Marko 14

Etumutaki enkiguana pee eari Yesu metua

(Mat 26.1-5; Lk 22.1-2; Yhn 11.45-53)

1 # Ena 12.1-27 Ore etaa nkolong'i are naatiooyo pee ebau Pasaka, nebau sii osirua loo Mukateni Nemeisuiisheki. Neing'oru ilapolosak kituaak o laiteng'enak loo nkitanapat eneiko pee eibung Yesu to losek, aar metua; 2amu etejo ninche, “Neme taa te nkata o sirua, mepuku ake olong'oling'oli lo lorere.”

Eelaki Yesu te Betania

(Mat 26.6-13; Yhn 12.1-8)

3 # Lk 7.37,38 Ore etii Yesu Betania enkaji e Simon oata enkeeya oo lbolot. Ore einosita endaa, nejing'u enkitok naata oltulet lo soit oji alabasta nebore eilata narropil naleng naji nardo, nagol oleng enkinyang'unoto, nedany ilo tulet nebukoki ina ilata elukunya e Yesu. 4Kake etii ilootagorote nejokino, “Kainyoo pee eitarruoyioki ena ilata narropil aaiko inji? 5Amu anaata etimiraki ena ilata aainosie dinari iip uni, neishori laisinak.” Neing'unyung'unyaki ina kitok. 6Nejo Yesu, “Entapal, kainyoo pee intanyamalala? Nanu eitaasa embae naikishian oleng. 7#Enkig 15.11Amu iatata laisinak anaake, naa te niyieuu, indimidimi ake aaitaasa ninche isupati; kake mikiaatata nanu anaake. 8Etaasa anaa enaidima; osesen lai eitera ael eton eitu enukari. 9Naa kesipa, ajoki intae, ore pooki wueji nelikiorieki ele rorei supat te nkop pooki, neinosari ena nataasa edamunyeki ninye.”

Etonyorrayie Yudas ajo akaldaa Yesu

(Mat 26.14-16; Lk 22.3-6)

10Nelo Yudas Iskariot laa obo le lelo tomon o aare enetii ilapolosak kituaak pee etum atakaldai Yesu te ninche. 11Ore pee ening ninche neshipayu neisiligie aajo keisho mpisai. Neing'oru Yudas erishata nakaldarie Yesu.

Einosa Yesu endaa e Pasaka te nebo o lkipaareta lenyena

(Mat 26.17-25; Lk 22.7-14,21-23; Yhn 13.21-30)

12Ore te nkolong e dukuya e nkata oo Mukateni Nemeisuiishieki, enkolong apa nayieng'i ilkuoo, oodamunyeki Pasaka, nejoki lkipaareta lenyena Yesu, “Kaji iyieu nikipuo aaitobir pee inyayie Pasaka?” 13Neirriwaa lkipaareta lenyena aare, nejoki, “Enchom enda anasa, ore pee enang'are intae oltung'ani onapita emoti e nkare; erukurukore, 14ore ake enejing, entiaaki olopeny enkaji. ‘Etejo Olaiteng'enani, Koree enkaji ai oo lomon, nainosie Pasaka te nebo lkipaareta laainei?’ 15Naa keitodol intae enkaji e shumata nalala naitobira; teine entobiraki iyiook.” 16Nedumunye lkipaareta lenyena nepuo ina anasa, neinepu etiu anaa enatiaakaki neitobiraki Pasaka.

17Ore pee eaku teipa nelotu Yesu o lelo tomon o aare. 18#Olk 41.9Ore etoni aanya endaa, nejo Yesu, “Esipa, ajoki intae, kaakaldaa obo linyi, oloinosita endaa te nebo nanu.” 19Neiteru lkipaareta aaisinanuo, nejoki maa obo ninye, “Ke nanu sa?” 20Nejoki Yesu ninche, “Obo doi le kulo tomon o aare, obo oitadoiki emukate embakuli te nebo nanu. 21Amu elo ake Enkerai e Tung'ani aikunari anaa enatisirakaki ninye, kake ooi ilo tung'ani laa ninye okaldaa Enkerai e Tung'ani! Enaikash apa te neitu eini ilo tung'ani.”

