छाम्माय़ङ 19
19
पावल एफिसस सहरादा
1अपोल्लोस कोरिन्थदा युङाङाहिदा पावल धाउलिप्पा लियाङ्सा धिखाहुप्ओ अ़रादात्नि लियाङ्सा एफिसस्दा तादिसा। खोसाआ खा-खाक्को काखेङ्चि मोदा धिरुचि। 2खोसाआ मोचि सेनुचि, “दि खानानिन साकोङ्छ़ङ त़मुन्हिदा सेङ्लावा त़तोक्तुम?”
मोचिआ खो अ़लासालोवा, “माआङ, सेङ्लावा म़युङ्याङ निकिना आन्कान्का ना मान्एन्छाङ्युक्तुम्का।”
3खोन्किना पावल्आ, “खोन्नालो खानानिन दियाको बप्तिस्मा त़लोइन?”नि मोचि सेनुचि।
खोन्कि मोचि “युहन्नाओ अ़बप्तिस्मा लोउम्का”नि म़य़ङा।
4खोन्कि पावल्आ, “युहन्नाआ प़चिओ अ़बप्तिस्मा हेवादाङ्का लामाओ बप्तिस्मा ओ। खोसाआ ‘अ़ङ्काएदाङ्का आदेङ साङ म़तायाङ्ओ, खो साकोङ्छ़ङ मुवानुम, खोक्कोङा येसु ओ’नि म़नाचि लोचि।” 5ओ य़ङ अ़एनाकिना मोचि हाङ्पा येसुओ अ़चुऩङ्दा बप्तिस्मा म़लोआ। 6खोन्किना पावल्आ अ़छुक मोचिएदा युङ्सुहिदा सेङ्लावा मोचिएदा म़धा, खोन्कि मोचि नि य़ङ्चिदा चेप्मा अ़पुङ्साकि निनाम्हाङ्य़ङ म़चेवा। 7मोदा झारा बारकापाङ दुवाछाचि म़याआङा।
8खोन्किना पावल यहुदिचिओ अ़चुयावायोक्खिम्दा खाराकि यहुदिचिएनान सुम्कादोङ्वात्तारि निनाम्हाङ्ओ अ़चुहाङ्होन्ओ अ़तुक्वादा राक्एनान दुम्चामेत्याङ्सा दुम्तुसा। 9मेन खा-खाक्कोचि लुङ्ख़धेन म़मुवाकि साकोङ्छ़ङ मान्मुचि, खोन्कि झारासोओ अ़चुबुदा मोचि हाङ्पाओ अ़चुदेङ्सालाप्पादा अ़त्लो दुम म़मुवा। खोन्ओसा पावल्आ मोचि छिरुदोचि, खोन्कि काखेङ्चि खात्तुचिकि तुरान्नस तायाखिम्दा अ़लेन्खिन्तुम खालुमा पुक्तु। 10ओ चिन्मा काचि ह्वा दोङ्तारि पावल्आ मुयुङ्सु। खोन्ओसा झारा एसियादा कायुङ्चि यहुदि खोन्कि ग्रिक ह्वा रुहुप्आङा हाङ्पाओ अ़चुय़ङ अ़एना।
11निनाम्हाङ्आ पावल नि पाराओ म़दोम्दाओ काचिचि मुमा सावा अ़पुवा। 12खोन्ओसा पावल्आ याङुचिओ अ़मुन्जेत्चि माङ्लो अ़बुदा लेम्खातित म़नाचिआ म़खात्तुचिकि कातुक्चिएदा म़युक्तुङुचि। खोन्कि कातुक्चि अ़चुसारिमाचिदाङ्का म़नुवाङा, खोन्कि चाकावालावाचिछाङ मोचिएदाङ्का म़लोन्ताखाराङा।
13खोन्किना खा-खाक्को यहुदि काकोन्लुक म़क्फेङ कामुचिआ हाङ्पा येसुओ अ़चुऩङ्लाम्पा चाकावालावाचि लोन्माखान्मा लाम्याङ्सा चाकावालावाआ लाउओचिएदा ओवात्नि म़य़ङाङा, “पावल्आ खालुसुङुओ येसुओ अ़चुऩङ्दा अ़ङ्का खाना लोन्ताखारानि लोना!” 14अ़क्छा स्केवास अ़ऩङ मुवाङाओ यहुदि मुलो काब़क्पाओ सात्कापाङ अ़दुवाछा-छाचि मोवात्नि म़चुवाङा। 15मेन चाकावालावाआ मोचि लासुलोचि, “येसुओ अ़तुक्वादा अ़ङ्का सिन्तुङ्योङ, खोन्कि पावल्छाङ अ़ङ्का सिन्तुङ्योङ, मेन खानानिन साङ ओ?” 16खोन्किना मो चाकावालावाआ लाउओ म़ना मोचिएदा तान्ता बाना, खोन्कि मोचि झारा क़म्तुचि, खोन्ओसा मोसाआ चाअ़त्लो ब़ङ्सुचिकि मो खिम्दाङ्का अ़चुकालाङ्द़क खोन्कि खेन्बोम्चा म़लिसाकि मोचि म़फुङ्सा।
