Yohani 8

Umwantanda we vamulemile muluvembu

1UwenʼuYesu ahavala pigamba lya Mavula. 2Ahalavila shanzanche ukuvala mwa tempeli nohavili, pʼavantʼimpuga yonti vahavala pupo pʼali. Uwenʼahatendama, ahavasambilizya. 3Ilelo pe navamanyakalata navaFalisayi vahaletʼumwantanda we vamwazile paluvembu, vahamuviha pe pahati. 4VahamuvuzyʼuYesu vahati: We Musambilizi, umwantandʼuno vamwazile paluvembu lwʼahavembuha. 5Munkomelezyo lelo mwʼatuhomelezizyʼuMose atili venga vali vovulo, ve muvatinzaje namavwe. Vulʼiwe lelo, ukuti vuli? 6Zye vahayangaga izya kumulinga she vatili tuve nazyo izya kumulonjelela. UwenʼuYesu ahinama, ahasimba nulwove pansi. 7Ayazile lelo vumishizizye ukumuvuzilizya, pʼahinuha, ahati: Umusitamalandu mumwo mwe muvaliye imwe munumu wʼatalishʼukumutinza nivwe. 8Havilʼuwene ahinama, ahasimba nulwove pansi. 9Avene lelo lwe viṿuye linili pe lihavamena muhati zyavo, vahafuma kunzi woka woka, vahataliha ve vasongo vahalandata nava pampelela. AhasyalʼuYesu weka numwantanda wʼayimiliye pahati pupo. 10Ilelo lwʼayinusilʼuYesu, pʼahamuvuzilizyʼumwantanda ahati: We mwantanda, vali kwi ve vakulonjelelaga? Atakulonzile numo ilya kukutupula? 11Uwenʼahamula ahati: Ndali numo, Mwene. PʼuYesu ahamuvuzya ahati: Pe fwane nane ntakukulonga ilya kukutupula. Valaga lelo, utavuyizyaje ukutalamalandu nohavili.

Uluhozyo lwa nsi

12PʼuYesu ahavuyizyʼukuyanga navo ahati: Nene ne luhozyo lwa nsi. Uno wengʼakundandatʼine, wʼatalijenda mushisi ndali, aliva nuluhozyo lwa vulanzi. 13PʼavaFalisayi vahamuvuzya vahati: Yenya, ukuyihomeshezya wenewe weka, uluhomeshezyo lwaho lute lwa nalyoli. 14AhamulʼuYesu ahavavuzya ahati: Pope nashenga nkuyihomeshezya nene neka, pope pʼuluhomeshezyo lwane lwa nalyoli, shʼimanyilʼine nakwe mfumile nakwe nkuvala, imwe nyene mutamanyile nakwe mfumile nakwe nkuvala. 15Imwe mukulonga pe mukumwenyelezya mumuvili munzʼumuntu. Ine nyene ntakumulonga numo. 16Pope nashenga nkulonga gamʼine, pope pʼuvulonzi vwane vwa nalyoli, she nte nene neka ndali, tuli swenti nane nuTata wʼantumilʼine. 17She mwope namunkomelezyo zyinyu mwe lisimṿilwe ilya kuti: Uluhomeshezyo lwa vantu vavili lwe lwa nalyoli. 18Nane ne nkuyihomeshezya nene, nuTata wʼantumilʼine wope akunkomeshezya. 19Pe vahamuvuzya vahati: Ali kwi uSo? AhamulʼuYesu ahati: Nane mutamanyile, nuTata mutamumanyile. Inga mumanyilʼine, pe nkandi mumumanyile nuTata. 20Agenʼamazwi ganaga ahayangaga pavutajilo uvwa kutajila mumwo iṿwa kusangulizanya, lwʼakusambilizya mwa tempeli. Ahasova numo uwa kumulema avene, shʼashili pahavalilizyo nakwe.

