छाम्माय़ङ 7
7
स्तिफनस चेवाओ
1खोन्किना मुलो काब़क्पाआ स्तिफनस सेनु, “दि खाना लाहि ऩपाक्याङ्ओ ओ य़ङ्चि अ़नुछ्या ओ?” 2खोन्कि स्तिफनस्आ य़ङ्लासु, “अ़ङ्ब़ब़चि खोन्कि अ़ङ्पापाचि ओ, अ़ङ्का य़ङ्ङाङाओ एनानुम! आन्सुन्तुम अब्राहाम हारान खात्मा बुया मेसोपोतामियादा युङाङाहिदा अ़चुऩङ्लोङ्मा खान्तुओ आन्निनाम्हाङ अब्राहाम्एदा खाङ्म़मुसान्चिन। 3खोन्कि निनाम्हाङ्आ खो अ़लोवा, ‘खाना आम्हेन्कोप खोन्कि आम्दाक्मित्चि छिरुदोचिकि अ़ङ्का हान खाङ्मेत्नाओ हेन्कोप्दा खारा।’
4खोन्ओसा खोसाआ कल्दिचिओ अ़चुहेन्कोप छिरुदो, खोन्कि हारान्दा खाराकि युङा। खोन्कि खोसोओ अ़पा सुवादाकि निनाम्हाङ्आ खो खानानिन आइमित त़युङिन्येन्ओ ओ हेन्कोप्दा अ़तारा। 5निनाम्हाङ्आ अब्राहाम ओदा अ़क्छेप्छाङ थाम्पुक्ओ अ़हाङ्पा लिमा मान्प़अ़दा। मेन अब्राहाम्ओ अ़छाचि मोन्ग़रि मात्द़ङ्याङ्चिनुछाङ ‘आम्छावारिचि माय़ङ ओ झारा थाम्पुक्ओ अ़हाङ्पा अ़धुन लिमा प़ङ्च़ङ’नि निनाम्हाङ्आ खो अ़हिप्ता। 6निनाम्हाङ्आ अब्राहाम ओवात्नि अ़लोवा, ‘आम्छावारिचि निहेन्कोप्या म़खात्कि तालावा लिमाकि युङ्मादोत, खोन्कि मो हेन्कोप्दाओ म़नाचिआ अ़चुहारुक म़मुचिकि मोचि चार सयेकादोङ्तारि चाअ़त्लो दुखा म़प़चि।’ 7निनाम्हाङ म़य़ङा, ‘मेन खानानिन हारुक कामुचि अ़ङ्का दन्दा प़ङ्च़ङ। खोन्किना मोचि मो हेन्कोप्दाङ्का आदेङ म़लाबान्कि ओदाङा अ़ङ्का ऩब़क्ङा।’ 8खोन्किना निनाम्हाङ्आ अब्राहाम हिप्तुओ मित्तुने निकिना #७:८ सिप्मायाम्बुन : दुवाछाचिओ अ़चुछेन्खाओ अ़चोम्दुओ अ़होक्वा सिप्माखान्मा इस्राएलिचिओ च़माथाङ्मा। अ़देङ्या य़ङ्सिवा अ़तुक्वाऩङ्दा ‘सिप्मायाम्बुन’ लामानुम।सिप्मायाम्बुन पाक्अ़मेत्ता। खोन्किना अब्राहाम इसहाक्ओ अ़पा लिसाकि इसहाक पुक्तान्चिन्ओ आथ्कालेन्ओलेन्दा अ़सिप्मायाम्बुन पाक्तु। आदेङ इसहाक याकुब्ओ अ़पा लिसाकि मोवात्निङा मु, खोन्कि याकुब बारकाभुङ्ओङा अ़चुपा लिसाकि मोवात्निङा मुचि।
9याकुब्ओ अ़छाचिआ अ़चुनिछा योसेफ ऩङ्च़ अ़मेत्ताकि खो हारुक लिसि मिस्र हेन्कोप्या मोचिआ अ़इनाखाइसा। मेन निनाम्हाङ खोएनान म़युङाङा। 10खोन्कि खोसोओ झारा अ़दुखाचिदाङ्का अ़रात्ता। निनाम्हाङ्आ योसेफ अ़नुवाक खारु अ़पुवाकि मिस्र हेन्कोप्दाओ हाङ फारोआ खो अ़ऩङानुसु। खोन्किना खो मिस्र हेन्कोप्दाओ खोन्कि हाङ्ओ झारा अ़खिम्लुम्पादाओ हाङ्काचि कामु अ़मुवा।