Eitanapishe Yesu te ndaa o Laitoriani pee edamunyeki ninye

(Mat 26.26-30; Lk 22.14-20; 1 Ilkor 11.23-25)

22Ore einosita endaa, nedumu Yesuemukate nemayian, nebelibel, neisho ninche, nejo, “Enkoito; osesen lai ele.” 23Nedumu enkikompe, ore pee eisho Enkai enashe neisho ninche, neok pooki. 24#Ena 24.8; Yer 31.31-34Nejoki ninye ninche, “Osarge lai ele lo sotua, oibukori te nkaraki ilkumok. 25Esipa, ajoki intae, meekure aigil aok aekata enoo lng'anayio loo sabibu o metabau ina olong naok eokoto ng'ejuk te nkitoria e Nkai.” 26Ore pee eidip aatarany osinkolio nepuku aapuo Oldoinyo loo Loirienito.

Etolikio Yesu Petero ajoki kelo amiki

(Mat 26.31-35; Lk 22.31-34; Yhn 13.36-38)

27 # Sak 13.7 Nejoki Yesu ninche, “Isikisiki ade pooki aailanyisho; amu etisiraki aajo, ‘Kaosh olchekut, neisardak intare!’ 28#Mat 28.16Kake ore pee aaitopiuni, naituruk te intae alo Galilaya.” 29Nejoki Petero, “Te naa keisik pooki, maaorore nanu.” 30Nejoki Yesu ninye, “Esipa aajoki iyie, ore ade te na kewarie, eton eitu eru olchogoo katitin are nikimiki iyie katitin uni.” 31Neisimu oleng ajo, “Te naa kaye te nebo o iyie, maamiki nanu iyie.” Nejo ninche pooki neijia.

Etoomono Yesu Enkai te Getsemane

(Mat 26.36-46; Lk 22.39-46)

32Nepuo ewueji neji Getsemane; nejoki Yesu lkipaareta lenyena, “Entaanyuaki tene o maidipa enkomono.” 33Nerik Petero o Yakobo o Yohana, pee eiriamariyie, neiteru aiputukuny oleng nenyamalu. 34Nejoki ninche, “Keeta oltau lai osina kitok oba anaa keeya; entotoni tene entashololoto#14.34 entashololoto: kejii sii entaanyisho.” 35Neigut penyo, neirrabalakino enkop neomon inchere, te naa keidimayu metogiroi ina kata ninye. 36Nejo, “Abba, Papa, keidimayu imbaa pooki te iyie; iwuang'akinyeki ena kikompe; kake mme enaa enayieu nanu, kake anaa eniyieu iyie.” 37Neshukunye neinepu eirurate, nejoki Petero, “Simon, iyie ilo oirura? Italaikine atashololoyu ena ninye nabo? 38Entashololoto naa entasaisho pee mijing'ijing'i atua ntemat; keyieu oltau, kake keshal osesen.” 39Neitoki ake alo neomon, neigil iladuoo ake rorei. 40Neitoki aitu neinepu eirurate, amu eiroshiutuo nkonyek oleng; nelau ninche enawaliki ninye. 41Neitu ene uni nejoki ninche, “Keton ake duoo irurara aayeng'iyeng'a? Eidipe; etabawua esaa; naitarasari Enkerai e Tung'ani aaitarasaki nkaik oo larruok. 42Enyoito, emaape; idol etabaua ilo laakaldaa.”

Etakaldayioki Yesu neibung'i

(Mat 26.47-56; Lk 22.47-53; Yhn 18.3-12)

43Ore nabo kata, eton eirorita Yesu, nelotu Yudas, obo le lelo tomon o aare, neiriamunore ninye empuoto neeta lalema o siaren, eirriutua ilapolosak kituaak o lasirak o lpayiani. 44Eishoo taa duoo ilo otakaldayie olmonekie, ajoki, “Ore taa olang'utut ninye ilo, embung'a entorik entirrisha.” 45Ore pee elotu Yudas, nelo nabo kata enetii Yesu, nejoki, “Lo kitok!” Neng'utut. 46Nesaru aaibung ninye. 47Kake etushutua obo le lelo ooitashe teine olalem, neosh osinka lo lapolosani kitok nedung'u enkiok. 48Nejoki Yesu ninche, “Ietuo itanapate anaa iloopuo aaibung olaisimani, aa nanu ipuonunu aaibung inapitata ilalema o siaren? 49#Lk 19.47; 21.37Natii oshi ake enkaji e Nkai te nebo intae aiteng'enisho, neitu kimbung'ubung'u? Kake nchoo eitabari ilkigerot.” 50Neing'uaa lkipaareta lenyena pooki ninye, neilanyisho.

