Maliko 14

Izya kumugogʼuYesu

1-2: Mat. 26,1-5. Luk. 22,1. 2.

1Ilelo gasyayʼamanda gavili ukwinza nuPasa nuchaka wa makati amasitaṿiluzizyo. Pe navashiputʼavapiti navamanyakalata vahanzʼizya kumwambamba ishifumbo ukumulema, ukumugoga. 2Vahati: Pachaka pe ndali, she pe vakutusambushilʼavantu.

Ukupakwa uYesu amafuta mu-Betaniya

3-9: Mat. 26,6-13. Yoh. 12,1-8.

3Ayazile lelo lwʼali mu-Betaniya munyumba ya Simoni wamambombo, lwʼahalyʼiṿintu, pʼahinzʼumwantanda woka wʼasenzitʼinsupa ya mafutʼamagomu nkani amasitakusanganya nahantʼahanji, ahabazulʼinsupa, ahamwitilila pitwe. 4Pe vamo ve vali pupo vahaṿitwa, vahavuzanya vahati: Akutaga gashʼamafuta vovulo? 5Shenga vakazyagʼamafuta ganaga, pe nkandi valonsilʼamadinali ge galusizyʼamashumʼamashumi gatatu uvwinji, zye vavagavanyʼavapina. Pe vahamupilila nkanʼumwantanda. 6UwenʼuYesu ahati: Simumuleshʼumwantandʼuno, mukumuhasamiha shonu? Shʼimbombo yʼambombeyʼine ye nyinza. 7Shʼavapina ve muli navo shima. Inga mwatinji tuvapanjʼiṿwinza avene vatasoṿile. Nkandʼine ntakuva mumwinyʼumu shima. 8Avomṿile anonelezizyʼuwene. Atalisile ukumpahʼamafuta ga kunsyililʼine. 9Nalyoli nkuvavuzyʼine nkuti: Mwonti mwIvangeli likuvalʼukukumuha munsi yonti, mwe ziliyanjilwa poka Zyope nazyʼavomṿilʼumwantanda wununo, zikuva zya kumukumbushila wuyo.

Inza shʼuYuda amwambiliyʼuYesu

10-11: Mat. 26,14-16. Luk. 22,3-6.

10PʼuYuda wa mu-Kalyoti, woka wa vishumi navavili, ahavala kuvashiputʼavapiti, ahayanga navo izya kuvaninchilizyʼuYesu. 11Avene lwe viṿuye zinizi, pe vahaseshela, vahati: E, tukukulipilʼimpiya. Pʼuwenʼahanzʼapinza apa kuvaninchilizya.

UYesu akulya isha kulya sha kumpelela poka navasundikwa vakwe

12-16: Mat. 26,17-19. Luk. 22,7-13.

12Apene lelo pisikʼitanzi lya makati amasitaṿiluzizyo, lye vakuvola nahagonzi ha Pasa, pe vahamuvuzilizyʼavasundikwa vakwe vahati: Watinji tuhayananye poshi apa kulyʼiwe ahagonzi ha Pasa? 13Pʼuwenʼahavatumʼavasundikwa vakwe vavili, ahati: Muvale munkaya mula, mwe mulihomana numuntu wʼasenzitʼinsonta ya minzi; we muhamulandate; 14muhinjile nawo mwenga mwazilʼakwinjilʼuwene. Mwe muhayanje nawo umuhatanyumba, muhatinji: UMusambilizi atili: Inyumba ya kulila mumwʼahagonzi ha Pasa nane navasundikwa vane yʼili kwi? 15Pʼuwenʼalivalanganizyʼinyumbʼimpiti ya pigulu, mwe vaye niṿilili vayiyaninye. Mwe muhatuyananizye mumwo. 16Pʼavasundikwa vahavala, vahafiha munkaya, vahazyaga inza she lilyo lyʼavavuzizye. Pe vahayananyʼiṿintu ṿwa Pasa.

17-25: Mat. 26,20-29. Luk. 22,14-23. Yoh. 13,21-26.

17Ilelo pe lwe vwiliye shamazuva, pʼahavalʼukwinjila mumwo navishumi navavili. 18Ilelo lwe vatendimʼukulya, pʼuYesu ahavavuzya ahati: Nalyoli nkuvavuzyʼine nkuti mwe muvaliye, woka wʼakulya poka nane, wʼalinanililʼine. 19Pe vahandʼukuswimililwa nkani, vahamuvuzilizya woka woka vahati: Amwe nene? 20Uwenʼahavavuzya ahati: Woka mwe muvaliyʼishumi navavili, we wuyo we tukusanzila poka mumbakuli, nane nawo. 21UwenʼuMwanamuntu akuvuha inza she lisimṿilwe kuli wuyo. Nkandi ye mwe we muntu, wʼukumwanililʼuMwanamuntu. Hali hinza ukusitʼukupapwa nalumʼiwe.

22-25: 1 Kol. 11,23-25.

