युहन्ना 19
19
1खोन्किना पिलातस्आ येसु लासुखात्तुकि य़हुप पाक्मेत्तुचि। 2खोन्कि रात्खामिचिआ त़ङ्खोक्वाओ ताङ्बोप्खा अ़बाकि खोक्कोसोओ अ़चुताङ्दु अ़बोप्ता, खोन्कि खोक्को हालापाक्पाक्ओ बोप्खु अ़हुप्ता। 3खोन्कि खोक्कोसोओ अ़चुच़क्दा म़ताकि, “सेवा, यहुदिचिओ अ़चुहाङ!”नि लोयाङ्सा मोचिआ खोक्को अ़सुङ्ता खोन्कि अ़चुखोम्ताङ्मादा अ़फेङ्सा।
4बुङ्खाया लासालोन्ताकि पिलातस्आ मोचि लोचि, “खानुम, अ़ङ्का ओक्को खानानिन्एदा बुङ्खाया लोत्तुङ्योङ, खोन्कि खानानिन खाएत्नाङ्नानिन, अ़ङ्का ओक्कोसोओ अ़देङ्सालाप्पादा दित्छाङ लाहि पाक्मायु अ़तुक्वा अ़धित्ऩङ।” 5खोन्कि त़ङ्खोक्वाओ ताङ्बोप्खा खोन्कि माक़ल़ङ तित हुम्साङाओ येसु बुङ्खाया अ़लोत्ता। खोन्कि पिलातस्आ मोचि लोचि, “खानुम, ओदाओ ओ म़ना!”
6मोन्ग़रि मुलो काब़क्पाचि खोन्कि निनाम्हाङ ब़क्खाखिम काहुङ्चिआ खोक्को अ़खा, मोचि ओवात्नि य़ङ्सा पात्मा अ़पुक्ता, “मो क्रुस्दा ख़न्तासेरानुम! मो क्रुस्दा ख़न्तासेरानुम!”
पिलातस्आ मोचि लोचि, “खानानिन आप्पिआङा ओक्को खात्तानुम खोन्कि मो क्रुस्दा ख़न्तासेरानुम! देकिनालो अ़ङ्का ओक्कोसोओ अ़देङ्सालाप्पादा दित्छाङ लाहि पाक्मायु अ़तुक्वा अ़धित्ऩङ!”
7यहुदि बुसुवाचिआ खोक्को अ़लासालोवा, “आन्काओ अ़क्तात य़ङ्हुप युङ्याङ, खोन्कि मो य़ङ्हुप्वा ओ स़माङादोत, देकिनालो ओसाआ आप्पि निनाम्हाङ्ओ अ़चुछा मुवान्युङ्सान्चिन।”
8ओ य़ङ पिलातस्आ एनुकि च़लोक अ़क़माकारा। 9खो खिम्हुत्दा वाङा खोन्कि येसु सेनु, “खाना खादा ओ?” मेन येसुआ खोसोओ अ़य़ङ मान्लाअ़दा। 10खोन्ओसा, पिलातस्आ खोक्को लो, “दि खाना अ़ङ्काएनान त़चेप्नान? दि खाना लेत्मा पाङ अ़ङ्काएदा याक्याङ, खोन्कि खाना क्रुस्दा ख़न्मा पाङ्छाङ अ़ङ्काएदा याक्याङ निकिना खाना त़सिन्तुन्योन?”
11येसुआ अ़लासालोवा, “खानानिन्आ धानाङ्का मान्तोक्त़दोम्ओदे अ़ङ्काएदा आम्नुओ पाङ दित्छाङ मान्लिओ। खोन्ओसा अ़ङ्का आम्नुओ छुक्दा कापाक प़ तोक्पो हेवामि ओ।”
12खोन्किना पिलातस्आ येसु लेत्माखान्मा च़लोक लामा। मेन यहुदि बुसुवाचि ओवात्नि य़ङ्सा म़पारा, “खानानिन्आ ओ म़ना त़लेरुम्नालो खानानिन कैसरओ अ़चुयावा माआङ। आप्पि हाङ्नि कालोनान्चिन झारा कैसरओ अ़देङ्सालाप्पादा म़मु।”
13पिलातस्आ ओ य़ङ एनुकि येसु बुङ्खाया लोत्तु खोन्कि खोक्को “लुङ्ओ पाति”नि लोवाङाओ (मो हिब्रुदा गब्बथानि लो) छ़ङ्छेन्खादा युङा। 14मोन्ग़रि काक्माखात्मा चानुचा चुम्मान्चिन्ओ लेन मुवाङा। अ़खोलेन्ओ आप्फात बार साङायुङ्सा। पिलातस्आ यहुदिचि लोचि, “खानुम, आम्नुओ हाङ!”
15मेन मोचि ओवात्नि य़ङ्सा म़पारा, “खोक्को खात्तानुम! खोक्को खात्तानुम! मो क्रुस्दा ख़न्तासेरानुम!”
