मत्ति 17
17
येसुओ अ़चुङाइवा फान्ताओ
मर्कुस ९:२-१३; लुका ९:२८-३६
1खोन्कि छकालेन्कि येसुआ पत्रुस, याकुब खोन्कि खोसोओ अ़निछा युहन्ना म़खात्तुचिकि अ़क्तात झोन्ताङाओ भ़ऱदु म़लोन्ता। 2मोदु अ़चुकाखेङ्पाचिओ अ़चुबुदा खोक्कोसोओ अ़चुकात्मा फान्ता। खोक्कोसोओ अ़चुङाइवा नाम्वात्नि लेरा, खोन्कि खोक्कोसोओ अ़चुतित साम्वात्नि ओम्पुवाचिचि लेरा। 3खोन्कि म़प्च़क़क्दा निनाम्हाङ्य़ङ खाकालु मोसा खोन्कि एलिया खोचिएदा खाङ्मुसाचिचिन, खोन्कि खोचि येसुएनान चेप्मा अ़पुङ्साचु।
4पत्रुस्आ येसु लो, “हाङ्पो, आन्कान ओदा युङ्मा अ़नुवाक लि! खानानिन त़मिनिन्नालो अ़ङ्का ओदा सुम्कातात याक्साचि मुङ्च़ङ्ने, अ़क्तात आम्नुओ निम्पाङ, अ़क्तात मोसाओ निम्पाङ खोन्कि अ़क्तात एलियाओ निम्पाङ।”
5पत्रुस चेवाङाहिदाङा, छोक्छोक्छोक्वाओ य़वारिआ मोचि भुक्तुखात्तुचि, खोन्कि मो य़वारिदाङ्का अ़क्तात य़ङ ता, “ओक्को सोमातुक्तुङ्योङ्ओ अ़ङ्छा ओ, खोक्कोएदा च़लोक अ़ङ्ऩङानुवायुङ्सा। खोक्कोसाआ ऩलोन्ओ एनानुम!”
6ओ य़ङ अ़चुकाखेङ्पाचिआ अ़एनाकिना मोचि अ़चुक़माकाराकि म़बोम्सान्चिन। 7मेन येसु म़ता, खोन्कि मोचि म़नोप्तुचिकि म़लोचि, “पुवालोन्तानिन, मान्क़दानिन!” 8खोन्कि मोचिआ अ़खाहिदा मोदा येसुदाङ्का साङ्छाङ मान्खाङ्अ़दा।
9खोन्कि खोचि भ़ऱदुङ्का म़धान्तान्यान्चिन्हिदा येसुआ मोचि म़लोचि, “देम्खातारि म़नाओ अ़छा स़दाओदाङ्का अ़लानिन्खोन्निन्लोन्निन, मोन्तारि खानानिन्आ त़खाम्ओ य़ङ साङ्छाङ खामान्एत्दानुम्च़म।”
10खोन्किना अ़चुकाखेङ्पाचिआ येसु अ़सेना, “खोन्नालो देकि य़ङ्हुप काचिन्पाचिआ बुया एलिया तामादोत्नि म़य़ङ्याङ?”#मलाकि ४:५
11येसुआ मोचि म़लासुलोचि, “अ़नुछ्या एलिया बुया ता, खोन्कि झारा य़ङ्चि लासुतोङ्सुचि। 12मेन अ़ङ्का खानानिन लोनानिन, एलिया बुयाङा ताचिआयुङ्सा, खोन्कि म़नाचिआ खो मान्सिन्अ़दा, मेन म़नाचिआ देमुमानि म़मिना, खोवात्निङा खो अ़मुवायुङ्सा। मोवात्निङा म़नाओ अ़छाआछाङ मोचिओ अ़चुछुक्दाङ्का दुखा आङ्मादोत।” 13मोन्ग़रि खोक्कोसाआ बप्तिस्मा काप़ युहन्नाओ अ़तुक्वादा आन्कान म़लोवाओ निकिना काखेङ्पाचिआ अ़तुप्ता।
येसुआ चाकावालावाआ लाउओ दुवाछा अ़नुसाओ
मर्कुस ९:१४-२९; लुका ९:३७-४३
