Lukasi 8

1Na yakwilaga mwitungo lyenilo wayumbayumbaga mu makaya na mu tukaya, na wavagi alitanizya na aliyisambazya Mhola ya Chelu ya vutemi wa Mulungu, 2hamohene nawe venava ikumi na vavili, na vakima vamo hovene vapizivilwe migavo mivi na mavulwile; Maria, uyo alitanwa Magdalena, homwene migavo 3mpungati zyamufumaga, na Yohana, mukima wamwa Kuza, kasika lufungulo wamwa Herode, na Susana na vangi vingi, hovene vavagwasaja na nsavo zyavo.

4Alisi aho mbuto ya vanhu vivilingaga na va mumakaya vikumingaga hawakwe, wayombaga mu mukolani. Muvivi wafumaga kuja kukaviva mbiyu zyakwe. 5Na aho wavagi aliviva, mbiyu zimo zyagwilaga ha nzila na zyapandagilagwa, na manoni ga hʼilunde gazilyaga. 6Na zingi zyagwilaga kwitale, na aho zyamelaga, zyanyalaga kunguno havagi hakavile hafumbezu. 7Na zingi zyagwilaga mu mingʼhwa, na mingʼhwa gamelaga hamohene nazyo na gazipinehezaja, 8Na zingi zyagwilaga mu vulongo vusoga, na zyamelaga na zyambaja fisumo igana na igana. Na aho wagayambaga genaya, wahamukaga, Homwene ali na matwi, adegeleke.

9Na vahemba vakwe vamuvuzaja nguno ya mukolani gwenugu. 10Na wayombaga, Inwe mwapivilwe kulumanicha lwiviso lwa vutemi wa Mulungu, alisi vangi mu mikolani, kigele avo valivona, valeke kuvona, na 11avo valigwa, valeke kumanicha. Alisi mukolani ugu nguno yago yili yeniyi: Mbiyu guli Muhayo gwa Mulungu. 12Na izyo zya ha nzila vali venava valigwigwa, haho Shetani aliza na aligwinja Muhayo mu myoyo 13yavo, kwigela ngʼo vasanizye na vapiziwe. Na izyo zya hitale vali venava valigwigwa na valigwanukula Muhayo na kudeha; alisi vakavile na mizi, valisanizya hʼitungo ido, na mwitungo lya mahumbiko valiguleka. 14Na izyo zyagwaga mu mingʼhwa vali venava valigwigwa na valipineheziwa na myanya na nsavo na mawivonya ga hangelo, na vakavile kufikomezya fisumo. 15Na izyo zya mu vulongo vusoga vali venava valigwigwa na valigudima Muhayo mu moyo musoga na mufula na valifyambya fisumo na vujamu.

16Kuduhu munhu aliyivacha tala na kuyikundikizya na kiseme, ninga kuyitula mu nhululi, sumbwa aliyitula kwigulya nʼifiga, kigele avo valingila vaguvone mwanga gwayo. 17Kwisi kuduhu kinhu kivisilwe hochene kufumbulwa ngʼo, ninga kuduhu cha mbisila hochene kumanikiwa ngʼo hambele na vanhu vose. 18Kunguno yeniyi mwikomye lelo kitisi muligwa, kwisi homwene ali na kinhu akupiwa, na homwene akavile nacho akupuziwa ninga cheniki aliganika ali nacho.

19Na nina na vaduguye vizaga kuwakwe, alisi kunguno ya mbuto ya vanhu vavagi vakakovolile kumwegela. 20Na wawilagwa ati, Noko na vaduguyo valima hanze 21na valikova kwivona naʼho. Na uyu witavukaga na wavawila, Mayu na vadugu vane vali venava valigwigwa Muhayo gwa Mulungu na valigumazya.

22Na yakwilaga lusiku lumo wingilaga mu wato hamohene na vahemba vakwe, na wavawilaga, Twambuke 23kumwambu na nyanza, na vavukaga. Na aho vavagi valija uyu walalaga tulo; na kikungulya chavukaga mu nyanza, na wato vokalaga na minzi na vavagi mu musyolo. 24Na vamwegelaga na vamumisaja, vuhaya, Guku, Guku, tulinwivila! Na wavukaga waguhilimilaga muyaga na mavimbi ga nyanza, na galembelaga na hadekanile. 25Na wavawilaga, Isanizyo linwe lili kuhe? Alisi vogohaga na vakumaja na vayombaga hamohene, Nani mwenuyu, kwisi aligulagila muyaga na minzi, na galimudonhoka?

