मत्ति 19
19
सायाकाम्माय़ङ फेक्मा
मर्कुस १०:१-१२
1ओ य़ङ्चि म़चेवाचिआकिना येसु गालिल्दाङ्का यर्दन याङ्वामाओ अ़ह्याउधेत यहुदिया धिखाहुप्ह्यात्नि म़खारा। 2अ़धिवा म़ना मुक्लाचिआ खोक्को अ़त़ङ्ता, खोन्कि खोक्कोसाआ मोचि मोदा म़नुसुचि।
3खा-खाक्को फरिसिचि म़ता, खोन्कि येसु चिन्माखाङ्मा निकिना मोचिआ अ़सेना, “दि दुवाछाआ दिसुओनुछाङ अ़तुक्वाआ अ़खिम्हाङ्मा छित्मा य़ङ्हुप्वा लि?”
4खोक्कोसाआ म़लासुलोचि, “खानानिन्आ साम्कालिन्दा मान्खिप्त़युक्तुम? ‘अ़पुङ्चिपुक्दाङ्काङा निनाम्हाङ्आ दुवाछा खोन्कि मेत्छाछा म़मुयुचि, 5खोन्कि म़य़ङा, खोन्ओसा दुवाछाआ अ़पा खोन्कि अ़मा छिरुदाचिकि अ़खिम्हाङ्माएनान युङ। खोन्किना मो ह़वाङ्माङ अ़क पोक लिचि।’ #पुङ्चिपुक २:२४ 6मोचि हान ह़वाङ माआङ, मेन अ़क पोक लिचि। खोन्ओसा निनाम्हाङ्आ म़काम्सुचिओचि म़नाआ फेक्माचि अ़नुनिन।”
7फरिसिचिआ खोक्को अ़सेना, “खोन्नालो निनाम्हाङ्य़ङ खाकालु मोसाआ सायाकाम्माय़ङ छित्मुमा छाप्लावा दुवाछाआ छाप्माकि अ़खिम्हाङ्मा छिरुनेनि देकि य़ङायुङ्सा?”#य़ङ्हुप २४:१
8येसुआ मोचि म़लासुलोचि, “आम्नुओ साकोङ्वा ऱक्भाक मुवाङाओसा मोसाआ आम्नुओ खिम्हाङ्माएनान फेक्मान्चिन खानानिन ऩप़न्ओ, मेन बुयादाङ्का ओवात्नि मात्द़ङ्याङ्ओ। 9अ़ङ्का खानानिन लोनानिन, साङ्आ ताङ्लान्दाङ्का नि अ़तुक्वाआ अ़खिम्हाङ्मा छिरु, खोन्कि नि मेत्छामाएनान सायाकाम, मो ताङ्लान मु।”
10येसुओ अ़चुकाखेङ्पाचिआ खोक्को अ़लोवा, “खिम्हाङ्पा खोन्कि खिम्हाङ्माएदा ओवात्नि लिनालो साया मान्काम्दामा अ़नुवाक लि।”
11येसुआ मोचि म़लासुलोचि, “झारा म़नाचिआ साया मान्काम्दामायु य़ङ लोक्मा ऩऱन। मेन निनाम्हाङ्आ साङ्चि ओ य़ङ म़प़युङ्सुचि, मोचिआ ओन्ङा लोक्मा अ़ऱ। 12देकिनालो खा-खाक्कोचि म़लिहिदाङा मेत्छाला म़मु, देम्पाङ म़नाचिआ मेत्छाला मुमाय़ङ्चि म़युङ। देम्पाङ निनाम्हाङ्होन्ओ निम्पाङ आप्पि मेत्छाला म़मुनान्चिन। साङ्आ मो लोक्मा ऱ, मोसाआ मो लोउने।”
येसु खोन्कि अ़चुप्पो छाचि
मर्कुस १०:१३-१६; लुका १८:१५-१७
13खोन्किना येसुआ छाचिओ अ़चुताङ्दा अ़चुछुक अ़युङ्कि याम़मात्तुप़चिने निकिना म़नाचिआ अ़चुप्पो छाचि खोक्कोएदा म़तारुचि। मेन अ़चुकाखेङ्चिआ मोचि म़रेन्तुचि।
14मेन येसुआ म़लोचि, “छाचि अ़ङ्काएदा तामा पुवानुम्च़म, मोचि मान्छेक्दानुम्च़म। देकिनालो निनाम्हाङ्होन ओ छाचिवाकोचिओ निकिङा ओ।” 15खोन्किना खोक्को मोदाङ्का खात्मा बुया अ़चुछुक छाचिओ अ़चुताङ्दा अ़युङ्साकि मोचि आसिखा म़प़चि।
अ़क्छा कातोक म़ना
मर्कुस १०:१७-३१; लुका १८:१८-३०
16अ़क्दु खोक्कोएदा अ़क्छा म़ना ताकि सेनु, “काचिन्पो, अ़ङ्का अ़लुक्निन्ओ ह़ङ्म़ङ तोक्मा दियाको अ़नुवाक काचि मुमादोत?”
