Jọnụ 8

Isi Nke Ẹsatọ

Okpoho Hụn Zọ ụkụ ye ọfịa

1Jesu nkẹ nọ shi Ugu Olivu. 2Ụzụtụntụn, o kinhẹnzi Ụlọ-nsọ, ndị hụ ile nọ bịa d'e kunrun ẹ, ọ nọ nọdị alị, kuzimẹ wẹ.

3Ya kẹ ndị-nkuzi Iwu lẹ ndị Itu-Farisi nọ duhẹ okpoho ohu wẹ nwụn ebe ọ rị a zọ ụkụ e ye ọfịa. E we w'ẹ tumẹ ihun ịhịan ile, 4wẹ nọ sị Jizọsị, “Onyẹ-nkuzi, wẹ nwụn okpohoni ebe ọ rị a zọ ụkụ e ye ọfịa. 5Imẹ Iwu, Mozizi sị ẹnyi gi ọmụma magbu okpoho mẹ ihiẹnni o mẹ. Kị yụ nwẹn ku?”

6Kanị wẹ rịhụ a chọ ihiẹn rị a ọnụ nị wẹ hụn ihiẹn w'e gi ma a ikpe. Ya kẹ Jizọsị nọ tukun, gi mkpịnsịn-ẹka a demẹ ihiẹn alị. 7A tọ wẹ a jụ a, ọ nọ lihi ọtọ, sị wẹ, “Onyẹ hụn mẹtulẹni njọ imẹ ụnụ ile ya bu ụzọ ma a ọmụma.” 8Ya ọ nọzị tukun, demẹ ihiẹn alị. 9A nụ wẹ ihiẹn ọ za, wẹ ile nọ pụma ohu-ohu — ndị kanị bu ụzọ pụma, d'e ru n'ọ họdụ Jizọsị sụọ; okpoho hụ turuhụkwọ ihun Jizọsị ebẹhụ. 10Ya Jesu nọ lihi ọtọ, sị a, “Okpoho, elebe wẹ rị? Onwọnni onyẹ ma ị ikpe?” 11Ọ nọ sị, “Diọkpa, onwọnni!” Jizọsị nọ sị a, “Mmẹ nwẹn amakọ ị ikpe. E jẹn. Gha kikẹnni jẹnmẹ, emẹzilẹ njọ.”

Jizọsị Wụ Ukpẹ Ụwa

12Ya kẹ Jizọsị nọ sịzị ndị ahụn o te rị a kuzi, “Mmẹ wụ ukpẹ ụwa. Onyẹ rị e sọnni m aghakọ imẹ ishi, kama, o sikọ d'e nwọn ukpẹ ahụn e ye ndụn.”

13Ndị Farisi nọ sị a, “Ị rị nwan a shịanị enwẹn i ẹri, ya wụ ẹlẹ hụn wẹ e gi dọn.”

14Jesu nọ sị wẹ, “Ọsụọn'a nị m shịanị enwẹn m ẹri, ẹri m furu w'e gi dọn, makẹlẹ a marịnghọ m ebe m gha bịa lẹ ebe m shikọ. Kanị ụnụ amarịn ebe m gha bịa mọbụ ebe m shikọ. 15Ụnụ a han eṅẹn kẹ ịhịan mmaka. Onwọnni onyẹ m'a hannị eṅẹn. 16Ọ sụọdẹn'a nị m han eṅẹn, ezigbo eṅẹn rọ, makẹni ẹlẹ mmẹ sụọ han a, mmẹ lẹ Chuku-Nẹdi hụn zihẹni m han a. 17E degụọdẹ w'a imẹ Iwu ụnụ nị ẹri mmadụ ẹbụọ shịa kẹ wẹ gi e dọn. 18M rị a shịanị enwẹn m ẹri; Nẹdi m hụn zihẹni m rịzịkwọ a shịanị m ẹri.” 19Ya wẹ nọ sị a, “Ebe nẹdi i ahụn rị?” Jesu nọ sị, “Ụnụ amarịn m, ụnụ amarịn Nẹdi m. Omẹni ụnụ te marịn m amarịn, nkẹ ụnụ a marịnzịkwọ Nẹdi m.”

20Ogẹn Jesu gi ku ihiẹnni, ọ rị ebe w'e buche oyiye imẹ ụlọ-nsọ a kuzi, bụ onwọnni onyẹ saẹka nwụnrụn a makẹni ogẹn ẹ e ke ru.