पिलातस्आ मोचि सेनुचि, “दि अ़ङ्का आम्नुओ हाङ क्रुस्दा अ़ङ्का ख़न्तुङ्नेनि त़मिनिन्येन?”
मुलो काब़क्पाचिआ अ़लासालोवा, “कैसरदाङ्का आन्काओ नि हाङ मात्द़ङ।”
16खोन्किना पिलातस्आ येसु क्रुस्दा ख़न्मासेत्मा प़लाउचि।
येसु क्रुस्दा
मत्ति २७:३२-४४; मर्कुस १५:२१-३२; लुका २३:२६-४३
खोन्किना रात्खामिचिआ येसु अ़खात्ता। 17खोक्कोसाआ अ़चुक्रुस आप्पि अ़खुयाकि ताङ्खोयोक्वानि लोवाङाओदा म़खारा। मो हिब्रु य़ङ्दा गलगथानि लो। 18मोदा मोचिआ खोक्को क्रुस्दा अ़ख़न्ता, खोन्कि खोक्कोएनान नि ह़वाङ म़ख़न्तुचि, अ़क्छा अ़क्लिप्पा खोन्कि अ़क्छा नि लिप्पा, खोन्कि अ़चुकाप्दा येसु।
19पिलातस्आ अ़क्तात लाहिपाक्मा छाप्माय़ङ्छाङ छाप्तु, खोन्कि क्रुस्दा अ़खेप्ता। मोदा ओवात्नि छाप्ताङा, “नासरत्ओ येसु, यहुदिचिओ अ़चुहाङ।” 20हान ब़द्धे यहुदिचिआ ओ लाहिओ छाप्लावा अ़खिप्ता, देकिनालो येसु क्रुस्दा म़खेप्ताओ सहराओ अ़च़क्दाङा याआङा। ओ हिब्रु, ल्यातिन खोन्कि ग्रिक य़ङ्दा छाप्ताङा। 21खोन्ओसा यहुदिचिओ मुलो काब़क्पाचिआ पिलातस अ़लोवा, “‘यहुदिचिओ अ़चुहाङ’ माआङ, मेन ‘ओसाआ अ़ङ्का यहुदिचिओ अ़चुहाङ्नि लोवान्चिन्ओ’नि छाप्तानुम।”
22पिलातस्आ लासुलोचि, “अ़ङ्का दि छाप्तुङ्युङ्सुङ, अ़ङ्का छाप्तुङ्चिउङ्युङ्सुङ।”
23रात्खामिचिआ येसु क्रुस्दा अ़ख़न्ताचिआकिना मोचिआ खोक्कोसोओ अ़चुतित अ़बात्ताकि अ़क-अ़क लोक अ़तोक्तालो चारकालोक अ़मुवा। खोक्कोसोओ अ़बोप्खुछाङ अ़बात्ता, मेन मो तित अ़थुप्खा मात्द़ङ्ओ धानाङ्का ह्युनितारि बामाय़ङ मुवाङा। 24खोन्ओसा मोचिआ अ़क्छा निएदा म़य़ङा, “ओ आन्कान अ़रेइमिन्ने, मेन ओ साङ्को लिओ निकिना होरा पाइन्ने।” साम्कालिन य़ङाङाओ तालाने निकिना ओ लिसाओ,
“मोचिआ अ़ङ्तित अ़चुरादा अ़हासा,
खोन्कि अ़ङ्बोप्खुओ निम्पाङ होरा अ़पाआ।”#साम्ऱङ्भुङ २२:१८
25खोन्ओसा रात्खामिचिआ ओ काचि अ़मुवा।
खोन्कि येसुओ अ़चुक्रुस्ओ च़क्दा खोक्कोसोओ अ़चुमा, खोक्कोसोओ अ़चुमाओ अ़निछामा, क्लोपास्ओ अ़खिम्हाङ्मा मरियम खोन्कि मग्दला सहरादाओ मरियम म़एवाङा। 26खोन्कि येसुआ अ़चुमा खोन्कि खोक्कोसाआ सोमाअ़तुक्ताङाओ अ़चुकाखेङ्पा अ़चुच़क्दा म़एवाङाओ अ़खाकि खोक्कोसाआ अ़चुमा अ़लोवा, “आमो, खा-खानुम, आम्नुओ छा!” 27खोन्कि मो काखेङ्पाछाङ अ़लोवा, “खाखो, आम्मा!” मोन्ग़रिदाङ्का मो काखेङ्पाआ मो आप्पिओ अ़खिम्दा खात्तु।
येसुओ अ़चुस़मा
मत्ति २७:४५-५६; मर्कुस १५:३३-४१; लुका २३:४४-४९
