मर्कूस 8
8
चार हजार मनैन खवैलक
मत्ती १५:३२-३९
1उह समयओर फेदोस्र मनैन्हक बराभारी भीड जम्मा हुइल्। हुँकन्हकठे खैना चिज कुछु नैरलहन। तब येशू चेलन आपनठे बलाक कल, 2“यी मनै म्वारठे रहल आज तीन दिन होसेक्लन, ओ हिँकन्हकठे खैना चिज कुछु फे बाँकी नैहुइटन। उहओर्से महीह स्वाग लागटा। 3हिँक्रमध्ये कौनो-कौनो त बरा दूर-दूरसे आरल। हिँकन भुँख्ल घर पठैना हो कलसे, हिँक्र डगरीहम मूर्च्छा फे परसेकहीँ।”
4चेलावँ येशूह कल, “यी गाउँबस्ती नैरहल ठाउँम अत्रा धेर जन्हक लाग खाना कहाँसे जुटैना हो?”
5तब येशू हुँकन पुछ्ल, “टुन्हकठे कैठो रोटी बा?”
हुँक्र जवाफ देल, “सातठो।”
6तबदोस्र येशू उ मनैन भूइँयम बैठ्ना आज्ञा देक सातठो रोटी आपन हाँठम लेल ओ परमेश्वरह धन्यवाद देल। उहाँ रोटी खन्टिखन्टा पर्ल ओ मनैन देह कैक उ रोटी चेलन देल। तब हुँक्र मनैन्हक आघ-आघ ढैदेल। 7हुँकन्हकठे डान्चे छोटी-छोटी मच्छी फे रलहन। येशू उ मच्छीम फे परमेश्वरसे आशिष माङ्ग्क मनैन देह लगैल।
8सबजन खाक अघैल त, चेलावँ उब्रल खन्टिखन्टा रोटी बराबरा छिट्टोक सात छिट्वा उठैल। 9उ दिन रोटी खउइया मनै लगभग चार हजार रलह। येशू मनैन विदा कैक पठैल।#८:९ ग्रीक भाषम “चार हजार” लिखल बा। “चार हजार” कलक जन्नीमनै ओ लर्कापर्का छ्वार, पुरुषहुँक्र केल हुइट जसिन देखपर्ठा (हेरी मत्ती १५:३८)। जन्नीमनै ओ लर्कापर्कन निगन्ना हुँकन्हक चलन रहल हुइसेक्ठन। 10तबदोस्र उहाँ आपन चेलन्हकसँग तुरुन्त लाऊम चिहुर्ल ओ दलमनुथा क्षेत्रम गैल।
11फरिसीहुँक्र येशूकठे आक उहाँसे बहस करलग्ल। हुँक्र उहाँक मज्झालेटी कल, “टुँ परमेश्वरक पठाइल मनैया हुइटो कलसे, परमेश्वरक शक्तिले एकठो अचम्मक काम कैक देखाओ त।”#मत्ती १२:३८; लूक ११:१६ 12हुँकन्हक माग सुन्क येशू दिक्कदार होगैल ओ गहिँरसे नम्मा साँस लेटी कल, “यी पुस्तक मनै काकर अचम्मक काम देखामङ्ग्ठ? मै जाट्टीसे टुँहन असिन मनैन कौनो अचम्मक काम नैदेखाजाई।”#मत्ती १२:३९; लूक ११:२९ 13तब हुँकन ओठहेँ छोरछार्क येशू ओ चेलावँ फेदोस्र लाऊम चिहुर्ल ओ गालील समुद्रक उपार जाइलग्ल।
फरिसी ओ हेरोदक खमिर
मत्ती १६:५-१२
14चेलावँ खाइ पुग्ना रोटी लैजाइ बिस्रारख्लह। लाऊम हुँकन्हकठे एक्कठो केल रोटी रलहन। 15तब येशू चेलन असिक कल, “फरिसीन्हक ओ हेरोदक खमिरसे होसियार रहो।”#लूक १२:१
16तर हुँक्र अप्न-अप्न बटोइल, “हमारठे रोटी नैहो, उहओर्से कहट।”
17यी बात थाहाँ पाक येशू हुँकन कल, “रोटी नैहो कैक टुह्र काकर बट्वाइटो? का टुन्हक आँख नैहो त, अक्किल फे नैहो? टुन्हक मन आम्ही फे कठोर बा का? 18का टुह्र आँख होक फे नैदेख्टो? का टुह्र कान होक फे नैसुन्टो? का टुँहन याद नैहो,#यर ५:२१; इज १२:२; मर्क ४:१२ 19जब मै पाँचठो रोटी खन्टिखन्टा पार्क पाँच हजार मनैन खवैनहुँ, तब टुह्र कै छिट्वा रोटीक खन्टिखन्टा उठैलहो?”
हुँक्र जवाफ देल, “बाह्र छिट्वा।”
20येशू पुछ्ल, “दोस्र फ्यारा, जब मै सातठो रोटी चार हजार मनैन खवैनहुँ, तब टुह्र बराबरा छिट्टोक कै छिट्वा रोटीक खन्टिखन्टा उठैलहो?”
हुँक्र कल, “सात छिट्वा।”
21येशू हुँकन कल, “का टुह्र आम्ही फे नैबुझ्टो?”