17ओ य़ङ एफिसस्दा कायुङ झारा यहुदि खोन्कि ग्रिक्चिआ अ़सिन्ता। खोन्कि मोचि झारा म़क़साकि हाङ्पा येसुओ अ़चुऩङ अ़चोन्ता। 18येसुएदा साकोङ्छ़ङ म़मुवाओ ब़द्धे म़नाचि म़ताकि मोचिआ अ़मुवाओ अ़अ़त्पा अ़चुकाचिचि म़नाचिओ अ़चुबुदा खाअ़लुसा। 19मोचिएदाओ ब़द्धेकापाङ म़क्फेङ कामुचिआ अ़चुओ म़क्फेङ मुखा छाप्लाखाचि अ़क्नि म़कोउतारुचिकि झारासोओ अ़चुबुदा म़ह़त्तुखाइसुचि। खोन्कि मोचिआ मो छाप्लाखाओ अ़लुङ अ़मुवाहिदा पचास हजारा रुपाओ फेक्वा लिसा। 20ओवात्नि निनाम्हाङ्ओ अ़चुय़ङ सावादा पोन्याङ्सा ब़द्धे फेयाङ्सा खारा।
एफिसस सहरादा काचेङ्वा
21ओ झारा म़लिसाचिआकि पावल माकेदोनिया खोन्कि अखैया धिखाहुप्ओ लाम लियाङ्सा यरुसलेम खात्मा अ़छ़ङ मु। खो य़ङा, “अ़ङ्का मोदा ताङालाङाकि रोम सहराछाङ खात्मादोत।” 22खोन्किना खो काफाचि ह़वाङ तिमोथि खोन्कि इरास्तस खोसाआ माकेदोनिया छुत्तुचि, खो ओन अ़क्चित्तारि एसियादाङा युङालारा।
23मेन मोन्ग़रि नुय़ङ्खान्ओ अ़तुक्वादा एफिसस सहरादा अ़धिवा काचेङ्वा लिसा। 24देकिनालो देमेत्रियस अ़ऩङ मुवाङाओ अ़क्छा रुपा कादुप्आ आर्तेमिस्ओ अ़चुप्पो-अ़चुप्पो रुपाओ माङ्खिम्चि दुउकि ब़द्धेकापाङ कादुप्चि काचि प़ङुचि। 25खोसाआ अ़काचि कामुचि खोन्कि झारा मोवाकोङा नि काचि कामुचि अ़क्नि बुत्तुचिकि लोचि, “यावाचि ओ, खानानिन्आ त़सिन्तुम्योम्ङा, ओ काचिदाङ्का आन्कान नुलोक छेन्बि तोक्तुम्योम। 26मेन खानानिन त़खाम्योम खोन्कि त़एनुम्योम्ङा, ओ एफिसस्दा ओन्ङा लिसाओ माआङ, मेन झारा एसिया धिखाहुप्दा छुक्आ मुमाय़ङ माङ्चि माङ्चिङा माआङ्ओनि य़ङ्याङ्सा पावल्आ ब़द्धे म़ना रुहुप्चि सोन्तुखात्तुङुचि। 27खोन्कि आन्खित्मा-इन्मा अ़त्लो लिओ क़मा ओन्ङा माआङ, मेन तोक्पो माङ्मा आर्तेमिस्ओ माङ्खिम्ओछाङ अ़सायापेप, खोन्कि झारा एसियादाओ खोन्कि हेन्खामादाओ म़नाचिआ अ़ब़क्ताताराओ मोसोओ तोक्पो अ़ऩङ्छाङ माखात।”
