Mâreke 11
11
Jezü lï atə̂ Jerûzalêmo
(Mat 21.1-11; Luk 19.28-40; Jan 12.12-19)
1Sə̂nə̈ ndə̂ andjë ndô la Jerûzalêmo, ndola gö ndə̂ Betefajë la andə̂ Betanï, tə̂ aga ndə̂ a-Olivï, Jezü wân angâ adjisîpili ndə̂ yê bïchuû. 2Tche tô rə̂ sə̈ andjê päkëdə̂: «Nyë êë atə̂lə̂ yɛ̈yɛ̈ gö ndə̂ âwâ tchâtchu nyê lâme, gbô rə̂ ndə̂ nyê âsə̈ li atə̂lə̂ yɛ̈yɛ̈ gö nə̈, nyê gboadje ngâ ɛ̈nə̈ kûndiɛ ndə̂ a tchô tchë, ndə̂ ngâ akrə âbô â pâ yê dämba-ê. Nyë zü tchë, kə̂ ka la tchë. 3Âdə ngâ akrə âyu nyê päkëdə̂: ‹Bëte giamâ kä ndə̂ nyê mbo tə̂ rə käko-ë?› Nyë tö rə̂ ndə̂nə̈ sə̈ tchë päkëdə̂: ‹Gbölö Gbïɛ̈ kä ndə̂ ânyîndə̂ yê, tchê wan-adje tchë sə̈ nyê ëngbânə̈ angangaâtə.›» 4Andjë ê kə̈ gbô ngâ ɛ̈nə̈ kûndiɛ ndə̂ a tchô tchë sûwu, ndrotə̂ ngâ nda ndroma köbo, ânyë andjë zû tchë. 5Angâ azü lə̂ gbâtə̂ azü ndə̂ andjë sə̂ tâ, yû andjê päkëdə̂: «Giamâ kä ndə̂ nyê mbo rə̂ lâme? Nyë sə̈ lakə̂ zu ɛ̈nə̈ kûndiɛ lâme bëte giamâ?» 6Andjë tô kütû tchêngbâ pö ndə̂ Jezü lâme sə̈ andjê ânyë a gbôtə̂ andjê, andjë kâ la tchë etə̂. 7Andjë kâ la ɛ̈nə̈ kûndiɛ nə̈ sə̈ Jezü, kə̈ kʉ̂ alə̂ba ndə̂ andjê ëpâ kûndiɛ nə̈ ânyë Jezü sə̂ ëpânə̈. 8Angbängbä azü vrô lə̂ba ndə̂ andjê pâ köbo ânyë angânə̈ kû amatö yö la kʉ̈kʉ̂ nə̈ tâ bhâlə̂ güsü kə̈ kʉ̂ ndjë rə̂ pâ köbo. 9Andjanə̈ ndə̂ andjë nə tchâtchu yê la andjanə̈ ndə̂ andjë za tchêngbâ yê sə̂ lakə̂ on päkëdə̂: «Voga sə̈ Ndjapä! Äwäpä Ndjapä e tchôtchô pö pâ akrə ndə̂ tche nə̂ la rə̈ Gbölö Gbïɛ̈! 10Äwäpä Ndjapä e tchôtchô pö pâ Gbölö gö-gbïɛ̈ ndə̂ ânə, lakə̂ mbo kümändëmä ndə̂ bha azə̂ Davîdi! Voga sə̈ Ndjapä bhâ lafô#11.10 Nyë dɨ̈ Aps 118.25-26.!» 11Jezü lî atə̂ Jerûzalêmo, kə̈ ê bhâlə̂ gbölö nda Ndjapä. La tchêngbâ nə̈ ndə̂ tche wûn arə gbɛ̂ ndə̂ âtâkpa ndrotə̂ yê, tche wûtu kə̈ zâ köbo la adjisîpili ndə̂ yê lə̂ könô gbɛ̂ tchêpâ nə̈ bïchuû ndə̂kə̂ e atə̂ Betanï bëte tchô ndô tə̂kə̂ bu nə̂.
