Jọnụ 17

Isi Nke Mmẹsa

Ekpere Jizọsị Mẹni Ndị Nke Ẹ Ile

1Ogẹn Jizọsị gi kugụ ihiẹn ndịnị, ọ nọ bu ẹnya zinmẹ elu-igwee, sị, “Baba, ogẹn hụ e rugụọ! Ye Nwa ị ọghọ, kẹni Nwa ị gi ẹ wẹhẹn'i ọghọ 2nọkẹ kẹ i dọn bu ịhịan ile che okpuru ẹ kẹni o ye ndị ile i ye ẹ ndụn itẹbitẹ. 3Ọnwan wụ ndụn itẹbitẹ: ịmarịnn'ị, Chuku hụn ya sụọ wụ Chuku nke-esi lẹ ịmarịn Jizọsị Kraịstị hụn i zihẹ.

4“E yegụọ m'ị ọghọ imẹ ụwanị ghahanị ịrụnchanrịn ọrụn i ye m rụn. 5Baba, yezi m nwan ọghọ ebe ị rị, ọghọ hụ m nwọn ebe ị rị nị ụwa d'e bidọn.

6“E mẹgụọ m ndịnị ị gha imẹ ụwa weye m marịn ẹfan ị. Ịyụ nwọn wẹ, ị nọ we wẹ ye m; e mẹgụọ wẹ ihiẹn i ku. 7A marịngụọ wẹ nwan nị ihiẹn ile i ye m gha ẹka ị bịa, 8makẹlẹ a gwagụọ m wẹ ihiẹn ndị hụ ị sị m gwa wẹ. A nabanhangụọ wẹ oku ndị hụ; a marịngụọ wẹ nwan nị m gha ebe ị rị bịa nke-esi. E kwerigụọ wẹ nị yụ zihẹ m.

9“Uwẹ kẹ m rị e mẹni ekpere: ẹlẹ ụwa ile kẹ m rị e mẹ ni ekpereni, kalẹ ndị hụn i ye m, makẹni wẹ wụ nke i. 10Ihiẹn ile m nwọn wụ nke i, nke i wụzịkwọ nke m. E wẹhẹgụọnị wẹ m ọghọ. 11Arịkọzị m nwan imẹ ụwa, kanị wẹ hụkwọ imẹ ụwa — mmẹ nwẹn lala d'e kunrun i. Nẹdi rị nsọ, gi ẹfan ị chemẹ wẹ, ẹfan ahụn i ye m, kẹni wẹ wụrụ ohu kẹ mmẹ lẹ yụ dọn wụ ohu. 12Ẹfan ị ahụn i ye m kẹ m gi chemẹ wẹ hụnnị mmẹ lẹ wẹ rị. E chemẹgụọ m wẹ: onwọnni hụn ọwụlẹ la iwi — wezụka onyẹ ahụn mẹ ihiẹn wẹ gi a la iwi — hụn Ẹkụkwọ-nsọ gi bụn. 13Kanị, m burula ị nwan; m rị e ku ihiẹn ndịnị imẹ ụwa kẹni wẹ nwọn ịghọghọ m imẹ ndụn wẹ, nwọnzu ẹ.

14“E yegụọ m wẹ oku i, ize wẹ a ban ụwa — makẹni ẹlẹ wẹ nke ụwa, nọkẹ kẹ o dọn mẹ ni mmẹ lẹ enwẹn m ẹlẹ nke ụwa. 15Arị m a rịọ ị n'ị wepụ wẹ imẹ ụwa; kama, m rị a rịọ n'ị chemẹ wẹ makẹ Eje-onyẹ hụ gha e mẹ wẹ ihiẹn ọwụlẹ. 16Ẹlẹ wẹ nke ụwa — nọkẹ kẹ o dọn mẹ ni mmẹ nwẹn ẹlẹ nke ụwa. 17Gi ezioku dọn wẹ nsọ: oku i wụ ezioku. 18Kẹ i dọn zihẹ m imẹ ụwa kẹ m dọn rị e zi wẹ e ye imẹ ụwa.

19“M rị nwan e gi ufiri wẹ e wepụha enwẹn m, kẹni m mẹ wẹ wụrụ ndị wẹ wepụha dọn nsọ nke-esi.

20“Ẹlẹ ndịnị rị ebeni sụọ kẹ m rị e mẹni ekpereni; kama, m rịzị e mẹni ndị hụn jẹnkọ d'e gi ufiri ozi wẹ k'e zi kwerini m, 21kẹni wẹ ile wụrụ ohu, nọkẹ kẹ ịyụ, Baba, dọn rị imẹ m, mmẹ nwẹn hụ imẹ i; m rị a rịọ nị wẹ rịzịkwọ imẹ ẹnyi — kẹni ụwa kweri nị ịyụ zihẹ m. 22E wegụọ m ọghọ hụ i ye m ye wẹ, kẹni wẹ wụrụ ohu kẹ mmẹ lẹ yụ dọn wụ ohu: 23kẹni ọ wụrụ nị mmẹ nwẹn hụ imẹ wẹ, yụ nwẹn hụ imẹ m; a wụrụchanrịn wẹ ohu, ụwa e gi ẹ marịn nị ịyụ zihẹ m lẹni y'e nwọnghọ ihiẹn-ọsụsụọ wẹ k'i dọn nwọn ihiẹn-ọsụsụọ m.

24“Baba! M chọ nị ndị ile i ye m sọn m rị ebe m rị, nị wẹ hụn ọghọ m, ọghọ hụn i ye m makẹni i nwọn ihiẹn-ọsụsụọ m n'i d'e kedẹ ụwa.

25“Euu Baba, Onyẹ ezi-omumẹ, ọsụọn'a nị ụwa amarịn ị, mmẹ nwẹn a marịnghọ ị; ndịnị wẹ a marịnzịghọ nị ịyụ zihẹ m. 26E mẹgụọ m wẹ marịn ị; m k'a gha e mẹ wẹ a marịn ị, kẹni ihiẹn-ọsụsụọ m i nwọn hụn ụzọ rị imẹ wẹ lẹni mmẹ nwẹn rịzị imẹ wẹ.”

Currently Selected:

Jọnụ 17: ikkBI

Highlight

Copy