LUKA 20
20
1Dayenli ke Jesu ka ki bangi bi niba U Tienu diegu nni ki wangi ba o Laabaaliŋamo, bi kopadicianba yudanba leni li *balimaama bangikaaba leni bi nikpeliba den cua o kani 2ki yedi o: «Waani ti yaa bali yaa po ke a tiendi li naa bonla. Ŋme n puni a li bali?» 3Jesu den goa ki yedi ba: «N moko baa buali yi bonyenla, yin waani nni. 4Jan n den *batisi bi niba yeni, o den baa li bali tanpoli po bi, bi bi nisaaliba kane?» 5Bi den bungi bi pala nni ki tua: «Ti yaa yedi ke o den baa li tanpoli po, o baa yedi: ‹Be yaa po ke yii den daani o maama?› 6Ti yaa yedi: ‹Bi nisaaliba yaa kane› mo, bi niba kuli baa lugidi ti a tana kelima bi nua ke Jan den tie sawalipualo.» 7Lani yaa po bi den goa ki yedi Jesu ke baa bani Jan bali n ñani naani. 8Jesu den yedi ba: «N moko kan waani yi yaa bali yaa po ke n tiendi laa bonla.»
Bi koaguudiba kpanjama
(Mat 21.33-46; Mak 12.1-12)
9Lani yaa puoli Jesu den pua bi niba mi naa kpanjama ki yedi: «O ja den ŋu duven tiidi kuanu, ki guuni o kuanu bi koaguudiba ki fii ki gedi u dogu ki baan waagi lipo.#Esa 5.1 10Li yogunu n den pundi, o den soani naacenyendo bi koaguudiba yeni kani, ke ban teni o o biinu o kuanu bonbaakaala nni. Ama bi koaguudiba den pua o i gbiami, ki yaadi o nukuomu. 11O go den soani naacentoa, bi den pua o moko i gbiami, ki fiagi o ki yaadi o nukuomu. 12O go den soani o naacentaalo mo. Bi den poagili o, ki deli o. 13O koadaano den yedi o yuli: ‹N baa tieni lede? To, n baa soani n bijabuadiga, daalinba bi baa fangi wani wani.› 14Ama bi koaguudiba n den laa o bi den yedi biyaba: ‹One n tie o faajielo, tin kpa o mani li faali n tua ti yaa yaali.› 15Bi den luni o u kuanu puoli po ki ku o. Lanwani o koadaano baa soani ba lede? 16O baa cua ki bolini laa koaguudiba ki teni o kuanu nitoaba.»
Ban den gbadi lani bi den yedi: «U Tienu n da tuo line n tieni.» 17Jesu den diidi ba ki yedi: «Lanwani yaala n diani na bundi be?
Bi tanmaaba n den yie yaa tanli
Lini n tua li tanpuuli tanjigi.»#Pis 118.22
18Jesu den juodi ki yedi: «Yua n baa laa tanli po kuli baa kuakua, lin baa yua yaa po mo baa tua wagima.»
19Lanyogunu liga bi kopadicianba yudanba leni li bali maama bangikaaba den moandi ki baa cuo Jesu, kelima bi den bandi ke o pua mi kpanjama yeni ki bagi bane, die bi den jie bi niba.
Loma badiciamo Sesa lubili
(Mat 22.15-22; Mak 12.13-17)
20Bi den kpaagi Jesu, ki soani yaa niba n kpali ke bi tiegi ki buali o moamoani, ke ban dia o ku madiagu ki cuo o leni maamaba, ki teni o bi bujiaba leni gufeneeli nuu nni wan bu ki cuo o. 21Laa niba den buali o ki yedi: «Canbaa, ti bani ke ŋan maadi ki bangi yaala tiegi, ŋaa gagidi oba bi niba siiga, a bangi bi niba U Tienu sanŋoadima leni i moamoani. 22Naani li pia u sanu tin pa Loma badiciamo *Sesa li lubili bi, bi laa pia?» 23Jesu den bandi bi fanu ki yedi: «Min le li kujapienli. 24Ŋme yaa nannanli leni ŋme yaa diani n maa lipo na?» Bi den goa ki yedi o: «Sesa yaali yo.» 25O den yedi ba: «Lanwani pa mani Sesa, yaala n tie Sesa yaala, ki pa U Tienu mo, yaala n tie U Tienu yaa yaala.» 26Baa den fidi ki cuo o o maama nni bi niba nintuali. O maguankaama yeni den paki ba ke bi ŋmini suo.