14खोन्किना खोचि अ़धिवाङ म़ना मुक्लाचिएदा म़ताला, खोन्कि अ़क्छा म़ना खोक्कोसोओ अ़चुबुदा ता, खोन्कि अ़तुम्प़छ़क तोम्तुकि लो, 15“हाङ्पो, अ़ङ्छा दुवाछा छा सोमायोक्निप़नि, देकिनालो खो स़दावाखेन्आ लाउयुङ्सु, खोसाआ चाअ़त्लो दुखा आङ्तुङु। खो अ़क्वावाक मिदा छुक, माङ्लो अ़क्वावाक चाक्वादा छुक। 16अ़ङ्का आम्नुओ काखेङ्पाचिएदा खो बात्तुङ, मेन मोचिआ खो नुमा मान्ऱअ़दा।”
17खोन्कि येसुआ मोचि म़लोचि, “खानानिन साकोङ्छ़ङ मात्द़ङ्ओ म़नाचि खोन्कि ऱक्याङ्ओ लाम्दा काकोन्चि ओ! देम्खातारि अ़ङ्का खानानिन्एनान युङ्ङा? देम्खातारि अ़ङ्का खानानिन आङ्नानिन? आम्छा अ़ङ्काएदा बात्तु।” 18येसुआ मो चाकावालावा अ़रेन्ता, खोन्कि चाकावालावा खोएदाङ्का लोन्ताखारा, खोन्कि मो दुवाछा छा च़क्नि नुवालावा।
19आदेङ काखेङ्पाचि येसुएदा सुकुलादा म़ताकि अ़सेना, “आन्कान्का मो चाकावालावा देकि लोन्मा मान्ऱदोम्का?”
20खोक्कोसाआ मोचि म़लासुलोचि, “आम्नुओ साकोङ्छ़ङ अ़चिलोक याक्याङ्ओसा ओ। अ़नुछ्या, अ़ङ्का खानानिन लोनानिन, खानानिन्एदा अ़क बोप प़सैओ अ़ल़वा ओन्को ओन्ङा आम्नुओ साकोङ्छ़ङ याक्याङ्नालो ओ भ़ऱ ‘ओदाङ्का खारालावा!’नि त़लोम्नालो मो खात्लाप़। खोन्कि खानानिन्आ मुमा त़ऱन्मिन्ओ दित्छाङ मात्द़ङ। 21[मेन ओवाको चाकावालावा यामात्मा खोन्कि मान्चामाङ मान्युङ्माङ्तारि अ़लोन्निन।”]
येसुआ अ़चुस़मादामाओ अ़तुक्वादा खाअ़लुसाओ
मर्कुस ९:३०-३२; लुका ९:४३-४५
22खोचि गालिल्दा म़लासान्कोवान्चिन्हिदा येसुआ मोचि “म़नाओ अ़छा म़नाचिओ अ़चुछुक्दा अ़पाक”नि म़लोचि। 23“खोन्कि मोचिआ खो अ़सेत, मेन सुम्कालेन्दा खो लाखोन्लोन।” खोन्ओसा खोचिओ अ़न्नुनु अ़चुमिन्मा तुआ।
येसुआ निनाम्हाङ ब़क्खाखिम्दा दाम्दु अ़छोराओ
24खोन्कि खोचि कफर्नहुम्दा म़ताहिदा निनाम्हाङ ब़क्खाखिम्दाओ दाम्दु कालात्चि पत्रुस्एदा म़ताकि अ़सेना, “दि आम्नुओ काचिन्पा दाम्दु अ़छोन्निन?”
25खोसाआ लासुलो, “उवा, अ़छोन।”
पत्रुस खिम्हुत्दा वाङा खोन्कि येसुआ खो बुया अ़लोवा, “सिमोन, खाना देत्नि त़मिन्याङ? हेन्खामादाओ हाङ्चिआ दाम्दु साङ्दाङ्का अ़कोप? अ़चुछाचिदाङ्का हे निचिदाङ्का?”
26पत्रुस्आ लासुलो, “निचिदाङ्का।”
येसुआ खो अ़लोवा, “खोन्नालो अ़छाचिआ ना छोन्मा अ़दोत्निन। 27मेन मोचि आन्कान्एदाङ्का अ़चुमाइसुङ अ़कात्निन्ने निम्पाङ धियाङ्वामादा खाराकि ख़ङ्य़ धोन्ता, खोन्कि बुया त़लाउओ ङा बात्तु। मोसोओ अ़दो त़होङ्सुहिदा खाना अ़क्तात रुपाओ फेक्वा त़धिरु। मो खात्तुकि आम्को खोन्कि अ़ङ्को निम्पाङ मोचि प़चि।”
Currently Selected:
मत्ति 17: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
