Luka 12

UYesu akusoha avasundikwa vakwe ukuti vatavanje nishifumbo

2-9: Mat. 10,26-33.

1Ilelo pe vahavunganʼavantʼavinji ve numʼatangavazya, vahahanyanʼiṿinama, pʼuwenʼahatalihʼukuyanga kuvasundikwa vakwe ahati: Mwandajʼiṿiluzizyo ṿwa vaFalisayi iṿwa shifumbo. 2Litalipo nalimo lye likupishililwe lye litalikupulwa, havili nalimo ilya kukwilu lye litalimanyiha. 3She zyonti nazyenga mukuyanga kukwilu, zye valitejelezya apazelu, zyonti nazyengʼavantu muvanongʼoneye mumakutwi gavo munyumba ya kuziho, zye valizikumusya pamwanya panyumba.

Akuvajimṿwa avasundikwa vakwe

4Imwe mwe vamwitu nkuvavuzya nkuti: Mutavanyile ve vakugoga we muvili weka, ilelo pe ulwa pisinda vakupotwa ukuvomba zimʼizinjʼimpiti. 5Muleshe mbavuzyʼine uwa kumunyila: Simumunyilʼuno wʼakulinga agozilʼumuvili, pe namaha aga kuvatajila mugehena gakwe wuyo. Ena, nkuvavuzya nkuti we mumunyile wuyo. 6Amwe indundulu zisano zitakukalwa namahela gavili? Havili nayoka muzyonti italuṿilwe kukwakwʼuMulungu. 7Zyope nazye nsisi zyinyu zyonti zya kwitwe zivazilwe. Mutahogopaje; she mulusizye nazye ndundulu zye nyinji uvugomu. 8Nkuvavuzyʼine nyene nkuti: Uno wengʼakuyiyanga kukwane lwe vakwiṿwʼavantu, we wope nuMwanamuntu aliyiyanga kukwakwe lwe vakwiṿwʼavahavizya va Mulungu. 9Nkandʼuno wengʼakuyihana kukwane paminso ga vantu, we nane ndiyihana kukwakwe paminso ga vahavizya va Mulungu. 10Uno wengʼakumuyanjila limʼizwʼivivi uMwanamuntu, wʼaliswilwa zizyo, nkandʼuno wengʼakumusamulʼuMupepʼuMufinjile, wʼataliswilwa zizyo. 11Apene nyene inga vakuvadendemula imwe mumasinagogi nakuvahombe nakuvamaha, pe mutakutanaje ukuti amwe tuhamulaje vuli amwe tuyanje lili kwi; 12shʼuMupepʼuMufmjile alivasambilizyʼimwe pahavalilizyo huho izya kuyanga zye zikuhondela.

Impapilo nishiholanyo sha dumbwe umudedevazu

13Ilelo pe wokʼumuntu wa mumpuga yiyo ahayanga nawo ahati: Musambilizi, umuvuzye uwamwitu tugavanʼahinza iṿwa pavupwano. 14Uwenʼahamuvuzya ahati: We muntu we, unanʼanimisilʼine ukuvalonzanya nukuvagavanyʼimwe? 15Pahava vuzya ahati: Mwandaje vwontʼuvupapilaṿwonti vutavahopaje, she pope nashenga ṿimutangaliye, umuntʼuvulanzi vwakwe vutakufuma muṿwuma ṿwakwe ṿwengʼalonsile. 16Pʼahavavuzyʼishiholanyo, ahati: Wokʼumuntʼudumbwe umugunda wakwe ayeleye nkani. 17Pʼahasiva muhati yakwe ahati: Nkonzye vuli lelo? She pasoṿilʼapa kuvihʼimboto yanʼino. 18Havili ahati: Nzyazile lelo. Nkumongolʼinkoma zyane, nkuzengʼimpwa impiti, mwe nkulunda ṿwonti ṿwe mpezilʼiṿi, niṿwuma ṿwane ṿwonti, 19pe ndiyanga kumwoyo wane nditi: We mwoyo wane, uli naṿwo lelo iṿwa kulimuhʼamahʼaminji. Vanga, tendamaga lelo, ulyanje, ungʼwelaje, uzevelaje. 20UwenʼuMulungu nyene ahamuvuzya ahati: We muwelewele iwe, shavusiku vunuvu vakwanzʼuvulanzi vwaho kukwaho. Ilelo pe ṿivanje ṿwa nanu ṿiṿwo ṿwʼuyiyananizizye? 21Shʼahonzizye lelʼuno wengʼakuyilundilʼiṿwuma, lwe kwa Mulungu atavisile naṿimo.

