Mateus 21

Jetusalẽi tä uli ha Jesus a lisipaso noai ĩ ta

Marcos 11.1-11; Lucas 19.28-40; João 12.12-19

1Ĩ na tä kua tä, Jetusalẽi tä uli ha Jesus anö töpö kai atetalo nö, Petöpasié tä uli ha töpö kai walokö tasoma. Töpö kai waloikitö nö, Olipa tä heuma kolo hamö töpö kai sokeaalö tä, Jesus anö kama kai a hua sinomo wi, ĩ ai polakapi töpö simöa tolehelöma. Töpö simönö nö, 2‑Ki ha sai pö kulali, ĩ hamö makö lisipalo nö, jumẽtu a suö pata, jumẽtu a okalo, ĩ na kökö kui kökö õkale, ĩ ma kökö pata taa soatalali kitäö! Ĩ ma kökö pata kusöpalö nö, ma kökö pata täaki solöö! 3Ma kökö pata täaö ha, ai tä aiki, “Wi na makö pi kuu salo, ma kökö kusöa kule?” a kuu ha, “Ipa kaikana tänö kökö naka kulaiö!” makö kuu! Ĩ na makö kuu ha, “Awai. Kökö tälölöö!” töpö kuu kitä‑ ĩ na Jesus a kuuma.

4Sutu upa Teusö a kai wäsä sinomo noai, ĩ anö tä sãökökö noai, ĩ tä kua tolea totiopö, ĩ jumẽtu kökö täa piama. Ĩ na ĩ tä sãökama kuuma:

5‑Sião tä uli pata ha töpö kule, ĩ töpö na ĩ na makö kuu! “Kamakö hai ĩ kaikana tä huu kimi. Jumẽtu a okalo hõo ha a tikäiki nö, a huu kule” ĩ na makö kuu!‑

ĩ na sutu upa ĩ na tä kuuma.

6Ĩ na tä kua tä, Jesus anö ĩ polakapi töpö simöni ha, ĩ töpö hulolö nö, ĩ sai pö ha töpö waloikitö nö, jumẽtu kökö kusöpalömae. 7Kökö kusöpalö nö, Jesus a na ĩ kökö tälölömae. Kökö tälölöhe nö, ĩ kökö hõo na kama töpönö haloi ösö halopo wi, ĩ kökö hõo pata na ĩ ösökö lukököma tä, ĩ ösökö ha Jesus a tikäa soataköma. 8A tikäa soataiki nö, Jetusalẽi tä uli ha a walokö tasopö, a kai huulö pamö töpö satehe epii töpö aiki, ‑Kaikana tä sai pata huu polatiö!‑ töpö pi kuu salo, kama töpö hai ĩ haloi ösö halopo wi, ĩ ösökö paa toleha läatalalöma. Ai töpönö koanata amösö hena kui na, ĩ na ösö hena kui ösö hena pätalalö nö, piliso hamö ĩ ösö hena hila paa naionöma. Kaikana tä sai pata huu ha, ĩ na tä thamatima.

9Tä thamati nö, Jesus a na ai töpö palule ĩ töpö, Jesus a noa ha ai töpö kule ĩ töpö, ĩ na töpö kui, Teusö a na ĩ töpö pewö aiki,

‑Davi a hai ĩ ola tolewö a totiatalo opawöö!

Kawanö wa simöpalö noai, ĩ a totiapala apa totihoö!

Teusö wa totiatalo opawöö!‑

ĩ na lope epii ĩ na töpö kupalo opatima.

10Ĩ na tä kua tä, Jetusalẽi tä uli ha Jesus a walokö tasoma. A waloikitö nö, Jetusalẽi tä uli ha a lisipasoö ha, jetusalẽi tili töpö pewö lalupalo opama. Töpö lalupalo opa nö, ‑A huu pole, ĩ witi ĩ a?‑ ĩ na töpö kuu ha, 11Jesus a na töpö huu naine ĩ töpö aiki, ‑Hi a hai, Teusö a kai wäsä sinomo wi, ĩ Jesus a. Kaliléia tä uli pata ha Nasaté tä uli kule, ĩ tä uli ha Jesus a kua wi, ĩ a‑ ĩ na ĩ töpö kuu hö̃töoma.

