Axwɛwɛwa 10

Kɔnelusɛ Eklu Petro

1Nɛ Sizeria nɛɛ anyɛ teli aza gɛ be klua sɛ Kɔnelusɛ, gɛ edzi keyutugbani kɛfɔɛfɔ aka nɛ Italia keyu ovulo toli nu. 2Yɛ anɛ yɛeshopoalɛ nɛ petee be dzi banɔ gɛ bayɛkɔ ishu akɔ klɛ be si Kpaya; akɔ banɔ kɛdɔ nɛ ɛyamyuyɔ banɔ bagɛ alasɛ ba kɔɛ dɔ klɛ bee klu Kpaya kibenyɛbe. 3Kiwi tili, ansɛ kemuze ɛɖɔtɛta mɛ ana, amɔ kɛdɔbubukasɛ. Amɔ Kpaya axwɛdɛ teli wee, gɛ aba yɛ ɔbha klɛ asɛ, “Kɔnelusɛ!”

4Kɔneliusɛ edi yɛ nɛ kifu sisim. Klɛ ebisia sɛ, “Kide gɛ ba, Apalete?”

Axwɛdɛ nɛ asɛ, “Wɔ kpayakuklu nɛ betsyutsyuini kɛdɔkukɔ kɛ ba dzi kɛdɔkukɔ gɛ batɛ ba dzɛkɛ nɛ Kpaya amɛ. 5Ɔtsɔ̃ nɛɛ, kpɛ banɔ nɛ Yoppa tɛ be de tsodzini anyɛ teli gɛ yɛ kinyi nu Simɔnɛ gɛ beklu asɛ Petro nɛ ɔmɛna. 6Alɛ Simɔnɛ nɛ gɛ abhɛtɛ buzaplukpa nɛ ɔkɔ, gɛ yɛ bupa nɛ lɛ aƒu nɛ shu.”

7Gɛ Kpaya axwɛdɛ nɛ gɛ aɖɔ kaɖɔ nɛ tsre yɛ na shɛ beke nɛ, Kɔnelius eklu yɛ baxwɛdɛ tɛabha nɛ keyutugbani terikpo gɛ nu anɔ gɛ edi yɛ ɔkɔ. 8Etsrea lɛ kɛdɔnyɛdɔ gɛ ba kɛlɛ mɛ klɛ akpalɛ asɛsɛ Yoppa.

Petro Kɛdɔbubukasɛ

9Aba za ansɛ kemuzem nɛ kiwi bhla nɛa bha gɛ ba za balɛ kidzo nɛa bha pɛ baa vɛ pɛ betsobunɔ ɔmagbla nɛ mɛ, Petro ewu avɛ buvu nɛabha sɛ tɛ ede klukpaya. 10Bubhɛ ba kpa yɛ buyi klɛ apɛ kɛdɔnɔ nɛ gɛ aba ŋa, klɛ gɛ ba bhɛtɛ kɛdɔŋɛŋa kɔ yɛ, abhɛtɛ ansɛ etsoku tram dza. 11Nɛ kɛlɛ mɛ nɛɛ amɔ owũsise lɔ danɛ klɛ amɔ kɛdɔ tili ansɛ keplukpa bhlɛkɛ gɛ be zhinɔ denɔ owũsise nɛ aamɛna kesukpa, nɛ bupɛ tɔlɛ nɛm nɛa bha. 12Keplukpa nɛ keyuku nɛ ɛtsrɛ tɛlɛ̃ aga petee, anɛ ɛyɛabhaga, anɛ kɛlɛm buzhɔɛ. 13Ɔkɛlɛ ogugu toli oyi klɛ lo tsre yɛ ɔsɛ, “Petro, vu ɔlɔ. Yi tɛ ɔtã.”

14Petro ebui lɛ bunua sɛ, “Apalete ɛtɛ ba bhɛtɛ!” “Ɛka ŋa kɛdɔnyɛdɔ gɛ klɛ shu di bhui nɛ di.”

15Kaɖɔ ne ze yi bubhla sɛ, “Tɛ kulu kɛdɔnyɛdɔ sɛ kɛlɛ shu di bhui gɛ Kpaya atɛ bhɛtɛ lɛ kibhui.”

16Kibui nɛ ba kɛlɛ mɛ aba tata, ko klɛ keplukpa bhlɛkɛ nɛ ketsodzi avɛ owũsise.

17Nɛ kibe li nɛ gɛ Petro edzi aza bhɛtɛ kɛtɔkpum nɛ kɛdɔ nɛ gɛ wɛ̃ nɛ yamɛ nɛ shu, banɔ nɛ gɛ Kɔneliusɛ akpɛ asɛsɛ na pɛ Simɔn bupa na mɔ klɛ ba dzrɔ nɛ bulɛe dunu. 18Banɔ nɛ kedunu ne klu asɛsɛ bupa nɛm ebisi asɛ nɛ pɔ Simɔn nɛ gɛ benyi ansɛ Petro ɔkɛlɛ alɛ dza.

