Yohani 6

Ukulisya avantu 5,000

1-15: Mat. 14,13-21. 15,32-38. Mal. 6,32-44. 8,1-10. Luk. 9,10-17.

1Pisinda pazinizi pʼuYesu ahavuha, ahajenda kwisyila lila lya sumbi wa mu-Galilayi, wa ku-Tibeliya. 2Pe vahamulandatʼavantʼimpugʼimpiti, she vawenyi iṿimanyilo ṿwʼahapelaga pavavinu. 3UwenʼuYesu ahazuva pigamba, pʼahatendama navasundikwa vakwe. 4Uwenʼuchaka wa vaYuda we vakuti uPasa, wʼapalamiye. 5UYesu lwʼatinzite nenye kukwʼaminso, pʼahaga avantʼavinjʼimpugʼimpiti vakwinza pʼali. PʼahamuvuzyʼuFilipu ahati: Amakati ga kulya vontʼavantu vanava amwe tukale kwi? 6Zizyo nyene zyʼahayanga zyalʼizya kumulinga, shʼuwene azimanyile zyʼakwʼavombaje. 7UwenʼuFilipu ahamwamula ahati: Amakati ga pamadinali 200 gatakukwila, gakuvasovela gope, nashenga vakuposhela hansi, unʼahakwe, unʼahakwe. 8Pʼahamuvuzya wokʼumusundikwa wakwe, uAndeleya umuzuna wa Simoni Peteli, ahati: 9Halipo panapa ahalumendo hoka halesite namakati ga ngana gasano ninswi zivili. Ṿwe ṿihole lelo avantu nuvwinji ṿiniṿi? 10UYesu ahati: Simuvavuzyʼavantu vatendame pansi. Ilyenʼisole lyalʼilyinji pupo. Pe vahatendama pansi. Uvwinji vali fwe ngati 5,000, ukuvavazyʼavanaṿuli vwelele. 11PʼuYesu ahasendʼamakati ganaga, ahasalifwa, ahavagavanya vuvo ve vatendime. Zyope ninswi vovulo, ahavapa mwe vasungwilwe. 12Ilelo lwe vikusi, pʼahavavuzyʼavasundikwa vakwe ahati: Muvunganishʼutulagala twe vatulesile, natumo tutatajishe. 13Pʼavene vahavunganiha utulagala twa makati ga ngana gasano gugo, twe valeshe vuvo ve valiye, vahizuzyʼiṿiseje ishumi naṿivili.

14Avenʼavantu lelo lwe vawenyi ishimanyilo isho, shyʼapezilʼuYesu, pe vahati: Wuyo nalyoli we mukuvwi we vatili ukwinza munsʼumu.

UYesu akuyeleleha nukujenda paminzi pamwanya

16-21: Mat. 14,22-33. Mal. 6,45-52.

15UwenʼuYesu lelo lwʼayazile vakuti tumuleme, tumutemwe, ave wʼumwene witu, pʼahashimbilila pigamba nohavili, pʼahayeleleha uwene. 16Avenʼavasundikwa vakwe vahagʼuvusiku vwila, pe vahiha ukuvala kwa sumbi. 17Vahayipashila mwivoti, vahati tulambʼusumbi, tuvale mu-Kapelinahumu. Ilelo shope nishisi shihavagwila, uwenʼuYesu nyene lwʼatavinziye suti. 18Uwenʼusumbi nyene ahahalambana, shʼinkungu yihakulʼimpiti. 19Ilelo lwe valinzile vapezile imayili zitatu ingavanga zine, pe vahaga uYesu akuhanya akujenda pasumbi, vahaga asyaye pansi ukufiha kwivoti lyavo. Pe vahatetema. 20Uwene nyene ahavavuzya ahati: Nkwe nene, mutatetemaje. 21Ilelo lwe vakuti tumusende mwivoti, pe vahaganduha ivoti lifisile luvilo luvilo kunsi kwe vahavalaga.

Avantu vakwanzʼishimanyilo

22Shandavi lelo pʼavantu impuga yonti ve vimiliye pisyila lila pasumbi vahenya ukuti litalipo nalimʼivoti ilyamwavo, havili ukuti uwenʼuYesu atayipashiye navasundikwa vakwe mwivoti, nkandi vali vekʼavasundikwa vakwe lwe vakuvuha. 23Agamwavʼamavoti gahafuma mu-Tibeliya, gahinza papipi pala pe vamaliyʼumukati lwʼuMwene asalifizye. 24Avantu lelo impuga yonti, lwe vazile vatalipo pupo nuYesu navasundikwa vakwe, pe vahayipashila vuvo mumavoti, vahalambʼukuvala mu-Kapelinahumu, vahamwanzʼuYesu. 25Ilelo lwe vavazile vamwaga isyila lila, pe vahamuvuzilizya vahati: Labi, ipa uyinzile shali?