28खोन्किना येसुआ झारा अ़चुकाचि हान चिआ निकिना अ़सिन्ता, खोन्कि साम्कालिन्दाओ य़ङ तालाने निम्पाङ, “अ़ङ्का वामित्मा सुवाङ” नि खोक्को म़य़ङा। 29मोदा सुन्ताङाओ अङ्गुरा माङ्वाआ भेप्ताओ ब़ युङाङा। खोन्किना सुन्ताङाओ अङ्गुरा माङ्वाआ भेप्तुओ अ़क्तात याङ्पेन अ़क्तात हिसप्ओ अ़खेक्दा अ़युङ्सा खोन्कि मोचिआ खोक्कोसोओ अ़चुदोदु अ़तासाला। 30येसुआ सुन्ताङाओ अङ्गुरा माङ्वा अ़दुङा, खोन्कि खोक्को म़य़ङा, “हान चिआ।” खोन्कि खोक्कोसाआ अ़चुताङ अ़पोम्सा, खोन्कि अ़चुसाक्मा खारा।
31अ़माङ्कोलेन अ़च़वाङ सावातोम्खा-लेन ओ, खोन्कि मो लेन यहुदिचि मोसोओ निम्पाङ म़चुम्सान्यान्चिन। देकिनालो यहुदिचिआ सावातोम्खा-लेन स़पोक्चि क्रुस्दा ऩयाक्निन्नेनि म़मिनाङा। खोन्ओसा मोचिओ अ़चुलाङ्चि ओत्माचिकि मोचिओ अ़चुपोक लात्माखात्माचि निम्पाङ पिलातस अ़दोत्ता। 32खोन्किना रात्खामिचि म़ताकि खोक्कोएनान क्रुस्दा ख़न्ताङाचिओसो अ़चुलाङ्चि म़ओत्तुचि, बुया अ़क्छाओ, खोन्कि नितात ओ। 33खोन्किना मोचि येसुएदा म़ताकि अ़खाहिदा खोक्को आत्थुङा म़सुवादायुङ्सा, खोन्कि खोक्कोसोओ अ़चुलाङ्चि मान्ओत्अ़दा। 34मेन रात्खामिचिएदाओ अ़क्छाआ खोक्कोसोओ अ़चुहेबेक्दा भेआ धुउ, खोन्कि मोन्ग़रिङा ह़ खोन्कि चाक्वा लोन्ता।
35खानानिन ओछाङ साकोङ्छ़ङ मुमा रुवानिन निकिना ओ काखाङ्आ सालुम्स़ङ प़ओ, खोन्कि खोसोओ अ़सालुम्स़ङ अ़नुछ्या ओ, खोन्कि खोसाआ आप्पि अ़छ़ङ खालुसुङ्योङ निकिना सिन्तुङु। 36“खोक्कोसोओ अ़क्तात्छाङ अ़चुय़वा अ़ओत्निन्ने”नि साम्कालिन तालाने निकिना ओ य़ङ्चि म़लिसाओ।#साम्ऱङ्भुङ ३४:२० 37खोन्किना साम्कालिन्ओ नि अ़धाङ्दाछाङ य़ङ्याङ, “साङ्चिआ खोक्को अ़धुवायुङ्सा, मोचिआ खोक्को अ़खाङ।”#जकरिया १२:१०
येसुओ अ़चुस़पोक खुम्मा काचि
38मोन्किना अरिमाथियादाओ योसेफ, खो यहुदि बुसुवाचिओ क़माआ सुकुलादा ओन्ङा येसुओ अ़चुकाखेङ्पा लिसायुङ्सा। मोसाआ पिलातस्एदा येसुओ अ़चुस़पोक खात्मा तोक्तुङ्ने निकिना दोत्तु। पिलातस्आ खात्मा प़। खोन्कि खो ताकि खोक्कोसोओ अ़चुस़पोक लारु खात्तु। 39खोन्किना बुया खोक्कोएदा अ़खाखुत काता निकोदेमस्आछाङ आप्फात: तेत्तिस किलो नाम्नुओ सुङ खोन्कि एलवा होन्माय़ङ्ओ तारुकि मोदा ता। 40मोचिआ येसुओ अ़चुस़पोक अ़लाराचु, खोन्कि यहुदिचिओ अ़चुओ खुम्माओ च़माथाङ्मावात्नि नाम्नुओ सुङ्एनान बाङ्गाय़ओ तित्दा अ़रिप्ताचु। 41खोक्को क्रुस्दा म़ख़न्ताओदा अ़क्तात स़ङ्सिबात्बुङ्खा याआङा। मो स़ङ्सिबात्बुङ्खादा देम्खाछाङ साङ्छाङ मान्युङ्युक्ताओ अ़क्तात अ़ऩङ्वा एप्मा याआङा। 42देकिनालो ओ यहुदिचिओ चुम्मान्चिन्ओ लेन ओ, खोन्कि मो एप्माछाङ अ़च़क्दाङा याआङा, खोन्ओसा मोचिआ येसु मो एप्मादा अ़युङ्सा।
Currently Selected:
युहन्ना 19: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