17खोक्कोसाआ मो अ़लासालोवा, “अ़नुवाक दि ओ, मोसोओ अ़तुक्वादा खाना अ़ङ्का देकि त़सेन्ङाङा? अ़नुवाक ना निनाम्हाङ ओन्ङा म़मुयाङ। मेन खाना अ़लुक्निन्ओ ह़ङ्म़ङ्दा वाङ्मानि त़मिन्याङ्नालो मोसाओ अ़य़ङ्हुप्वात्नि चुवा।”
18मो म़नाआ खोक्को सेनु, “खा-खाक्को य़ङ्चि?” येसुआ म़लासुलोचि, “खाना म़ना मान्सेत्दा, खाना ताङ्लान मान्मुदा, खाना मान्ख़दा, खाना सोज्जे सालुम्स़ङ मान्प़दो। 19आम्मामा खोन्कि आम्पापाचि साया मेत्तुचि, खोन्कि खाना आम्तेन्पाङ आप्पिवाङा सोमातुक्तु।”#लेबि १९:१८; लाम्वाङ्माय़ङ २०:१२-१६; य़ङ्हुप ५:१६-२०
20मो म़नाआ येसु लासुलो, “ओ झारा य़ङ्चि ना अ़ङ्का अ़ङ्सावाछायुङ्काङा मुङ्युङ्सुङ्च़ङ। हान अ़ङ्काएदा दि मान्तालायुक?”
21येसुआ मो अ़लासालोवा, “खाना झारा अ़नुवाक लिमा त़स़याङ्नालो खाराकि झारा आम्सामाचि इनुचिकि मान्तोक्कादाचि प़चि। खोन्कि खाना निनाम्मादु चासुम्छेन्बि त़तोक्तु। खोन्किना बानाकि अ़ङ्का त़ङ्ताङ।”
22मो सावाछाआ ओ य़ङ एनु, खोन्कि खोसोओ अ़मिन्मा सुवाकि खारालावा, देकिनालो खोसोओ ब़द्धे अ़चासुम्छेन्बि युङाङा।
23खोन्किना येसुआ अ़चुकाखेङ्पाचि म़लोचि, “अ़नुछ्या अ़ङ्का खानानिन लोनानिन, कातोक म़ना निनाम्हाङ्होन्दा वाङ्मा ब़द्धे चाअ़त। 24अ़ङ्का खानानिन लानालोनाङ्नानिन, कातोक म़ना निनाम्हाङ्होन्दा वाङ्मादाङ्का ना उता लुप्मित्ओ अ़खेत्दाङ्का लेन्मालोन्मा नुसुम्पेन्ता लि।”
25ओ अ़एनाकि अ़चुकाखेङ्पाचि अ़न्नुनु दोम्तुदोचि खोन्कि अ़सेना, “खोन्नालो साङ लेन्मा ऱ?”
26येसुआ मोचि नुलोक म़चोउचि खोन्कि म़लोचि, “म़नाचिदाङ्का ओ लिमा अ़ऱनिन, मेन झारा य़ङ्चि निनाम्हाङ्एदा लिमा म़ऱ।”
27खोन्कि पत्रुस्आ खोक्को अ़लोवा, “खानुम, आन्कान्का झारा सामाचि छिरुम्दोम्च़म्काकि खानानिन त़ङ्निङ्नि। आन्कान्का दि तोक्तुम्का?” 28येसुआ मोचि म़लोचि, “अ़नुछ्या अ़ङ्का खानानिन लोनानिन, खानानिन साङ-साङ्आ अ़ङ्का त़त़ङ्ताङ्युङ्साङ्ऩङ, खाउग़रि म़नाओ अ़छा झारा अ़ऩङ्वा य़ङ्चि मुन्माय़ङ ग़रिदा साम्स़रिओ हाङ्युङ्खादा युङ, मोन्ग़रि अ़ङ्का कात़ङ्चिछाङ बारकाहाङ्युङ्खाचिदा त़युङिन, खोन्कि इस्राएल्दाओ बारकाभुङ्चिओ अ़चुछ़ङ त़छेन्तुम्च़म। 29खोन्कि साङ-साङ्आ अ़ङ्ऩङ्ओ निम्पाङ अ़खिम माङ्लो अ़द़क्छा-बुवाचि माङ्लो अ़ना-निछाचि माङ्लो अ़पापा-अ़मामाचि माङ्लो अ़छाचि माङ्लो अ़व़क्स़ङ्चि छिरुयुङ्सुचि, मोसाआ सयेकास़रो तोक्तु, खोन्कि अ़लुक्निन्ओ ह़ङ्म़ङ्ओ पाङ तोक्तु। 30मेन बुया कालिचि देङ्दा म़लि, खोन्कि देङ्दा कालिचि बुया म़लि।”
Currently Selected:
मत्ति 19: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
