Luka 1
1
Izya kutaliha
1Nazile valinzile ve vinji ukutuvuzya mwa kalata zyontʼinongwa mwe zyalandatana zye zivonesilʼukupelwa mumwitʼumu, 2zye vatulesheyʼavanyamata vʼizwi, ve vatalisilʼukuzilola nage minso gavo, lwe zikwanda vwelele. 3Pe nane nkuzisimishizya zyonti, nkafuma nazyo pe pavwando. Pe nkati nkukusimbila nawe we Teyofili we mupiti nalyoli, nkati nkusimbile mwe zikulandatana muvulandatano, 4she nkuti nawe umanyinsanyʼahinzʼamazwi gʼuyiṿuye, ukuti gali ga nalyoli.
Uvukuvwi vwa zya kupapwa kwa Yohani umwozyi
5She pala pʼuHelodi ahava wʼumwene munsi ya vaYuda, pʼalipo wokʼuwashiputo wa muvutapunkano vwa vana-Abiya pambombo, izina lyakwe alʼuZahaliya. Umushi wakwe alʼumwana wa Aloni paluho, izina lyakwe alʼuElisabeti. 6Vali vagolosu ve vavili kwa Mulungu, vuhalandata namunkomelezyo zya Mwene namuvugolosu vwʼahomelezizye wuyo, vatali nazyo nazimʼizya kuvalonga. 7Nkandʼumwana we vatali nawo, shʼuElisabeti ali mugumba. Kwope nakuvugosi vafishe ve vavili.
8Lumo lelo lwʼakuvombʼiya vwashiputo kuminso ga Mulungu pamulungu wakwe wa vutapunkano vwakwe, 9pe luhamwaga ululajizyo mwʼavashiputo shima mwʼalʼumwiho wavo ukwilihʼuwa kwinjila nukusushizya mutempeli wa Mwene. 10Avenʼavantu nyene impuga yonti vahasyala kunzi ukuputa pahavalilizyo aha kusushizya. 11Pʼahitushilʼuhavizya wa Mwene, ahaga ayimiliye kushifinjilo sha kusushizya pupo kumuhonʼumulilo. 12Pʼahaganduha nkanʼuZahaliya lwʼamuwenyi, shihamugwilʼishitetemwi. 13Uwenʼuhavizya ahati: Utatetemaje we Zahaliya, shʼuMulungu ayiṿuye zye walavaga. UElisabeti umushi waho alipapʼumwanʼumwanaṿuli. Izina uhamupanjʼilya Yohani. 14Alikupelela nukuseshela nukuze-vela. Navanji valiseshelʼavinji Napafilwe. 15Shʼaliva mupiti kuminso kwa Mwene, nipele lya mampensya nuwamwavo Vwonti ṿwe ṿikuholʼumuntu ṿwʼatalingʼwelaga naṿimʼuwene. Uwenʼaliyizula we MupepʼuMufinjile mwe muhati mwa nyina. 16Alivavwezya kwa Mwene uMulungu wavo vamʼavinji muvana-Yisilayili. 17Uwenʼalijendela namumupepo wa Eliya namumaha gakwe lwʼakulongolela kwilongolela kuli Wuyo. Amoyo ga vayise aligasyetula kuvana vavo, nave vakumwila vope alivasyetula vinze vasivajʼizya vugolosu, alimuyananizyʼavantu uMwene. 18PʼuZahaliya ahamuvuzilizyʼuhavizya ahati: Zye nkuzimanya nishonu zinizi? She ne mugosʼine, wope numushi wane afisile kuvugosi. 19Pʼahamulʼuhavizya ahati: Ine ne Gabiliyeli, shima nimiliye kuminso ga Mulungu. Shinishi ntumilwe kukwaho ukuyanga nawe ukukuvuzyʼinongwʼinyinza zinizi. 20Yenya, lelo ukuva we shinunu shinishi, ulipotwʼukuyanga ukuvalʼukufiha kwisiku lye zikuloleha zinizi, she gasisitʼukukuholʼiwe amazwi ganʼiga, ge gakwinza nalyoli pisiku lyakwe. 21Avenʼavantu vahamugulililʼuZahaliya. Vahasukumila lwʼahaṿile mutempeli. 22Uwene lwʼakufuma pe vahagʼatamanyilʼukuyanga navo nalimʼizwi. Pe vahamumanyila pupʼavene ukutʼawenyʼishitushizya shimwitushizizye mutempeli. Uwenʼahavahanka shima, ahava wʼushinunu. 23Ilelo pʼahalinga lwe gasilʼamanda ga mbombo yakwe, pʼahavala kuhaya. 24Ilelo pe lwe padila, pʼuElisabeti umushi wakwe ahamwama. Pʼahavwamʼamezi gasano ahati: 25Shʼahonzizye vovulʼuMwene pisiku lya kunenya, lwʼakumbusilʼukumpoha ukuholelwa kuvantu.