28ओ य़ङ अ़एनाकि म़नाचि अ़चुमाइसुङ्आ पुन्तुदोचि, खोन्कि मोचि पात्मा अ़पुक्ता, “एफिसस्दाओ माङ्मा आर्तेमिस तोक्पो ओ!” 29खोन्कि झारा सहराङा काचेङ्वा लिसा, खोन्कि म़नाचिआ माकेदोनियादाओ पावल्ओ अ़यावाचि गायस खोन्कि अरिस्तार्खस म़लाउचि, खोन्कि हालिफुलि खाचोप्खाहुत्या अ़क्नि म़सारुवाक्तुचि। 30पावल म़ना मुक्लाचिओ अ़चुबुदा खात्मालामा, मेन काखेङ्चिआ खो खात्मा मान्प़अ़दा। 31एसिया धिखाहुप्दाओ खा-खाक्को बुसुवाचि पावल्ओ अ़यावाचि म़याआङा, खोचिआ “खाचोप्खाहुत्या मान्वाङ्दानिन!”निकिना पावल यायोक अ़पुवा।
32खाचोप्खाहुत्या खा-खाक्कोचि अ़क्तात य़ङ्आ म़पाराङा, खा-खाक्कोचि नि य़ङ्आ म़पाराङा। खोन्ओसा झारा म़कोवान्चिन्ओ म़नाचि हाक्हाक्किरा म़लिसायुङ्सा। खोन्कि मोदा देकि म़कोवान्चिन्ओ मोछाङ ब़द्धेकापाङ्आ मान्सिन्अ़दा। 33यहुदिचिआ मोदा लिसाङाओसोओ अ़तुक्वादा चेप्सि अलेक्जेन्दर बुया अ़खाइसा। खोन्किना म़ना मुक्लादाओ खा-खाक्कोचिआ अलेक्जेन्दर यायोक अ़पुवा। खोन्कि खोसाआ म़नाचि अ़छुक्चालाआ “मान्चेप्दानिन”नि मुचिकि खोचि रात्माचि निकिना म़नाचि खाएत्मालाप्तुचि। 34मेन खोचिआ खो यहुदिनि अ़सिन्ताकि मोचि झाराकापाङ अ़क्य़ङ्आ आफ्फात ह्वा कोम लेङ, “एफिसस्दाओ आर्तेमिस माङ्मा तोक्पो ओ!”नि य़ङ्याङ्सा म़पारायुङ्सा।
35आदेङ्माङ सहरादाओ काछाप्पाआ म़ना मुक्लाचि सोम्सुसेरुचिकि लोचि, “एफिसस्दाओ म़नाचि ओ, एफिसिचि तोक्पो माङ्मा आर्तेमिस्ओ अ़माङ्खिम काखाङ, खोन्कि खोसोओ अ़सेम्पोक आन्काएदा निनाम्मादुङ्का धाओ य़ङ साङ्आ अ़सिन्तुन्योन कि? 36खोन्ओसा ओ अ़छ़ङ य़ङ्चि क़प्मा अ़ऱन्मिन्चिन्ओसा खानानिन वाइवेत युङ्मादोत, खोन्कि मान्मिन्खाङ्माङ देत्छाङ मान्च़दानिन। 37खानानिन्आ ओदा त़तारुम्च़म्ओ ओ म़नाचिआ ना आन्माङ्खिम्दाङ्काङा अ़ख़सायुङ्साचु, ना मोचिआ आन्माङ्माओ अ़तुक्वादा अ़त्लोङा चेवायुङ्साचि। 38खोन्ओसा देमेत्रियस खोन्कि खोसोओ अ़काचि कामुचि खा-खाक्कोसोओ अ़चुदेङ्सालाप्पादा तुवाऱक्मा युङ्याङ्नालो आन्छ़ङ्छेन्खाचि खोन्कि हाङ्काचि कामुचि म़युङ्याङ, खोचिङा मोदा अ़क्छा निएदा ह़त्काह़त म़मुने। 39मेन खानानिन ओसोओ अ़तुक्वादा च़लोक दुम्चि युङ्मादोत्याङ्नालो मो दुम्चिओ अ़छ़ङ हाङ्छामि यायोक्खादा मुमादोत। 40आय़ओ काचेङ्वाओ लाहि आन्कान्एदा रोमि हाङ्काचि कामुचिएदाङ्का तामा ऱ। खोन्नालो ओ काचेङ्वाओ अ़तुक्वादा आन्कान देत्छाङ य़ङ्मा अ़ऱन्मिन। देकिनालो ओ अ़तुक्वा मात्द़ङ्ओ य़ङ ओ।” 41खोन्किना खो ओन य़ङाचिआकि खोसाआ म़कोवान्चिन्ओ म़नाचि साम्तुचि।
Currently Selected:
छाम्माय़ङ 19: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