Jezü drä ndə̂ yö fîge
(Mat 12.18-19)
12Tchô krâ pânə̈, ndə̂ andjë sə̂ lakə̂ wutu lə̂ gö ndə̂ Betanï, gʉ nyû Jezü. 13Tche wûn ngâ yö fîge, ndə̂ âwâ tʉ̂rʉ la akʉ̈kʉ̂ nə̈ tâ, tche nə̂, kə̈ wûntî pä ânyë gboadje angâ alêlê nə̈, praâbalë tche gîtə̂ yê ndola rə̂, kə̈ gbô kütû akʉ̈kʉ̂ nə̈, bëte lö kə̂ le ndə̂ fîge nə̈ də̂âbo rə̂-a. 14Jezü tô rə̂ sə̈ yö fîge nə̈ päkëdə̂: «Ngâ akrə kä zɨ bata lêlê zə̈ balë tee-a!» Adjisîpili ndə̂ yê djê pö lâme.
Jezü grö a-earə̂ waɛ̂che lə̂ gbölö nda Ndjapä
(Mat 21.12-17; Luk 19.45-48; Jan 2.13-22)
15Andjë wûtu bhâ Jerûzalêmo. Jezü lî bhâlə̂ gbölö nda Ndjapä, kə̈ sə̂ lakə̂ gro azü gbɛ̂ ndə̂ andjë ka rə la andjanə̈ ndə̂ andjë yo arə. Tche gôâ agbalâka ndə̂ andjë chandje makətche pânə̈, la ambätä ndə̂ a-earə̂ kə̂ ka apuli. 16Tche gbôâbo tə̂ ngâ akrə balë pä tche za ngâ rə lə̂ gbölö nda Ndjapä nə̈ kə̈ rô la rə̂-a. 17Pânə̈ tche nyîsə̂ rə sə̈ andjê päkëdə̂: «A mbôâbo rə̂ lə̂ mbëtï päkëdə̂: ‹A â-eadje rə̂ tə̂ nda ndə̂ mê pä nda kə̂ to pö sə̈ Ndjapä ndə̂ azü pâ acho gbɛ̂?› Praâbalë nyënyê ndə̂ nye nə̈, nyë mbô rə̂ batə̂ sə̂ tchô ndə̂ a-earə̂ ngbä zatə̂ andjê wü tâ#11.17 Nyë dɨ̈ Eza 56.7; Jer 7.11.!» 18Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ djê pö ndə̂ rə ndə̂ Jezü mbô rə̂ lâme, kə̈ sə̂ lakə̂ pu köbo ndə̂kə̂ won tchë. Praâbalë andjë mbö wa, bëte kə̂ nyisə̂ rə ndə̂ yê zä su kpûlû azü nə̈ gbɛ̂ tə̂ gbölösə̂nə̈. 19Ârə̂ âsə̈ wutu la tchêndə̂gölo, Jezü la adjisîpili ndə̂ yê wûtu lə̂ gö nə̈.
