मत्ति 27
27
येसु पिलातस्एदा खात्माय़ङ
मर्कुस १५:१; लुका २३:१-२; युहन्ना १८:२८-३२
1अ़वाय़ङ खादात्मा मुवाङाहिदा झारा मुलो काब़क्पाचि खोन्कि म़नाचिओ अ़चुअ़धुवाचि येसु स़मा दन्दा प़मा निम्पाङ खोक्कोसोओ अ़चुदेङ्सालाप्पादा याम़योआ। 2खोन्किना मोचिआ येसु अ़छ़साकि रोमि धिखाहुप काखाङ पिलातस्एदा अ़खात्ता।
यहुदा सुवाओ
छाम्माय़ङ १:१८-१९
3येसु काधान्पा यहुदाआ येसु दन्दा प़माय़ङ एनुहिदा अ़न्नुनु अ़मिन्मा चाअ़त्सा, खोन्ओसा मुलो काब़क्पाचि खोन्कि अ़धुवाचि रुपाओ तिस्काफेक फेक्वा लासुप़चि। 4खोन्कि खोसाआ लोचि, “अ़ङ्का मान्फिकादा म़ना धान्तुङ्कि हेवा मुवाङ्युङ्साङ।”
मेन मोचिआ अ़लासालोवा, “आन्कान्का दित्छाङ अ़सिन्तिमिन्का? खानाङा सिन्ता।”
5खोन्किना यहुदाआ मो रुपाओ फेक्वाचि निनाम्हाङ ब़क्खाखिम्दा वेइसुदिसुदोकि मो खारालावा, खोन्कि मो क़ङ्सान्सेरान्चिन।
6खोन्कि मुलो काब़क्पाचिआ मो रुपाओ फेक्वाचि अ़कुआकि म़य़ङा, “य़ङ्हुप य़ङ्याङ, ओ फेक्वा छेन्बि युङ्खादा युङ्मा अ़नुनिन, देकिनालो ओ ह़ओ अ़लुङ्ओ।” 7मोचि याम़योआकि मो फेक्वाआ ब़ काबोप्ओ अ़व़क अ़खिरा खोन्कि प़न्था काकोन्चि खुम्खा अ़मुवा। 8खोन्ओसा मो व़क आइमित्तारिछाङ “ह़ओ व़क”नि लोयाङ। 9मोवात्नि यर्मिया निनाम्हाङ्य़ङ खाकालुआ चेउओ य़ङ ताला,
“मोचिआ रुपाओ तिस्काफेक्वा अ़लारा,
खोक्कोसोओ अ़चुलुङ, इस्राएल्ओ अ़छाचिआ छोन्मा म़काङ्सा,
10खोन्कि निनाम्हाङ्आ अ़ङ्का ऩलोवाङ्वा ब़ काबोप्ओ अ़व़क खित्मा,
मोचिआ मो छेन्बि अ़याङा।”#जकरिया ११:१२-१३; यर्मिया ३२:६-१५
पिलातस्ओ अ़बुदा येसु
मर्कुस १५:२-१५; लुका २३:३-५,१३-२५; युहन्ना १८:३३–१९:१६
11येसु धिखाहुप काखाङ्ओ अ़बुदा म़एवा, खोन्कि मोसाआ येसु सेनु, “दि खाना यहुदिचिओ अ़चुहाङ ओ?”
येसुआ अ़लोवा, “खानानिन्ङा खोवात्नि त़य़ङिन्युङ्सिन म़ल़क।”
12खोन्किना मुलो काब़क्पाचि खोन्कि अ़धुवाचिआ खोक्को लाहि अ़पाक्ता, मेन खोक्कोसाआ देत्छाङ मान्लोम़दोचि। 13खोन्किना पिलातस्आ खोक्को लो, “आम्देङ्सालाप्पादा मोचिआ ब़द्धे य़ङ्दा सालुम्स़ङ अ़प़याङ, दि खाना त़एनुन्योन?” 14मेन येसुआ अ़क्तात लाहि पाक्माय़ङ्ओसोछाङ य़ङ मान्लाअ़दा। खोन्ओसा धिखाहुप काखाङ्छाङ अ़न्नुनु दोम्तुदो।
15काक्माखात्मा चानुचादा म़ना मुक्लाचिआ अ़छेन्ताओ अ़क्छा छेक्ताङाओ म़ना धिखाहुप काखाङ्आ लेत्प़सा मुङुचि। 16मोन्ग़रि बारब्बा अ़ऩङ मुवाङाओ अ़क्छा अ़त्लो अ़ऩङ ऱङाओ छेक्ताङा। 17खोन्किना म़नाचि म़कोआन्चिन्हिदा पिलातस्आ मोचि सेनुचि, “आम्नुओ निम्पाङ अ़ङ्का साङ लेत्नाप़नानिन्नेनि खानानिन त़मिनिन्येन? बारब्बा हे ख्रिस्तनि लोयाङ्ओ येसु?” 18देकिनालो यहुदिचिओ अ़चुसाम्योक्मि अ़चुबुसुवाचिओ अ़चुऩङ्च़आ येसु खो अ़पुवालावाओ निकिना खोसाआ नुलोक सिन्तुङु।
19खोन्कि पिलातस छ़ङ्छेन्खादा युङाङाओ ग़रि खोसोओ अ़खिम्हाङ्माआ ओवाको य़ङ्खान छोक्तु, “मो साम्योक्मि म़ना देत्छाङ मान्मुदानुम, देकिनालो आय़ सेन्मुयुदा मोसोओ अ़तुक्वाआ अ़ङ्का ब़द्धे दुखा आङ्तुङ्युङ्सुङ।”
20मेन मो मुलो काब़क्पाचिआ खोन्कि अ़धुवाचिआ बारब्बा लेत्माप़मा खोन्कि येसु सेत्मा दन्दा प़मा दोत्मा निम्पाङ म़नाचि म़थेन्तुचि।
21धिखाहुप काखाङ्आ लासुसेनुचि, “ओ ह़वाङ्दा खाक्कोतात अ़ङ्का आम्नुओ निम्पाङ लेरुङ्नेनि खानानिन त़मिनिन्येन?”