26Na wafikaga mu nsi ya Vagerasi ha welekela wa Galilaya. 27Na aho wambukilaga ha nguka wasangaja na mugosya mbati wa mukaya, nawe wavagi na migavo, na nsiku ningi akazwalile mwenda na akikalile mu numba sumbwa ku mafivimbi duhu. 28Na aho wamuvonaga Yesu walilaga, wagwaga hambele nawe na wayombaga na kilaka, Ulikovaki nane, Yesu, Mwana wa Mulungu homwene ali kwigulya? Ndikulomba, kuduhu unduche. 29Kwisi wagulagilaga mugavo gumufume munhu mwenuyu, kwisi kingi muno gwamusulungutaja, na uyu watungagwe na minyololo na matendele na walindilagwe, alisi wazitinagulage minyololo na wapezivagwe na mugavo kwibalangu. 30Na Yesu wamuvuzaja, Lina lyako nani? Nawe wayombaga, Ligioni, kwisi migavo mingi zyamwingilaga. 31Na zyamulombaga aleke kuzilagila kwingila mu nyombe. 32Na lyavagiho henaho idale ihanya lya nguluve zilidima ha lugulu, na zyamulombaga zipiwe luhusa kwingila muzyo. Na wazipaga luhusa. 33Na migavo zyamufumaga munhu na zingilaga mu nguluve, na idale lyatelemukaga mwiga mugati na nyanza, 34na zyafwaga. Alisi aho vagavonaga genayo gakwilile, vadimi vapelaga na vagusambazaja muhayo mu kaya na mwihala. 35Na vafumaga kugavona genaya gakwilaga, na vizaga kumwa Yesu, na vamuvonaga munhu uyo, homwene migavo zyamufumile, ikalile ha magulu gamwa Yesu, azwalile myenda na wavile na masala; na vogohaga. 36Na avo vagavonaga vavapozezaja isyo munhu wa migavo wapizivilwe. 37Na vanhu vose va mwigunguli lya Vagerasi vamulombaga afume kuwavo, kwisi vadimagwa na kogoha kuhanya, nawe wingilaga mu wato na wasyokaga. 38Alisi mugosya uyo homwene migavo zyamufumile wamulombaga aje nawe, alisi wamudahaja, 39uhaya, Usyoke ku numba yako na ugapozye genaya mahanya Mulungu wakuvezezaja. Nawe wajaga na wagapozaja mu kaya yose genaya mahanya Yesu wamuvezezaja.

40Na yakwilaga aho Yesu wasyokaga, mbuto ya vanhu 41vamwanukulaga, kwisi vose vamulindilaga. Na lolaga, munhu umo wizaga, lina lyakwe Yairo, wavagi munamhala wa sinagogo, na wagwaga ha magulu gamwa Yesu na wamulombaga, ize mu numba yakwe; 42kwisi wavagi na mwana umo duhu, mwanike wa myaka ikumi nʼivili, homwene wavagi bihi na kufwa. Na aho wavagi ajile, mbuto ya vanhu vamufitaga. 43Na mukima umo homwene wapululukila myaka ikumi nʼivili, homwene wazimalizaja nsavo zyakwe zyose ku vafumu, alisi wavagi akakovolile kupiziwa na 44umo ngʼo, wegelaga kunuma na walikumaja isune lya mwenda gwakwe, na itungo lili kasela ka magazi gakwe kakamaga. Na Yesu wayombaga, Honani wankumaja? 45Alisi aho vose vakanaga Petro wayombaga, Guku, mbuto ya vanhu valikupilima na valikufita. Yesu 46wayombaga, Umo wankumaja, kwisi namanikaja mwenekili kitisi nguzu zyanfumaga. 47Alisi mukima, aho wavonaga ati akakovolile kwivisa, wizaga alidetema, wegelaga hambele nawe na wamupozezaja hambele na vose nguno ya kumukumya, na kitisi wapizivilwe itungo lili. 48Na uyu wamuwilaga, Mwanike, isanizyo lyako lyakupizaja, jaga na kuhola. 49Na aho atali aliyomba, wizaga umo kufuma ku numba ya munamhala wa sinagogo, uhaya, Mwana wako mukima wafwaga, uleke kumuducha hangi muhembeki. 50Aho Yesu wigagwa wamwitavukaga, Uleke kogoha, usanizye duhu na akupiziwa. 51Na aho wafikaga ha numba akazumizye umo ingile hamohene nawe sumbwa Petro na Yohana na Yakobo na ise na nina wa mwanike. Na vose vavagi valilila makungwi. 52Alisi uyu wayombaga. Muleke kulila, akafwile sumbwa alilala tulo. 53Na vamusekelaga, kwisi vamanikaja ati wafwaga. 54Alisi uyu wakudimaga kukono kwakwe, wahamukaga, 55uhaya, Mwanike, uvuke! Na myuye yakwe yasyokaga, na itungo lili wavukaga; na uyu walagilaga vamupe chakulya. 56Na vavyazi vakwe vakumaja munogwene, alisi uyu walagilaga valeke kumuwila umo yeniyi yakwilaga.

Currently Selected:

Lukasi 8: Nym51

Highlight

Copy