Jẹnẹsisi 30

Isi Nke Iri Kwasị Ọgụn

1Ogẹn Rechẹlụ gi hụn a n'ọ mụnịnị Jekọpụ nwa, ẹnya nọ fụma a nị nwẹnẹ rị a mụ. Ọ nọ sị Jekọpụ, “Yekwọ m ụmụ; y'e yeni m ụmụ, a nwụnhụn m.”

2Iwe nọ we Jekọpụ, ọ nọ gi iwe sị Rechẹlụ, “Mmẹ wụ Osolobuẹ mẹ i amụlẹ nwa?!”

3Ya Rechẹlụ nọ sị a, “Lẹhụ Bil'ha, nwa rị iwe m: sọn ẹ ranhịn n'ọ hụn ụzọ mụdọnni m ụmụ, a gha m ẹka a nwọnrin ụmụ nke m.” 4Ya ọ nị we nwata hụ rị iwe ẹ wụ Bil'ha weye Jekọpụ lụma; Jekọpụ nọ sọn ẹ ranhịn. 5Bil'ha nọ tụrụ imẹ, mụnị Jekọpụ okẹnnyẹ. 6Ya Rechẹlụ nọ sị, “Osolobuẹ a shịagụọnị m ẹri; ọ nụgụọ arịrịọ m, ye m okẹnnyẹ.” Ọ nọ gụn a “Danị#30.6 Asụsụ Hibru, Danị wụ “Ọ shịa ẹri”.”. 7Omẹgụ, Bil'ha nọ tụrụzị imẹ, mụnị Jekọpụ okẹnnyẹ hụn mẹ ẹ ẹbụọ. 8Ya Rechẹlụ nọ sị, “Mmẹ lẹ nwẹnẹ m a dọgụọ ọhụnma-ọhụnma, e mẹri m'ẹ!” Ọ nọ gụn a Naf'tali#30.8 Asụsụ Hibru, Naf'tali wụ “Ọdịdọ m dọ”..

9Lia a hụn a nị ya nwẹn amụzịnị nwa, ọ nị we Zil'pa, nwa rị iwe ẹ, weye Jekọpụ lụma. 10Ya Zil'pa nwa rị iwe Lia nọ mụnị Jekọpụ okẹnnyẹ. 11Lia nị sị, “Ẹwẹrẹ m.” Ọ nị gụn a “Gadị#30.11 Asụsụ Hibru, Gadị wụ “Ẹwẹrẹ” mọbụ “Ndị-agha”.”.

12Zil'pa nọ mụzịnị Jekọpụ okẹnnyẹ hụn mẹ ẹ ẹbụọ. 13Ya Lia nọ sị, “Ịghọghọ e jun m obi! Ikpoho k'a kpọ m Ịghọghọ!” Ọ nị kpọ a Asha#30.13 Asụsụ Hibru, Asha wụ “Ịghọghọ”..

14Rubẹni jẹn ugbo ogẹn wẹ gi e be ọka-witi, ọ nọ hụn ẹfịfịa mandreki hụn wẹ sị onyẹ mụlẹni nwa ri a, ọ tụrụ imẹ. Ọ nị welụa nị nnẹ ẹ wụ Lia ya. Ya Rechẹlụ nọ sị Lia, “Dodo, yebeye m mandreki hụ nwa ị welụa.” 15Lia nọ sị a, “Di m ị narịn m ezun'i? Ị chọzị n'i weri mandreki nwa m?”

Rechẹlụ nị sị a, “Ọ hụghọ mma; ye m nwan mandreki nwa ị nị yụ lẹ di ẹnyi ranhịn uhinhinni.”

16Ogẹn Jekọpụ gi gha ugbo lụa ẹnyasị hụ, Lia nọ jẹnburu ẹ, sị a, “Ị k'e sọnrịrị m ranhịn tannị, mandreki nwa m wẹhẹ kẹ m gi kụ ụgwọ mmẹ lẹ yụ k'e gi ranhịn.” Ya Jekọpụ nị sọn ẹ ranhịn imẹ abalị ahụn.

17Ya Osolobuẹ nị nụ ẹkwan Lia, Lia nọ tụrụ imẹ, mụnị Jekọpụ okẹnnyẹ hụn mẹ wẹ isẹn. 18Lia nọ sị, “Osolobuẹ a kụgụọ m ụgwọ m gi we nwa rị iwe m ye di m.” Ọ nọ gi ufiri ẹ gụn a Isaka#30.18 Asụsụ Hibru, ẹrịra kẹ w'a sị “Ụgwọ-ọrụn”..

19Lia a tụrụzị imẹ, mụnị Jekọpụ nwa okẹnnyẹ hụn mẹ wẹ isin. 20Lia nọ sị, “Osolobuẹ e yeọlẹ m ihiẹn rị mkpa. Di m k'e ye m nwan ọghọ, makẹni a mụpụnị m'a ikẹnnyẹ isin”; ọ nọ gi ufiri ẹ gụn a Zẹbulọnụ#30.20 Asụsụ Hibru, Zẹbulọnụ wụ “ọghọ”.. 21Omẹgụ, ọ nọ mụ okpoho, gụn a Daịna.

22Omẹgụ, Osolobuẹ nọ nyanhan Rechẹlụ; ọ nị nụ ẹkwan a, kpọpụ a ẹkpa-nwa. 23Ọ nị tụrụ imẹ, mụ okẹnnyẹ, sị, “Osolobuẹ e bupụọlẹ m ifẹnrẹn ihun.” 24Ọ nọ gụn a “Josẹfụ”, sị “Osolobuẹ dodo yezi m nwa-okẹnnyẹ.”