11खोन्किना झारा मिस्र हेन्कोप खोन्कि कनान्दा स़ङ्साक्वा लुवाकि म़नाचि चाअ़त्लो दुखा म़तोक्ता, खोन्कि आन्सुन्तुम्चि चामायु मान्तोक्चि। 12मेन याकुब्आ मिस्र हेन्कोप्दा चासुम युङ्याङ्नि एनुकि आन्सुन्तुम्चि बुयाओदु चासुम खित्सि छुत्तुचि। 13मोचि ह्वादुओदु चासुम खित्सि म़खाराहिदा योसेफ्आ अ़बुवाचि खो साङ्ओ निकिना खाएत्तुचि, खोन्कि योसेफ्ओ अ़खिम्लुम्पाओ अ़तुक्वादा मिस्रदाओ हाङ फारोआ सिन्तु। 14खोन्किना योसेफ्आ अ़पा याकुब खोन्कि खोसोओ अ़खिम्लुम्पाचि मिस्रदा युङ्सि बान्मा निकिना बुत्तुखाइसुचि। मोचि झारा पचहत्तरकापाङ म़याआङा। 15खोन्किना याकुब मिस्र हेन्कोप्दा खाराकि मोयुङा सुवादा, खोन्कि आन्सुन्तुम याकुब्ओ अ़छाचिछाङ मोयुङा म़सुवादा। 16खोन्कि मोचिओ आदेङ अ़चुस़पोक्चि सकेम्दा म़लासुखात्तुचिकि म़खुम्तुचि। मो स़पोक खुम्खा हमोरओ अ़छाचिएदाङ्का अब्राहाम्आ रुपाआ खिरुयुङ्सुओ।
17मेन निनाम्हाङ्आ अब्राहाम अ़हिप्ताओ तामालामा ग़रि नेक्ताताहिदा मिस्र हेन्कोप्दा आन्म़नाचिओ अ़चुखिप्मा ब़द्धे पोयायुङ्सा। 18खोन्किना योसेफ्ओ अ़तुक्वादा दित्छाङ मान्सिन्कादा नितात अ़क्छा हाङ मिस्र हेन्कोप्दा हाङ मुमा पुङ्सु। 19खो आन्रावाचिएदा चाप्चा काचि मुवा, खोन्कि आन्सुन्तुम्चिआ अ़ऩङ्वा म़तोक्तुचिओ अ़चुनुनुचि म़स़दाने निकिना बुङ्खाया राकाङ्थेत्नि युङ्दाम़मेत्तुङुचि।
20मोन्ग़रिङा निनाम्हाङ्य़ङ खाकालु मोसा लिसा। मो नुनु निनाम्हाङ्ओ अ़खाङ्मादा अ़न्नुनु खान्नुवाङा। खोन्कि खो सुम्कादोङ्वात्तारि अ़पाअ़माचिआ अ़चुखिम्दा अ़केन्ताचु। 21खोन्किना खो बुङ्खाया अ़छिरादाचु, मेन हाङ फारोओ अ़छा मेत्छाछाआ खो धिरुकि खात्तु, खोन्कि अ़छावा केन्तु। 22खोन्कि मोसा मिस्रिचिआ झारा अ़लेसाङाओ ताया अ़चिन्ताकि खो चेप्मादा खोन्कि काचिचिदा ब़द्धे काले लिसा।
23मोसा चालिस्कादोङ बात्तुहिदा इस्राएलि अ़द़क्छाबुवाचिएनान तुप्मानि अ़मिन्मादा मिना। 24अ़क्लेन अ़क्छा मिस्रिआ अ़क्छा इस्राएलि रिम्तुङुओ मोसाआ खाकि इस्राएलि अ़म़ना रात्तुकि मिस्रि सेरुकिना अ़फान लात्तु। 25मोसाआ अ़द़क्छाबुवाचि मिस्रिचिएदाङ्का फोङ्सि निनाम्हाङ्आ अ़छुत्ताङ्ओ निकिना अ़तुप हे नि मिनाङा, मेन मोचिआ मान्तुप्अ़दा। 26अ़माङ्कोलेन मोसाआ ह़वाङ इस्राएलिचि म्हुवाङाचिओ खाचि। मोचि अ़क्छा निएदा तोङ्माचिनि मिनाकि खोसाआ लोचि, ‘एनाचु, यावाचि ओ, खानाचिना यहुदि-यहुदि ए, देकि खानाचि ओवात्नि त़म्हुचिङ्चिओ?’