Teusömo wi a sai ha töpö kule, Jesus anö ĩ töpö sasupalö noai ĩ ta

Marcos 11.15-19; Lucas 19.45-48; João 2.13-22

12Ĩ na tä kua tä, Teusömo wi a sai ha Jesus a lisipasoma. A lisipalo nö, sitipa kökö ha wani tä totoma sinomo wi ĩ töpö, sitipa kökö ha wani tä täalali wi ĩ töpö, ĩ na töpö kui, Jesus anö ĩ töpö pewö sasua kopalöma. Sitipa kökö totoa nomöhöa hö̃töo soatalo sinomo wi, ĩ töpö hai ĩ hii tiki ha sitipa kökö maketa wi, Jesus anö ĩ tiki pata nomöhöpamani, Teusö a na holeto kökö wai totoköpö, sitipa kökö noa ha ĩ holeto kökö wai totoa sinomo wi ĩ töpö hai ĩ lotami tiki nomöhöpamani, ĩ na tiki nomöhöa thapamanöma. 13Ĩ na tiki nomöhöa thapamanö nö, Jesus aiki, ‑Teusö a kuu noai, Teusö tä waheta na ĩ tä sãökama kua. “Ipa sai a hai, Teusö sa na sanöma töpö hapalo sinomo wi ĩ a sai” ĩ na tä sãökama kua kule maaki, hi a sai hai, thomömo wi ĩ töpö hai ĩ sai ma thama pikia kule‑ ĩ na Jesus a kuuma.

14Ĩ na Jesus a kuu nö, ĩ na tä kua tä, Teusömo wi a sai ha Jesus a kua soa tä, tä tapa mai ĩ töpö, töpö huu mi ĩ töpö, Jesus a na ĩ töpö kai walopatima. Töpö kai walopati noai, Jesus anö ĩ töpö toapama kotioma. 15Ĩ töpö toapama kotioö ha, ulu töpö aiki, ‑Davi a hai ĩ ola tolewö Jesus a na, “Wa totiatalo opawöö!” ĩ na makö pewö kuupököö!‑ ĩ na ulu töpö lalupalo opa nö, ĩ na töpö wai kuuma. Ĩ na tä kua tä, Teusö a täpä sinomo wi ĩ pata töpö, Moisés a kai wäsä sinomoti wi ĩ töpö, ĩ na töpö kui töpönö Jesus anö tä aipöamati pole, ĩ tä taa nö, Teusömo wi a sai ha ulu töpö a lalupalo hapalo pole, ĩ ta hininö nö, töpö hĩsosoma. 16Töpö hĩsolo nö, Jesus a na, ‑Ulu töpö kuu pole, ĩ wa ta hini kule?‑ ĩ na töpö kuu ha, Jesus aiki hö̃töwö, ‑Awai ta pi kuu mi sai. Teusö tä waheta aiki, “Teusö anö ulu töpö pi wai hatukupamani ha, Teusö a na, ‘Wa totiatalo opawö’ ĩ na ulu töpö kuu makoka apaö” ĩ na Teusö tä waheta kuu. Ĩ tä waheta kuu wi, ĩ ma ta hini hãto maama?‑ ĩ na Jesus a kuuma. 17Ĩ na Jesus a kuu nö, Jetusalẽi tä uli ha a husolo nö, Petânia tä uli ha a hulasolöma. Petânia tä uli hamö a waloikitö nö, ĩ ha a kuköma.

Jesus anö piku ti häwämanö noai ĩ ta

Marcos 11.12-14, 20-25

18Ĩ hena tä, Jetusalẽi tä uli ha a kõo sapa koonö tä, a oio opama. 19A oi ipö salo, piliso kasö ha piku tiki öpale, ĩ tiki öpa talalö nö, a ekua soataköma. A ekua soataköma maaki, hii ti mo mai ha, pili nakö hena sino kuo sisama. Pili tiki henakö sino kuo sisa ha, ĩ ti na Jesus a hapalo nö, ‑Waiha au pili mo lalo kota mai kitäö!‑ Jesus anö ĩ na piku tiki noa wani thama. Ĩ na ĩ tiki noa wani thalöma, ĩ piku tiki häwäa soasoma.

20Tiki häwäa soaso noai, Jesus a kai a hua sinomo wi ĩ töpönö ĩ tä taa nö, ‑Kilatiha! Hi tiki häwäa soa nö kilitalohe‑ ĩ na töpö kuuma.