Ihiẹn-uriri Jekọpụ Ebuwaye Ọda

25Ogẹn Rechẹlụ gi mụgụ Josẹfụ, ya kẹ Jekọpụ nọ sị Labanị, “Ha m ụla, nị m lakin alị m. 26Ye m inyẹnmẹ m lẹ ụmụ m, kẹni m hụn ụzọ lama n'e gigụọ m ufiri wẹ fe i. Y'a marịngụọ nị e fegụọ m'ị ọhụnma-ọhụnma.”

27Ya Labanị nọ sị a, “Dodo, omẹni ihiẹn m a sụọghọ ị, duzi m nọdị, makẹni a mahụngụọ m'a nị ufiri i haịn Osolobuẹ gi rị a gọzi m.” 28Labanị nọzị sị a, “Gwa m ihiẹn m k'a kụ ị, m k'a kụ ị ya.”

29Ya Jekọpụ nọ sị a, “Y'a marịngụọ kẹ m fehan ị lẹzi kẹ ihiẹn-uriri i rịhan mma ẹka m. 30Ihiẹn i bulẹni ọda kẹ m bịa a barapụgụọ; Osolobuẹ e gigụọ ihiẹn ile m buche ẹka gọzi i. Elee ogẹn kẹ m'e gi nwan mẹni ezi-lẹ-ụlọ m?”

31Ya Labanị nọ sị a, “K'ị sị m ye i?” Ya Jekọpụ nọ sị a, “Eyelẹ m ihiẹn ọwụlẹ; kanị, i mẹni m hụ ihiẹn ohuni m jẹnkọ d'e ku, e dusọnmẹ m ihiẹn-uriri i, lepụsọnmẹ wẹ ẹnya: 32Nị m ghahunmẹ imẹ igunrun ihiẹn-uriri i ile, a họpụha m atụnrụn ile tụ ntụpọ mọbụ ẹkịrịka lẹ okoro-atụnrụn ile rị e gi ngi lẹzi ewu ile tụ ntụpọ mọbụ ẹkịrịka; wẹ ile a wụrụ ihiẹn i gi kụ m ụgwọ. 33O ru ihun, i jẹnkọ d'a marịn kẹ m gi ezioku mẹ ẹ ogẹn y'e gi lele kẹ ihiẹn i gi kụ m ụgwọ kẹ m weri: ị hụnhụ ewu ọwụlẹ nwọnlẹni ntụpọ mọbụ tụlẹni ẹkịrịka mọbụ okoro-atụnrụn gilẹni ngi, y'a marịn nị m zun wẹ e zun.”

34Labanị nọ sị a, “E kwerigụọ m. Ya rị k'i dọn ku.”

35Ụhụọhịn ahụn, Labanị nị họpụhachanrịn mkpịn ile vin ugbẹnrẹn lẹ ndị tụ ntụpọ lẹ odegbe ewu ile vin ugbẹnrẹn lẹ ndị tụ ẹkịrịka, kẹ wẹ han nwọn ebe ọwụlẹ wẹ nọ chan ụchan, lẹzi okoro-atụnrụn ile e gi ngi. Ọ nọ kị wẹ che ẹka ụmụ a ikẹnnyẹ.

36O wepụ wẹ ẹka Jekọpụ, we wẹ shi ebe wẹ gi akpọhịn ẹtọ e jẹn; Jekọpụ nị zụnma ihiẹn-uriri Labanị họdụnị.

37Ya Jekọpụ nị berisọnmẹ agala pọpla lẹ “amọndụ” lẹ pleni rị ndụn, kpụnchan wẹ mkpabe-mkpabe — hụn wụnị w'e legha ebe ile ọ kpụnchan rị a chan ụchan. 38Ọ nọ bu agala ndị ahụn che ihiẹn anụ ndị ahụn gi a ra mirin, hụn wụnị wẹ gha a ra, wẹ hụ e legha agala ndị ahụn o kpụnchan mkpabe-mkpabe; anụ ndị ahụn rị a chọ nị wẹ gba bịa ebẹhụ d'a ra mirin, 39a nọ wẹ ebẹhụ gba; a mụ wẹ anụ ndị nwọn ẹkịrịka mọbụ ntụpọ.

40Jekọpụ hụ e bu ụmụ ndịnị wẹ rị a mụ e che azụụn ichẹn; o ru, o bu ndị rị a chọ nị wẹ gba ihun zimẹsọnmẹ ndị nke Labanị rị e gi ngi lẹ ndị tụ ẹkịrịka; ẹrịra k'o dọn nwọnrin ihiẹn-uriri nke ẹ, e wepụ wẹ ebe nke Labanị rị. 41Ogẹn ọwụlẹ Jekọpụ hụn nị onyẹnnyẹ ndị hụn ka ibe wẹ e ze rị a chọ nị wẹ gba, o bu agala ndị ahụn ọ kpụnchan che ihiẹn wẹ gi a ra mirin kẹni wẹ nọkunmẹ wẹ wẹ gha a gba. 42Kanị, omẹni anụ ndị zelẹni rọ, o wejẹnkọ wẹ ebẹhụ. Ẹrịra kẹ ndị ile zelẹni gi wụrụ nke Labanị, ndị ile zeni a wụrụ nke Jekọpụ.

43Ẹrịra kẹ Jekọpụ gi hi okẹn-ọdanfịn, ihiẹn-uriri ẹ lẹ idibo ẹ nọ barapụ, kẹ idibo-ikpoho kẹ idibo-ikẹnnyẹ, lẹzi anyịnyan-mkpukpuke ẹ lẹ jaki ẹ.

Currently Selected:

Jẹnẹsisi 30: ikkBI

Highlight

Copy