Mateo 17

1Na hanuma na nsiku mkaga Yesu wavajanaga Petro na Yakobo na Yohana, muduguye, na alivafila vinene ku lugulu lulihu. 2Na muvili gwakwe gwagalukaga hambele navo, na vusyu wakwe wayekemaga kitisi limi, na myenda yakwe yavagi ya pe kitisi mwanga. 3Na lolaga, vigelaga hawavo Mose na Elia valisunsumula nawe. 4Na Petro witavukaga na alimuwila Yesu, Guku, yilivela muno iswe tuliho henaha; ulu ulikova nkuzenga henaha nkambi idatu, yimo kuwako na yimo kumwa Mose na yimo kumwa Elia. 5Aho wavagi atali aliyomba, ilunde lya pe lyavakinganizaja; na muzwi gwafumaga kwilunde na gulihaya, Mwenuyu ali Mwana wane, mutoneke, homwene alintogezya, mumwigwe mwenuyu. 6Na aho vahemba vigagwa, vagwaga vakundamaga ha vusyu wavo na vogohaga munogwene. 7Na Yesu wavegelaga na wavakumaja, uhaya, Muvuke 8na muleke kogoha! Alisi aho valangamilaga vakawine ungi sumbwa Yesu inene.

9Na aho vavagi valitelemuka ku lugulu Yesu wavagizaja, uyomba, Muleke kumuwila munhu genaya mwagavonaga kusika Mwana wa Munhu wahembukile ku lufu. 10Na vahemba vakwe vamuvuzaja, vuhaya, Kungunoki haho vamanicha fitabu valiyomba ati: Elia 11kolaga ize hambele? Alisi witavukaga na wahaya, 12Ahene, Elia akwiza na akuvezelezya gose. Alisi ndimuwila inwe ati, Elia wamalaga kwiza, na vakamumanikizye, sumbwa vamwitilaga gose hogene vakovaga. Sisyo sisyene Mwana wa Munhu akudukiwa navo.

13Haho vahemba vamanikaja kitisi aliyomba navo kunguno ya Yohana Moja.

14Na aho vafikaga ha mbuto ya vanhu, mugosya umo 15wamwegelaga na alimusukambila na aliyomba, Guku, umuvonele kisa mwana wane, kwisi ali mulwile wa kafunta na alidukiwa sivi; kwisi kingi aligwila mu moto na kingi mu minzi. 16Na namuletaga ku vahemba vako, navo vilagwa kumupizya. 17Na Yesu witavukaga, uhaya, Inwe, vuvyalwa wʼivengwe na wa vutavanya, kusika nanali nkuviho hamohene ninwe? Kusika nanali 18nilambilizye ninwe? Muletagi hawane. Na Yesu wagudakilaga mugavo, nago gwamufumaga na muyanda wapizivagwa itungo lyenilo. 19Haho vahemba vamwegelaga Yesu kumhelo na vayombaga, Kungunoki iswe 20twilagwa kugufumya? Nawe alivawila, Kunguno yʼisanizyo linwe ido; kwisi yalole ndimuwila inwe, ulu mbe mwavagi nʼisanizyo kitisi luveke lwa haradali mukuluwila lugulu lwenulu, Uvuke henaha na uje uko! na lukuja, na kuduhu kinhu kikuvi kigaka kuwinwe. 21Alisi mutindo gwenugu kufuma ngʼo, sumbwa mu kulomba na kufunga.

22Alisi aho vahingulaga mu nsi ya Galilaya, Yesu wavawilaga, Mwana wa Munhu ali bihi kupanwa mu 23makono ga vanhu; navo vakumuvulaga na ha lusiku lwa vudatu akuhembuka. Na vasayaga munogwene. 24Alisi aho vafikaga mu Kapernaumu va kodi yʼisengelo vamwegelaga Petro na vayombaga, Kinahe, muhembeki winwe akavile kufumya kodi yʼisengelo? 25Nawe wayombaga, Alifumya. Na aho wingilaga mu numba Yesu watongelaga kumuvuzya na wayombaga, Ulivona kinahe Simoni, vatemi va liwelelo valisola ihongo ninga kodi ku vanhu ki, ku vana ninga ku 26vageni? Alisi aho wayombaga, Ku vageni, Yesu 27wamuwilaga, Haho vana vali vanamiko. Alisi kwigela ngʼo tuve isiki lya kwikumpa kuwavo, uje ku nyanza na ukatagile ndovani, na usole isomba lya mbele holyene lilifuma na ugwasamye mulomo gwalyo na ukuvonamo fedha; yeniyo uyisole na uvape venavo kuwane na kuwako.

Currently Selected:

Mateo 17: Nym51

Highlight

Copy