Matiyə̈ 18
18
Akrə ndə̂ tche wâ gbölö lə̂ Gbölö gö-gbïɛ̈ ndə̂ tchêlafô
(Mar 9.33-37; Luk 9.46-48)
1Posə̂nə̈ lâme, adjisîpili nə̂ ndola Jezü kə̈ yû tchë päkëdə̂: «Tchabâ âwâ gbölö kə̈ rô angâ yê lə̂ Gbölö gö-gbïɛ̈ ndə̂ tchêlafô?» 2Tche zâ ngâ yɛ̈yɛ̈ bechë, kə̈ zâ tchë lə̂ gûtə̂ andjê, 3kə̈ tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Âdə su nyê âdoabô tə̂ yê dô, kə̂ wa batə̂ su yɛ̈yɛ̈ bechë âtə, nyê liabô lə̂ Gbölö gö-gbïɛ̈ ndə̂ tchêlafô tee-a. 4Akrə ndə̂ tche wâ gbölö kə̈ rô angâ yê lə̂ Gbölö gö-gbïɛ̈ ndə̂ tchêlafô, tche də̈ akrə ndə̂ tche mbotə̂ yê kpîɛ̂kpîɛ̂ rə̂, kə̂ wa batə̂ yɛ̈yɛ̈ bechë âtə. 5Akrə ndə̂ tche mbô rə̂ la ngâ yɛ̈yɛ̈ bechë batə̂ tchanə̈ âtə la rə̈ mê, dëkë mëmê la tə̂ mê kä ndə̂ tche mbô rə̂ la mê.»
Rə ndə̂ âmbo rə̂ pä akrə te lə̂ ngbongbo rə
(Mar 9.42-48; Luk 17.1-2)
6«Akrə ndə̂ tche mbô rə̂ pä ngânə̈ balë lə̂ gûtə̂ ayɛ̈yɛ̈ abechë ndə̂ andjë zâ su andjê sə̈ mê te lə̂ ngbongbo rə, äfü pä a i ngâ gbölö täme tə̂ gɨ̈ yê, kə̂ yi tchë la rə̂ lə̂ dju gbölö ngû ngbro. 7Äwätə̂ rə ndə̂ nyonyo tə̂ azü pâ cho âtə! Arə ndə̂ âmbo rə̂ pä azü te lə̂ ngbongbo rə ngbä tə̂ gbölösə̂nə̈! Tə̂ lëge nə̈, ädäka ndə̂kə̂ pa arə nə̈ lâme wutu. Praâbalë nyonyo kä tə̂ akrə ndə̂ tche mbô rə̂ pä rə nə̈ lâme wutu. 8Âdə könô zə̈, âdəndjë da zə̈ kä ndə̂ âmbo rə̂ pä mo te lə̂ ngbongbo rə, amö ku rə̂ kə̂ yi rə̂ tʉ̂rʉ. Äfü pä mo li lə̂ tchîsûwu la könô balë âdəndjë da balë, ârô anə̈ ndə̂kə̂ pa gbô könô zə̈ wa bïchuû âdəndjë da zə̈ bïchuû gbɛ̂, ânyë a yi mö la rə̂ lə̂ wo ndə̂ âju pïï etə̂. 9Âdə la zə̈ kä ndə̂ âmbo rə̂ pä mo te lə̂ ngbongbo rə, amö niɛ rə̂ kə̂ yi rə̂ tʉ̂rʉ. Äfü pä mo li lə̂ tchîsûwu la la zə̈ balë, ârô anə̈ ndə̂kə̂ pa gbô la zə̈ bïchuû gbɛ̂ wa tâ ânyë a yi mö la rə̂ lə̂ wo ndə̂ âju pïï etə̂.»
Ɛ̈bro-ngbaga ndə̂ tche yû ânyë a gbô tchë
(Luk 15.3-7)
10«La nyê gbö-ê! Nyë wün-äbô ngâ yɛ̈yɛ̈ bechë wûn lə̂ gûtə̂ ayɛ̈yɛ̈ abechë âtə batə̂ mbämbä akrə-ê. Më tö rə̂ sə̈ nyê, aânje ndə̂ ayɛ̈yɛ̈ abechë âtə kä bhâ tchâtchu Bha mê bhâ lafô. [11Modô ndə̂ Akrə nə̈ ndə̂kə̂ tcha azü ndə̂ andjë yû#18.11 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 11 lâme wâbo lə̂nə̈-a. Nyë dɨ̈ Luk 19.10..]