Insoshe kuzyʼilyoga

22-31: Mat. 6,25-33.

22Pʼahavavuzyʼavasundikwa vakwe ahati: Mwe mumwo nkuvavuzyʼimwe nkuti, kwe ndali ukukutana nuvulanzi vwinyu iṿwa kulya, numuvili winyu aga kuzwala. 23She nuvulanzi niṿintu, vupiti vwe vulanzi, numuvili naga kuzwala, mupiti we muvili. 24Simusivʼamakungulu. Shʼagene pope nashenga gatakuvwala, nashenga gatakuṿuna, ninkoma gate nazyo, popʼuMulungu akugalelʼiṿintu. Imwe mulusizye nkanʼuvugomu inyunyi! 25Imwe mwe muvaliye, unanu amanyile ukwonjezyʼumuhono woka vwelele uvutali uvulanzi vwakwe, nashengʼakukutana? 26Apene lelo inga zivaposite nazye nyinsi zinizi, pe mukukutana shonu nukukutanʼizinji? 27Simusivʼuvwezya lwe vukumela. Shʼuvwene vutakupota, havili vutakuhova. Nkandʼine nkuvavuzya nkuti: Wope nawe Solomoni muvumwamu vwakwe vwonti atazwaye nalumo fwe vwokʼuvwezyʼuvu. 28Apene lelʼuMulungu ingʼalizwisile vovulʼisole lya mwilala, lye musanyʼuno lilipo, lyʼindavi likutajilwa mwilungu lya mwoto, pʼatʼasitʼukulusyʼukuvazwiha imwe lelo, mwe va lwitihʼulupupusʼimwe! 29Namwe kwe ndali ukwanzʼiṿwa kulya niṿwa kungʼwela, gatayelushʼamoyo ginyu. 30She kuṿwonti ṿiniṿi kwe vakuyikungula ve vakunzi ava munsʼumu. She mwenemwe uSo aṿimanyile nzila ṿwontʼiṿwa kuti muve naṿwo. 31Ndali mwe, muyikungule nzila kwe kuvumwene vwakwe, pe muliyaga ṿwonti naṿiniṿi akuvonjelezya pamwanya. 32Kwe ndali nkutetema lelo we hadimilo hansʼiwe, shʼuSo akumbusilʼukuvapʼuvumwene imwe.

33. 34: Mat. 6,20. 21.

33Simukazye ṿwenga muli naṿwo, muvapanjʼiṿwa shikuku ava kuvapa. Simumamʼamafuko ge gatakukulupa. Simusendʼishuma kumwanya she shitakusila nalumolumo, she numwiva atakufwa pupo, she nulunyenze lutakulya. 34She kwe shilʼishuma shinyu, kwe gali namoyo ginyu.

Ukwanzilwa kwa kuyisenganya nishiholanyo sha muvomyi umutungamu

35-46: Mat. 24,42-51.