21Ĩ na töpö kuu ha, Jesus aiki, ‑“‘Teusö a lotete epö’ makö pi kuu tä, ‘Teusö a lotete hãto mai kitäö!’ ĩ na makö pi kuu mi tä, hi piku sa tiki thama kuahe na, kamakönö ĩ na ma tä thama hö̃töo kitä. ‘Teusö a lotete epö’ ĩ na makö pi kuu totio nö, hi heu tä öpale, ĩ heu tä ha makö hapalo nö, ‘A hoköpalo nö, kosoto u pata ha a keikiö!’ makö kuu ha, heu tä pata maaki, kosoto u pata ha tä pata kepaso kitä” ĩ na sa kuu kule. Sa holisi mai kitäö! 22“Teusö a lotete epii ĩ anö sa hini kitäö!” ĩ na makö pi kuu totioö ha, Teusö a na makö hapalo nö, ma tä naka wi ĩ ma tä täa hö̃töli kitä‑ ĩ na Jesus a kuuma.

‑Witi pili anö wa simököma?‑ pata töpö kuu noai ĩ ta

Marcos 11.27-33; Lucas 20.1-8

23Ĩ na Jesus a kuu nö, Teusömo wi a sai ha a hua konasolöma. A hua kononö nö, ĩ ha a waloikitö nö, töpö pi hatukamati tä, Teusö a täpä sinomo wi ĩ pata töpö, juteu pata töpö, ĩ na töpö kui, Jesus a na ĩ töpö ekua ateiki nö, ‑Witi pili anö wa simöaö ha hi wa tä aipöamatii?‑ ĩ na töpö kuuma.

24Ĩ na töpö kuu ha, ‑Kamakö na sa tä hini hö̃töo pia kule. Kamakö na sa ta hini ha, kamakö hö̃töwö, “Ĩ naköö!” makö kuu hö̃töoö ha, “Witi pili anö wa simöaö ha hi wa tä aipöamatii?” makö kuuhe, ĩ tä na, “Ĩ anököö!” sa kuu hö̃töo kitäö!‑ ĩ na Jesus a kuuma.

25Ĩ na a kuu nö, ‑Witi pili anö João a simöaö ha, ĩ anö töpö mãi õmatima? Teusö anökö hãtowö? Sanöma töpönökö hãtowö? Wi na makö pi kuu kule?‑ ĩ na Jesus a kuuma.

Ĩ na a kuu ha, kama töpö hapalo nomöhöpaso nö, ‑“Teusö anö João a simököma” ĩ na makö kuu ha, Jesus aiki hö̃töwö, “Ĩ na makö kuu manu kule, wi na makö pi kuu salo, João ma kai a hini totio maama?” ĩ na Jesus a kuu hö̃töo kitä.

26Ĩ na tä kua tä, “Sanöma töpönö päwö João a simökömaö!” makö kuu ha, ai töpö pewönö makö wanipo matimöö!‑ ĩ na töpö kuuma. ‑“João a patanö Teusö a kai wäsä totio wi, ĩ a sai kuo totioma” ĩ na ai töpö pewö kupaloti saiö!‑ ĩ na ĩ töpö pi kuu salo, ‑Sanöma töpönö päwö João a simököma‑ ĩ na ĩ töpö kuu kili ipama. 27Töpö kuu kili ipa salo, ‑Kui. Sama tä tai mi‑ Jesus a na ĩ na ĩ töpö kuuma.

Ĩ na töpö kuu ha, ‑“Witi pili anö wa simöaö ha, hi wa tä aipöamatii?” makö kuu kule maaki, kamakö na sa kuu hö̃töo mai kitäö!‑ ĩ na Jesus a kuuma.

Polakapi pelupö töpö kua noai ĩ ta

28Ĩ na Jesus a kuu nö, ‑Sa ta wäsä piale, ĩ tä na wi na makö pi kuu kule?‑ ĩ na a kuuma. Ĩ na a kuu nö, ‑Pö̃ a hai ĩ polakapi pelupö kökö kuoma. A thaa somakö noai ĩ a na, “Pösai. Huki upa mokö kulati, ĩ a hikali ha wa kalipalo pia kulatiö!” ĩ na pö̃ a kuu ha, 29“Ĩ ha sa kalipalo wani ipöö!” ĩ na pelupö pata a kuu hö̃töoma. Ĩ na a kuu hö̃töa kule maaki, waiha a pi tapoiki nö, a kalipalomö hulasolöma.