Uvukuvwi vwa zya kupapwa kwa Yesu
26Ilelo mumwezi wa mutanda, pʼuMulungu ahamutumʼuhavizya uGabiliyeli munsi ya mu-Galilayi munkaya mwe vakuti mwe mu-Nazaleti izina, 27kumulindu woka wʼamuzinjiyʼumuntu wʼali wʼuYosefu izina, umwana-Davidi paluho. Uwenʼumulindu ali wʼuMaliya izina lyakwe. 28Ahinjila mwʼali, ahati: Nkukulamuha wʼuposheleyʼuvwilʼiwe, uMwene ali nawe. 29Uwene nyene ahatentwa nkani kwizwi linili, ahasiva ahati: We mulamu vuli wununo? 30Uwenʼuhavizya ahamuvuzya ahati: Utatetemaje we Maliya, shʼuyazilʼuvwila kwa Mulungu iwe. 31Yenya, ulimwama muhati yaho, ulipa-pʼumwanʼumwanaṿuli, wʼulimupʼizina lya Yesu. 32Wʼaliva mupiti, alitashilwʼukuva we Mwana wa Mulusyi. Shope nishitengo sha vumwene sha Davidi, uyise wakwe, alimupʼuMulungu uMwene. 33Alivʼumwene wa paluho lwa Yakobu shima shima. Nuvumwene vwakwe vutaliva napavusililishilo napamo. 34PʼuMaliya ahamuvuzilizyʼuhavizya ahati: Zye zyinzaje vuli zinizi, she nte numwanaṿuli numo? 35Uwenʼuhavizya ahamula ahati: UMupepʼuMufinjile alikwinzila, namaha ga Mulusyi galikugwinchila. Pe nishifinjile shʼulishipapa shilitashilwa ukuva we Mwana wa Mulungu. 36Yenya, nawe Elisabeti umujenzi winyu wope amwamile muvugosi shinishi. Umwezʼuno we wa mutanda kukwakwe we vakumutahʼuvugumba. 37She naṿimo ṿitakumupotʼuMulungu. 38PʼuMaliya ahati: Yenya, ne muvomṿi wa Mwenʼine, zipelwaje lelo kukwane zizyo zyʼayanzile. Pʼuhavizya ahasogola.
UMaliya akumutandalila uElisabeti: Ulwimbo lwa Maliya umulindu umugolosu
39Ilelo pʼuMaliya ahavuhʼukuvala lwe patadiliye nkani, ahavala mumagamba luvilo luvilo, ahafiha munkaya yoka ya munsi ya vana-Yuda. 40Ahavalʼukwinjila munyumba ya Zahaliya, ahamulamuhʼuElisabeti. 41Ahalinga lelʼuElisabeti lwʼakwiṿwʼumulamu wa Maliya pʼahagʼumwana akudova muhati mumwakwe. PʼuElisabeti ahizulʼuMupepʼuMufinjile, 42ahadandushilʼizwʼipiti ahati: Ulositwʼiwe uvalusizye vontʼavantandʼavamwinyu. Mulotwa wope numwana wʼuli nawo muhati mumwavo. 43Ndi nishonu ine, unyina wa Mwene wane, shʼayinzile kukwane? 44Yenya, lwe niṿuyʼizwi lya kundamuhʼiwe mumakutwi gane, pe nkagʼumwana muhati yanʼumu akudova. 45We musangalusu wuyo wʼayitisile ukuti zikwinza zizyo zyʼamuvuzizyʼuMwene. 46PʼuMaliya ahati:
Umwoyo wane akumutundumihʼuMwene,
47numupepo wane akumululutilʼuMulungu uMuposhi wane,
48shʼanenyizyʼuvufupi vwane muvomṿi wake.
Yenya, vakwanda shinishi, vakunjangʼuvusangalusu vontʼavanyenya mwe vakulandatana,
49shʼuWamaha ampeleyʼiṿipiti,
lyope nizina lyakwe lifinjile,
50lwope nulupepelezyo lwakwe luvazilʼukufiha
nakuvanyenya va vanyenya mulʼava ve vakumunyila.
