युहन्ना 7
7
येसु खोन्कि अ़चुओ निछाचि
1खोन्किना येसु गालिल्दाङा म़कोला, मेन खोक्को यहुदियादा खात्मा मान्स़चि, देकिनालो यहुदि बुसुवाचिआ खोक्को सेत्मा निकिना अ़वाखाम अ़लाप्ताङा। 2हान यहुदिचिओ याक्सादाओ चानुचा नेक्ताताङा। 3खोन्ओसा येसुओ अ़चुनिछाचिआ खोक्को अ़लोवा, “गालिल छिरादानुम, खोन्कि यहुदिया खारानिन, खोन्किना खानानिन्आ त़मुम्योम्च़म्ओ काचिचि आम्नुओ काखेङ्पाचिआछाङ अ़खाङ्ने। 4खाक्को म़नाआ अ़ऩङ ऱङ्मा स़, मो सुकुलादा काचि अ़मुनिन। खानानिन ओ काचिचि त़मुम्च़म्नालो आप्पि हेन्खामादा खाङ्मुसानिन्चिन।” 5खोक्कोसोओ अ़चुनिछाचि मोवात्नि म़य़ङा देकिनालो खोचिआछाङ येसु साकोङ्छ़ङ मान्मुअ़दाङा।
6येसुआ मोचि म़लोचि, “मोदा खात्मा तोङ्ओ अ़ङ्को अ़ङ्ग़रि मान्तायुक, मेन खानानिन ना खाउग़रिनुछाङ खात्मा त़ऱन। 7हेन्खामाआ खानानिन ऩङात़छिरिमिन, मेन अ़ङ्का ना ऩङाअ़छित्ङा। देकिनालो हेन्खामाओ काचिचि अ़अ़त्पा म़मुयाङ निकिना अ़ङ्का सालुम्स़ङ प़ङ। 8खानानिन आप्पि ओ चानुचादा खारानिन। अ़ङ्का ओन्ग़रि अ़खात्ऩङ, देकिनालो अ़ङ्ग़रि हान्छाङ मान्तालायुक।” 9ओवात्नि म़य़ङाचिआकि खोक्को गालिल्दा म़युङालारा।
10मेन खोक्कोसोओ अ़चुनिछाचि चानुचादा म़खाराचिआकि खोक्को म़नाचिआ खाङ्याङ्सा माआङ, मेन मान्सिन्माङ म़खारा। 11चानुचादा यहुदि बुसुवाचिआ खोक्को अ़लामाङा, “खोक्को खादा युङ्याङ?”निकिना अ़सेनाङा।
12म़ना मुक्लाचिआ खोक्कोसोओ अ़चुतुक्वादा दुम म़तुसा। खा-खाक्कोचि म़य़ङा, “खोक्को अ़नुवाक म़मुयाङ।” निचि म़य़ङा, “माआङ, खोसाआ म़नाचि थेम्सुखात्तुङुचि।” 13मेन यहुदि बुसुवाचिओ अ़चुक़माआ खोक्कोसोओ अ़चुतुक्वादा साङ्छाङ झारासोओ अ़चुबुदा मान्चेप्चि।
चानुचादा येसुआ म़चिन्तुचिओ
14खोन्किना चानुचा अ़क्धाङ लिसाओ ग़रि येसु निनाम्हाङ ब़क्खाखिम्दा म़वाङा खोन्कि म़चिन्तुचि। 15यहुदि बुसुवाचि दोम्तुदोचि खोन्कि म़य़ङा, “देम्खाछाङ मान्खिप्ओ ओ म़ना देत्नि काले लिसा?”
16खोन्किना येसुआ मोचि म़लासुलोचि, “अ़ङ्चिन्माय़ङ अ़ङ्को माआङ, मेन अ़ङ्का काछुत निनाम्हाङ्दाङ्का ता। 17खाक्को म़नाआ निनाम्हाङ्ओ अ़चुमिन्मावा च़मानि मिन्नालो अ़ङ्चिन्माय़ङ निनाम्हाङ्दाङ्काओ हे, अ़ङ्को आप्पिओ अ़ङ्पाङ्दाङ्का ओ, मो खोसाआ सिन्तु। 18साङ आप्पि अ़पाङ्लाम्पा चेप, मोसाआ आप्पिओ अ़साऩङ्वा लामु, मेन साङ्आ खो काछुत्ओ अ़साऩङ्वा लामु, मो अ़छ़ङ काचेप ओ, खोन्कि खोएदा म़प्माय़ङ अ़याक्निन।
19 दि निनाम्हाङ्य़ङ खाकालु मोसाआ खानानिन य़ङ्हुप त़प़न्ओ माआङ? मेन खानानिन साङ्छाङ मो य़ङ्हुप्वा त़च़न्मिन। खानानिन देकि अ़ङ्का सेत्मा त़लाप्ङाङाऩङ?”
20म़ना मुक्लाचिआ अ़लासालोवा, “खाना चाकावालावाआ त़लावायुङ्सा। साङ्आ खाना सेत्मा त़लाप्याङ?”