Insoshe kuzya lunanjiho lwe lukwinza

21AhavuyizyʼuYesu ukuvavuzya ahati: Ine nkuvala, imwe mulinanzaga, mulifwanga mumalandu ginyu. Kwe nkuvalʼine, kwe mutalivalʼukufiha kukwʼimwe. 22PʼavaYuda vahavuzilizanya vahati: Ingavanga akuyigoga weka shʼakuti: Kwe nkuvalʼine, kwe mutalivalʼukufiha kukwʼimwe. 23Uwenʼahati: Imwe mufumile pansʼipa, nkandʼine mfumile kumwanya. Imwe mufumile munsʼino, nkandʼine ntafumile munsʼino. 24Mwe munumu mbavuzizye ntili mulifwanga mumalandu ginyu. Shʼinga mutakunitiha ine izya kuti: Nkwe nene, pe mulifwanga mumalandu ginyu. 25Pe vahamuvuzya vahati: We nanu lelʼiwe? UwenʼuYesu ahavamula ahati: Ne wuyo we mbavuzizye shima ntili ne shitʼulive. 26Ine ndi nazyʼinyinji nizya kuvayanga imwe nizya kuvalonga. Nkandʼuno wʼantumilʼine we wa nalyoli, nane zye niṿuye kuli wuyo, zye nkuyivuzyʼinsi. 27Avene vatahamanyinsanya ukuti akutaha we Yise. 28PʼuYesu ahavavuzya ahati: Inga lumo inga mwinzilʼukumuvusyʼuMwanamuntu pe mulimanyinsanya izya kuti: Nkwe nene, havili ukuti zyonti zye nkuvomba ine ntakuvomba nazimo nene neka ndali, nkandi zizyo zyengʼambuzizyʼuTata zye nkuyanga zizyʼine. 29Uwenʼuno wʼantumilʼine we ndi nawo ine. Uwene atakundeha nene neka ndali, shʼine shima nkuvomba zizyo zye zikumuyanana wuyo. 30Ilelo lwʼakuyanga zinizi pe vahamwitiha avinji.

Ukudalinkana navaYuda

31PʼuYesu ahavavuzyaʼavaYuda ve vamwitisile ahati: Inga mukusyelemetela mumazwi gane, pe mukuva mwe vasundikwa vane nalyoli; 32pe mulimanyinsanya uvwanalyoli, ilelo pʼuvwenʼuvwanalyoli vulivatavuzya. 33Avene vahamwamula vahati: Swe mbeyu ya Abulahamu iswe, tutakonzile nalumo kumuntu numo uwa kuva swe vazya vakwe. Ilelo ukuyanga vuli ilya kuti: Muliva mwe vatavushe? 34PʼuYesu ahavavuzya ahati: Nalyoli lyoli nkuvavuzyʼine nkuti: Vonti venga vakutalʼamalandu, ve vazya va vutalamalandu. 35Uwenʼumuzya atakuva munyumba shima ndali, nkandi uwenʼumwana wʼakuvanga shima. 36Apene lelo ingʼakuvasatula we Mwana, pe mwe vasatushe nalyoli. 37Imanyile nane ukuti mwe mbeyu ya Abulahamu imwe, nkandi mukwanzʼukungogʼine, shʼamazwi gane gatakuvahola. 38Nkuyanga zizyo zye nkwenya kwa Tata, namwe mukuvomba zizyo zye mwiṿuye kwa so imwe. 39Avene vahamula vahamuvuzya vahati: Iswe utata we Abulahamu. UwenʼuYesu ahati: Mupele mwe vana va Abulahamu, nkandi mukuvomba zizyo zyʼahavombaga uAbulahamu. 40Shinishi imwe mukwanza ukungogʼine ne muntu wʼavavuzizye izya nalyoli, zye niṿuye kwa Mulungu. Zye atahavombaga uAbulahamu. 41Imwe mukuvomba zye mbombo zya so imwe. Pʼavene vahamuvuzya vahati: Iswe tute swe vana va mwisole. Tuli nuTata woka mwene wʼuMulungu. 42AhamulʼuYesu ahati: Apele ali wʼuso imwe uMulungu pe nkandi munkunzite nane, shʼine mfumile kwa Mulungu lwe ninzile munsi munumu, ntayitumile neka lwe ninzile ndali, antumile wuyo. 43Mutakumanyinsanya shonu injango yane? Shʼizwi lyane lye nkuyanga mupositwe ukutejelezya. 44Imwe mwe vana va so, va mukwakwa, mwe mumwo mukasimʼukuvomba zizyo zyʼapapiye uso imwe. Uwene mugogavantu shima, ukufuma pavwando, uwene atakwimilila muvwanalyoli, shʼuvwanalyoli navumo mumwakwe. Uwene lwʼakuyanga izyʼilenga, pʼakuyangʼizyakwe, shʼali mulumilenga, ali wʼuyise wʼilenga. 45Ine nyene mutakunitiha imwe, she nkuyanga zye zya nalyoli. 46Kulʼimwe ali kwi woka uwa kumenelezya gamo amalandu ine? Apene lelo inga nkuyanga zye zya nalyoli, pe mutakunitiha shonu? 47Uno wengʼafumile kwa Mulungu, wʼakwiṿwʼamazwi ga Mulungu. Mwe mumwo mutakwiṿwʼimwe, she mutafumile kwa Mulungu.

