Luka 19

UZahayi

1Pʼahavalʼukufiha mu-Yeliho, mwʼahatuha. 2Ilelo mwe muhaya mwʼalʼumuntu wʼuZahayi izina, usongo wa vasonkolamusonko, wʼalʼudumbwe nkani. 3WʼahanzʼukumwenyʼuYesu ukumumanya, nkandʼahapotwa shʼavantu valʼavinjʼimpuga, uwene shʼali mufupi. 4Pʼahashimbilila kwilongolela, ahazuva mwituvu ahati mwe imwenye, shʼamanyilʼukuti mwʼakutuha. 5UwenʼuYesu lelo lwʼafisile pupo, pʼahenya mumwanya, ahayanga nawo ahati: Zahayi, yihaga luvilo luvilo, she natinji ntendame munyumba yaho umusanyʼuno. 6Pʼahiha luvilo luvilo, ahamuposhela nuluseshelo. 7Ilelo lwe vamuwenyi, pe vonti vahakwinkwina vahati: Ayinjiye kumutalamalandu, mwʼakutuzya. 8PʼuwenʼuZahayi ahimilila, ahamuvuzyʼuMwene ahati: Yenya, shinishi pʼishuma shane shonti nkutapulanya pahati, Mwene, inyusu nkuvapʼavapina. Nuno wengʼiṿwakwe ndiye muvusheṿu, we nkumulipa ṿine pali shoka. 9UwenʼuYesu ahamuvuzya ahati: Umusanya wununo pʼuvuposhi vwinzile munyumba yinino, she wope numuntu wununo mwana-Abulahamu. 10ShʼuMwanamuntu ayinzilʼukulondola she shitezile nukushipoha.

Ishiholanyo sha ṿwuma

11-27: Mat. 25,14-30.

11Ilelo lwe vahiṿwa zinizi, pʼahonjezya ukuyangʼishiholanyo, shʼayazile apalamiye mu-Yelusalemu, shʼayazilʼavene vakusiva ukuti uvumwene vwa Mulungu vukwinzʼukuloleha luvilo luvilo shinishi. 12Pʼahayanga ahati: Wokʼumuntu wa munyimṿwila ahavala kunsi ya kukutali ukuyiposhelelʼuvumwene nukuvwela nohavili. 13Ahavitʼavanyamata vakwe ishumi ahavapʼiṿigavʼishumi ṿwa mpiya, ahati: Zye mutantanye lelo pe nkwinza. 14Avene nyenʼavankaya yakwe vamupasite, pe vahatumʼintumi mwisinda mumwakwe, vahati: Tutakasimʼiswe ukuti avanje wʼumwene witu. 15Afinzile lelo lwʼavweleye kwʼavazilʼukuposhelʼuvumwene vwakwe, pʼahalajizyʼukuvita kukwakwe avanyamatʼava vʼavapiyʼimpiya, amanye mwe vatantinye woka woka. 16Pʼahapalamilʼumutanzi, ahati: Mwene, ishigava shaho sha mpiya shilonsilʼiṿwamwavo ishumi. 17Pʼuwenʼahati: Hinza, we munyamata we mwinza. She we mutungamu pavunsi, pe lelo uve we muhatankaya ishumi. 18Pʼahapalamila nuwa vuvili, ahati: Mwene, ishigavo shaho sha mpiya shilonsilʼiṿwamwavo visano. 19Wope nuno ahamuvuzya ahati: Nawe uve we muhatankaya zisano. 20Wope nuwamwavo ahapalamila ahati: Mwene, yenya, alʼishʼishigavo shaho sha mpiya, nashipinyile mumwenda wa matwinsi. 21She natetemaga kukwaho she we muhalʼiwe, ukusenda naṿwʼutavisile, ukuṿuna namwʼutapesile. 22Uwenʼahamuvuzya ahati: Zikumenile zye zya mwilomu lyaho, we munyamata umuvivi. Wamanyile ukuti ne muntu ne muhalʼine, wamanyile ukuti nkusenda naṿwe ntavisile, nkuṿuna namwe ntapesile? 23Pe wamile nishonu lelo ukuvaninchilizyʼimpiya yane ve vakutantanya? Shinishi lelo lwe ninzile, pe nkwe njisendaje poka niṿilonkwa ṿwakwe. 24Pʼahavavuzya vuvo ve vimiliye pupo, ahati: Simusendʼishigavo shakwe sha mpiya, she mumupanjʼuno wʼali naṿwʼishumi. 25Avene vahamupinga vahati: Mwene, ali niṿigavo ishumi iṿwa mpiya. 26Uwenʼahati: Muleshe mbavuzyʼine, uno wengʼali naṿwo yimo, wʼakwonjezelwa numwonji, uwene nyene wengʼate naho nahamo, we hakusompolwa nahuho hengʼali naho. 27Avenʼavalugu vane vala nyene, ve vasitaga ukuti ntavanje ne mwene wavo ine, ve muvaletʼipa, muvavole she nkwenya.