22Ilelo lwe valemilʼukulya, pʼuYesu ahasendʼumukati, ahaputa, ahawumensulanya, ahavapa, ahati: Ali, we muvili wanʼuno. 23Nishikombe ahasenda, ahasalifwa, shope ahavapa, vonti vahangʼwela. 24Ahavavuzya ahati: Ge mavanda gane ga lumfingwi ganaga, ge gakuvitishila ve vinji. 25Nalyoli nkuvavuzyʼine nkuti: Nkwanda we musanyʼuno ntakuvuyizya nohavili ukungʼwelʼilya nsanga zya mampensyʼili, nkuvalʼukufiha pisiku lila lye ndingʼwelʼipwa mushinamwene sha Mulungu.

UYesu akukuvwa izya viva ntagwa viva vasundikwa

26-31: Mat. 26,30-35. Luk. 22,31-34; 39.

26Ilelo lwe vimṿilʼulushindiho, pe vahafuma kunzi, pe vahavala kwigamba lya Mavula. 27PʼuYesu ahavavuzya ahati: Mwenti mulipunula. She lisimṿilwe lye likuti: Ndimuhomangʼumudimi, ilelo pʼingʼonzi zilinyampana. 28Nkandi lwe nzyusile, pe ndivalongolela ukuvala mu-Galilayi. 29UwenʼuPeteli nyene ahamuvuzya ahati: Pope nashenga vonti vakupunula—nkandʼine ndali. 30AhamulʼuYesu ahati: Nalyoli nkukuvuzyʼine nkuti, vwe vusiku vunuvu, lwʼinkandʼishili nukuvilishila havili, she pʼuyihanile hatatu kukwanʼiwe. 31Uwenʼahapitililʼukuyanga nkani ahati: Pope nashenga twavalʼukufwa nawe nane, pope ntaliyihana kukwaho. Vonti navamwavo vahayanga linili.

UYesu mu-Getisemani

32-42: Mat. 26,36-46. Luk. 22,40-46.

32Pe vahavalʼukufiha kuluvungano lumo lwe vatili mwe mu-Getisemani izina. Uwenʼahayanga navasundikwa vakwe ahati: Mutendame panapʼimwe, nkuvalʼukuputa kulʼine suti. 33AhasendʼavaPeteli nuYakobu nuYohani, vʼahavala navo. Pʼahatetema umwoyo ahelela. 34Pʼahavavuzya ahati: Umwoyo wane ali nuvuswimililwa uvupiti, ndi fwe ngati nakufwa vufwe. Muvanje panapʼimwe, mudamulaje. 35Uwenʼahapitilila hansi, ahakupama pansi, ahaputa ahati: Inga hapagaga pavupitililo papanʼahavalilizyo hanaha! 36Ahati: Aha, we Tata, naṿimo ṿitakukupotʼiwe, ushipitilizyajʼishikombʼishi papanʼipa. Nkandi ne washʼine zye nkasimʼine, zivombelwaje zyengʼukasimʼiwe. 37Ahinza, ahavaga vakasitʼutulo. Pʼahayanga nuPeteli ahati: Simoni, ukasitʼutulo? Pope nahavalilizyo hoka vwelele hakupositʼukudamulʼiwe? 38Simudamule, muputaje, ukuti ulutazyo lutavagaje. Uwenʼumupepo wa muhati wʼayitisile, uwenʼumuvili nyene we mutonsu. 39Ahavuyizya nohavili ahavalʼukuputa, ahayanga gugo gʼayanzilʼulutanzʼamazwi. 40Lwʼayinzile nohavili, pʼahaga havili vakasitʼutulo, shʼaminso gavo gamwamile, Zyope nazye vahamwamula vahasavata vwelele. 41Pʼahinza nohavili ulwa vutatu ahayanga navo ahati: Pashi simukataje, mutuzyaje. Mpela. Ahavalilizyo hafisile. Yenyi, uMwanamuntu akutwalwa munyove zya vatalamalandu. 42Simuvushe tujende, ayinzilʼuwa kunanilila.

Ukulemwa kwa Yesu

43-54: Mat. 26,47-58. Luk. 22,47-55. Yoh. 18,2-18.