Ebe Jesu Gha Bịa Lẹ Ebe O Shikọ

21Ya Jizọsị nọzị sị wẹ, “M pụkọ apụkọ; ụnụ jẹnkọ d'a chọ m, kanị ụnụ jẹnkọ d'a nwụntọ imẹ njọ ụnụ. Ụnụ asakọ ẹka bịa ebe m jẹnkọ.”

22Ndị Ju hụ nọ sị, “Ọ chọdẹ nwan n'o gbu enwẹn ẹ ra? Hụnnị ọ rị a sị, ‘Ụnụ asakọ ẹka bịa ebe m jẹnkọ’?”

23Jizọsị nọ sị wẹ, “Ụnụ gha ibe alị bịa, kalẹ m gha elu bịa; ụnụ wụ nke ụwanị, kanị ẹlẹ m nke ụwanị. 24Ya haịn m gi gwa ụnụ nị ụnụ sikọ d'a nwụntọ imẹ njọ ụnụ. Ụnụ jẹnkọ d'a nwụntọ imẹ njọ ụnụ mmanị ụnụ kweri nị m wụ Onyẹ M Wụ.”

25Wẹ nọ sị a, “Onyẹ k'ị wụ?” Jesu nọ sị wẹ, “Onyẹ hụ m gwa ụnụ isi mbidọn. 26M nwọn ihiẹn bu ọda nkẹ m'e ku ma ụnụ ikpe; kanị, onyẹ zihẹni m furu wẹ gi e dọn ẹnya, m'a gwahụ ụwa ihiẹn m nụ ọnụ a.”

27Kanị aghọtanị wẹ nị Chuku-Nẹdi k'ọ rị e ku.

28Ya Jizọsị nọ sị, “Ogẹn ụnụ e gi weshi Nwa nke Ịhịan elu kẹ ụnụ k'a marịn nị m wụ Onyẹ M Wụ, nị m'ara gi uche m mẹ ihiẹn ọwụlẹ, kama, m rị a gwa ụnụ ihiẹn ndịnị kẹ Nẹdi m dọn kuzi m. 29Onyẹ hụ zihẹni m nọyeni m anọyeni; ọ latọnị m, makẹni ogẹn ile kẹ m gi e mẹ ihiẹn a sụọn'a.”

30Ogẹn o gi rị e ku ihiẹn ndịnị, ndị bu ọda nọ kwerin'ẹ.

Ezioku Jẹnkọ D'e Mẹ Ụnụ Weri Enwẹn Ụnụ

31Ya kẹ Jizọsị nọ sị ndị Ju hụn kwerinin'ẹ, “Omẹni ụnụ e sọnsọnmẹ nkuzi m, ụnụ wụ ndị nsọnmazụụn m nke-esi; 32ụnụ jẹnkọ d'a marịn ezioku, ezioku a tọpụ ụnụ ẹgbụn-igbọn.”

33Wẹ nọ sị a, “Ụmụ Ebraham kẹ ẹnyi wụ; ẹnyi awụtuni igbọn ịhịan. K'ị rị a sịnị, ‘Ụnụ jẹnkọ d'e weri enwẹn ụnụ’?!”

34Jesu nọ sị wẹ, “Ezioku kẹ m rị a gwa ụnụ, onyẹ hụn e mẹ njọ wụ igbọn njọ. 35Igbọn ara nwọnsọnmẹ ọnọdị imẹ ezi-lẹ-ụlọ, kanị, nwa e nwọnsọnmẹ ọnọdị imẹ ezi-lẹ-ụlọ. 36Ya wụ nị Nwa Osolobuẹ tọpụ ụnụ ẹgbụn-igbọn, ụnụ e weri enwẹn ụnụ nke-esi. 37A marịnghọ m nị ụnụ wụ ụmụ Ebraham, kanị ụnụ rị nwan a chọ nị ụnụ gbu m, makẹni oku m arị a ban ụnụ obi. 38M rị e ku ihiẹn m hụn ẹka Nẹdi m; kanị ụnụ nwẹn rị e mẹ ihiẹn ụnụ nụ ọnụ nẹdi ụnụ.”

39Wẹ nọ sị, “Ebraham wụ nẹdi ẹnyi.”

Jesu nọ sị wẹ, “Omẹni ụmụ Ebraham kẹ ụnụ wụ, nkẹ ụnụ hụ e mẹ ihiẹn Ebraham mẹ. 40Kanị ụnụ rị nwan a chọ nị ụnụ gbu m, onyẹ hụn gwa ụnụ ezioku ọ nụ ọnụ Osolobuẹ. Ebraham emẹni ẹrịra! 41Ihiẹn nẹdi ụnụ e mẹ kẹ ụnụ rịhụ e mẹ.”

