Luka 21

Ahasenti ha mwantandʼumuzishe

1-4: Mat. 12,41-44.

1Pʼahinulʼisheni, ahenyʼavadumbwe lwe vakutaga ṿiṿwo ṿwe valesite mumbogoso ya kutajila mumwo iṿwa kusangulizanya. 2Ahenya wope numwantanda woka umufwile umupina, she wope ahatajila mumwo amahelanyusu gavili. 3Pʼahavavuzyʼavasundikwa vakwe ahati: Nalyoli nkuvavuzyʼine nkuti: Umuzishʼuno umupina avalusizye vonti ukutajila mumwo. 4She vonti vanava lwe vakutajila mumwo iṿwa kusangulizanya kwa Mulungu, pe vakusenda lwe vazile ṿivatangaliye, uwene wununo nyene muvupina vwakwe atajiye ṿiṿwo ṿwʼali naṿwo iṿwa munzala.

UYesu akukuvwa izya lunanjiho lwa Yelusalemu nukusililishila kwa nsi

5-24: Mat. 24,1-21. Mal. 13,1-19.

5Lwe vamo vahayangana izya tempeli, ukuti vayemṿizye namavwʼaminza nutuntu twa kufinjila, pʼahati: 6Zyonti zye mukwenya shinishi,—zikwinzʼinsiku pe nalimʼivwe litalileshelwa pivwʼilyamwavo isitakumongolwa. 7Pe vahamuvuzilizyʼavene vahati: Musambilizi, zye zikwinza shali zinizi? She shimanyilo vuli isha kumanyila mumwo ukuti pe zikwanda zikwinza lelo zinizi? 8Uwenʼahati: Mwandaje, mwenye numʼatavahopaje. She valiyinzʼavinji, valijendela mwizina lyane, valitinji: Nkwe nene. Havili valitinji: Umwaha apalamiye. Ve mutahavalandate. 9Inga lumo lelo inga mwinzilʼukwiṿwa uvulugu nukusambushilanʼavantu, pe mutahaganduhaje. She zye pakuti zitalihaje ukuloleha zinizi, izyene nyene izya kuvusilo pe lwe suti zishili. 10Pʼahavavuzya ahati: Uluho lwoka lwa vantu lulisambushilʼuluho ulwamwavo, nuvumwene vwoka vulisambushilʼuvumwene uvwamwavo. 11Nukuyingʼinsi kwʼiliyinga nkani. Iligwa ninzala munsi munsi, iligwa nindobi. Namapelashitetemwi galiloleha nakumwanya amayelʼamapiti. 12Lwe zishili suti zyonti zinizi, pe valivalemʼimwe, valivaṿwima, valivatwala namumasinagogi gavo namujela, valivadendemula kuvamwene nakuvasungansi, she muli nizina lyanʼimwe. 13Zye zilivinzila zinizi ukuti zive zya kumanyila mumwʼimwe. 14Mukumbuhaje lelo mumoyo ginyu mutinji pe tutasivaje nzila izya kuyilonjela. 15She pe ndivapa nene amazwi mwilomu ninjele zye vonti ve vakuvabumanjizya zihvapota ukuvamula nukuvamenʼimwe. 16Valivambilila nyene nave vapafi vinyu nave vanavinyu nave vajenzi vinyu nave vamwinyu. Vamʼimwe valivagoga. 17Vonti valivapata she muli nizina lyane. 18Nkandi nalwe lusisi nalwoka lwa pitwe lyinyu lutalinanjiha. 19Inga mukusimpa mulivulonkʼuvulanzi vwinyu.

20Inga lumo lelo mwinzilʼukwagʼimpuga zya vulugu zizenjeleyʼinkaya ya Yelusalemu, pe mumanye ukuti ikuvʼukumongolwa lelo. 21Pe vahashimbilile mumagamba vonti venga vali mu-Yudayi, nave vali munkayʼino vepaje vavale ukunji, nave vali mutusasa vatinzʼukwinjila munkaya. 22She ge manda ga kulanduzya ganaga pe zililunjiha zyonti zye zisimṿilwe. 23Ye mwe, mwe vantanda umusanyʼula mwe mumwamile namwe mukwonsyʼavana! She valihamantanilwa nkani ava munsi yonti, akuva we mulaha mutupu uwa kuṿitililwʼuluho lwa vantʼava. 24Valigwa vwe vwembe vwa shipanga. Valivakunga ukuvadendemula munsi zyonti zya vakunzi, ninkaya ya Yelusalemu valihanyanjila niṿinama avakunzi, valifiha pupo pe gakusililishilʼamaha ga vakunzi.

25-28: Mat. 24,29; 30. Mal. 13,24-26.

25Pe galilolehagʼamamfindango mwizuva namumwezi namunzota. Namunsʼumu avantu inkolo zyonti zya vakunzi shilivafwamʼishitetemwi, valiyaga kusoṿile kulesile, lwe vakwiṿwa nawe sumbi wʼakuvusyʼamavilingwa. 26Avantu valisililishilʼishitetemwi, lwʼaminso genyizye kuli zizyo zye zikuyinzilʼinsi. She gope namaha ga kumwanya galiyugumbana. 27Pe valimwenyʼuMwanamuntu lwʼakwinza mwivingo namaha nuvumwamu vwe vwinji. 28Apene lelo inga zikwandʼukwinza zinizi, pe muhatalanganye naminso ginyu, she pʼukupokwa kwinyu kupalamiye.

Ukwanzilwa kwa zya kuyisanganya

29-33: Mat. 24,32-35. Mal. 13,28-31.

29Pʼahavavuzyʼishiholanyo ahati: Simwenye nituvu namakwi gonti. 30Lwenga gakufuma, pe mukwenya mumwo nashenga numo atavavuzizye, mukumanyila mumwo umulundo ukuti apalamiye. 31Vovulo lelo namwenemwe inga muziwenyi zyonti zinizi ukwinza, pe mumanyile mumwo ukuti shili papipʼishinamwene sha Mulungu. 32Nalyoli nkuvavuzya nkuti: Avantu va shinishʼiva vataliyepa vonti lwe zitinzile suti zyonti zinizi. 33Niya kumwanya niya pansʼinsi zye ziliyepa, nkandʼamazwi gane ge gataliyepa nalumo. 34Mwandaje nyene, musungajʼamoyo ginyu, gatayipelajʼukuvʼamamwamu nuvuluṿu nuvungʼwezi nuvukutano vwa vulanzi, ilelo pe mwajʼisiku lilyo livitushizizye ukuvuyila lwe mutayisenginye. 35She lilivitushizya fwe ngati shipingo sha ṿwimpuha ukuvinzila vontʼavantu ve vasamiye pamukwembe pamwanya. 36Mudamule lelo shima muputaje, namwe ukuti muhondele ukupona zyonti zinizi zye zikwinza nukwimilila kuminso kwa Mwanamuntu.

37Shima shamusanya pʼahavasambilizyʼavantu mwa tempeli, shavusiku nyene pʼahafuma muhaya, ahavalʼukudila pigamba lye vakuti lya mavula. 38Vontʼavantu vahalavila ukuvala mwa tempeli ukumutejelezyʼuwene.

Currently Selected:

Luka 21: NYi1965

Highlight

Copy