Jezü la yö fîge ndə̂ âhrô
(Mat 21.20-22)
20Po mbatchâ ndə̂ andjë sə̂ lakə̂ ro, andjë wûn yö fîge nə̈ ndə̂ âhrô ndjoa ëtə̂ chëchë nə̈. 21Su Pîêre tê pâ rə ndə̂ âmbô alême ânyë tche tô rə̂ sə̈ Jezü päkëdə̂: «Earə̂ kə̂ nyisə̂ rə, wunsaâ, yö fîge ndə̂ mo drâ ndə̂nə̈ alême hrô nə̂ gbɛ̂.» 22Jezü tô rə̂ sə̈ adjisîpili ndə̂ yê päkëdə̂: «Nyë zä su nyê gbɛ̂ sə̈ Ndjapä. 23Ɛn-ɛn, tə̂ lëge nə̈ më tö rə̂ sə̈ nyê, âdə ngâ akrə âto rə̂ sə̈ aga âtə päkëdə̂: ‹Amö gbo tchâtə kə̈ tê lə̂ gbölö ngû ngbro›, ânyë su yê krʉ̂ pâ pö nə̈, ânyë tche wûnsə̂ nə̈ pä rə nə̈ âwutuadje, Ndjapä âgambadje rə̂ sə̈ tchë. 24Bëte rə̂ kä ndə̂ më tô rə̂ sə̈ nyê: Ndə̂ nyê âsə̈ to pö sə̈ Ndjapä, rə gbɛ̂ ndə̂ nyê yukû nə̈ tchânə̂ yê, äwäpä nyë gamba rə̂ pä nyë gbô rə nə̈ nə̂, Ndjapä âzadje rə̂ sə̈ nyê. 25Âdə nyê âkrʉ̂ lafô ndə̂kə̂ to pö sə̈ Ndjapä, ânyë ngâ pö wâtə̂ su nyê la ngâ akrə, nyë kö pö lə̂ küma yê, ânyë bha nyê ndə̂ tche sə̂ bhâ lafô ko ndjë pö lə̂ küma nyê. [26Praâbalë âdə nyê âkoabô pö kô lə̂ küma ngâ akrə, Bha nyê ndə̂ tche sə̂ bhâ lafô koabô ndjë pö lə̂ küma nyê tee-a#11.26 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 26 lâme wâbo lə̂nə̈-a..»]
Gbôgbô ndə̂ Jezü tö tchêbâ?
(Mat 21.23-27; Luk 20.1-8)
27Andjë kâ atə̂ Jerûzalêmo. Sə̂nə̈ ndə̂ Jezü âsə̈ nə kulə̂ gbölö nda Ndjapä, agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ la akpôkpô azü nə̂ ndola tchë. 28Andjë yû tchë päkëdə̂: «Mo sə̈ lakə̂ mbo arə âtə la rə̈ tchabâ? Tchabâ kä ndə̂ âzâ gbôgbô sə̈ mö ndə̂kə̂ mbo rə̂?» 29Jezü tô rə̂ ndə̂nə̈ sə̈ andjê päkëdə̂: «Mëmê ndjë gbɛ̂ më âyu nyê la ngâ pö balë, nyë tö pö ndə̂nə̈ sə̈ mê, ânyë mê nyiadje sə̂ köbo gbôgbô ndə̂ mê mbo rə la rə̂ lâme sə̈ nyê. 30Tchabâ kä âkə̈ wân Jâan-Batîse ndə̂kə̂ mbo batɛ̂me? Ndjapä kä, âdəndjë azü? Nyë tö tchêngbâ pö nə̈ sə̈ mê.» 31Praâbalë andjë sə̂ lakə̂ to pö lə̂ hûɛ̈ lə̂ gbâtə̂ andjê päkëdə̂: «Âdə azə̂ âto rə̂ päkëdə̂: ‹Ndjapä kä ndə̂ âwân tchë› tchê yuadje azə̂ päkëdə̂: ‹Bëte giamâ kä ndə̂ nyë gâmbabô pö ndə̂ Jâan gâmba-ê?› 32Âdə azə̂ âto rə̂ päkëdə̂: ‹Azü kä ndə̂ âwân tchë›», käko andjë mbô wa kpûlû azü nə̈ bëte andjë wûnsə̂ nə̈ nə̂ pä Jâan də̈ ngâ lëge earə̂ ndə̂ma Ndjapä. 33Tchâme, andjë tô rə̂ ndə̂nə̈ sə̈ Jezü päkëdə̂: «Ârâ wûn-âbo sə̂nə̈-a.» Jezü tô rə̂ sə̈ andjê päkëdə̂: «Mëmê ndjë gbɛ̂, mê nyiabô sə̂ akrə ndə̂ mê mbo rə âtə la rə̈ yê sə̈ nyê tee-a.»
Currently Selected:
Mâreke 11: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