12«Pö bhâlə̂ su nyê wä atöko? Âdə ngâ akrə lə̂ gbâtə̂ nyê âwâ la aɛ̈bro-ngbaga ngbangbo balë, ânyë ngânə̈ balë lə̂ gûtə̂ andjê yû, tchê gboabô tə̂ adɨ̂ nə̈ tə̂ azü voanə̈ la lə̂ könô gbɛ̂ tchêpâ nə̈ mïndûu manə̈ voanə̈ (99) lə̂ küma aga, kə̂ e kə̂ pu tchanə̈ balë ndə̂ tche yû lâme? 13Ɛn-ɛn, tə̂ lëge nə̈ më tö rə̂ sə̈ nyê, âdə tche âgbo tchë, kə̂ wa la mômô tə̂ gbölösə̂nə̈ âro mômô ndə̂ tche wâ la rə̂ bëte aɛ̈bro-ngbaga tə̂ azü voanə̈ la lə̂ könô gbɛ̂ tchêpâ nə̈ mïndûu manə̈ voanə̈ ndə̂ andjë yûâbô yû lâme. 14Käko kä ndə̂ Bha nyê ndə̂ tche sə̂ bhâ lafô nyîâbo ndə̂nə̈ pä ngânə̈ balë lə̂ gûtə̂ ayɛ̈yɛ̈ abechë lâme yu-a.»
Köbo ndə̂kə̂ ka la akrə pâ tchôtchô köbo
15«Âdə ngâ zə̈ âmbo ngâ ngbongbo rə tə̂ zə̈, amö e kə̂ wun tchë. Momö la tchë bïchuû nyê sə, mo nyisə̂ ngbongbo rə ndə̂ yê sə̈ tchë. Âdə tche âdje mö, dëkë mo kâ la ngâ zə̈ pâ tchôtchô köbo nə̂. 16Praâbalë âdə tche âkosə̂ kə̂ dje mö, amö za ngâ akrə balë âdəndjë azü bïchuû ëtə̂ kʉ̂tê zə̈, kə̂ kä e kə̂ wun tchë. Ädə̈ käko ânyë, Mbëtï Ndjapä tô rə̂#18.16 Nyë dɨ̈ Det 19.15. päkëdə̂: ‹Lə̂ köbosə̂ pö ma azü bïchuû âdəndjë vötaâ ndə̂ andjë wûnsə̂ pö nə̈, andjë nyikrə rə̂.› 17Âdə tche âkosə̂ kə̂ dje andjê, amö to ndə̂ma pö nə̈ sə̈ azü ndə̂ Egilîze. Âdə tche âkosə̂ kə̂ dje azü ndə̂ Egilîze, amö wun tchë batə̂ akrə ndə̂ tche wûn-âbô sə̂ Ndjapä wûn-î, wun tchë batə̂ earə̂ kə̂ pala makətche-lapöo lə̂ la zə̈.
18«Ɛn-ɛn, tə̂ lëge nə̈ më tö rə̂ sə̈ nyê, rə gbɛ̂ ndə̂ nyê i rə̂ bêche âtə, a â-iadje rə̂ bhâ lafô. Rə gbɛ̂ ndə̂ nyê zu rə̂ bêche âtə, a âzuadje rə̂ bhâ lafô.
19«Ɛn-ɛn, tə̂ lëge nə̈ më kä tô rə̂ sə̈ nyê: Âdə azü bïchuû lə̂ gûtə̂ nyê bêche âtə ndə̂ andjë djêtə̂ andjê ndə̂kə̂ yu Ndjapä tə̂ pö ndə̂ ngâ rə, Bha mê ndə̂ tche sə̂ bhâ lafô zadje rə ndə̂ andjë yûkû nə̈ lâme sə̈ andjê. 20Bëte sə̂ tchô ndə̂ azü bïchuû âdəndjë vötaâ pâlatə̂ andjê tâ la rə̈ mê, më kä lə̂ gûtə̂ andjê.»