Ya wẹ nọ sị a, “Ẹnyi ẹlẹ ụmụ ọwụ, Osolobuẹ sụọ wụ Nẹdi ẹnyi.”

42Jizọsị nọ sị wẹ, “Omẹni Osolobuẹ te wụ Nẹdi ụnụ, nkẹ ihiẹn m a sụọ ụnụ, makẹni m gha ẹka Osolobuẹ bịa; ịya mẹ m nwan rị ebeni. Ẹlẹ mmẹ gi ihiẹn ẹka m bịa, ịya zihẹ m. 43Kị haịn ụnụ gilẹni a ghọta ihiẹn m rị e ku? Ụnụ arị a ghọta makẹni ụnụ ara s'ẹka gọn ntịn oku m.

44“Ụnụ wụ nke Ekwensụ nẹdi ụnụ. Ihiẹn nẹdi ụnụ chọ kẹ ụnụ chọ nwan nị ụnụ mẹ. Izighẹ k'ọ wụ gha isi mbidọn lala; ọ kwadọntuni ezioku — makẹni ezioku arị imẹ ẹ. Ọ gha a tụ ntụ, onwọnni ihiẹn ọ kpọ a, makẹni onyẹ ntụ lẹ nẹdi ntụ k'ọ wụ. 45M rị e ku ezioku haịn ụnụ gilẹni nwan kweri ihiẹn m rị e ku. 46Imẹ ụnụ ile, onyẹ k'a saẹka ghọsị nị m mẹ njọ? Omẹni ezioku ke m rị a gwa ụnụ, kị haịn nwan ụnụ gilẹni kweri ihiẹn m rị e ku? 47Onyẹ wụ nke Osolobuẹ e gi oku Osolobuẹ e dọn. Ụnụ ẹlẹ nke Osolobuẹ haịn ụnụ gilẹni e gi oku Osolobuẹ e dọn.”

Jizọsị Lẹ Ebraham

48Ndị-ndu ndị Ju nọ sị a, “Ẹnyi e kun'ẹ tan n'ị wụ onyẹ Sameria, nị eje-mmọn rị imẹ i?”

49Jesu nọ sị, “Eje-mmọn arị imẹ m; m hụ e ye Nẹdi m ọghọ, ụnụ nwẹn hụ a kpari m. 50Kanị ẹlẹ m rị a chọ onyẹ e ye m ọghọ, makẹni hụn e ye m ọghọ hụ a; ịya k'a han eṅẹn. 51Ezioku kẹ m rị a gwa ụnụ, onyẹ mẹ ihiẹn m ku ahụnkọ ọnwụn, kaka.”

52Ya kẹ ndị Ju nọ sị a, “O wegụọ nwan ẹnyi ẹnya nị eje-mmọn rị imẹ i! Ebraham lẹ ndị-amụma a nwụnhụnghọ, kanị ị sị, ‘Onyẹ mẹ ihiẹn m ku ahụnkọ ọnwụn.’ 53Ebraham nẹdi ẹnyi a nwụnhụnghọ, ndị-amụma a nwụnhụnzịghọ; ịyụ kazị wẹ? K'ị rịdẹ nwan a kpọ enwẹn i?”

54Jizọsị nọ sị, “M ye enwẹn m ọghọ, ọghọ hụ la iwi. Nẹdi m wụ hụn e ye m ọghọ, onyẹ nwẹn ụnụ sị ‘Ịya wụ Chuku ẹnyi’, 55bụ ụnụ amarịn a; kalẹ mmẹ nwẹn a marịnghọ a. M sị amarịn m'a, a wụrụ m onyẹ ntụ kẹ ụnụ; kanị a marịnghọ m'a, ihiẹn ọ sị m mẹ kẹ m'e mẹ. 56Ọ rịkẹnmẹkẹ nẹdi ụnụ kanị wụ Ebraham n'ọ hụn ogẹn m; ogẹn o gi hụn a, ẹfọ nọ sụọ a ụsụọ.”

57Ya ndị Ju hụ nọ sị a, “Y'a hụnọlẹ Ebraham bụ y'e ke ru ahụa iri-kwasị-ọgụnnaị?!”

58Jesu nọ sị wẹ, “Ezioku kẹ m rị a gwa ụnụ, m wụ Onyẹ M Wụ nị wẹ d'a mụ Ebraham.”

59Ya wẹ nọ tụtụrụ ọmụma nị wẹ magbu ẹ, kanị Jesu nọ gi nzuzue, gha imẹ Ụlọ-nsọ gepụ.

Currently Selected:

Jọnụ 8: ikkBI

Highlight

Copy