48Pe vahamulʼavaYuda vahamuvuzya vahati: Amwe tutakulovosya lelo lwe tukuti: We muSamaliya, lwe tukuti: Uli nimpepʼimbivi iwe? 49AhamulʼuYesu ahati: Ine impepʼimbivi nte nayo ndali, ine nkumushindiha uwenʼuTata, nkandʼimwe mukunsufwʼine. 50Ine nyene ntakuyanzilʼulushindiho lwane nene neka ndali, nkandʼalipo wʼakunanzila, wʼakulonga. 51Nalyoli lyoli nkuvavuzyʼine nkuti: Uno wengʼizwi lyane akulisajila, wʼuvufwe atalivulola nalumo. 52PʼavaYuda vahati: Shinishi uloleshe ukuti uli nimpepʼimbivi. ShʼuAbulahamu afuye navakuvwi vovulo, havilʼiwe ukuti: Uno we izwi lyane akulisajila, wʼatalitoma nalumo uvufwe. 53Ingavanga we mupiti nakwa tata Abulahamu wʼafuye? Vope navakuvwi vafuye. Ukuyipimbiliha mwe mushonu iwe? 54AhamulʼuYesu ahati: Inga nkuyishindiha neka ine, pe nkandi ulushindiho lwane lute lushindiho ulwene. AlipʼuTata, wʼakunchindiha uwene, wuyo namwe mukuti we Mulungu winyu. 55Imwe nyene mutamumanyile nalumʼuwene, nkandʼine imumanyile. Inga nati ntinji ntamumanyile, pe ne mulumilenga fwe mwenemwe. Nkandʼimumanyile, nizwi lyakwe ndisajiye. 56UwenʼuAbulahamu uso imwe ahadova lwʼayiṿuye ukuti aliyenyʼisiku lyane. Ilelo ahalyenya, pʼahaseshela. 57PʼavaYuda vahamuvuzya vahati: Utamazilʼamaha amashumi gasano, havili ukuti imuwenyi uAbulahamu? 58UwenʼuYesu ahavavuzya ahati: Nalyoli lyoli nkuvavuzyʼine nkuti: Lwʼashili ukupapwa Abulahamu, pe nalipʼine. 59Pe vahasevʼamavwe vahati tumutinze. UwenʼuYesu ahavelenguha ahafuma mwa tempeli.

Currently Selected:

Yohani 8: NYi1965

Highlight

Copy