Lûke 15

Ndoka pâ ɛ̈bro-ngbaga ndə̂ tche yû ânyë a gbô tchë

(Mat 18.12-14)

1A-earə̂ kə̂ pala makətche-lapöo la a-earə̂ ngbongbo rə gbɛ̂ nə̂ ndola Jezü ndə̂kə̂ dje tchë. 2Afarizïɛ̈n la a-earə̂ kə̂ nyisə̂ ndïɛ̈ sə̂ lakə̂ jende tchë lakə̂ tô rə̂ päkëdə̂: «Köchë âtə mbö la sə̂ a-earə̂ ngbongbo rə, ânyë kə̈ sə̂ lakə̂ zɨ rə la andjê!» 3Käko Jezü tô ndoka âtə sə̈ andjê päkëdə̂: 4«Tchanə̈bâ köchë nə̈ lə̂ gbâtə̂ nyê kä ndə̂ âwâ la aɛ̈bro-ngbaga ngbangbo balë, ânyë ngânə̈ balë lə̂ gûtə̂ andjê yû, ânyë tche gbôâbô gbôtə̂ adɨ̂ nə̈ tə̂ azü vöanə̈ la lə̂ könô gbɛ̂ tchêpâ nə̈ mïndûu manə̈ voanə̈ (99) lə̂ përä andjê, kə̂ e kə̂ pu tchanə̈ balë ndə̂ tche yü lâme zoo, kə̈ gbo tchë ânyë? 5Âdə tche âgbo tchë, kə̂ wa la mômô, tche âza ɛ̈bro-ngbaga lâme ëpâ kängä yê, 6kə̂ gu la tchë atə̂ndə̂ yê. La tchêngbâ nə̈ tche e araagü nə̈, la azü ndə̂ andjë lô ndola tchë, kə̂ to rə̂ sə̈ andjê päkëdə̂: ‹Nyë nə̈ azə̈ vû ngɨ̈, bëte ɛ̈bro-ngbaga ndə̂ mê ndə̂ tche yû alême, më gbô tchë nə̂!›

7«Käko ndjë, më tö rə̂ sə̈ nyë: Ngâ gbölö mômô wadje bhâ lafô, bëte earə̂ ngbongbo rə balë ndə̂ tche gbotə̂ bəndɨ kə̂ mbo rə ndə̂ yê. Mômô lâme rö andə̂ adjîrə̂ azü tə̂ azü voanə̈ la lə̂ könô gbɛ̂ tchêpâ nə̈ mïndûu manə̈ vöanə̈ (99) ndə̂ andjë wäbô wâ la gʉ ndə̂kə̂ gbotə̂ bəndɨ köbo andjê.»

Ndoka pâ makətche ndə̂ âyû ânyë a gbô rə̂

8«Âdəndjë rə̂ ndə̂ ngâ ɛ̈chë âwa la mîɛ̈-makətche lə̂ könô gbɛ̂, ânyë ngânə̈ balë yû, tchê zabô wo lə̂ lâmba, kə̂ gro tchâalê ndə̂ sɨ̂nyî nə̈, lakə̂ pu rə̂ zoo, kə̂ gbo rə̂ ânyë? 9Âdə tche âgbo rə̂ nə̂, kə̂ e araagü nə̈, la azü ndə̂ andjë lô ndola tchë, kə̂ to rə̂ sə̈ andjê päkëdə̂: ‹Nyë nə̈ azə̈ vû ngɨ̈, bëte mîɛ̈-makətche ndə̂ mê ndə̂ âyû tə̂ mê alême, më gbô rə̂ nə̂!› 10Käko ndjë, më tö rə̂ sə̈ nyê, mômô kä lə̂ gbâtə̂ aânje ndə̂ Ndjapä bëte ngâ earə̂ ngbongbo rə balë ndə̂ tche gbôtə̂ bəndɨ kə̂ mbo rə ndə̂ yê.»