30Ĩ na tä kua tä, a kalipalomö hulasolö noai ĩ a hai ĩ poosa a na pö̃ aiki, “Pösai. Upa mokö kulati ha a kalipalotöö!” ĩ na pö̃ a kuu ha, “Awai. Sa hulasolö kitäö!” ĩ na poose a kuu hö̃töoma. Ĩ na poose a kuu hö̃töa kule maaki, a huu maama‑ ĩ na Jesus a kuuma.

31Ĩ na a kuu nö, ‑Witi anö pö̃ a kai a hinia totilöma?‑ Jesus a kuu ha, ‑Pepala anökö‑ ĩ na töpö kuu hö̃töoma.

Ĩ na töpö kuu ha, Jesus aiki, ‑“Pata töpö na sitipa totoköpö, ĩ sitipa täta sinomo wi ĩ töpö, sitipa noa na suö töpönö wano töpö sapäkama hätäpo wi ĩ töpö, ĩ na töpö kui, Teusö a kaikanamo wi ĩ ha ĩ töpö lisia somataso kitä. Sitipa täa sinomoti wi ĩ töpö, suö töpönö wano töpö sapäkama sinomo wi ĩ töpö, ĩ na töpö kui töpö wanisala apa wi maaki, kamakö hai, Teusö ulupö makö kupo paio mai ha, ĩ töpö hai, Teusö ulupö töpö kua somapaso kitä” ĩ na sa kuu kule. Sa holisi mai kitäö! 32João Pasisöta anö piliso salili ipii ĩ tiso mömamö huu noai, ĩ a na, “Pitili wa” makö pi kuu maama. Sitipa täa sinomoti wi ĩ töpö, wano töpö sapäkama hätäpo wi ĩ suö töpö, ĩ na töpö kui töpönö wanisala tä thaa noai, ĩ töpö aiki, “João Pasisöta anö Teusö ta wäsä wi ĩ ta pitili” ĩ na töpö pi kuu nö, ĩ ta hinia totilöma. “João Pasisöta a kai a pitili” ĩ na töpö kuu noai, ĩ ma ta hinima maaki, “Häö. Wanisala sa tä thaa kota wani ipö” ĩ na makö kuu naio maama. “Wanisala sa tä thaa wani” ĩ na makö kuu nö, makö pi tapomo sapamo kõoma aköna, “Teusö ta pitili” ĩ na makö kuu naio noa kipi‑ ĩ na Jesus a kuuma.

Töpö kalipalo haitio noai ĩ töpönö kaikana tä hai ĩ pelupö a säpalö noai ĩ ta

Marcos 12.1-12; Lucas 20.9-19

33Ĩ na Jesus a kuu nö, ‑Ai uni sa ta wäsä pia kule. Ĩ ta hiniheö! Pata tänö upa totokö satehe epii totokö tösama. Mositimö a kui na, ĩ na upa mokö kui, upa totokö ha mokö salolo wi, ĩ mokö tösatima. Ĩ mokö tösa nö, ĩ totokö kuo pamö tä hokoloköma. Tä hokolokö nö, upa mokö kopekeama pia salo, maa ma pata thaköma. Maa ma pata thakö nö, ösö ha tikio wi tiki matakali thaa nömököma. Matakali tiki thaa nömökö nö, ai töpö na, “Hi ipa hikali a ha pö kalipalo hisaö! Waiha au noa sa tä totoki kitäö!” ĩ na a pata kuuma. Ĩ na a pata kuu nö, a hama hulasolöma. 34A hama pata hulolö nö, tiko tä uli ha a pata kutio tasoma. A kutio wi, ĩ tä tetea apöpaso noai ha, kama hai hikali a na upa mokö patasipö öpö tä, polakapi kama hai ĩ upa mokö suli pia salo, ĩ pata tänö töpö nokapalamati wi ĩ polakapi ai töpö simöa konöma. 35Ĩ töpö kopi ha, töpö hikalimo haio wi ĩ töpönö töpö huölö nö, ai tä soalali, ai tä säpali, maa manö ai a säsä pamö, ai tä säpali, ĩ na töpö thamama. 36Ĩ na töpö thamaö ha, pata tänö satehe epii ai töpö simöa nömönöma. Töpö simöa somanö noai, ĩ töpö peama thama noai na, ĩ na ĩ töpö peama thama nömöo tasoma. 37Ĩ na ĩ töpö peama thama nömöo tasoma ha, pata tänö kama hai ĩ pelupö a simöa nömönöma. “Ĩ töpönö ipa ulu a peama mai kitäö!” ĩ na a pi pata kuu nö, kama hai ĩ ulu a simöa nömöpalö tasoma. 38A simöa nömöa kopalö taso wi, töpö hikalimo haitio wi ĩ töpö na a waloa nömöa kõkö tasoma. A walo tasoa tä, töpö hikalimo haitio wi ĩ töpönö a talalö nö, “Pata tä hai ĩ pelupö a huu kulatiö! Ma säpalöpöö! Ma säpalö nö, hi hikali ma pata sua asalöpöö!” ĩ na töpö kuuma. 39Ĩ na töpö kuu nö, pata tä hai ĩ pelupö a huölö nö, hikali a kasö ha a läkälölö nö, a säpalömae‑ ĩ na Jesus a kuuma.