म़ना मुक्लाचिआ “आन्कान्का बारब्बा लेत्निप़नि!”नि अ़लोवा।
22पिलातस्आ मोचि सेनुचि, “खोन्नालो ख्रिस्तनि लोयाङ्ओ येसु अ़ङ्का दे मुङ म़ल़क?”
मोचि म़लासापारा, “मो क्रुस्दा ख़न्तासेरानुम!”
23मेन पिलातस्आ मोचि सेनुचि, “देकिना? ओसाआ दि फिसुयुङ्सु कि?”
मेन मोचि च़लोक म़पारा, “मो क्रुस्दा ख़न्तासेरानुम!”
24पिलातस्आ देत्छाङ च़मा अ़ऱन्ओ खा, मेन च़लोक काचेङ्वा लिमा पुङ्सुङुओसा, खोसाआ चाक्वाआ म़ना मुक्लाचिओ अ़चुबुदा अ़छुक वास़ खोन्कि लोचि, “अ़ङ्का ना ओ म़नाओ अ़ह़दाङ्का मान्फिकादा मुङाङा। खानानिन्ङा सिन्तानुम।”
25झारा म़नाचिआ अ़लासालोवा, “ओसोओ अ़ह़ आन्कान्का खोन्कि आन्काओ छाचिएदा छुक्ने।”
26खोन्किना खोसाआ मोचि बारब्बा लेत्तुप़चि, मेन येसु य़हुप पाक्मेत्तुचि, खोन्कि क्रुस्दा ख़न्मासेत्मा प़लाउचि।
रात्खामिचिआ येसु अ़सुङ्ताओ
मर्कुस १५:१६-२०; युहन्ना १९:२-३
27खोन्किना पिलातस्ओ अ़रात्खामिचिआ येसु धिखाहुप काखाङ्ओ अ़हाङ्मुखादा अ़खात्ता, खोन्कि झारा रात्खामि रुहुप्चि अ़चुऱङ्कोप्नि म़कोउचि। 28मोचिआ खोक्कोसोओ अ़चुतित अ़हुत्ताकि खोक्को हालापाक्पाक्ओ बोप्खु अ़हुप्ता। 29खोन्कि मोचिआ त़ङ्खोक्वाओ ताङ्बोप्खा अ़बाकि खोक्कोसोओ अ़चुताङ्दु अ़बोप्ता, खोन्कि मोचिआ खोक्कोसोओ अ़चुचुप्ताङ्छुक्दा द़ङ अ़पुवा, खोन्कि खोक्कोसोओ अ़चुबुदा अ़चुतुम्प़छ़क अ़तोम्ताकि, “यहुदिचिओ अ़चुहाङ, सेवा!”नि लोयाङ्सा खोक्को अ़सुङ्ता। 30खोन्किना मोचिआ खोक्को अ़थुक्ता, खोन्कि मो द़ङ अ़ङाप्ता खोन्कि खोक्कोसोओ अ़चुताङ्दु अ़धात्ता। 31खोक्को अ़सुङ्ताचिआकि मोचिआ बोप्खु अ़हुत्ता, खोन्कि खोक्कोसोओ अ़चुतित्ङा अ़हुप्ता। खोन्किना खोक्को क्रुस्दा क़ङ्मासेत्मा निकिना अ़खात्ता।
येसु क्रुस्दा ख़न्माय़ङ
मर्कुस १५:२१-३२; लुका २३:२६-४३; युहन्ना १९:१७-२७
32मोचि म़खाराङाहिदा मोचिआ सिमोन अ़ऩङ मुवाङाओ कुरेनि सहरादाओ अ़क्छा म़ना अ़धिरा, खोन्कि मोचिआ मो राकाङ्थेत्नि येसुओ अ़चुक्रुस खुन्अ़मेत्ता। 33मोचि गलगथानिओदा म़ताला, मोसोओ अ़तुप्माय़ङ “ताङ्खोयोक्वा ला” ओ। 34खोन्किना मोचिआ खोक्को ख़क्लेप्पा होन्माय़ङ अङ्गुरा माङ्वा दुङ्मा अ़पुवा, मेन खोक्कोसाआ मो अ़छेम्साकिना दुङ्मा म़छुन्ता।
