Lûke 17
17
Ngbongbo rə lakə̂ ko pö lə̂ küma
(Mat 18.6-7,21-22; Mar 9.42)
1Jezü tô rə̂ sə̈ adjisîpili ndə̂ yê päkëdə̂: «Arə ndə̂ âmbo rə̂ pä azü te lə̂ ngbongbo rə kä tâ logbɛ̂. Praâbalë nyonyo kä tə̂ akrə ndə̂ tche mbô rə̂ pä angâ yê te lə̂ ngbongbo rə. 2Äfü pä a i ngâ gbölö täme tə̂ gɨ̈ yê, kə̂ yi tchë la rə̂ bhâlə̂ gbölö ngû ngbro, ärö rə̂ ndə̂kə̂ pa tche mbo rə̂ ânyë ngânə̈ balë lə̂ gbâtə̂ abechë âtə te lə̂ ngbongbo rə. 3Äwäpä la nyê gbo-ê!
«Âdə ngâ zə̈ âmbo ngbongbo rə tə̂ zə̈, amö nyisə̂ ngbongbo rə ndə̂ yê nə̈ sə̈ tchë lə̂ küwû nə̈. Âdə tche âgbotə̂ bəndɨ kə̂ mbo rə ndə̂ yê nə̈, äwäpä mo ko pö lə̂ küma yê. 4Âdə tche âmbo ngbongbo rə tə̂ zə̈ sûsunə̈ mïndûu manə̈ bïchuû lə̂ lo balë, ânyë kə̂ kângbâ yê pu mö sûsunə̈ mïndûu manə̈ bïchuû lakə̂ to rə̂ päkëdə̂: ‹Më gbôtə̂ köbo nə̈ nə̂›, äwäpä mo ko pö lə̂ küma yê.»
Kə̂ za su sə̈ Ndjapä
(Mat 17.19-20)
5 Abadjângele tô rə̂ sə̈ Gbölö Gbïɛ̈ päkëdə̂: «Amö mbo rə̂ ânyë kə̂ za su ârâ sə̈ Ndjapä ge.» 6Gbölö Gbïɛ̈ nə̈ tô rə̂ ndə̂nə̈ sə̈ andjê päkëdə̂: «Âdə kə̂ za su nyê sə̈ Ndjapä âge batə̂ ndjî mütârede, nyë âto rə̂ sə̈ da yö âtə päkëdə̂: ‹Amö alafô la chëchë zə̈ gbɛ̂, kə̂ e kə̂ chitə̂ zə̈ bhâlə̂ gbölö ngû ngbro›, da yö lâme âdjeadje nyê.»
Rə ndə̂ âwâ pä earə̂ kua mbo rə̂
7«Azə̈ chï ndə̂ pö âtə: Âdə ngâ akrə lə̂ gbâtə̂ nyê âwa la ngâ earə̂ kua ndə̂ tche djo kɨ̈ndɨ̈ âdəndjë rə̂ ndə̂ tche bata kpûlû agia. Ndə̂ tche âsə̈ wun earə̂ kua lâme ndə̂ tche tô bhâlə̂ kɨ̈ndɨ̈ ndə̂kə̂ kangbâ yê, tchê toadje rə̂ sə̈ tchë päkëdə̂: ‹Amö nə gasa kə̂ zɨ kɨ̈zɨ̂›? 8Âdə̂âbo käko-a, tchê toadje rə̂ sə̈ tchë päkëdə̂: ‹Amö fa kɨ̈zɨ̂ sə̈ mê, pânə̈ mo yu lə̂ba tə̂ zə̈ bëte kə̂ za kɨ̈zɨ̂ nə̈ sə̈ mê. Âdə më âzɨ rə ânyë kə̈ ndjô rə nə̂, mô zɨadje andə̂ zə nə̈ ndjë lakə̂ ndjo rə.›
