Matayi 14

Uvufwe vwa Yohani umwozyi

1-12: Mal. 6,14-29. Luk. 9,7-9.

1Mumanda gala uHelodi umwene ahiṿwʼizya kukumuhʼuwenʼuYesu. 2Pʼahayanga navanyamata vakwe ahati: WʼuYohani umwozyi. Azyusile kuvafwe mwe mumwo mwʼakupelʼamamfindango ganaga. 3ShʼuHelodi amulemilʼuYohani ahamukunga ahamwinjizya mujela pamalandu ga Helodiya umuhawamwavo uFilipu. 4ShʼuYohani amuvuzizye atili: Mwiho ukuva nawo iwe. 5Uwene shima atili imugoje, havili ahatetema kuvantʼimpuga shʼavene vahatinji we mukuvwi. 6Ilelo pisiku lyoka pachaka wa kukumbushilʼukupapwʼuHelodi, pʼumwanʼumulindu wa Helodiya ahapunzʼingʼoma mumwo mwe vahizyaga, ahahondela kwa Helodi. 7Pʼuwene ahamulapila nishilapo ukumupa ṿwonti ṿwʼakulava. 8Uwene shʼunyina amupiye inkama nzila, ahati: Mpanga panapa pibeseni itwe lya Yohani umwozyi. 9Pʼumwene ahaswimililwa. Ilelo shʼalafile nzila, she viṿuye navuvo vʼahalya navo iṿintu, pʼahati: Simumupanje. 10Ahatumʼumuntʼuwa kuvalʼukumudumulʼitwʼuYohani mujela. 11Pʼitwe lyakwe lihaletwa pibeseni, ahapelwa umulindu, wʼahavalʼukumupʼunyina. 12Pʼavasundikwa vakwe vahavalʼukusendʼiṿimba lyakwe, vahavalʼukumusyila. Inga pe vahavalʼukumuvuzyʼuYesu.

Ukulisya avantu 5,000

13-21: Mal. 6,31-44. Luk. 9,10-17. Yoh. 6,1-13.

13UwenʼuYesu lwʼayiṿuye zinizi, pʼahavala mwivoti ahayeleleha mulwugwa. Avenʼavantu lwe viṿuye pe vahamulandata niṿinama, vahafuma munkaya zyavo mwonti. 14Ilelo lwʼuYesu akufuma mwivoti, pʼahagʼavantʼimpugʼimpiti. Pʼahavapepelezya ahavazuzuvushizyʼavayeyevazu vavo. 15Lwe vwiliye shamazuva avasundikwa vakwe vahavalʼukuyanga nawo vahati: Mwe mulwugwʼumu, vwope nuvusiku vwiliye, uvavwezye lelʼavantu, vavale mwonti munkaya vayikalilʼiṿwa kulya. 16UwenʼuYesu ahavavuzya ahati: Vavale vashi? Simuvapanje mwenemwe iṿwa kulya. 17Avene vahamuvuzya vahati: She naswe tute naṿwo. Tuli nago ge makati gasanu ninswi zivili mpela. 18Uwenʼahati: Simuṿilete palʼine. 19Ahati: Avantu vatendame ponti pisole. Pʼahasenda nage makati gasanu ganaga nazye nswi zivili, ahenya kumwanya ahaputa. Pʼahamensulanyʼamakati, ahavapʼavasundikwa vakwe, avenʼavasundikwa ve vahavapʼavantu. 20Pe vonti vahalya vahikuta. Vahavunganihʼiṿwalila ṿwa tulagala, ṿihizulʼiṿisejʼi-shumi naṿivili. 21Avene nyene ve vahalya mwe vavaliye vali 5,000 uvwinji, ukuvazya ve vanaṿuli veka shisitakuvazya navantanda navana.

UYesu akujenda pasumbi pamwanya

22-36: Mal. 6,45-56. Yoh. 6,15-21.

22PʼuYesu ahavapilinkanyʼavasundikwa vakwe ahati: Simuzuvaje mwivoti, mutalishʼimwe ukulambʼisyila lila, nkuvavwezya sutʼinʼavantʼiva. 23Ilelo lwʼavavwezizyʼavantu mwe vavaliye mumpuga, pʼahazuva pigambʼuwene pʼahayeleleha weka, ahaputa. Pʼuvusiku vuhamwilila lwʼali pupo weka. 24Ilyenʼivoti lwe lyali pahati pasumbi pe lihalwa namavilingwa, shʼahamṿulungwa hafumile kwe venyizye. 25Pavusiku nyene pahavalilizyo ha vune, mwe vakuvazya ve vakusungʼinkaya shavusiku, pe vahamwenyʼakwinza kwe vali, ahahanya pamwanya pasumbi ukujenda. 26Avenʼavasundikwa nyene lwe vamuwenyi akujenda pamwanya pasumbi, pe vahatentwa muhati vahati: Ingavanga shitumbu. Pe vahaholʼinkolo. 27PʼuYesu ahayanga navo ahati: Simujimbaje, she nene, mutatetemaje. 28PʼuPeteli ahamula ahati: Mwene, inga wewe pʼumbuzyʼine njendaje paminzi pamwanya nane, ninze kukwaho kunukwo. 29Uwenʼahati: Nzagaga. PʼuPeteli ahafuma mwivoti, ahajenda paminzi ahavala kwa Yesu. 30Lwʼawenyi lelʼahamṿulungwa, pʼahatetema. Ilelo pʼahajenda nukudwiva, pʼahaholʼahati: Mwene, mpoha! 31PʼuYesu ahagolosyʼumuhono luvilo luvilo, ahamulema ahamuvuzya ahati: We wa lwitihʼulupupusʼiwe, waganagana shonu? 32Ilelo pe vahazuva mwivoti, pʼahamṿulungwa hahategama. 33Avene nyene ve vali mwivoti vahakupama kukwakwe vahati: Nalyoli we Mwana wa Mulungu lwe. 34Pe vahalamba vahavalʼukufiha munsi ya mu-Genesaleti. 35Avantu va mumwo lelo lwe vamumanyile ukuti we wuyo, pe vahatumʼintumi mwonti munsi mumwo. Pe vahamutwala vonti ve vavinagʼuvuvinu vwonti. 36Vahalambilizya kukwakwe ukuti vapalamansyajʼamenda gakwe kuvupinte. Ilelo vonti ve vapalamansizye, ve vahapona.

Currently Selected:

Matayi 14: NYi1965

Highlight

Copy