Luka 16

Umuvomyi umuvivi

1Pʼahavavuzya vope navasundikwa vakwe ahati: Alipo wokʼumuntʼudumbwe, wʼali numusunganyumba yakwe, we vahamulonjelela kukwakwe ukuti akutaganyʼiṿwuma ṿwakwe. 2Pʼahamwita, ahamuvuzya ahati: Zye nongwa vuli zye nkwiṿwa palʼiwe? Ukwo, umbazizye iṿwa pavusunzi vwaho, she pʼutakuva we wa kusunjililʼinyumba yane shinishi. 3Pʼuwenʼumusunganyumba ahasiva muhati yakwe ahati: Ye mwe, ntuvuli lelo? Shʼumwene wane akupohʼuvusunzi kukwane. Ukulima kwe ne mutonsu, ukwenʼukulava iṿwa kulava pe ndi ninsoni. 4Nzyazilʼine zye nkuvomba izya kumpelela ukuti vamposhele mwe munyumba zyavo lwʼanefizye pavusunzi vwane. 5Pʼahavita woka woka ve vapaṿile yimo kwa mwene wakwe, ahamuvuzilizyʼuwa kutaliha ahati: Iwe wapaṿile shonu kwa mwene wane? 6Uwenʼahati: Napaṿilʼamafuta iṿipimilo amashumʼishumi. Uwenʼahamuvuzya ahati: Alʼukalata wahʼuno, tendamaga pansʼipa, usimbʼamashumi gasano luvilo luvilo. 7Havili ahamuvuzyʼuwamwavo ahati: Iwe wapaṿile shonu? Uwenʼahati: Ine napaṿilʼiṿipimilo ṿwa ngana amashumʼishumi. Pʼahamuvuzya ahati: Alʼukalata wahʼuno, usimbʼamashumʼumunana. 8Pʼumwene ahamutimʼumusunzi umugulugulʼuno, ukuti avomṿile iya njele. Shʼavana va nsi yinino muvupwanilinkano vwa vukuzi vwavo vavalusizyʼinjele avana va luhozyo.

Idala ilyinza ilya kuvombelʼinsavo

9Nane muleshe mbavuzye: Simuyilonchele ava kuvʼavamwinyu muvudumbwe vwa vugulugulu, pe pakuti inga lumo ingʼakusila pe pakuti vavaposhelaje muntuma zye zikuva shima. 10Uno wenga mutungamu paṿinsi, wʼakuva mutungamu pope napaṿipiti. Uno wenga mugulugulu paṿinsi, wʼakuva mugulugulu pope napaṿipiti. 11Apene lelo inga mute mwe vatungamu napavudumbwe vwa vugulugulu, pʼunanʼavaninchilizye iṿwa nalyoli? 12Apene lelo inga mute mwe vatungamu pashuma sha vanji, pʼunanʼatinji avapanjʼishinyu? 13Numʼumuzya atamanyile ukuvavombelʼavamwene vavili. Pamo angamupata wokʼuno, pʼangamukundʼuwamwavʼula; pamo angamwumishizya wokʼuno, pʼangamusyoshelʼuwamwavʼula. Mukupotwʼukuvavombela ve vavili nuMulungu nuvudumbwe.

AvaFalisayi vakupinga

14Zye vahiṿwa zyonti zinizi avaFalisayi avasungwampiya, pe vahamugota. 15Uwenʼahavavuzya ahati: Imwe mwe mukuyigolosyʼuvugolosu lwe vakwiṿwʼavantu. UwenʼuMulungu nyene wʼagamanyilʼamoyo ginyu. She zyenga vazyimisilʼavantu, zye zilʼumwiho kwa Mulungu. 16Ninkomelezyo navakuvwi vinzilʼukupela pe pa-Yohani. Ukufuma pupo pe zikuyangwa zye nongwʼinyinza izya vumwene vwa Mulungu, ilelo vonti vakufwililishilʼukwinjila. 17Nukwepʼinsi niya kumwanya niya pansi nukwomohʼahagwanule hoka vwelele ha munkomelezyo—tupupusu ukwepʼinsi. 18Uno wengʼakumutavulʼumushi wakwe nukusendʼuwamwavo, wʼakuvembuha. Nuno wʼakusendʼumwantanda wʼumulume amutavuye, wopʼakuvembuha.

Umuntʼudumbwe numupina uLazali

19Pʼali wokʼumuntʼudumbwe, wʼahazwalagʼamendʼamashemamu namazelu amanyengʼenyezu, ahizya muvwinza shima. 20Ilelo numusamusu wʼali wʼuLazali izina, we vamuvisile kushilyango shakwe, wʼali namalondʼaminji. 21Ahasungwʼukwikuta utwalila twe tuhagwanga pameza ya dumbwe. Zyope nimbwa zihamwantʼamalonda gakwe. 22Pe lelo umusamusu ahafwa. Avahavizya vahamunyatula pashifuva sha Abulahamu; wope nudumbwe ahafwa, ahasyilwa. 23Ilelo lwʼali muvuzimu, lwʼakuyimba, pʼahinulʼisheni, ahamulolʼuAbulahamu ukutali nuLazali pashifuva shakwe. 24Pʼahavilishila ahati: Tata Abulahamu, umpepelezyaje, untumilajʼuLazali, atumpishʼulwove lwakwe kunsongo muminzi, ayinze ankatalizyaje palumili, she nkuyimṿilwa mumwilʼumu. 25UwenʼuAbulahamu ahamula ahati: Kumbuhaga we mwana wane, shʼiwe wayisendeye iṿwinza ṿwaho muvulanzi vwaho, uwenʼuLazali ahava naṿwo ṿwe ṿivivi. Shinishi nyene pʼuwenʼakupumilizilwa panapa, nkandʼiwe ukuyimṿilwa. 26Havili lwope nulwema ulutali luvisilwe pahati palʼiswe namwe, ulwa kuvagalusya nava panapa venga vakuti tuvale twinze kumwinyu kunukwo, nava kunukwo venga vakuti tuvale kumwitʼipa. 27Pʼuwenʼahati: Pe fwane lelo nkulambilizya kuli we tata, nkuti umutumaje munyumba ya tata lelo. 28She ndi navamwitu vasano, ahomeshezye kuli vuvo, ukuti vatinze vopʼumu, mwe mwa kuyimṿilwʼumu. 29PʼuwenʼuAbulahamu ahati: Vali navo navaMose navakuvwi, vavatejelezyaje vuvo. 30Uwene nyenʼahati: Ndali we tata Abulahamu, nkandʼinga vazile wokʼafumile kuvuzimu akuvuzilizya, pe vangapinduha. 31Pʼuwenʼahamuvuzya ahati: Inga vatakutejelezya nakwa Mose nakuvakuvwi, pe zitalivaholʼavene pope nashenga wokʼazyusile kuvafwe.

Currently Selected:

Luka 16: NYi1965

Highlight

Copy