35मोचिआ येसु क्रुस्दा अ़क़ङ्साचिआकि खोक्कोसोओ अ़चुतित्चि खोचिओ अ़चुरादा होरा म़पाआ खोन्कि अ़हासा।#साम्ऱङ्भुङ २२:१८ 36खोन्कि मोदा म़युङाकिना मोचिआ खोक्को हुङ्मा अ़पुङ्सा। 37“ओ येसु यहुदिचिओ अ़चुहाङ”निओ खोक्कोसोओ अ़चुदेङ्सालाप्पादा लाहिपाक्मा छाप्माय़ङ मोचिआ खोक्कोसोओ अ़चुताङ छोङ्दु अ़खेप्ता। 38मोचिआ ह़वाङ काख़पाचिछाङ येसुएनान क्रुस्दा म़ख़न्तुचि। अ़क्छा खोक्कोसोओ अ़चुचुप्ताङ्लिप्पा खोन्कि अ़क्छा अ़चुबेङ्साङ्लिप्पा।
39मो लाम काकोन म़नाचिआ अ़चुताङ ङाङ्याङ्सा येसु ओवात्नि लोयाङ्सा अ़सुङ्ता, 40“खानाङा निनाम्हाङ ब़क्खाखिम काभुङ खोन्कि मो सुम्कालेन्दा कालामु! खाना आप्पि लेइसान्चिन! निनाम्हाङ्ओ अ़चुछा ओनालो क्रुस्दाङ्का धान्तान्चिन।”
41मोवात्निङा मुलो काब़क्पाचिआ, मोसाओ अ़य़ङ्हुप काचिन्पाचिआ खोन्कि अ़धुवाचिआछाङ अ़क्नि सुङ्याङ्सा म़य़ङा, 42“ओसाआ निचि ना लेइसुचि, मेन खोक्को आप्पि लेन्मान्चिन अ़ऱनिन! ओ इस्राएल्दाओ हाङ ओ! ओन्ग़रिङा खोक्को क्रुस्दाङ्का धान्नान्चिन्ने खोन्कि आन्कान खोक्कोएदा साकोङ्छ़ङ मुम। 43खोक्को निनाम्हाङ्एदा सोम्कुवा मु। खोक्को, ‘अ़ङ्का निनाम्हाङ्ओ अ़चुछा ओ!’नि य़ङाङाओ। निनाम्हाङ्आ ओ लेन्मानि म़मिन्नालो खोक्कोसाआ ओ ओन्ग़रिङा लेइसुने।”
44खोन्किना खोक्कोएनान क्रुस्दा ख़न्ताङाचिओ मो काङाप्खात्चिआछाङ मोवात्निङा खोक्को अ़सुङ्ताचु।
येसुओ अ़चुस़मा
मर्कुस १५:३३-४१; लुका २३:४४-४९; युहन्ना १९:२८-३०
45हान बार साङादाङ्का सुम्काकोम साङातारि झारा हेन्कोप्दा कुन्चियाधेक्धेक लिसा। 46आप्फात सुम्काकोम साङाहिदा येसु अ़धिवा य़ङ्आ म़पारा, “इलोइ, इलोइ, लामा सबखथनि?” मोसोओ अ़तुप्य़ङ, “अ़ङ्निनाम्हाङ, अ़ङ्निनाम्हाङ, खानानिन्आ अ़ङ्का देकिना त़छित्नि?” ओ।
47मोदा म़एवाङाओचिएदाओ देम्पाङ्साआ ओ अ़एनाकि म़य़ङा, “खोसाआ ना एलिया बुत्तुङु।” 48मोचिएदाओ च़क्नि अ़क्छा लोराखाराकि अ़क्तात याङ्पेन्दा सुन्ताङाओ अङ्गुरा माङ्वादा लुम्तु खोन्कि अ़क्तात द़ङ्दा छ़सुकि खोक्को दुङ्मा प़। 49मेन निचिआ मो अ़लोवा, “अ़क्दुने, आन्कान खाम्ने, एलिया मात्दे ओ लेइसि ता हे?”