27मेन कारिम्आ मोसा ह्यात्नि तोलुखाइसुकि लो, ‘आन्कान्काएदा हाङ्काचि कामु खोन्कि छ़ङ्काछेन खाना साङ्आ त़मुवा? 28आखोमाङ खाना मो मिस्रि त़सेरुओवा अ़ङ्काछाङ सेत्मा त़लाप्ङाङा?’ 29ओ य़ङ एनुकि मोसा मिस्र हेन्कोप्दाङ्का मिधान्दा फुङ्साखारा। खोन्कि खो मो हेन्कोप्दा तालावा लिसाकि युङा। मोदा खोसोओ ह़वाङ दुवाछा अ़छाचि लिसाचि। 30चालिस्कादोङ क़प्तुकिना सिनै भ़ऱ च़क्दाओ लेक्लेक्लेक्वाओदा लेरायुङ्साङाओ स़ङ्फोम्सुवादाओ मिलाप्दा अ़क्छा निनाम्हाङ काफा मोसाएदा खाङ्मुसान्चिन। 31मोसाआ मो खाकि दोम्तुदो खोन्कि मो नुलोक खाङ्सि अ़च़क्दा खाराहिदा खोसाआ निनाम्हाङ्ओ अ़चुय़ङ एनु। 32‘अ़ङ्का आम्सुन्तुम्चिओ अ़चुनिनाम्हाङ ओ। अब्राहाम्ओ अ़निनाम्हाङ, इसहाक्ओ अ़निनाम्हाङ खोन्कि याकुब्ओ अ़निनाम्हाङ ओ।’ खोन्कि मोसा अ़क़माआ धुन्मा पुक्तुकिना खाङ्मा राक मान्मुदो।
33खोन्किना निनाम्हाङ्आ मोसा अ़लोवा, ‘आम्लाङ्दाओ फेङ्ताचि हुरुचि, देकिनालो खाना त़एप्याङ्ओ बाखा सेङ्याङ। 34मिस्रदा अ़ङ्म़नाचि चाअ़त्लो म़रिम्तुङुचिओ अ़ङ्का खाङ्युङ्सुङ, खोन्कि दुखाआ ह़त्पा म़लुवाङाओ एनुङ्कि अ़ङ्का मोचि फोङ्सि निकिना युवाङ्युङ्साङ। हान खारा, अ़ङ्का खाना मिस्र हेन्कोप्दा लानाछुत्नाङ्ना।’
35ओ मोसाङा इस्राएलिचिआ ‘आन्कान्काएदा हाङ्काचि कामु खोन्कि छ़ङ्काछेन खाना साङ्आ त़मुवा?’निकिना बुया ऩङाअ़छिराओ। मेन निनाम्हाङ्आ लेराङाओ स़ङ्फोम्सुवादा खाङ्कामुनान्चिन निनाम्हाङ काफालाम्पा मो मोसाङा इस्राएलिचिओ अ़चुहाङ्काचि कामु खोन्कि काफोङ्लोन ह्वातात्माङ अ़मुवाकि अ़छुत्ता। 36खोसाआङा इस्राएलिचि मिस्र हेन्कोप्दा, हालापाक्पाक्ओ धियाङ्वामादा खोन्कि लेक्लेक्लेक्वाओदा चालिस्कादोङ्तारि अ़न्नुनु म़दोम्दाओ काचिचि खोन्कि बुन्चि मुयाङ्सा तित्तुलोत्तुचि।
37ओ निनाम्हाङ्य़ङ खाकालु मोसाआ इस्राएलिचि लोचि, ‘निनाम्हाङ्आ अ़ङ्का ऩछेन्ताङ्वात्नि आम्नुओ आप्पिओ म़नाचिदाङ्का अ़क्छा आम्नुओ निम्पाङ निनाम्हाङ्य़ङ खाकालु अ़छेन।’
38ओ मोसाङा इस्राएलि म़नाचि लेक्लेक्लेक्वाओदा साम्भुङ्चिएदा निनाम्हाङ काफा खोन्कि आन्सुन्तुम्चिएनान सिनै भ़ऱदु म़चेवा, खोन्कि निनाम्हाङ्य़ङ खाकालु मोसाआ आन्कान प़मा निम्पाङ अ़ह़ङ य़ङ्खान्चि निनाम्हाङ काफाएदाङ्का तोक्तुचि।