43Ilelo naluvilo lwʼamakuyanga, pe vahaganduha wuyo ayinzilʼuYuda uwa vishumi navavili poka navantʼimpuga, ve valemile niṿipanga namakunku, vafumile kuvashiputʼavapiti nakuvamanyakalata nakuvasongo. 44Uwene wuyo wʼavapanga avavuzizye nishimanyilo, ahati: Uno wenga nkumulipa, we wuyo we muhamuleme, mumutwale, atahashimbile. 45Ilelo lwʼafisile, pʼahamushimbililʼuwene, ahati: Labi; pʼahamufipa. 46Pe vahavusyʼamahono, vahamulema. 47Avene nyene ve vimiliye pupo, woka ahakulʼishipanga shakwe, ahamudibʼumunyamata wa washiputʼumupiti, ahamusengʼikutwi lyoka. 48PʼuYesu ahavavuzya ahati: Mwinzile kukwane kundema fwe ngati mwavalʼukumulemʼumupumaṿintu, musenzite niṿipanga namakunku? 49Shima lwe tuhizyaga mwa tempeli, lwe nkavasambilizyaga, pe mutahandema; nkandi she zihonzizye vovulo ukwinza zizyo zye zili mwa kalata. 50Pe vahamuleshela vontʼavasundikwa vakwe, vahashimbila. 51Wokʼumulumendo wʼamulandite, wʼazwaye we mutote weka wa mwendʼumuzelu mumuvili, we vahamulema. 52Pʼuwenʼahavaleshelʼumwenda, ahashimbila vwelele.

Ukulongwa kwa Yesu kuwashiputo umupiti

55-65: Mat. 26,59-68. Luk. 22,63-71. Yoh. 18,19-24.

53UwenʼuYesu vahavala nawo, vahamutwala kuwashiputʼumupiti, she kwe vavungine navashiputʼavapiti navasongo navamanyakalata. 54UwenʼuPeteli wʼahamulandatʼukutali ahafiha nawo paluvungano lwa washiputʼumupiti, pʼahatendama poka navanyamata ukwotʼumwoto. 55Avene nyene avashiputʼavapiti nuluhomano lwonti lwa vayangamalandu vahanza zimo izya kumumenelezyʼuYesu, izya kumugojela mumwo, nkandi vatazyazile. 56Pe vali navinji ava kumuyangʼizyʼilenga, havili vahaga zye vakumuyanga zitayaninʼahinza. 57Pe vahavuha vamo vahamuhomeshezyʼizyʼilenga, vahati: 58Umuntʼuno tuhaga akuti: Imanyilʼine ukumongolʼutempeli uno, we vazenzile ninyove, havili njende nukuvombʼamanda gatatu ukuzengʼuwamwavo umusitakuzengwa ninyove. 59Havili Uvwahome vwavo vwe vakumuyanga vutayanine. 60Pʼahavuhʼuwashiputʼumupiti, ahimilila pahati, ahamuvuzilizyʼuYesu ahati: Zyonti zye vakuyanga vanava sutakwamula nalimʼiwe? 61Uwenʼahapuma mwa, ahasita nukwamula nalimo. Pʼuwashiputʼumupiti ahavuyizyʼukumuvuzilizya, ahati: Iwe we Chilisiti lelo, we Mwana wa Muhatalutimo? 62UwenʼuYesu ahati: E, nene. Havili mulimwenyʼuMwanamuntu lwʼatendime kumuhonʼumulilo wa Muhatamaha, lwʼakwinza mumavingo ga kumwanya. 63Pʼuwashiputʼumupiti ahazepulanyʼamenda gakwe, ahati: Pe tutinji tuvanze vashʼavanji ava kumuyanga? 64Mwiṿuye namwe lwʼakumusamulʼuMulungu. Vulʼimwe? Pe vonti vahalonga vahati: We wa kumugoga. 65Pe vamo vahandʼukumuswila namati nukumuziga kuminso, vahamukunta, havili vahati: Ukwo, kuvwaga lelo. Vope navanyamata vahamukanza namakofi.

UPeteli akumuhanʼuYesu

66-72: Mat. 26,69-75. Luk. 22,56-62. Yoh. 18,17; 25-27.

66UwenʼuPeteli lwʼatendime paluvungano, pe wokʼumuntu wa washiputʼumupiti, umwantanda, ahavala pʼali. 67AhagʼuPeteli akwotʼumwoto, pʼahamwenya, ahati: Nawe wavanga nuYesu wa mu-Nazaleti ula. 68UwenʼuPeteli ahahana ahati: Ha, ntazimanyile zyʼukuyanga. Ilelo lwʼafuma kunzi lwʼali pashilyango, pʼihavilishilʼinkanda. 69Uwenʼumwantanda lwʼamuwenyi, pʼahavuyizya havili ahavavuzya vuvo ve vali pupo, ahati: Umuntu wununo wamwavo wa vala. 70Uwenʼahahana nohavili. Ilelo lwe vizizye hansi, pe vahavuyizya vuvo ve vali pupo, vahayanga nuPeteli, vahati: Weya, nalyoli we wamwavo wa vala. She we muGalilayi. 71Pʼuwenʼahayitipa, ahalapa, ahati: Ine ntamumanyile nakumʼumuntʼuno we mukumutaha. 72Pʼihavilishilʼulwa vuvili inkanda. PʼuPeteli ahakumbuhʼizwi lyʼuYesu amuvuzizye lyʼatili: Lwʼishili nukuvilishila havilʼinkanda, pʼuyihanile hatatu kukwanʼiwe. Pʼahasiva, ahakutʼamansozi.

Currently Selected:

Maliko 14: NYi1965

Highlight

Copy