9«Ndə̂ earə̂ kua nə̈ mbô arə gbɛ̂ ndə̂ gbölö akrə ndə̂ yê yûkû nə̈ lâme, tche âza ayîabâ sə̈ earə̂ kua ndə̂ yê lâme? Âdə̂âbo käko-a. 10Ârə̂ âwa ndjë me käko tə̂ andə̂ nye nə̈, ndə̂ nyë mbô arə gbɛ̂ ndə̂ a yûkû nə̈ sə̈ nyê, nyë tö rə̂ päkëdə̂: ‹Ârâ wätə̂ ambämbä a-earə̂ kua, ârâ mbö kütû rə ndə̂ âwâ pä ârâ mbo rə̂.›»
Jezü tchä a-earə̂ broma lə̂ könô gbɛ̂
11Ndə̂ Jezü zâ köbo ndə̂kə̂ e atə̂ Jerûzalêmo, tche dô lə̂ agö ndə̂ Samarï la andə̂ Galilë. 12Ndə̂ tche âsə̈ li lə̂ ngâ yɛ̈yɛ̈ gö, a-earə̂ broma lə̂ könô gbɛ̂ nə̂ lə̂ köbo yê, kə̈ krʉ̂ bhâchï#17.12 Nyë dɨ̈ Lev 13.45-46.. 13Andjë sə̂ lakə̂ ta wârə̂ päkëdə̂: «Jezü, Earə̂ kə̂ nyisə̂ rə, amö wun nyonyo ârâ!» 14Jezü wûn andjê kə̈ tô rə̂ sə̈ andjê päkëdə̂: «Nyë êë, kə̂ mâtə̂ nyê tə̂ a-earə̂ kə̂ wa ngela sə̈ Ndjapä#17.14 Nyë dɨ̈ Lev 14.2-3..» Ndə̂ andjë âsə̈ e, tə̂ andjê dâka-ê. 15Ngânə̈ balë lə̂ gûtə̂ andjê ndə̂ tche wûn rə̂ pä tə̂ anyê dâka nə̂, tche dôtə̂ yê lakə̂ voga Ndjapä lakə̂ ta wârə̂ ngbôô. 16Tche tê tchâtchâ Jezü, kə̈ chî küma yê tə̂ cho lakə̂ za ayîabâ sə̈ tchë. Köchë lâme wätə̂ akrə gö ndə̂ Samarï. 17Käko Jezü tô rə̂ päkëdə̂: «Âdə̂âbo andjê lə̂ könô gbɛ̂ kä ndə̂ më tchâ andjê? Adɨ̂ nə̈ mïndûu manə̈ vöanə̈ sə̈ bhâ tchêbâ? 18Ngâ akrə balë ndə̂ tche rɨ̂ tchə̂lə̂ yê ndə̂kə̂ ka bëte kə̂ za ayîabâ sə̈ Ndjapä wâbo-a, kütû akrə ndə̂ ngâ gö ngbî âtə?» 19Pânə̈ Jezü tô rə̂ sə̈ tchë päkëdə̂: «Alafô, kə̈ gû atə̂ndə̂ zə̈; kə̂ za su zə̈ sə̈ mê tchâ mö nə̂.»
Kə̂ nə ndə̂ Gbölö gö-gbïɛ̈ ndə̂ Ndjapä
(Mat 24.23-28,37-41)
20 Afarizïɛ̈n yû Jezü päkëdə̂: «Kə̂ nə ndə̂ Gbölö gö-gbïɛ̈ ndə̂ Ndjapä âwa dalatchêbâ?» Jezü tô rə̂ ndə̂nə̈ sə̈ andjê päkëdə̂: «Gbölö gö-gbïɛ̈ ndə̂ Ndjapä nəabô tee batə̂ ngâ rə ndə̂ a wun rə̂ wün-a. 21A âtoabô rə̂ tee päkëdə̂: ‹Nyë wün rə̂, äkä tchâtə!› Âdəndjë rə̂ ‹äkä təbhâ!› Bëte äwäpä nyë wunsə̂ nə̈ pä Gbölö gö-gbïɛ̈ ndə̂ Ndjapä kä lə̂ gûtə̂ nyê.»