40Ĩ na Jesus a kuu nö, ‑Önö kutenö, pata tä kopo nö, töpö hikalimomati noai, ĩ töpö na wi na pata tä kua kitä?‑ ĩ na a kuuma.

41Ĩ na a kuu ha, ‑A pata kopo nö, töpö hikalimoma ti noai ĩ töpö säa hö̃töpali kitä. Töpö säa hö̃töpalö nö, ai tiko töpö na, “Ipa hikali a ha pö kalipaloö! Waiha noa sa tä totoki kitäö!” a pata kuu kitä. A pata kuu ha, “Awai” töpö kuu nö, töpö hikalimo nö, nii tä patasipö öpö tä, pata tänö nii tä nakaö ha, ĩ töpönö wani ipii nii tä simöa totiatala apa asa kuki kitäö!‑ ĩ na töpö kuuma.

42Ĩ na töpö kuu ha, Jesus aiki, ‑Teusö tä waheta kuu noai, ĩ ma tä sãökama möö hãto maama?

“Maa ma sai thaa wi ĩ töpönö ai ma hosalö noai, ĩ ma toita satio opama. Ĩ manö sai a lototoama totio wi, ĩ ma. Ĩ na tä kua wi, Teusö anö ĩ tä thama. Teusö anö tä thaa wi ĩ tä totiatalo opaö”

ĩ na Teusö tä waheta kuu‑ ĩ na Jesus a kuuma. 43Ĩ na Jesus a kuu nö, ‑“Kamakö na Teusö a kaikanamo pasio mai kitä. Teusö a kai a hini totiatalo opa asa wi ĩ töpö na Teusö a kaikanamo asa kitä” ĩ na sa kuu kule. 44Maa sa ma katehahe, Teusö anö a kaikanamoma wi ĩ a uni hai, ĩ maa ma. Ĩ maa ma na ai tä kaepaköma, a pewö saokipasoö. Ai tä na ĩ maa ma keköma, ĩ a nakasia totipasoö‑ ĩ na Jesus anö uni ta wäsä nö, ĩ na a kuuma.

45Ĩ na Jesus a kuu ha, Teusö a täpä sinomo wi ĩ pata töpö, patiseu töpö, ĩ na töpö kui töpönö ĩ uni tä pewö a hininö nö, ‑Jesus anö makö a kateha nö, ĩ uni tä pewö a thaa nö, ta wäsä kule ta o‑ ĩ na töpö pi kuuma. 46Önö kutenö, Jesus a peama pia salo, a hua pi topa apama. A hua pi topa apama maaki, ai juteu töpö satehe epii töpö na ĩ juteu pata töpö kili ipa salo, Jesus a hua maama. Juteu töpö satehe epii töpö aiki, ‑Jesus anö Teusö a kai wäsä totio wi ĩ a‑ ĩ na ĩ töpö pi kuuma kutenö, pata töpönö Jesus a hua maama.

Currently Selected:

Mateus 21: xsu

Highlight

Copy