50खोन्किना येसु अ़धिवाङ य़ङ्आ म़लासापाराकि अ़चुसाक्मा खारा।
51मोन्ग़रिङा निनाम्हाङ ब़क्खाखिम्ओ अ़थेम्खातित अ़छोङ्दुङ्का अ़थेन्युतारि ह्वाधाङ लिसालो रेआखारा। हेन्खामा धुन्तु, खोन्कि लुङ्छ़ङ्चि म़केरा। 52एप्माचि म़होङ्सा खोन्कि म़इम्सादाओ निनाम्हाङ्ओ अ़चुम़नाचिओ ब़द्धे अ़चुस़पोक्चि म़पुवालोन्ता। 53खोन्कि मोचि अ़चुएप्माचिदाङ्का म़लोन्ता, खोन्कि म़सुवादाओदाङ्का येसु म़खोन्तालोन्ताकिना मोचि सेङाङाओ सहरादा म़वाङा, खोन्कि मोचि ब़द्धे म़नाचिएदा खाङ्म़मुसान्चिन।
54कप्ताना खोन्कि येसु काहुङ रात्खामिचिआ लुत्लि खोन्कि मोदा झारा म़लिसाङाओचि म़खाचि, खोन्किना अ़न्नुनु अ़चुक़माकाराकि मोचि ओवात्नि म़य़ङा, “अ़नुछ्याङा, ओ म़ना ना निनाम्हाङ्ओ अ़चुछा ओ।”
55मोदा गालिल्दाङ्का म़बानाओ ब़द्धे मेत्छामाचिछाङ म़याआङा, मोचिआ अ़थायाङ्का ओ झारा अ़खाङा। मोचिआ खोक्को ब़त्याङ्सा गालिल्याङ्का येसु अ़त़ङ्ताओ। 56मोचिएदाओ मग्दला सहरादाओ मरियम, याकुब खोन्कि योसेफ्ओ अ़चुमा मरियम, खोन्किना जब्दियाओ अ़दुवाछा छाचिओ अ़चुमा म़याआङा।
येसु एप्मादा युङ्माय़ङ
मर्कुस १५:४२-४७; लुका २३:५०-५६; युहन्ना १९:३८-४२
57अ़नाम्प़क्साऱङ लिसायुङ्सा अरिमाथियादाओ योसेफ अ़ऩङ मुवाङाओ अ़क्छा कातोक म़ना ता। खोछाङ येसुओ अ़चुकाखेङ्पा याआङा। 58खो पिलातस्एदा खाराकि येसुओ अ़चुस़पोक दोरु। खोन्किना पिलातस्आ मो खो प़मेत्तुचि। 59योसेफ्आ स़पोक खात्तु, खोन्कि सेङाङाओ बाङ्गाय़ तित्दा मो रिप्तु, 60खोन्कि खोसाआ लुङ्छ़ङ अ़क़प्ताकि अ़मुवायुङ्साओ खोसोओ आप्पिओ अ़ऩङ्वा अ़एप्मादा मो स़पोक युङ्सु, खोन्कि एप्माओ अ़दोदा अ़क्तात अ़धिवो लुङ्ताक ध़सुदिप्तु, खोन्कि खो खारा। 61एप्माओ अ़बुदा मग्दला सहरादाओ मरियम खोन्कि नि मरियम्छाङ युङाङा।
एप्मादा काहुङ्चि
62अ़माङ्कोलेन, सावातोम्खा-लेन ओ, मुलो काब़क्पाचि खोन्कि फरिसिचि पिलातस्एदा म़कोआन्चिन। 63मोचिआ अ़लोवा, “हाङ्पो, आन्कान्का मित्तुम्योम्का, मो काम़प्आ ह़ङाङाहिदा ‘सुम्कालेन्कि अ़ङ्का लाङाखोन्ङालोन्ङा’नि य़ङाओ। 64खोन्ओसा सुम्कालेन्तारि मो एप्मा रात्मायुङ्मानि लोवानुम्च़म। माङ्लोना मोसोओ अ़काखेङ्पाचि म़ताकि अ़ख़खात खोन्कि ‘मो ना सुवादाओदाङ्का खोन्तालोन्ता’नि म़नाचि म़लोचि, खोन्कि मो आदेङ्ओ धान्माय़ङ बुयाओदाङ्का च़लोक खान्अ़त्लो लि।”
65पिलातस्आ मोचि लोचि, “आम्नुओ काहुङ रात्खामिचि म़युङ्याङ। खारानिन्कि खानानिन्आ त़ऱम्ओन रात्तानुम।” 66खोन्किना मोचि म़खाराकि लुङ्दा अ़सेप्ता, खोन्कि काहुङ्चि म़छाम्सुचिकि एप्मा अ़रात्ता।
Currently Selected:
मत्ति 27: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