22Pânə̈ tche tô rə̂ sə̈ adjisîpili ndə̂ yê päkëdə̂: «Angâ alö âwutuadje ndə̂ nyê nyində̂ kə̂ wun ngâ lö balë lə̂ alö ndə̂ Modô ndə̂ Akrə, praâbalë nyê wun-abô rə̂ tee-a. 23A âtoadje rə̂ sə̈ nyê päkëdə̂: ‹Tche kä təbhâ!› Âdəndjë rə̂ ‹tche kä tchâtə!› Praâbalë nyë ëäbô ê bhâye-ê, âdəndjë rə̂ nyë kpëäbô kpê bhâye-ê. 24Käko lo kə̂ ka ndə̂ Modô ndə̂ Akrə âwa me batə̂ rə̂ ndə̂ nyïvrö sro kpôlə̂nyä ânyë ngbänga nə̈ wutu dəkalâ dəkalâ lâme. 25Praâbalë äwäpä tche wun yûkü tə̂ gbölösə̂nə̈ dokʉ̈tchê, ânyë äwäpä azü ndə̂ tchô angêta kosə̂ yê. 26Rə ndə̂ âmbô alême losə̂ Nowë, ârə̂ âmbo ndjë me käko losə̂ kə̂ ka ndə̂ Modô ndə̂ Akrə. 27Azü zɨ̈ rə alême lakə̂ ndjo rə, aköchë la aɛ̈chë tôtə̂ andjê zoo âwûtu ëtə̂ lo nə̈ ndə̂ Nowë lî lə̂ âreche. Käko gbölö nyïvrö nyî, kə̈ vô katchôgbɛ̂, ânyë kə̈ wôn andjê gbɛ̂#17.27 Ndə̂kə̂ to tə̂ yɛ̈yɛ̈ da 26 ëtə̂ 27, nyë dɨ̈ Jen 6.9—7.24.. 28Ârə̂ âwadje ndjë me käko batə̂ losə̂ Lôto: Azü zɨ̈ rə alême lakə̂ ndjo rə, andjë yö rə, kə̂ ka rə, andjë lü rə, kə̈ mbô anda. 29Praâbalë lo nə̈ ndə̂ Lôto wûtu lə̂ Sodômo, Ndjapä wân ngâ gbölö tïmï wo la sûfre bhâ lafô âjrê pâ andjê batə̂ nyïvrö, kə̈ jû andjê gbɛ̂#17.29 Ndə̂kə̂ to tə̂ yɛ̈yɛ̈ da 28 ëtə̂ 29, nyë dɨ̈ Jen 18.20—19.25.. 30Rə nə̈ âmbo ndjë me käko lo nə̈ ndə̂ Modô ndə̂ Akrə madje tə̂ yê lə̂ la azü.
31«Tə̂ lo nə̈ lâme, akrə ndə̂ tche sə̂ tchâmbrönda ndə̂ yê də lafô, ânyë arə ndə̂ yê wâ bhâ tchâalê, tchê liabô tee ndə̂kə̂ kʉ rə̂-a#17.31 Nyë dɨ̈ Mat 24.17.. Âdəndjë akrə ndə̂ tche sə̂ bhâlə̂ kɨ̈ndɨ̈, tchê doabô tə̂ yê atə̂lə̂ manda ndə̂ yê tee-a. 32Äwäpä pö ndə̂ ɛ̈chë ndə̂ Lôto#17.32 Nyë dɨ̈ Jen 19.26. te lə̂ nyê. 33Akrə ndə̂ tche pû köbo ndə̂kə̂ bata tchîsûwu ndə̂ yê, tchê yuadje köbo nə̈. Praâbalë akrə ndə̂ tche yû köbo tchîsûwu ndə̂ yê, tchê batadje rə̂. 34Më to rə̂ sə̈ nyê: Lə̂ bütchî âtə, azü bïchuû âloadje balë pâ ngâ kʉ̈ngrʉ; a âzadje ngânə̈ balë, ânyë kə̂ gbotə̂ balë nə̈. 35Aɛ̈chë bïchuû âsəadje lakə̂ nu rə; a âzadje ngânə̈ balë, ânyë kə̂ gbotə̂ balë nə̈. [36Aköchë bïchuû âsəadje bhâlə̂ kɨ̈ndɨ̈; a âzadje ngânə̈ balë, ânyë kə̂ gbotə̂ balë nə̈#17.36Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 36 lâme wâbo lə̂nə̈-a. Nyë dɨ̈ Mat 24.40..]» 37Adjisîpili yû tchë päkëdə̂: «Gbölö Gbïɛ̈, rə nə̈ lâme âmbo bhâ tchêbâ?» Tche tô rə̂ sə̈ andjê päkëdə̂: «Sə̂nə̈ ndə̂ akrʉkrʉ wa tâ, sə̂nə̈ lâme akânda paladje tə̂ andjê tâ#17.37 Nyë dɨ̈ Job 39.30..»
Currently Selected:
Lûke 17: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