Ndoka pâ bechë ndə̂ tche yû ânyë a gbô tchë

11Jezü kä tô rə̂ päkëdə̂: «Ngâ köchë wä la amodô ndə̂ yê bïchuû. 12Angɨ nə̈ tô rə̂ sə̈ bha nə̈ päkëdə̂: ‹Bha më, amö kʉ andə̂ me nə̈ arə ndə̂ âwâ ndə̂kə̂ pa më gbo rə̂ lâme sə̈ mê.› Käko bha andjê krʉ̂ tchə̂lə̂ arə ndə̂ yê tə̂ amodô ndə̂ yê bïchuû lâme. 13La tchêngbâ kpîɛ̂kpîɛ̂ lö, angɨ nə̈ kâ arə ndə̂ yê lâme gbɛ̂, ânyë kə̈ rô la makətche nə̈ ngrɨ̈ atə̂lə̂ ngâ gö. Bhâye, tche ndɨ̂ arə ndə̂ yê gbɛ̂ lakə̂ mbo angbongbo rə. 14Ndə̂ makətche nə̈ âsə̈ ka tə̂ yê gbɛ̂, ngâ gbölö gʉ tê lə̂ gö nə̈, käko tche wâbo la ngâ rə balë ndə̂kə̂ zɨ rə̂-a. 15Tche ê ndə̂kə̂ pu kua bhândə̂ ngâ akrə gö nə̈. Akrə gö nə̈ lâme wân tchë bhâlə̂ kɨ̈ndɨ̈ ndə̂kə̂ sə pâ akoso ndə̂ yê. 16Tche wä âme la gʉ ndə̂kə̂ zɨ akɨ̈zɨ̂ ndə̂ akoso nə̈ zɨ rə̂ lâme, praâbalë ngâ akrə balë wâbo ndə̂kə̂ za rə̂ sə̈ tchë-a. 17Käko tche sə̂ lakə̂ za küma yê pâ kə̂ sə ndə̂ yê lakə̂ to rə̂ päkëdə̂: ‹A-earə̂ kua ndə̂ bha mê gbɛ̂ kä la kɨ̈zɨ̂ tə̂ gbölösə̂nə̈, ânyë më sə̂ bhâtə lakə̂ tchu la gʉ âtə! 18Mê adjelafô ndə̂kə̂ gu atə̂ndə̂ bha mê, kə̂ to rə̂ sə̈ tchë päkëdə̂: Bha mê, më mbö rə ndə̂ âkôsə̂ Ndjapä ânyë kə̈ kô ndjë sə̂ zə̈, 19më kʉ̂âbo sə̂nə̈ ndə̂kə̂ pa mo ka wûn mê batə̂ modô ndə̂ zə̈-a, amö za mê batə̂ ngâ earə̂ kua ndə̂ zə̈.›

20«Tche âlafô kə̈ gû atə̂ndə̂ bha nə̈. Ndə̂ gbô tchë ndə̂po ngrɨ̈ la nda nə̈, bha nə̈ wûn tchë, ânyë kə̈ wûn nyonyo yê tə̂ gbölösə̂nə̈, tche kpë lə̂ köbo yê, kə̈ tchû tchë kproô ëla krʉ̈ yê lakə̂ a ma yê. 21Modô nə̈ tô rə̂ sə̈ tchë päkëdə̂: ‹Bha mê, më mbö ngbongbo rə ndə̂ âkôsə̂ Ndjapä ânyë kə̈ kô ndjë sə̂ zə̈, më kʉ̂âbo sə̂nə̈ ndə̂kə̂ pa mo wun mê batə̂ modô ndə̂ zə̈-a.› 22Praâbalë bha nə̈ tô rə̂ sə̈ a-earə̂ kua ndə̂ yê päkëdə̂: ‹Nyë ë wândâ wändä kə̈ kâ la ngâ ngrɨ̈ngrɨ̈ lə̂ba ndə̂ âfû kə̈ yû rə̂ ëtə̂ yê. Nyë yü ɛ̈dage ëtə̂ könô yê, la dakpo ëtə̂ da yê. 23Nyë kä la bâgala ndə̂ azə̈ mbô rə̂ pä tchë wâ la jrôâ tə̂ yê lâme, kə̂ won tchë, azə̈ zɨ tchë, ânyë kə̂ mbo kpülü, 24bëte modô ndə̂ mê ndə̂ nyê wun tchë âtə, tche tchû alême nə̂ ânyë kə̈ jô âtə, tche yû alême nə̂ ânyë më kä gbô tchë âtə.› Andjë jêtə̂ kə̂ mbo gbölö kpülü nə̈.