Ndoka pâ earə̂ kua ndə̂ tche kôsə̂ kə̂ wun nyonyo ngâ yê
21Pîêre gîtə̂ yê ndola Jezü kə̈ yû tchë päkëdə̂: «Gbölö Gbïɛ̈, âdə ngâ mê âmbo ngbongbo rə tə̂ mê, më âko pö nə̈ lə̂ küma yê sûsunə̈ atöko? Sûsunə̈ mïndûu manə̈ bïchuû?» 22Jezü tô rə̂ ndə̂nə̈ sə̈ tchë päkëdə̂: «Më tôâbo rə̂ sə̈ mö pä sûsunə̈ mïndûu manə̈ bïchuû-a. Praâbalë mo âmbo rə̂ zoo tə̂ azü vötaâ la lə̂ könô gbɛ̂ (70) sûsunə̈ mïndûu manə̈ bïchuû. 23Bëte rə̂ kä ndə̂, pö ndə̂ Gbölö gö-gbïɛ̈ ndə̂ tchêlafô wâ batə̂ pö ndə̂ ngâ gbïɛ̈ ndə̂ tche nyîndə̂ kə̂ nyikrə pö ndə̂ geda ndə̂ âwâ lə̂ küma azü kua ndə̂ yê. 24Ndə̂ tche jêtə̂ kə̂ wun pö nə̈, azü zâ ngâ earə̂ kua ndə̂ yê, kə̈ nə̂ la tchë. Makətche ndə̂ yê nə̈ gë lə̂ küma yê tə̂ gbölösə̂nə̈. 25Köchë nə̈ lâme wâbo la ngâ makətche ndə̂kə̂ gi rə̂ ëngbânə̈ sə̈ earə̂ nə̈-a. Gbïɛ̈ nə̈ zâma ndə̂kə̂ pa a ka köchë lâme, tchetchë la ɛ̈chë ndə̂ yê, la abechë ndə̂ yê la arə gbɛ̂ ndə̂ tche wâ la rə̂, ânyë kə̂ kʉ makətche nə̈ kə̂ gi rə̂ ëngbânə̈. 26Earə̂ kua lâme gʉ̂te ëbêche tchâtchâ gbïɛ̈ nə̈, kə̈ dɨ̂ tchə̂lə̂ ma yê kə̈ tô rə̂ sə̈ tchë päkëdə̂: ‹Su zə̈ kʉ̈äbô mö kʉ̂ tə̂ mê, mê giadje rə ndə̂ zə̈ gbɛ̂ sə̈ mö.› 27Gbïɛ̈ nə̈ wûn nyonyo yê, kə̈ jî geda lâme lə̂ küma yê, kə̈ gbôtə̂ yê tche gû etə̂. 28Earə̂ kua nə̈ wûtu kə̈ tâkpa la ngâ yê earə̂ kua ndə̂ geda ndə̂ yê wâ lə̂ küma yê mîɛ̈-makətche ngbangbo balë. Tche tchû angrô yê kproô, kə̈ zâ tchə̂lə̂ nə̈ ndɛ̈ɛ̈ lakə̂ tô rə̂ pä: ‹Amö gi geda ndə̂ mê sə̈ mê.› 29Ngâ yê nə̈ lâme gʉ̂te ëbêche tchâtchâ yê kə̈ dɨ̂ tchə̂lə̂ ma yê sə̈ tchë päkëdə̂: ‹Su zə̈ kʉ̈äbô mö kʉ̂ tə̂ mê, mê giadje rə ndə̂ zə̈ gbɛ̂ sə̈ mö.› 30Köchë nə̈ lâme kôsə̂ nə̈-ê, kə̈ ê la tchë kə̈ yî tchë bhâlə̂ nda kânga ndə̂kə̂ pa tche sə bhâye zoo, kə̂ gi geda ndə̂ yê lâme sə̈ tchë ânyë. 31Angâ yê ndə̂ andjë mbo kua la tchë sə̂nə̈ balë wûn rə̂ käko, nyonyo yê mbô andjê. Andjë kâ kə̈ tô ndə̂ma pö nə̈ gbɛ̂ sə̈ gbïɛ̈ nə̈. 32Gbïɛ̈ nə̈ ê earə̂ kua lâme, kə̈ tô rə̂ sə̈ tchë päkëdə̂: ‹Ngbongbo earə̂ kua! Mo dɨ̈ tchə̂lə̂ ma zə̈ alême sə̈ mê, më jî geda ndə̂ mê lə̂ küma zə̈ gbɛ̂. 33Mo wûn-âbo ndjë nyonyo ngâ zə̈ batə̂ rə̂ ndə̂ më wûn nyonyo zə̈ lâme?› 34Su gbïɛ̈ nə̈ kʉ̂ tchë tə̂ gbölösə̂nə̈, tchë wân tchë ndə̂kə̂ pa a yuku tchë bhâlə̂ nda kânga zoo, tche gi geda ndə̂ yê gbɛ̂ ânyë.»
35Ndə̂kə̂ ka pö lâme, Jezü tô rə̂ sə̈ andjê päkëdə̂: «Bha mê bhâ lafô âmbo ndjë rə̂ tə̂ nyê balë balë käko, âdə nyë âkosə̂ kə̂ ko pö lə̂ küma angâ nyê la su nyê gbɛ̂.»
Currently Selected:
Matiyə̈ 18: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
