Milimo 4

1Aho vavagi valiyomba na vanhu, vahozya na mulindilizi wʼisengelo na Vasadukayo vavegelaga; 2kwisi vagayaga kunguno vavahembekaga vanhu, na vatanizaja kuhembuka kwa vafwile mugati na Yesu. 3Vavadimaga, na vavatulaga mu jela kusika igolo; kwisi yavagi mhindi. 4Alisi vingi mugati na venavo vagwigagwa muhayo ugu vasanizaja, na luvalo lwa vagosya lwasikaga bihi na fihumbi fitano.

5Hawangaluke vivilingaga mu Yerusalema vahanya 6na vanamhala na vamanicha fitabu, na hangi muhozya muhanya Ana, na Kayafa, na Yohana, na Aleksandro, navo vose hovene vavagi va vudugu wa muhozya muhanya. 7Na aho vavimilikaga hagati navo vavavuzaja, Na nguzu ki, ninga mu lina lyamwa nani mwitaga genaya? 8Haho Petro, okalile na Roho Nsondo, 9wavawilaga, Inwe vahanya va vanhu na vanamhala, ulu tulivuziwa walelo kunguno ya vugwasiwa wa 10mulema, na lumehoki wapizivilwe, haho inwe vose na vanhu vose vʼIsraeli mumaniche ati, ku lina lyamwa Yesu Kristo wa Nazareti, homwene mwamukomelaga ku musigiti, na homwene Mulungu wamuhembukaja ku lufu, ahene, kunguno ya lina lyenili mwenuyu imile mupanga hambele ninwe. 11Mwenuyo ali iwe lyenilo, holyene lyataganiziwa ninwe vazenguzi; alisi holyene lyavile iwe lya ha kituli. 12Ninga mugati na ungi vupiziwa vuli haduhu; kwisi haduhu lina lingi hansilili nʼilunde lyapanilwe mugati na vanhu, mugati nalyo tupiziwe.

13Aho vavonaga vugimu wamwa Petro na Yohana, na yigelaga kuwavo, kitisi vavagi vanhu vuduhu vuhembekwa wa masala, vakumaja, na vavamanikaja kitisi vavage hamohene na Yesu. 14Na aho vamuvonaga munhu, homwene wapizivagwa, imile hamohene navo, vavagi vali gele muhayo gwa kusyokelezya. 15Sumbwa vavalagila vafume kwivanza, navo vitozaja vavo ku 16vavo, vayomba, Tuvitileki vanhu venava? kwisi mugaka gwa loleyene gwavezivilwe navo, nago gwigelaga ku vose venava valikala mu Yerusalema, nʼiswe tukakovolile kugwikana. 17Alisi kwigela ngʼo mhola yeniyi yisambale mugati na vanhu, tuvadakile valeke kuyomba hangi ninga na munhu umo ngʼo mu lina lyenili. 18Haho vavitanaga, na vavalagilaga valeke vuliko kuyomba ninga kuhembeka mu lina lyamwa Yesu. 19Alisi Petro na Yohana vavitavukaga na vavawilaga, Muyangulage venekili, ulu yilivela hambele na Mulungu kumudegeleka inwe kukila Mulungu. 20Kwisi tukakovolile koya kugahaya genaya twagawine na twagigilwe. 21Aho vavadakilaga hangi vavatungulilaga; kwisi vakawine nzila ya kuvadukizya kunguno ya vanhu; kwisi vose vamugongolaga Mulungu kunguno ya genaya gakwilaga. 22Kwisi munhu uyo homwene mugaka gwenugo gwamukwililaga, myaka ya kukula kwakwe yavitaga makumi anne.

23Hanuma na kutungulwa kwavo vajaga ku vanhu vavo, na vavasunsumulilaga gose, hogene vahozya vahanya na vanamhala vavawilaga. 24Aho vagigagwa vahamukaga hamohene kumwa Mulungu na vayombaga, Guku, Hoveve watundile ilunde na liwelelo na nyanza na gose galimo. 25Veve wayombaga mugati na Roho Nsondo ku mulomo gwa vava wiswe Davidi, mukumba wako,

Hokinahe vapagani valibubuzya na vanhu valomaga ndaka ya gele?

26Vatemi va liwelelo vipangaga,

Na vahanya valomaga ndaka hamohene vamwikane Guku na Kristo wakwe.

27Ahene, Herode na Pontio Pilato vivilingaga hamohene na vapagani na vanhu vʼIsraeli mu kaya yeniyi, vamudime Mukumba wako musondo Yesu, homwene 28wamuvilaga maguta, vavezye genayo kukono kwako na ndaka yako yalomile kale gakwile. 29Na lelo Guku, ukwilolele kudakila kwavo, na uvape vakumba vako 30kuyomba muhayo gwako na vugimu vose, ugolole kukono kwako kupizya, na gakwile malumeho na migaka mu lina lya Mukumba wako musondo Yesu. 31Aho valombaga, hatinginaga henaha vivilingaga, na vose vokazivagwa na Roho Nsondo, na vatanizaja muhayo gwa Mulungu na vugimu.

32Mbuto ya vanhu, hovene vasanizaja, vavagi na moyo gumo na roho yimo, kuduhu ninga umo mugati navo wakitanaga kinhu kimo mugati na nsavo zyakwe, ati kili chakwe mwenekili, sumbwa vavagi na lusangi mu finhu fyose. 33Na vatume vasangilagwa na nguzu kunguno ya vuhembuke wamwa Guku Yesu, na kisa kihanya chavagi higulya navo vose. 34Kuduhu umo wadukaga ku mafundo mugati navo; kwisi vose hovene vasavaga malale ninga manumba vagaguzaja, na valetaga mapesa ga mupango gwago, 35na vagatulaga ha magulu ga vatume, na gagavanivagwa mugati navo hanuma na mafundo gavo.

36Na Yosefu, homwene witanilwe Barnaba na vatume, kitisi mwana wa kuhulikiwa, Mulefiti, homwene wavyalilwe ku Kipro, 37uyu wavagi nʼilale, waliguzaja na waletaga mapesa, na wagatulaga ha magulu ga vatume.

Currently Selected:

Milimo 4: Nym51

Highlight

Copy