Sadusieninba buali, bi tinkpiba fiima po
(Mat 22.23-33; Mak 12.18-27)
27 *Sadusieninba yaaaba n tua ke bi tinkpiba fiima ki ye, bi tianba den cua Jesu kani ki buali o ki yedi:#JTT 23.8 28«Canbaa, Musa den diani ki bili tipo li *bali maama nni ki yedi: ‹O nilo kpelo yaa kpe, ki pia pua kaa pia biga, wan taa o kpelo yeni pua ki baa o kpelo po u buolu.›#Tia 25.5 29To, jaba lele den ye ki taa baa. O bonkpelo den taa o pua ki kpe kaa baa biga. 30O bonlielo den taa o kpepuoli ki kpe. O bontaalo mo den taa o. 31Li den tua yeni, ke bani bonba lele yeni kuli den kpekpe kaa baa biga. 32Li yaa puoli o pua mo den ti kpe. 33Lanwani bi tinkpiba fiima yogunu, o pua yeni baa tua ŋme yaa yua yo? Kelima bani bonba lele yeni kuli yendo yendo den taa o ke o tua o pua.» 34Jesu den yedi ba: «Ŋanduna na jaba taani bi puoba, bi puoba mo kuni bi jaba, 35ama yaaba n dagidi ki baa fii bi tinkpiba siiga ki kua yaa yogunu n kpendi yaa yema nni, bi jaba kan go taa puoba, bi puoba mo kan go kuni jaba, 36kelima bi baa tie nani malekinba yeni, ki kan go kpe. Bi tie U Tienu bila, wan fiini yaaba bi tinkpiba siiga. 37Yaala n tie bi tinkpiba fiima maama fuuli, Musa den maadi li maama wan togidi yaa fatuugu n den co mi fantama yaa yogunu, wan den yini o Diedo yaa yeli n na: Abalahama Tienu, Isaaka Tienu leni Jakobo Tienu.#Ñam 3.6 38To, U Tienu naa tie kpiema Tienu, o tie yaaba n fo yaa Tienu yo. Kelima o yaa po wani, bikuli fo.» 39Li balimaama bangikaaba siiga bi tianba den yedi: «Canbaa, a maadi bonŋanla.» 40Baa go den pia papaali ki go buali o bualiba kuli.
Kilisiti n tie yua
(Mat 22.41-46; Mak 12.35-37)
41Jesu go den yedi ba: «Li ga lede ke bi niba tua ke *U Tienu n Gandi yua tie Dafidi Bijua? 42Dafidi wani oba maadi Pisoma tili nni ki yedi:
‹O Diedo den yedi n Diedo:
Kali n jienu po,#Pis 110.1
43Hali min baa teni a yibalinba
N tua a taaŋmaakaanu.›
44Dafidi oba yini o o Diedo, li nan go ga lede ke o tie wani Dafidi bijua?»
Jesu jagili li bali maama bangikaaba
(Mat 23.1-36; Mak 12.38-40)
45Ku niligu kuli n den cengi, Jesu den yedi o ŋoadikaaba: 46«Fangi mani yi yula leni li bali maama bangikaaba, bani yaaba n bua ki yaa laa a liadiciama, ki go bua ban yaa fuondi ki kpiagidi ba mu daamu nni, ki go bua ki yaa ka i niciankali-kaani li *bali maama bangima diena nni, ki go bua yaa kaani n gagidi mi jecianma kani. 47Bi go janbidi a kpepuona ki fenli bi diena, ki go jaandi i jaandifoagi ki kpali ke bi tie jajaandimoana. Ti buudi yaa yogunu, bi yaa cuonu baa gagidi ki yaa bia ki cie.»
O kpepoluodo paabu
(Mak 12.41-44)
Currently Selected:
LUKA 20: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