39मेन मोसाआ लोचिओ आन्सुन्तुम्चि मान्काङ्चि, खोन्कि मोचिआ खो ऩङाअ़छिराकिना मिस्र हेन्कोप्याङा लामाखात्मानि म़मिना। 40खोन्कि मोचिआ हारुन अ़लोवा, ‘आन्कान्का बुया कातित माङ्चि मेत्निप़नि, देकिनालो आन्कान्का मिस्र हेन्कोप्दाङ्का कातित्बात मोसा दे लिसायुङ्सा, आन्कान्का अ़सिन्तिमिन्का!’ 41खोन्किना मोचिआ बोयोङ छावा काराओ अ़क्तात सेम्पोक अ़मुवाकि हेन्खोक्वा अ़धात्ता, खोन्कि अ़चुछुक्आ अ़मुवाओ सामाओ अ़तुक्वादा अ़चुऩङाम़नुसान्चिन। 42खोन्ओसा निनाम्हाङ्आ मोचि निनाम्मादुओ नाम, लादिप्मा खोन्कि साङ्केन्माचि अ़चुमाङ्चिवा म़ब़क्तुचिने निकिना म़छिरुखाइसुचि। निनाम्हाङ्य़ङ खाकालुचिआ अ़चुछाप्लावादा अ़छाप्तायुङ्सा:
‘इस्राएलि म़नाचि ओ! दि खानानिन्आ चालिस्कादोङ्तारि
लेक्लेक्लेक्वाओदा अ़ङ्का सायाम्पोक्ओ
हेन्खोक्वा त़प़नि?
43खानानिन्आ मोलोख माङ्ओ तित्खिम खोन्कि रेफन्निओ माङ साङ्केन्माओ अ़सेम्पोक
ब़क्मा निकिना त़मुम्च़म।
खोन्ओसा अ़ङ्का खानानिन बेबिलोन्दाङ्का अ़थायातारि ङेङ्चिलाम्पा लाप्खात्मेत्नानिन।’#आमोस ५:२५-२७; लेबि १८:२१
44लेक्लेक्लेक्वाओदा आन्सुन्तुम्चिओ अ़चुसालुम्स़ङ प़खा तित्खिम युङाङा। निनाम्हाङ्आ मोसा सिनै भ़ऱदु खाङ्अ़मेत्ताओ अ़मात्ऩङ्वाओ तित्खिम अ़मुवायुङ्सा। 45आदेङ आन्सुन्तुम्चिओ अ़चुफान्दा निरावाचि निनाम्हाङ्आ म़ऱसुखाइसुचिकि अ़चुहेन्कोप अ़चुपाङ्दा अ़मुवाहिदा यहोसुओ अ़तित्मादा मो तित्खिम अ़बात्ता। खोन्किना मो दाउद हाङ्ओ अ़ग़रितारि मोदाङा अ़याङा। 46दाउद हाङ्आ निनाम्हाङ्ओ अ़चुऩङानुसु, खोन्कि याकुब्ओ अ़निनाम्हाङ्ओ निम्पाङ अ़क्तात निनाम्हाङ ब़क्खाखिम मुखा खोसाआ दोत्तु। 47मेन निनाम्हाङ्ओ अ़चुब़क्खाखिम कामु हाङ सोलोमन ओ।
48खोन्नुछाङ, झारादाङ्का तोक्पो निनाम्हाङ म़नाचिआ मुमाय़ङ ब़क्खाखिम्चिदा ऩयुङ्निन। ओवात्नि निनाम्हाङ्य़ङ खाकालुचि म़य़ङायुङ्सा:
49‘निनाम्मा अ़ङ्हाङ्युङ्खा ओ,
खोन्कि हेन्खामा अ़ङ्लाङ नेम्खा ओ।
खानानिन अ़ङ्को निम्पाङ दियाको खिम मुमा त़ऱम कि?