Umukati umupelavulanzi

26UwenʼuYesu ahavamula ahati: Nalyoli lyoli nkuvavuzyʼine nkuti: She mukunanzʼine pe mutakunanzila zizyo zye muwenyi ivimanyilo ndali, nkandi zizyo zye muliyʼamakati, mwikusi. 27Mwe, zye ndali ukuyikungula kuṿintu ṿwe ṿikutega, nkandi kuṿintu ṿwe ṿikusyala nakuvulanzi vwa shimashima, vwʼuMwanamuntu akuti mbapanje. Uwene we wuyo wʼuYise, uMulungu, amuvisile ukuva shimanyilo sha kumwitishila. 28Avene vahamuvuzilizya vahati: Tutuvuli lelo ukuyikungula kumbombo zya Mulungu? 29AhamulʼuYesu ahavavuzya ahati: Iyenʼimbombo ya Mulungu ye ya kumwitiha wuyo wʼamutumilʼuwene. 30Pʼavene vahamuvuzya vahati: Ukupelʼishimanyilo vuli iwe, ukuti twenye, ukuti twitishile mumwʼiswe? Ukuvombʼishonu? 31Avatata iswe she vahalyangʼumana mulwugwa, inza she lilyo lisimvilwe lye likuti: Ahavapʼiṿwa kulya ukufuma kumwanya, ukuti valye. 32PʼuYesu ahavavuzya ahati: Nalyoli lyoli nkuvavuzyʼine nkuti: Ate wʼuMose wʼavapiye iṿwa kulya ṿwa kumwanya yila, we wʼuTata ine wʼakuvapʼiṿwa kulya ṿwa kumwanya iṿwa nalyoli. 33Shʼiṿwenʼiṿwa kulya ṿwa Mulungu ṿwe ṿiṿwo ṿwe ṿifumile kumwanya, ṿwe ṿikuyipʼuvulanzi insi. 34Pʼavene vahati: Mwene, ṿwʼutupanje shima iṿwa kulya ṿiniṿi. 35PʼuYesu ahavavuzya ahati: Nene ne ṿwa kulya ṿipelavulanzi nenene. Uno wengʼakwinza kukwane, wʼitalimulumʼinzala, uno wengʼanitisilʼine, wʼataliyumilwa nalumo.

36Ilyene lilyo lye navavuzizye natili: Ukunenya kwe mumbwenyi, nkandi mutitisile. 37Vonti vuvo vengʼakumpʼuTata, ve vakwinza kukwane. Havili uno wengʼakwinza kukwane, we nane ntalimubunchilizya kunzi nalumo. 38She nisile mfumile kumwanya, nkandi ntinzile ukuvomba zizyo zye nkasime nenene ndali, ninzilʼukuvomba zizyo zyʼakasime wuyo wʼantumile. 39Uwene wʼantumilʼine, zyʼakasime ukuti vonti vʼampiyʼuwene mwe vavaliye ukuti ntamulejelezyaje numo ndali, nkandʼukuti mbazyusye vonti pisiku lya pampelela ine. 40ShʼuwenʼuTata zyʼakasimʼukuti vonti ve vakumwenyʼuMwana, ve vakumwitiha wuyo, ukuti vavwajʼuvulanzi vwa shimashima. Ilelo pe nane ndivazyusya pisiku lya pampelela. 41Pe vahasyonganʼavaYuda shʼatili: Nene ne ṿwa kulya ṿwe ṿifumile kumwanya. 42Avene vahati: Amwe ate wʼuYesu umwana-Yosefu wununo, tutavamanyile nunyina nuyise? Havili akuti vuli nisile mfumile kumwanya? 43AhamulʼuYesu ahavavuzya ahati: Mutasyonganaje mwe. 44Numʼatakwinza kukwane, ingʼatakumukwesela kukwanʼuTata wʼantumilʼine, ilelo we ndimuzyusyʼine pisiku lya pampelela. 45Vope navakuvwi vasimṿile vatili: Vonti valiva vasambilizilwa, vʼavasambilizizyʼuMulungu. Vonti vuvo venga vakwiṿwa kwa Tata, vuvo ve vakumanya kukwakwʼinongwa, ve vakwinza kukwane. 46Havili pe mutatinji umuntʼumo amuwenyʼuTata, nkandi uwene wʼafumile kwa Mulungu, wuyo nyene wʼamuwenyʼuTata. 47Nalyoli lyoli nkuvavuzyʼine nkuti: Uno wʼali nulwitiho, wʼali navwʼuvulanzi vwa shimashima.