आन्धर मनैया चोखैलक
22येशू ओ चेलावँ बेथसेदा सहरम अइल। तब मनै एकठो आन्धर मनैयह येशूकठे अन्ल ओ यहीह छुक चोखादी कैक बिन्ती कर्ल। 23तब येशू उ आन्धर मनैयह हाँठ पकर्क डोर्यैटी गाउँक बाहर लैगिल। उहाँ आपन अङ्ग्रीम थुक्क वाकर आँखिम लगैल, ओ वाकरम हाँठ ढैक पुछ्ल, “टुँ कुछु द्याखटो?”#८:२३ हुइना त उ ब्याला फे आनकम थुक्लसे अपमान करल मानजाए (मर्कूस १४:६५, १५:१९), तर कबुकाल थुक लगादेना जुन चोखैना संकेत फे रहलहुई।
24तब उ मनैया हेर्टी कहल, “हजुर, मै मनैन न्याङगट् द्याखटुँ, तर हुँक्र रूख्वाअस देखपरट।”
25येशू फेदोस्र वाकर आँखिम छुल, त ऊ जरजर-जरजर ह्यारलागल। असिक उ मनैया देख्नाहा होगैल्, ओ सब चिज छर्लङ्ग द्याखलागल। 26तबदोस्र येशू ओहीह कल, “गाउँओर जिन जाओ, सरासर घर जाओ।”
पत्रुसक स्वीकार
मत्ती १६:१३-२०; लूका ९:१८-२१
27येशू आपन चेलन्हकसँग गालील क्षेत्रसे कैसरिया फिलिप्पी कना सहरक आसपासम रहल गाउँम गैल। जाइबेर डगरिम येशू आपन चेलन पुछ्ल, “मनै म्वार बारेम बट्वाइबेर महीह ‘के हो’ कैक कठ?”
28हुँक्र कल, “कौनोजन अप्नह ‘बप्तिस्मा देहुइया यूहन्ना हुइट’ कठ, कौनोजन ‘एलिया हुइट’ कठ, कौनोजनजुन ‘अगमवक्तामध्ये अप्न फे एक जन हुइटी कठ।’”#मर्क ६:१४-१५; लूक ९:७-८
29तब येशू हुँकन पुछ्ल, “टुह्र जे, म्वार बारेम कह पर्लसे का कह्बो?” पत्रुस उहाँह जबाफ देल, “अप्न मनैन मुक्ति देहुइया ख्रीष्ट हुइटी।”#यूह ६:६८-६९; ८:३४; मत्ती १०:३८; लूक १४:२७
30तब येशू “टुँ ठीक कलो, तर यी विषयम किहुसे जिन बटोइहो” कैक हुँकन कर्रा आज्ञा देल।
येशू आपन मृत्युक बारेम बट्वइलक
मत्ती १६:२१-२८; लूका ९:२२-२७
31येशू “मै मनैयक छावह, दुःखकष्ट सहपरी। अगुवाहुँक्र, मुख्य पूजारीहुँक्र, ओ शास्त्रीहुँक्र महीह हेल्हा करहीँ। मै मुवापैम, तर तीसर दिनम फेदोस्र जिजैम” कैक आपन चेलनसे बट्वाइलग्ल। 32कहख्वाजल बात येशू स्पष्ट रूपले कैदेल।
पत्रुस उहाँह एकओर लैजाक हप्काइलग्ल, “अप्न असिक बट्वाइ नैपर्ना हो।”
33तब येशू चेलन्हकओर हेर्ल ओ पत्रुसह झपर्टी कल, “शैतान, ओट्टी जा! टैँ परमेश्वरक हिसाबले नैसोँच्ट्या, तर मनैन्हक हिसाबले सोँच्ठ्या।”
34तबदोस्र येशू आपन चेलन ओ भीडक मनैन आपनठे बलाक कल, “कौनो मनैया म्वार चेला हुइ चहठा कलसे, ऊ म्वार कहल मान, आपन इच्छा छ्वार, ओ म्वारम विश्वास कर्लक कारण दुःखकष्ट सह ओ मुवपर्लसे फे आपन क्रूस बोक्क म्वार पाछ लाग।#मत्ती १०:३८; लूक १४:२७ 35आपन जीवन बचाइ खोजुइयन जीवन गुमैहीँ। तर म्वार पाछ लग्लक ओ खुशीक खबर प्रचार कर्लक कारण आपन जीवन गुमुइयन जीवन पैहीँ।#मत्ती १०:३९; लूक १७:३३; यूह १२:२५ 36संसारभरिक धनसम्पत्ति हाँठ पार्क फे, मनै अनन्त जीवन गुमैल कलसे, हुँकन का फाइदा? 37गुमाइल अनन्त जीवन मनैया कसिक फिर्ता पाइसेकी? 38मै मनैयक छावा, आपन बाबक महिमम पवित्र स्वर्गदूतन्हकसँग यी संसारम फेदोस्र अउइयाबाटुँ। यी व्यभिचारी ओ पापी जमानम महीहसे ओ म्वार वचनसे कुई शरम जिन मान। यदि कुई शर्माई कलसे, उ ब्याला मै फे ओहीसे शर्मैनेबाटुँ।”#दान ७:१४
Currently Selected:
मर्कूस 8: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