51Umuhono wakwe apezilʼiṿwa maha,
avamabado munsivo zya mumoyo gavo avalulumiye;
52avamaha avagwisizye paṿitengo ṿwavo ṿwa vumwene, a vamwamisilʼavafupi.
53Avanzala avatangazizye vwe vwinza, avadumbwe avavinzile shisitukuvapa naṿimo.
54AkumutulʼuYisilayili umuntu wakwe,
shʼakuti nkukumbushʼulupepelezyo,
55inza she lilyo afinzile navatata
nuAbulahamu nava mumbeyu yakwe shimashima.
56UwenʼuMaliya abadilʼamezi gatatu kukwakwe kukwo. Ilelo pʼahavwelʼukuvala kuhaya.
Ukupapwa kwa Yohani umwozyi: Ulwimbo ulwa kuti “Musundikwa uMwene”
57Ilelo uElisabeti isiku lyakwe lya kupapʼumwana lihinza. Pʼahapapʼumwanʼumwanaṿuli. 58Pe navapalamani vakwe navajenzi vahiṿwʼukutʼuMwene amupepelezizyʼulupepelezyʼulupiti, pe vahaseshela nawo. 59Ilelo lwʼadiliyʼamandʼumunana, pe vahavalʼukumuvolʼumwana uvuvolwa. Vahamupʼizina lya yise ilya Zahaliya. 60Uwenʼunyina ahahana ahati: Lye ndali, simumupanjʼilya Yohani. 61Avene vahati: Shʼatalipo numʼumuntu muvujenzi vwinyu uwʼizina linili. 62Vahamupalizyʼuyise vahati pe fwane kwʼatuvuzye wuyo izina lyengʼakasime ukumupʼumwana wakwe. 63Uwenʼahalavʼitafili. Pʼahasimba pupo, ahati: WʼuYohani izina lyakwe. Pe vonti vahasukumila. 64Pʼilomu lyakwe lihiguhʼapashezi, nulumili lwakwe vovulo Pʼahayanga, ahamutimʼuMulungu. 65Pʼishitetemwi shihavagwila vonti ve vupalamiye nawo nkuzenga. Zyontʼinongwa zinizi zihakumuha mwonti mumagamba mwa Yudayi. 66Vonti ve viṿuye zinizi vahaziviha mumoyo, vahati: Amwe aliyipelʼukuva vulʼumwana wununo? Shʼumuhono wa Mulungu ali nawo. 67PʼuZahaliya uyise ahizulʼuMupepʼuMufinjile, ahakuvwa ahati:
68Musundikwa uMwene, uMulungu wa Yisilayili,
shʼayenyizyʼavantu vakwe, avapeleye nukupokwa.
69Atwimishiyʼulupembe lwa kutupoha
munyumba ya Davidi ya muntu wakwe.
70Lwe lulwo ahaluyanga nzila
mwilomu lya vakuvwi avafinjile avalulwo, 71ulwa kutupoha kuvalugu vitu
nakumuhono wa vuvo vonti ve vatupasite.
72Shʼuwenʼatili mbalemelʼulupepelezyo avatata vitu iswe,
nkumbuhajʼulwitinkanʼulufinjile lwʼayitinkine navo,
73inza shʼamulapiyʼishilapʼuAbulahamu utata swenti,
ukuti: Tulipokwa kunyove zya valugu vitʼiswe,
kwe kutetema nakumo, tumuvombelaje Wuyo,
75muvufinjile namuvugolosu
kuminso kukwakwe shima gontʼamaha aga kulandilʼiswe.
76Nawe we mwanʼiwe, ulitashilwʼukuva we mukuvwi wa Mulusyi,
shʼulilongolela kwilongolela kukwakwe ukuyananizyʼidala lyakwe.
77Uvamanyinsy a jʼavantu vakwʼuvuposhi
muvuswila vwa malandu gavo,
78shʼatupepelezizyʼulupepelezyo uMulungu witu,
lulwo lwʼajenzite mumwo ukwinza kumwitu uMufumakumwanya,
79uwa kuvitushizya ava mushisi nava mwizyungululu lya vufwe,
uwa kugoloshezya iṿinama ṿwitu mwidala lya vwihalo.
80Uwenʼumwana ahakula, ahagoma nawe mupepo wa muhati. Ahava mulwugwa shima ahafiha pupo pʼayilolesizye kwa Yisilayili uku.
Currently Selected:
Luka 1: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