19Petro eke aza bhɛtɛ kɛtɔkpum nɛ kɛdɔ nɛ gɛ amɔ nɛ tra nɛ mɛ shu, ɔkɛlɛ Ɔfufɔɛ nɛ otsre sɛ, “Simɔnɛ, banɔ tɛata teli ebisi wɔɛ tɔkpu. 20So lɔ tɛ ozhi ɔvɛ kesi. Tɛ zi kibe nɛ balɛ tɛtutɔnɔ vɛ mɛ, alasɛ mɛ kpɛ alɛ.”

21Petro ezhi avɛ klɛ ede tsre banyɛ na sɛ, “Mɛ nu anɔ nɛ gɛ nɔ pɛɛ. Kibui ɖueɖu nɔ mɛna mɛ ɔkɔ?”

22Banyɛ nɛ bu ishu nu sɛ, “Kɔnelius gɛ enu Italia keyuovulo aka nɛ ɔkɔ lɔ de. Enu anɔ dzyɔgo klɛ esi Kpaya kifu, klɛ Yuɖanɛ nɛ petee akɔ yɛ ɔzakɔ. Axwɛdɛ nɛna teli etsre yɛ asɛ akɔ wɔ ɔba yɛ bupa mɛ tɛ enu ebui nɔɔ nɛ gɛ alɛ wɔ ahwɛ pɛ ɔbɔ ɖɔ.” 23Klɛ Petro ayɛkɛ banyɛ nɛ ansɛ yɛ befu akpɛ yɛ bupa mɛ.

Petro Nɛ Kɔnelius Bupa Mɛ

Nɛ keli zɛzam nɛɛ Petro ebe koeyi aplɛnɔ alɛ, anɛ badzya teli gɛ be de Yoppa tsya tɔnɔ alɛ. 24Nɛ keli zɛza nɛ mɛ Petro ede ku Sizeria. Kɔnɛliusɛ edi balɛ kidzoe nu klɛ eklu yɛshopoalɛ nɛ yɛ ɛbhɛyalɛ ebe dzu yɛɔbha. 25Gɛ Petro etsoku bupa nɛ mɛ, Kɔneliusɛ alɔa tsya nɛ yɛ klɛ ezhia dɔ yɛ butsrukpɔ nɛ nu nɛ ishu zhizhinɔesim. 26Pɔ Petro etsre yɛa sɛ, “Lɔ kititi, Mɛ nahwɛ tsyɛ anɔ tite mɛ enu.”

27Nɛ kaɖɔ ɖuɖɔm nɛ yɛ nɛ, Petro etsoku yɛa bha klɛ ada mɔ sɛ banɔɛza xogo dzi yɛ ɔbha. 28Etsrea lɛ asɛ: “No nyi mɔmɔ sɛ ɔshã nɛ ɔdɛ kɔ kidzo sɛ tɛ Yuɖa eyi aga nɛ bagɛ edi nu Yuɖanɛ ɔdɔgɔsɛ adɛ yɛ ɔbha. Pɔ Kpaya atɛ bu akasɛ mɛa sɛ ɛtɛ klu anɔnyanɔ sɛ adɛ na ɔdɔgɔsɛ sɛ yɛ shu di bhui. 29Klɛ so gɛ be klum nɛ, eba kide mayimayi. Kɔ mɛ bisi wɔ kɛdɔnɔ nɛ so pɛ ɔkpɛ anɔ nɛ mɔkɔ?”

30Kɔneliusɛ ebui lɛ nu asɛ: “Nɛ ewi talɛ̃ gɛ aba fla nɛ mɛ ɛza mɛ bupa mɛ ɛklukpaya nɛ kemuze ɛɖa tɛtam. Ɔkɛlɛ ko ɛmɔ anyɛ teli gɛ enyumu kɛdɔ fufu gɛ kɛta shiãshiã 31klɛ aɖɔ sɛ, ‘Kɔneliusɛ, Kpaya eti nu wɔ yɛ tɛkukulu klɛ abaka wɔ kɛdɔkukɔ kɔ betsyuitsyuini. 32Kpɛ anɔ nɛ Simɔnesi gɛ be klua sɛ Petro nɛ Yoppa. Enu efu nɛ Simɔnɛ nɛ gɛ abhɛtɛ buzaplukpa nɛ bupa mɛ, nɛ aƒu nɛ tɔ.’ 33Klɛ so pɛ ɛkpɛ anɔ nɛ wɔesi kɛkpɛ tili, klɛ kɛpɛ sɛ ɔba. Ɔtsɔ̃ nɛɛ blɔ petee li Kpaya amɛ nɛ ɛkɛ sɛ tɛ bu tatɔ nɛ kibui nyɛbui gɛ Apalete nɛ ayɛkɔ kpɛ wɔ ahwɛ sɛ otsre lɔ.”