UYesu akwinjila mu-Yelusalemu nuluseshelo ulupiti

29-38: Mat. 21,1-9. Mal. 11,1-10. Yoh. 12,12-16.

28Ilelo lwʼayanzile zinizi, pʼahalongolela ukuzuvʼukuvala ku-Yelusalemu. 29Vazile lelo lwʼapalamiye mu-Betifage namu-Betaniya, lwe venyizye kwigamba lye vakuti lya mavula, pʼahatumʼavasundikwa vavili, 30ahati: Simuvale munkayʼila ye tulungamine nayo. Lwe mukuvalʼukufiha, pe muliyagʼinyana ya ndogovi vayikunzile, ye numʼumuntu atalimbiye nalumo. Ye muhasatule, muhaletʼuku. 31Ingʼumʼumuntu akuvavuzilizya akuti: Mukuyisatula yashi? pe muhatinji: NkwʼuMwene akuyanza. 32Pe vahavala vuvo vavatumile, vahazyaga inza she zizyo ayanzilʼuwene. 33Ilelo lwe vakusatulʼinyana ya ndogovi yinino, pʼavahatandogovi vahavavuzya vahati: Mukusatula yashʼinyana ya ndogovʼino? 34Avene vahati: NkwʼuMwene akuyanza. 35Pe vahayitwala kwa Yesu. Lwe vayʼamenda gavo pamwanya panyana ya ndogovi, pe vahamulimbizya pupʼuYesu. 36Lwʼakujendʼuwene, pe vahalʼamenda gavo mwidala. 37Lwʼasenjelela kuntene yʼIgamba lya Mavula, pʼavasundikwa impuga yonti mwe vavaliye, vahandʼukuseshela, vahamutimʼuMulungu mumamfindango gonti ga maha ge vawenyi, vahavilishilʼizwʼipiti, 38vahati:

Mulotwa umwene wʼakwinzila mwizina lya Mwene,

vwe vwihalo kumwanya, lwe lushindiho kwa Mulungu.

39Pe vamʼavaFalisayi ve vali mumpuga yiyo vahayanga nawo vahati: Musambilizi, uvapilile avasundikwa vaho. 40Ahamulʼuwene ahati: Muleshe mbavuzyʼine, inga vakupuma vanava, pe gangapongomoha ge mavwe.

UYesu akulosezyʼinkaya ya Yelusalemu

41Ilelo lwʼavazilʼukufiha lwʼakwenyʼinkaya, pʼahayikutilʼamansozi, 42ahati: Nawe inga wazimanyaga we musanyʼuno izya kukupelelʼuvwihalo! Nkandi shinishi she zizyihime kuminso kukwaho. 43She likukwinzilʼisiku, lyʼavalugu vaho valibanʼumwimbwe uwa kukuzenjelela, valikudindila, valikuṿwimbila mwonti namwonti, 44valikumongolanya navana vaho mwe mumwaho, vatalilehʼivwe nalimo palyamwavo. Shʼusisitʼukumanyʼisiku lyaho lya kukwenyelezya mumwo iwe.

UYesu akuzelufwa mwa tempeli

45-48: Mat. 21,12-16. Mal. 11,15-18. Yoh. 2,13-16.

45Pʼahavalʼukwinjila mwa tempeli, pʼahandʼukuvavinga vonti nave valesitʼiṿwa kukazya. 46Ahavavuzya ahati: Lisimṿilwe mwa kalata lye likuti:

Inyumba yane ye nyumba ya kuputila mumwo.

Nkandʼimwe muyipezilʼukuva ninga ya vapumaṿintu.

47Shima ahavasambilizya mwa tempeli. Avene nyenʼavashiputʼavapiti navamanyakalata navasongo va luho vahanzʼu-kumuloṿwa. 48Zihasova izya kumwandila mumwo, she vontʼavantu vahamwumishizya vahiṿwa zizyo zyʼahayangaga.

Currently Selected:

Luka 19: NYi1965

Highlight

Copy