkpikpem gelee. Ɔkɛlɛ be tsodzi avɛ Listra, Ikonio nɛ Antiɔkɛ, 22nɛ bugɛganɛ kpɛkpɛ badɔkpasɛ anɛ kemi zɛza sɛ tɛ ba nyɛna kabhayɛyɛkɛŋa nɛm nɛ kɛgba. Baɖɔ sɛ, “Kɛ lɛ sɛ tɛ bu ga ebui gɛganɛ mɛ fla sɛ tɛ bu tsoku Kpaya bukusi ɔŋakɔ nɛm.” 23Paolo anɛ Banabasɛ edzu beshishe nɛ busɔlɛɔha ɔkanyaka nu klɛ, ɔyɛkɔ plɛnɔ onugbunyɛnya anɛ kpayakuklum, ayɛkɔa lɛ akpɛ ahwɛ kɔ Apalete, gɛ yɛabha la yɛkɛ aŋa. 24Gɛ ba ga koeyi nɛ Pisiɖia nɛ beke, ba be tsoku Pamflia, 25klɛ gɛ ba ɖɔ kibui nɛ Pɛga, ba vɛ ede zhieku Attalia.

26Denɔ Attalia nɛɛ ba za kenia bha etsodzi avɛ Antiɔkɛ, ɔkɛlɛ gɛ ba yɛkɔa lɛ akpɛ ahwɛ kɔ Kpaya ɛyamyuyɔ kɔ kɛxwɛ nɛ gɛ be ti beke nɛ ɔtsɔ̃ nɛ mɛ. 27Nɛ balɛ ɔkɛlɛ tɛkuku mɛ, be klu basɔlɛha nɛ exogo klɛ ba ɖɔ etsrea lɛ ebui nɛ petee gɛ Kpaya abhɛtɛ ganɔ balɛa bha nɛ kana gɛ adanɛ tɛyɛyɛkɛŋa kidzo akɔ bagɛ be di nu Yuɖanɛ. 28Klɛ ba za ɔkɛlɔ kibe dzidze nɛ badɔkpasɛ.

Currently Selected:

Axwɛwɛwa 14: tcd

Highlight

Copy