34Ko klɛ Petro akpa kaɖɔ ɖɔ sɛ: “Ɛmɔ ɔtsɔ̃ kana gɛ kinu kɛgba sɛ Kpaya ete di anɔa amɛ 35so ayɛkɛ banɔ edenɔ kɛmadi kanyakam gɛ esi yɛ kifu klɛ ba bhɛtɛ kɛgɛ nu kɛdzyɔgo. 36Sɛ no nyi igbe nɛ gɛ Kpaya asɛsɛ Izraɛlanɛ, gɛ ba ɖɔ ishuyuyɔ kibui dzyɔgo nɛ aganɔ Yesu Kristoa bha, gɛ enu Apalete nɛ akɔ anɔnyanɔ. 37Sɛ no nyi kɛdɔnɔ nɛ gɛ ba klɛm ganɔ Yuɖia, gɛ kɛkpɛe si nɛ Galelia anɛ buni kpɛkpɛ nɛ gɛ Yohanɛsɛ aɖɔ nɛede. 38Kana gɛ Kpaya asrabɔ akɔ Yesu Nazarɛtɛ eyi nɛ Ɔfufɔɛ Dzyɔgo anɛ kemi, anɛ kɛkana nɛ gɛ aga ka na nɛ ebui dzyɔgo tɛbhɛbhɛtɛ nɛ bagɛ za ɛfufɔɛ kpãesi nɛ banya tɛbibeke, alasɛ Kpaya aza plɛnɔ yɛ.

39“Blɔ petee bu dzi bebuimɔɖɔ kɔ ebuinyɛbui gɛ abhɛtɛ nɛ Yuɖanɛ kesukpam nɛ Yerusalɛm. Be yi yɛ ganɔ tɛkpɛkplasɔ mɛ, 40pɔ Kpaya efeke yɛ edenɔ bekpum nɛ kiwi tramɛ nɛa bha klɛ abhɛtɛ yɛ asɛ tɛ bamɔɛ. 41Banɔ nɛ peteea dɛ mɔɛ, pɔ bagɛ Kpaya atɛ bhɛtɛ sɛ bamɔ klɛ ɔdzyɔkɔ na mɔɛ—nɛ blɔ bagɛ ŋa pɛ bu wɛ̃ nɛ yɛ nɛ gɛ anyɛmɛ denɔ bekpum nɛe de. 42Akpɛ blɔ sɛ tɛ buɖɔ yɛ kibui nɛ tsre banɔ tɛ bu bu kasɛa lɛ sɛ yɛ enu anɔ nɛ gɛ Kpaya akɔ sɛ tɛ eklu kebhui nɛ baga lɛ nɛ ɛkpã anɛ be tsitsi. 43Batɔnu nɛ petee aɖɔ edenɔ yɛ shu sɛ anɔnyanɔ gɛ anya yɛkɛ yɛa bha aŋa ko amɔ buzizi tɛyɛyɛkɔ tsye ganɔ yɛ kinyim.”

44Kibe lɛ nɛ gɛ Petro eke dzia ɖɔ ebuia nɛ, Ɔfufɔɛ Dzyɔgo nɛ ɔba anɔnyanɔ gɛ enu kibui nɛa bha. 45Banɔ nɛ gɛ be kebhui bɔnyɛnyɛ gɛ ba yɛkɛ Yesua bha ŋa pɛ baza Petroe de aba klɛ nɛ tsyɛ kiyinɔa lɛ sɛ be bu Ɔfufɔɛ Dzyɔgo nɛ abalɛ bagɛ edi nu Yuɖanɛ nɛ tsyɛa bha. 46Alasɛ benua lɛ tsyɛ kɛdɔ gɛ be dzia ɖɔa ɖɔ nɛ anɛkɛ vuvɔm klɛ bakpɛ Kpaya nɛa bha.

Klɛ Petroa sɛ, 47“Anɔ teli aba na banɔa nɛa bha dzua hwɛ sɛ ba tɛ kpɛ buni akɔa lɛ dza? Ba tɛ yɛkɛ Ɔfufɔɛ Dzyɔgo nɛ ansɛ gɛ blɔ tsyɛ tɛ yɛkɛ.” 48So nɛ Petro akɔ sɛ tɛ ba kpɛ buni nɛ Yesu Kristo kinyim kɔa lɛ tsyɛ. Klɛ be bisi sɛ Petro aza balɛ ɔbha ewi bhli teli ko.

Currently Selected:

Axwɛwɛwa 10: tcd

Highlight

Copy