माङ्लो खानानिन अ़ङ्को निम्पाङ सावातोम्खा खिम मुमा त़ऱम कि?
50निनाम्मा हेन्खामादाओ ओ झारा सामाचि अ़ङ्छुक्आङा मुयुङ्च़ङ्ओ माआङ कि?’निकिना निनाम्हाङ्आ म़सेन्याङ।#यसैया ६६:१-२
51खानानिन लोमान्तेत म़नाचि ओ, ऱक्भाक साकोङ्वा कामु खोन्कि निनाम्हाङ्ओ अ़चुय़ङ मान्एन्कादा खानानिन अ़धुन सेङ्लावाओ अ़चुदेङ्सालाप्पा त़च़न। आम्नुओ सुन्तुम्चि देत्नि म़चुवा, खानानिन्छाङ मोवात्निङा त़च़न। 52आम्नुओ सुन्तुम्चिआ दुखा मान्प़म़दोचिओ निनाम्हाङ्य़ङ खाकालुचि साङ्छाङ मात्द़ङ्चि। आम्नुओ सुन्तुम्चिआ साम्योक्मि म़ना मसिह म़ताङाओ अ़तुक्वादा निनाम्हाङ्य़ङ खाकालुचि झारा म़सेरुचि। आइमित खानानिन खोक्को मसिह साकोङ्छ़ङ्दा त़धान्तुम, खोन्कि त़सेरुम। 53निनाम्हाङ काफाचिआ ऩप़न्ओ निनाम्हाङ्ओ अ़चुय़ङ्हुप त़तोक्तुम्नुछाङ खानानिन मो य़ङ्हुप्वा मान्च़त़दान।”
स्तिफनस लुङ्ताक्आ अ़वेरासेराओ
54धियायोक्खादाओ म़नाचिआ स्तिफनस्ओ अ़य़ङ अ़एनाकि अ़चुमाइसुङ कारा, खोन्कि अ़चुच़ऱपाआ अ़चुक़ङ ऱक्मा अ़पुक्ता। 55मेन स्तिफनस सेङ्लावाआ भेप्तुकिना निनाम्मादुत्नि होन्नि खाचोवा, खोन्कि निनाम्हाङ्ओ अ़चुसाम खोन्कि येसु निनाम्हाङ्ओ अ़चुचुप्ताङ्छुक्लिप्पा म़एवाङाओ खा। 56खोन्कि खो य़ङा, “खा-खानुम! अ़ङ्का निनाम्मा होराओ खोन्कि म़नाओ अ़छा निनाम्हाङ्ओ अ़चुचुप्ताङ्छुक्लिप्पा म़एप्याङ्ओ खाङ्योङ।”
57खोन्किना धियायोक्खादाओ म़नाचि अ़चुनाबाक अ़धेक्ता खोन्कि च़लोक म़पारालोन्ताकि अ़क्धुवा स्तिफनस अ़झोम्ता। 58मोचिआ स्तिफनस सहरादाङ्का बुङ्खाया अ़सारालोत्ता, खोन्कि लुङ्ताक्आ अ़कोवा। खोन्कि मोन्ग़रि सालुम्स़ङ्चिआ अ़चुबोप्खुचि म़हुरुचिकि सावल अ़ऩङ मुवाङाओ थाङाछाओ अ़लाङ च़क्दा म़युङ्सुचि।
59म़नाचिआ स्तिफनस लुङ्ताक्आ अ़कोआङाहिदा स्तिफनस यामारा, “हाङ्पा येसु, अ़ङ्लावा लोआनुम!” 60खोन्किना खोसाआ अ़तुम्प़छ़क तोम्तुकि अ़धिवाङ य़ङ्आ पारा, “हाङ्पो, ओ अ़चुहेवाआ ओचि अ़धिरुन्चिन्ने!” ओन य़ङाचिआकि खोसोओ अ़साक्मा खारा।
Currently Selected:
छाम्माय़ङ 7: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