21येसुआ मोचि म़लासुलोचि, “अ़क्तात म़दोम्दाओ काचि अ़ङ्का सावातोम्खा-लेन्दा मुङ, खोन्कि खानानिन झारा त़क़सिन। 22मेन मोसाआ खानानिन सिप्मायाम्बुन मुमा थाप्स़ङ ऩप़न (अ़नुछ्याङा मो मोसालाम्पाओ माआङ, मेन आम्नुओ सुन्तुम्चिआ अ़पुङ्सा ओ), खोन्ओसा सावातोम्खा-लेन्दा खानानिन्छाङ म़नाचि सिप्मायाम्बुन त़पाक्तुम्च़म। 23मोसाओ य़ङ्हुप अ़काक्निन्ने निम्पाङ खाक्को म़नाआ सावातोम्खा-लेन्दा सिप्मायाम्बुन पाक्तुनालो अ़ङ्का अ़क्छा म़ना सावातोम्खा-लेन्दा नुसुङ निकिना दि खानानिन अ़ङ्काएदा आम्नुओ माइसुङ कात्याङ? 24ङाइवा खाङ्सा छ़ङ मान्छेन्दानिन, मेन तोङ्लो छ़ङ छेन्तानिन।”
येसुङा ख्रिस्त ओ?
25खोन्किना यरुसलेम्दाओ खा-खाक्को म़नाचि म़य़ङा, “दि ओ म़नाङा माआङ, मोचिआ सेत्मा अ़लाप्याङ ओ? 26खानुम, येसु राक्एनान चेप्याङ, मेन ओचिआ खोक्को देत्छाङ ऩलोन्योन। ओङा ख्रिस्तओनि बुसुवाचिआ अ़नुछ्या अ़सिन्ता हे? 27मेन आन्कान सिन्तुम्योम, ओ म़ना खादाङ्का ताओ। मेन ख्रिस्त म़ताहिदा खाङ्म़मुनान्चिन, खोक्को खादाङ्का म़ता साङ्आछाङ अ़सिन्तुन।”
28खोन्ओसा येसुआ निनाम्हाङ ब़क्खाखिम्दा म़चिन्तुङुचिहिदा तोक्पो य़ङ्आ म़य़ङा, “खानानिन अ़ङ्का त़सिन्ङाऩङ, खोन्कि अ़ङ्का खादाङ्का ताङ्ओ, मोछाङ त़सिन्तुम। मेन अ़ङ्का आप्पिङा ताङ्ओ माआङ, मेन साङ्आ ऩछुत्ताङ, खोक्को अ़छ़ङ म़मुयाङ। 29खानानिन्आ खोक्को त़सिन्तिमिन। मेन अ़ङ्का खोक्को सिन्तुङ, देकिनालो अ़ङ्का खोक्कोलाम्पा ताङ्ओ, खोन्कि खोक्कोसाआ अ़ङ्का ऩछुत्ताङ्ओ।”
30खोन्ओसा मोचिआ खोक्को लाप्मा अ़लाप्ता, मेन साङ्आछाङ खोक्को छुक मान्पाक्अ़दा, देकिनालो खोक्कोसोओ अ़चुग़रि हान्छाङ मान्तायुक्ता। 31खोन्नुछाङ मुक्लादाओ ब़द्धे म़नाचिआ खोक्कोएदा साकोङ्छ़ङ म़मुवा खोन्कि मोचि म़य़ङा, “ख्रिस्त म़ताहिदा दि ओ म़नाआ मुचिओदाङ्का तोक्पो म़दोम्दाओ बुन्चि मुमा ऱचि कि?”
32म़ना मुक्लाचिआ येसुओ अ़चुतुक्वादा ओवाको दुम म़तुसाङाओ फरिसिचिआ अ़एना। खोन्किना मुलो काब़क्पाचि खोन्कि फरिसिचिआ खोक्को लाप्मा निम्पाङ निनाम्हाङ ब़क्खाखिम काहुङ्चि म़छुत्तुचि।
33येसुआ म़लोचि, “अ़क्चित ग़रि अ़ङ्का खानानिन्एनान युङ्ङा, खोन्किना अ़ङ्का काछुत्एदा लाङाखात्ङा। 34खानानिन्आ अ़ङ्का त़लाम्ङाऩङ, मेन त़धित्ऩङ्ऩम़ङ, खोन्कि खादा अ़ङ्का युङ्ङा, खानानिन तामा त़ऱन्मिन।”
35खोन्ओसा यहुदिचि अ़क्छा निएदा म़य़ङा, “ओ खादा खात्मा म़मुयाङ, खोन्कि आन्कान खो अ़धिरिमिन? दि ओक्को ग्रिक य़ङ काचेप्चिओ अ़चुरादा म़रिसाखाराकि म़युङ्याङ्ओ यहुदिचिएदा खात्माकि ग्रिक य़ङ काचेप्चि चिन्माचि म़स़याङ? 36खोक्कोसाआ म़य़ङाओ ओ य़ङ दि ओ, ‘खानानिन्आ अ़ङ्का त़लाम्ङाऩङ, मेन त़धित्ऩङ्ऩम़ङ, खोन्कि खादा अ़ङ्का युङ्ङा, खानानिन तामा त़ऱन्मिन।’?”