Oloti barnoti oilanyishe

51Neirukurukore oloti barnoti Yesu laa olkarasha ake errotianita; neibung ninche ninye. 52Kake eitiaa ninye ilo karasha neisik meishopo.

53Nerikoki ninche Yesu olapolosani kitok, netumo lapolosak pooki kituaak o lpayiani o lasirak. 54Nesujita Petero ninye elakuaniki, o metijing'a abaiki olgoriet lo lapolosani kitok; neton te nebo ilarripok aij enkima. 55Neing'oru lapolosak kituaak o ina kiguana pooki shakenisho naarie Yesu metua; kake etalaita. 56Amu eetuo lkumok ooiteenikitia mbaa, kake eitu eipira nkiteenikinot enye. 57Neinyototo kulikae aaiteeniki, ejo, 58#Yhn 2.19“Kitoning'o iyiook ejo, ‘Kagil nanu ena aji e Nkai naitobiraki too nkaik, ore too nkolong'i uni nashetu ae, neitu eitobiri too nkaik.’ ” 59Kake ore ake eyia, eitu eipira ina shakenisho enye. 60Neinyototo olapolosani kitok nelo aitashe te mpolos, neikilikuan Yesu ajoki, “Ai miata ewalata niwalu? Kaa shakenisho ena nikintang'orie kulo tung'ana?” 61Kake etigire Yesu neitu ewaliki. Neitoki ake olapolosani kitok aikilikuan ajoki. “Ira iyie Kristo, Oinoti lo Lomayiana?” 62#Dan 7.13Nejo Yesu, “Ee, ara, naa iyiookiki aadol Enkerai e Tung'ani eton te nkaina e tatene o Lopeny Engolon, elotu too nkatampo e keper.” 63Nepolos olapolosani kitok ilkilani lenyena nejo, “Kainyoo kintoki aayieunye lchakenini? 64#Ilaw 24.16Itoning'okito ate emoroto namor Enkai. Ijojo aa?” Nedung'oki pooki enkiguana aajo keishiaakino keeya. 65Neiteru kulikae aanotaki, neimulumul enkomom, nedam, nejoki, “Imbonisho!” Neitanang'are ilarripok ninye ioshot.

Etomikio Petero Yesu

(Mat 26.69-75; Lk 22.56-62; Yhn 18.15-18,25-27)

66Ore etii Petero olgoriet ti abori ine, nelotu enkaisiaayiani nabo o lapolosani kitok. 67Ore pee edol Petero eijito enkima, neing'or ninye, nejo, “Iboitare sii oshi iyie Yesu le Nasaret.” 68Kake etomikio ejo, “Mayiolo nemaning'u enijoito.” Nepuku ninye alo kishomi.

69Nedol ina aisiaayiani, neitoki ake ajoki lelo ooitashe teine, “Ore ele tung'ani, obo lenye.” 70Kake enyaaka ake Petero amiki. Ore ake sii te nkiti rishata nejoki lelo ooitashe te nebo Petero, “Edede taa ninye ira iyie obo lenye; amu ira ole Galilaya.” 71Kake eiterua adek kewan nenya lmuma ajo. “Mayiolo nanu ele tung'ani liimakiki.” 72Ore nabo kata ake neru olchogoo ene are. Nedamu Petero enatiaaka Yesu nchere, “Ore eton eitu eru olchogoo katitin are, nikimiki iyie katitin uni.” Nedanya Petero aishir.

Currently Selected:

Marko 14: BIBLIACATHO

Highlight

Copy