Luka 14

Uwampungo ya minzi ahapona pʼisabati

1Ilelo umusanya woka pisabati pʼuYesu ahavalʼukulyʼiṿintu munyumba ya mupiti muvaFalisayi. Pʼavene vahamwambamba. 2Pʼahagʼumuntu wa mpungo ya minzi pʼali wʼumo. 3PʼuYesu ahavavuzya navamanyankomelezyo avaFalisayi, ahati: Amwe hinza ukuzuzuvushizyʼumuntu pisabati, amwe ndali? 4Avene vahapuma mwa. Pʼuwene ahamulema, ahamuzuzuvushizya, ahati: Valaga lelo. 5Pʼahayanga navʼavene ahati: Imwe mwe muvaliye, unanu avanje nindogovi, avanje ninkambaku, ilelo pʼijenda nukugwila mushifula—amwʼasitaje ukuzizuvula luvilo luvilo pisabati? 6Pe zihasovʼavene izya kumwamula pazinizi.

Uvwahayisye nuvutesi

7Pʼahavavuzyʼishiholanyo ve visitwe, shʼawenyi inza she vahayisevelʼukutendama pavwimishilwa, ahavavuzya ahati: 8Ingʼumuntu akwisite ukulyʼiṿwa pavusendelo, kwe ndali ukuvalʼukutendama pavwimishilwa, she ngavangʼuyaje amwisite nuwamwavo umupiti nakukwaho, 9ilelo pʼuyaje akwinzʼakuyanga kukwaho wuyo wʼavisite mwe vavili, uyaje akuti: We, umuvuzile uwamwinyʼuno, ilelo pʼinsoni zikulemʼiwe kumpelela. 10Ndali, lwe ingʼumuntu akwisite, pʼuvalʼutendame kumpelela, wuyo wʼakwisite pʼayinze akuvuzyaje atinji: We wamwitu, zuvaga, utendame pavwimishilwa pala. Pʼuliva nulushindiho kuminso ga vonti vʼutendime navʼukulya. 11Shʼuno wengʼakuyimiha weka, wʼakwishilwa, havilʼuno wengʼakuyisya weka, wʼakwimishilwa.

12Wope nuno wʼamwisitʼukulyʼiṿintu ahamuvuzya ahati: Ingʼukuteleha nga ṿwa kulavuha, nga iṿwa shamazuva, pʼutavite navamwinyu navana vinyu navajenzi vinyu navadumbwe, vʼupalamiye navo ukuzenga ndali, ukuti vuvo havili vatakwitʼiwe, vatavanje fwe ngati vakulifile paṿintu ṿwahʼiwe ṿwe valiye. 13Nkandʼingʼutelesilʼiṿwa kulya, pʼuvite navapina nave valemayʼumuvili nave vakudyogolelʼukujenda navantonko. 14Pʼuliva we musangalusʼiwe. Shʼavene vate naṿwo naṿimo iṿwa kukugalushizya, ṿwʼukuvalʼukuṿwaga lwe vakuzyuhʼavagolosu.

Ishiholanyo sha ṿwakulya ṿwa pavusendelo

16-24: Mat. 22,2-10.

15Ilelo lwʼayiṿuye linili woka we vatendime nawʼukulya, Pʼahamuvuzya ahati: Ena, musangalusu wengʼakulyʼumukati mushinamwene sha Mulungu. 16Uwenʼahamula ahati: Wokʼumuntu ahatelehʼiṿintu ṿwa kulya ṿwe ṿwinji, pʼahavitʼavinjʼavantu. 17Ilelo pahavalilizyo aha kulila, pʼahatumʼumunyamata wakwe ukuvavuzya vuvo ve visitwe ukuti: Mwinze lelo shʼiṿintu ṿipiye. 18Ilelo pe vonti vahahana fwe muntu woka. Umutanzi ahati: She nkazilʼumugunda, kwe kuva lelo mpilinkinʼukuvalʼukuwenya, nkukulava umfwilʼuvwila. 19Uwamwavo ahati: She nkazilʼinkambaku zya majoho gasano, ilelo mbusilʼukuzimanyinsanya, nkukulava umfwilʼuvwila. 20Uwamwavo ahati: She nsenzitʼumwantanda shinishi, zye zizyo nte ninze. 21Ilelo lwʼavweleyʼumunyamatʼuno, pʼahamuvuzya zinizi umwene wakwe. Pʼahaṿitwa umuhatankaya, ahamuvuzyʼumunyamata wakwe ahati: Vuhaga luvilo luvilo, valaga namumagulumo namutudala twonti twa nkayʼino, uhavavunganishe munumu vonti navasamusu navalemazu navantonko nave vakudyogolelʼukujenda. 22Pʼuwenʼumunyamata ahati: Mbomṿile inza shʼundajizizye. Nkandi vusyayʼuvuzilo. 23Pʼumwene ahamuvuzyʼumunyamata wakwe ahati: Vuhaga, valaga mwonti namumadala namumpitu, uvaṿijilizyaje vinze munumu, vizulaje munyumba yanʼumu. 24She nkuvavuzyʼine nkuti, avantu vala ve visitwe—numo atalimanya mwilomu iṿintu ṿwane iṿwa kulya.

Uvugomu vwa vusundikwa

26. 27: Mat. 10,37. 38.

25Ilelo vahajenzanya nawʼavantʼimpugʼimpiti, pʼuwenʼahavashevela, ahavavuzya ahati: 26Ingʼumuntu akwinza kukwane musitakumupata nuyise nunyina numushi navana navaninʼa-vanaṿuli navaninʼavantanda, musitakuvupata navwe vulanzi vwakwe wuyo, wʼalipotwʼukuvʼumusundikwa wane. 27Wope nuno wengʼatakuvegalʼishihovenkanyo shakwe, ingʼatakundandata mwisindʼine, wʼakupotwʼukuvʼumusundikwa wane. 28Shʼimwe mwe muvaliye, inga wokʼakuti nzenjʼinganzya ya njelwa, pʼamwe atakutalihʼukutendama suti ukuvazyʼiṿwa kuzenjela, ahenyʼingʼali niṿwa kumalilizya? 29Ingʼayaye lwe lwalo lweka, inga kumupositʼukumalilizya, pe vonti ve vakumwenya lwʼakuzenga valimuholela, 30vakuti: Umuntu wununo atalisilʼukuzenga, nkandi atali namaha ga kumalilizya. 31Amwe vovulo numwene, wʼavusilʼukulwʼuvulugu numwene wamwavo, wope akutalihʼukutendama ukusiva suti akuti: Avanʼavantu vali 10,000, avʼula wʼalesitʼuvulugu vali 20,000, amwe pe nsimpe lelo kulʼula? 32Ingʼayazilʼukuti ndali, pʼakuvatumʼava kuvatuma, lwe sutʼashili alʼukutali uwamwavo, ukulavʼizya vwihalo. 33Vovulo lelo mwenti namwenemwe mwe muvaliye. Uno wengʼatakuṿileha ṿwonti ṿwʼali naṿwo, wʼakupotwʼukuva musundikwa wane.

34Iveya lye lyinza vwelele. Apene nyene lwengʼiveya lisufile, pe ṿilipo lelo iṿwa kulilunga havili? 35Namumagunda napantanga litahondeye ndali, vakulitaga kunzi. Uno wengʼamakutwi aga kutejelezya ali nago, wʼatejelezyaje.

Currently Selected:

Luka 14: NYi1965

Highlight

Copy