37खोन्किना चानुचाओ आदेङ्ओ लेन माङ्लो चानुचाओ मुलो लेन्दा म़एवाकि येसुआ अ़धिवो य़ङ्आ म़य़ङा, “साङ वामित्मा स़नालो मो अ़ङ्काएदा ताने खोन्कि दुङुने। 38साङ अ़ङ्काएदा साकोङ्छ़ङ मु, साम्कालिन ओवात्नि य़ङ्याङ, ‘मोसोओ अ़कोङ्हुत्याङ्का ह़ङ्म़ङ काप़ चाक्वाओ होङ्कुचि म़सोन्लोन।’” 39ओ य़ङ खोक्कोसाआ सेङ्लावाओ अ़चुतुक्वादा म़य़ङाओ। मो सेङ्लावा खोक्कोएदा साकोङ्छ़ङ म़मुवाओचिआ तोक्मा अ़मुवाङा। सेङ्लावा ओन्ग़रितारि मान्प़म़युक्तुचि, देकिनालो निनाम्हाङ्आ येसु झारा साऩङ्वा मान्प़अ़युक्ता।#७:३९ ओसोओ अ़तुप्य़ङ ‘निनाम्मादु मान्लाम़युक्ता’ओ। युहन्नाओ अ़नुय़ङ्खान्दा क्रुस्दा म़ख़न्ताहिदा खोन्कि सुवाओदाङ्का म़खोन्तालोन्ताकि निनाम्हाङ्ओ अ़चुच़क्दा म़युङ्हिदा येसुआ झारा साऩङ्वा अ़तोक्ओ निकिना तुप।
40ओ य़ङ काएन खा-खाक्को म़नाचि म़य़ङा, “ओ म़ना ना अ़नुछ्याङा तामादोराङाओ निनाम्हाङ्य़ङ खाकालुङा ओ।”
41निचि म़य़ङा, “ओ ना ख्रिस्त ओ।” मेन खा-खाक्कोचि म़य़ङा, “दि ख्रिस्त गालिल्दाङ्का तामा म़ऱ कि? 42दि साम्कालिन्दा मान्छाप्युक, ख्रिस्त दाउद्ओ अ़भुङ्दाङ्का खोन्कि दाउद्ओ अ़तेन बेथलेहेम्दाङ्का म़ता?” 43ओवात्नि म़नाचिओ अ़चुरादा येसुओ अ़चुचुतुक्वाआ म़फेआ। 44मोचिएदाओ देम्पाङ्साआ खोक्को लाप्मा अ़लाप्ता, मेन खोक्को साङ्आछाङ छुक मान्पाक्अ़दा।
यहुदि बुसुवाचिओ अ़चुसाकोङ्छ़ङ मान्मुदामा
45आदेङ्माङ निनाम्हाङ ब़क्खाखिम काहुङ्चि मुलो काब़क्पाचिएदा खोन्कि फरिसिचिएदा म़लासाता। मोचिआ निनाम्हाङ ब़क्खाखिम काहुङ्चि म़सेनुचि, “खानानिन्आ खो देकि मान्तात्त़दोम?”
46निनाम्हाङ ब़क्खाखिम काहुङ्चिआ म़लासुलोचि, “ओ म़नाआवात्नि ना खाक्कोछाङ म़ना देम्खाछाङ मान्चेप!”
47फरिसिचिआ मोचि म़लोचि, “खानानिन्छाङ त़थेमिन्खारिन हे देत्नि? 48दि पाङ्कातोक्चि माङ्लो फरिसिचिएदाओ खाक्को खोक्कोएदा साकोङ्छ़ङ मुवायुङ्सा? 49मेन ओ मुक्लादाओ साङ्आ य़ङ्हुप अ़लेसुन, मो माङ्हिम्सायुङ्सा।”
50मोचिएदाओ अ़क्छा निकोदेमस्निओ युङाङा, मो बुया अ़क्दु येसुएदा खाराओ। खोसाआ मोचि लोचि, 51“दि आन्य़ङ्हुप्आ बुया म़नाओ अ़य़ङ मान्एन्माङ खोन्कि मोसाआ दि मुयुङ्सु, मो मान्सिन्माङ मो लाहि पाक्तु कि?”
52मोचिआ खो अ़लासालोवा, “दि खानाछाङ गालिल्दाङ्का ओ? साम्कालिन्दा लामुकि खा, खोन्कि खाना त़खा, गालिल्दाङ्का निनाम्हाङ्य़ङ खाकालु अ़लोन्निन।”
ताङ्लान कामुमा लाप्माय़ङ
[53खोन्कि झारा म़नाचि अ़चुखिम म़खारा।
Currently Selected:
युहन्ना 7: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