35Mufungajʼamalamba mumasana ginyu, Zyope ninyale zyinyu zyahaje. 36Muvanje fwe vantu ve vakugulililʼumwene wavʼukwinza, lwʼafumilʼukusendʼumwantanda, ve vatakuhavʼukumwigulila lwʼayinzile lwʼakuhonyonsya kulwiji. 37Ve vasangalusʼavanyamata vʼumwene wavo akwinzʼukuvaga vadamuye lwʼayinzile. Nalyoli nkuvavuzyʼine nkuti: Pʼuwenʼalifungʼumwendʼumutote, alivanzilʼiṿwa kutendamila, ajende nukuvatelamishilʼiṿintu. 38Nashengʼakwinza pahavalilizyo ha vuvili, mwe vakuvazya ve vakusunga pavusiku, amwe pahavalilizyo ha vutatu, ingʼakuvaga vovulo ve vasangalusu vanava. 39Zye mumanyinsanye zinizi nyene: Ingʼumuhatanyumba amanyaga umwiva ukuti akwinza pahavalilizyo ahalive, pʼatangaleha inyumba yakwe idovolwe. 40Namwe lelo, simuyisenganyaje vovulo, shʼuMwanamuntu aliyinza pahavalilizyo huho hʼimwe mulitinji ingavangʼashili. 41PʼuPeteli ahamuvuzilizya ahati: Mwene, ishiholanyʼishi ukutuvuzya sweneswe, ingavanga ukuvavuzya vope navantu vonti? 42PʼuwenʼuMwene ahati: Amwʼalipʼumusunganyumba umutungamu uwanjele, wʼumwene wakwe akumwimiha ukuti ave avalinjilʼiṿintu ṿwavo ava munyumba yakwe pahavalilizyo ahinza? 43We musangalusʼumunyamatʼuno ingʼumwene wakwe akwagʼakuvomba yiyo lwʼayinzile. 44Nalyoli nkuvavuzyʼine nkuti: Alimwimiha ukuti avanje wa kusunjilila ṿwonti ṿwʼali naṿwo. 45Nkandʼingʼumunyamatʼuno mumwoyo wakwʼakuti: Shʼumwene wanʼashili akuhavʼukwinza, ilelo pʼavushʼukuvahoma navanyamatʼavamwavo navantanda va pambombo, nukuluvʼiṿintu nukungʼwela nukuholwʼipele, 46pʼaliyinzʼumwene wa munyamatʼuno pisiku lyoka lwʼakusivʼukutʼashili napahavalilizyo hʼuwenʼatamanyinsinye, pʼalimudumulanya, alimugavila poka navasitavutungamo navumo ishigavo shakwe. 47Umunyamatʼuno wengʼazimanyile zizyo zyʼalajizizyʼumwene wakwe, ilelo pʼasite nukuvomba huho hʼalajizizyʼuwene, wʼalisyempwʼinsanzʼinyinji. 48Nkandʼuno wengʼatahamanyile huho, ilelo pe wopʼakuvomba zye zya nsanzu, wʼalisyempwa hansi. Uno wengʼaposheleyʼiṿwinji, we valimulanduzya ṿwe ṿwinji. Wope nuno wenga vamukunjiyʼiṿwinji ukuṿisunjilila, we valipitilizya ukwanza ṿwe ṿwinji kukwakwe.

Izya kumanyila mumwo Havalilizyo

49Ninzilʼukupembʼumwotʼine munsʼumu. Ilelo ndi naho hoka vwelele, he hakuti ingʼamasile he hali. 50Ndi nukwozelwʼine, kwe pakuti nozelwaje. Kwe kumpatishizizye muhati, nkuti inga namafisile kuvusilo.

51-53: Mat. 10,34-36.

51Imwe mukuti ingavangʼayinzilʼukwihazyʼinsʼino ine? Ndali, ndesite vwe vulugu nyene ine. 52Shenga vali munyumba yoka vwelele avantu vasano ve vakwanda shinishi vakululinkana; vavili vakululihʼavamwavo vatatu, havili ve vatatʼiva vakululihʼavamwavo vavili vala. 53Nuyise akumu-lulihʼumwanʼumwanaṿuli, havili wope numwanʼumwanaṿuli akumululihʼuyise. Nunyina akumululihʼumwanʼumulindu, havili wope numwanʼumulindu akumululihʼunyina. Wope nunyinaṿwala akumululihʼumuhamwana, havili numuhamwana akumululihʼunyinaṿwala.

54Pʼahavavuzya vope avantʼimpuga yonti ahati: Lwenga mukwagʼivingo likuzuva kuvuswelo, pe mutakuhavʼukuyangʼukuti imṿulʼikwinzʼukutonya. Fwane nalyoli. 55Havili inga mwazilʼinkungu ifumile kuluvazu lwa kumulilo, pe mukuti ahasanya hakuva hakulama nkani. Fwane nalyoli. 56Mwe va shifumbo mwe, insi niya kumwanya kula zye muzimanyile. Muli nishonu lelo ukuwumanya wope numwaha wa shinishʼuno? 57Muli nishonu ukuzilonga mwenemwe mweka izya vugolosu? 58Inga mwasogola ukulongana mwe vavili nawe nuwa mulandu waho kumuhombe, pʼulingaje mwidala ukuyipoha kuli wuyo, ukuti atahakudendemulile kumulonzi, ilelʼumulonzi atahakutwale kumusikali, uwenʼumusikali atahakutaje mujela. 59Nkukuvuzyʼine nkuti: Utalivalʼukufuma mumwo lwʼutalifile nahahela aha kumpelela.

Currently Selected:

Luka 12: NYi1965

Highlight

Copy