48Nene ne ṿwa kulya iṿipelavulanzi nenene. 49Avasʼimwe vahalyangʼumana mulwugwa, havili vahafwa. 50Iṿwene ṿwa kulya ṿwe ṿifumile kumwanya, ṿwengʼumuntʼaliye pʼatakufwa. 51Nene ne ṿwa kulya ṿwa vulanzi ṿwe ṿifumile kumwanya. Umuntʼuno wengʼaliye iṿwa kulya ṿiniṿi, wʼalilandila shima. Iṿwenʼiṿwa kulya ṿwe ndivapʼine we muvili wane, we ndivapa ukuti ayipelajʼukuvʼuvulanzi vwa nsi.

52Pe vahadalinkanʼavaYuda vahati: Angatupa vuli lelo umuvili wakwe umuntʼuno, ukuti tulye? 53UwenʼuYesu ahavavuzya ahati: Nalyoli lyoli nkuvavuzyʼine nkuti: Inga mutakulyʼumuvili wa Mwanamuntu, inga mutakungʼwelʼamavanda gakwe, she pe vwe vulanzi mute navwo muhati mumwinyu. 54Uno wengʼakulya umuvili wane, wengʼakungʼwela namavanda gane, wuyo nyene wʼali nuvulanzi vwa shimashima, nane ndimuzyusya pisiku lya pampelela. 55Shʼumuvili wane ṿwe ṿintu ṿwa nalyoli iṿwa kulya, namavanda gane ṿwe ṿintu ṿwa nalyoli iṿwa kungʼwela. 56Uno wengʼakulya umuvili wane, wengʼakungʼwela namavanda gane, wʼakuva mumwanʼine, we nane nkuva mumwakwe wuyo. 57Inza she mulanzʼuTata wʼantumilʼine, she nane nkulandila pe pazya Tata, shʼakuhonzya wope nawuyo wengʼakundyʼine, wʼakulandila pe pazyane. 58Vwe ṿwa kulya ṿiniṿi ṿwe ṿifumile kumwanya, iṿwene ṿite fwe wʼumana ndali, we vahalyʼavaso, havili vahafwa; iṿwene wengʼakulya wʼakulandila shima. 59Zyʼahavavuzya musinagogi lwʼakuvasambilizya mu-Kapelinahumu.

Avasundikwa va maganigani

60Vamo nyene avasundikwa vakwʼavinji lwe viṿuye zinizi pe vahati: Ligomʼizwʼili lyʼakuyanga, lyʼunanʼatinji atejelezyaje? 61UwenʼuYesu shʼamanyile muhati mumwakwe avasundikwa vakwe vakukwinkwina pazinizi zyʼayanzile, pʼahavavuzilizya ahati: Amwe zivapunuzizye zinizi? 62Vuli lelo, inga mukwagʼuMwanamuntu akuzuva, akuvala kukwo kwʼali lulwo? 63We wʼuMupepo wʼakumupʼuvulanzi umuntu, uwenʼumuvili wʼatakumupa naṿimʼumuntu. Amazwi ge mbavuzizyʼine, we wʼuMupepo, vwe vulanzi gugo. 64She valipo vamo mwe muvaliye imwe ve vatali nulwitiho. ShʼuYesu avamanyile nzila pe pavwando ve vakusita nukwitiha, wope nuwa kumwandila ulwa pisinda ukuti we wushitʼulive. 65Havili ahati: Zye zizyo mbavuzizye ntili: Numo atakwinza kukwane ingʼatamupiyʼuTata ukwinza.

UPeteli akwitihʼukuti uYesu wuChilisiti

66Zye zizyo vamʼavinji avasundikwa vakwe vahandʼukwepa kukwakwe, vahasitʼukujenda nawo. 67PʼuYesu ahavavuzilizya avishumi navavili ahati: Amwe namwe mukasimʼukwepa? 68Pʼahamwamula uSimoni Peteli ahati: Mwene, twepe tuvale kwa nanu? Shʼamazwʼiga gakutupʼuvulanzi vwa shimashima gʼuli nago wenewe. 69Shʼiswe tuli nulwitiho, tumanyinsinye ukuti we Mufinjile wa Mulungu wenewe. 70AhavamulʼuYesu ahati: Lwe mbasavuye nene amwe ntasavuyʼishumi navavili? Havili woka we wʼuSetano. 71AhamutahagʼuYuda umwana-Simoni wa mu-Kalyoti. She wʼali wa kumwandila pisinda, ali woka wa vishumi navavili.

Currently Selected:

Yohani 6: NYi1965

Highlight

Copy