25«Tə̂ lo nə̈ lâme, gbô âyä modô lâme kä bhâlə̂ kɨ̈ndɨ̈. Ndə̂ tche âsə̈ kangbâ yê, kə̈ wûtu ndola nda nə̈, kə̈ djê sɨ̈kɨ̈ ndûgû la ɛ̈ngbä ndə̂ azü da rə̂. 26Tche ê ngâ earə̂ kua balë lə̂ gbâtə̂ a-earə̂ kua nə̈, ânyë kə̈ yû tchë tə̂ rə ndə̂ âmbo lâme. 27Earə̂ kua nə̈ tô rə̂ sə̈ tchë päkëdə̂: ‹Yîngâ zə̈ kângbâ yê nə̂, ânyë bha zə̈ wôn bâgala ndə̂ azə̈ mbô rə̂ pä tche wâ la jrôâ tə̂ yê lâme ndə̂kə̂ pa azə̈ zɨ tchë, bëte tche gbö modô ndə̂ yê ndə̂ gbô tchë sə̂ la sə̂nə̈.› 28Käko tchə̂lə̂ dokʉ̈ modô nə̈ kʉ̂ tchë, ânyë tche kôsə̂ kə̂ li atə̂ tchâalê nə̈. Bha nə̈ wûtu, kə̈ dɨ̂ tchə̂lə̂ ma yê sə̈ tchë ndə̂kə̂ pa tche li. 29Praâbalë tche tô rə̂ sə̈ bha nə̈ päkëdə̂: ‹Wünsa ngâ rə! Më mbö kua ndə̂ zə̈ lə̂ angbängbä angû, më kôâbo sə̂ ma zə̈-a, praâbalë mo zâbo ndjë ngâ kûtiɛ̈ ɛ̈bro balë sə̈ mê ndə̂kə̂ pa më mbo ndjë kpülü la araagü mê-a. 30Gbô rə̂ ndə̂, mo âsə̈ wun modô ndə̂ zə̈ ndə̂ tche kângbâ yê, tchetchë ndə̂ tche ndɨ̈ arə ndə̂ zə̈ gbɛ̂ tə̂ pö ndə̂ aɛ̈chë ndə̂ kua ndə̂ andjê wâ ndə̂kə̂ pu aköchë lâme, mo wôn bâgala ndə̂ azə̈ mbô rə̂ pä tche wa la jrôâ tə̂ yê lâme bëte tchë!› 31Bha nə̈ tô rə̂ sə̈ tchë päkëdə̂: ‹Modô ndə̂ mê, mo kä ndrotə̂ mê logbɛ̂, arə ndə̂ mê gbɛ̂ wä ndjë tə̂ andə̂ zə̈ nə̈. 32Praâbalë azə̈ wä âme ndə̂kə̂ mbo kpülü, kə̂ vu ngɨ̈ bëte yîngâ zə̈ âtə, tche tchû alême nə̂ ânyë kə̈ jô âtə, tche yû alême nə̂ ânyë a gbô tchë âtə!›»

Currently Selected:

Lûke 15: lnl

Highlight

Copy