Luka 23

Yiisu nha kulu a Pilato

(Mataayi 27.1-2,11-14; Malako 15.1-5; Yowani 18.28-38)

1Batemini boosi itwaari na babiti Yiisu nha kulu a Pilato. 2Bo babaandii ufuundu nde, baleeli: «Bisi dibaasi muutu wu mu utsindi baata ba tsi a bisi paa badwaanisa litumu la tsi: nde li mu ulii bo ufutu limaanda kwaa Kayisari, na nde li mu uleele mu inde makulu ti nde ni Kristo, mutini.» 3Pilato afuuli nde: «We ni mutini a Bayuudayo?» Nde avutili kwaa nde: «Ni we leeli buu.» 4Pilato aleeli kwaa banguu ba bangaanga ba Nziaambi na kwa koongi: «Me amoni toono ya uholo kesili mu muutu wu pe.» 5Ka bo bahanini na baleeli: «Nziisili a nde yili mu utsindi baata mu udwaanisa litumu la tsi, umata mu Ngalili, mu nde abaandii, mu Yuuda yoosi, natee nhaa na nha.»

Yiisu nha kulu a Erode

6Bu Pilato ayuyi maa, afuuli mbii ti muutu wu ni musi Ngalili. 7Bu nde ayaabi ti Yiisu amati mu itinini kia tsi kia litumu la Erode, nde atsindii Yiisu kwaa Erode wali ka mu Yeruselemi mu biluumbu bii. 8Bu Erode amoni Yiisu, nde ali na kinyi yalaa. Umata belepe ka nde ali na nzala umono nde, mu ndaa ma nde ayuyi baleeli mu nde, na nde ali na ilimbisi mu umono nde asa imaanga. 9Nde afuuli nde manduru malaa, ka Yiisu a avutili nde pe. 10Banguu ba bangaanga ba Nziaambi na bayiisi ba mikele bali nhaa, na bafutili nde mandaa mu iteesi kia mifuri. 11Ka Erode ka, na masodaare ma nde, bamutsori; na bu bamani usiebe nde na ulwaatisi nde ikutu kia tala, nde abwivutulu Yiisu kwaa Pilato. 12Pilato na Erode bali mitaata, bavuutili imbaayi mu kiina iluumbu kii.

Kesili a likwa la Yiisu

(Mataayi 27.15-26; Malako 15.6-15; Yowani 18.39—19.16)

13Pilato akukii banguu ba bangaanga ba Nziaambi, bakuutu na baata boosi, 14na aleeli kwaa bo: «Beni dibeyi me muutu wu mu ndaa ti nde li mu utsindi baata mu udwaanisa ipfumu kia tsi. Ka me fuuli nde nha kulu a beni, na me amoni toono yimbi mu nde pe yi beni dili mu ufuundu nde. 15Erode ka a asolili toono yimbi mu nde pe, ka nde vutili bisi nde. Ni mu buu, a uli na ndaa yi nde asa pe yafwaana mu likwa. [ 16Me sa tumu bafiinzi nde bikoti, na nha mbisi me sa namunyaala.» 17Mu pasi mukuungi a Paaka, Pilato ali na ipfu kia upalisa bo kori mosi uli mu perese.] 18Ka bo boosi baloyi mu itwaari: «Dusu muutu wu, na nyaala bisi Barabase.» 19Barnaba ali baloosi mu perese mundaa bu punga-pungu bali mu ngaanda na mu ndaa ti nde adusi muutu. 20Bu Pilato ali na nzala a unyaala Yiisu, nde abwileele bo ndaa yiina yii. 21Ka bo baloyi: «Komo nde nha kuruwa! Komo nde nha kuruwa!» 22Nde aleeli kwa bo mu mbala la mutata: «Ki ndaa yimbi nde ayiluu? Me amoni toono mu nde pe yafwaana mu likwa. Ni mu buu me sa nyaala nde, nha mbisi a utumu ti bafiinzi nde bikoti.» 23Ka bo bahanini mu uloo mu mifuri, ba loombi: «Wamukomo nha kuruwa!» Na miloo mia bo mia biingi. 24Pilato aholi kesili mu ukuusu litoono la bo. 25Nde anyaali wu bo baloombi wali mu perese mu ndaa ikiindi na ndusili; ka nde ayeelili bo Yiisu paa bayiluu mu nde pasi mi bo batoono.

Yiisu bamukomi

(Mataayi 27.32-44; Malako 15.21-32; Yowani 19.17-27)

26Bu bo babiti nde, bo baholi Simooni musi Kirene, wakimata ku matsie, na bo bamukwiyi kuruwa paa nde abiti yo nha mbisi a Yiisu. 27Koongi yinene ya baata yaduki nde, na Bakaasa bakilili na unioongo mu nde. 28Yiisu asieetii kwaa bo na aleeli: «Bakaasa ba Yeruselemi, a dilili mu me pe; ka dilili mu benime na mu baana ba beni. 29Ka biluumbu biyiri bi bakaa leele: “Kinyi kwaa Bakaasa ba bikumbu, kinyi kwaa mioonyo miahele ubutu, na mabeene mahele unywiisi!” 30Ka sa babaleele kwa milaanda miminene: “Dibwa nha yulu a bisi”, na kwaa milaanda mimikee: “Diswee bisi!” 31Ka mbii basiiri buu kwaa muti wu mubisi, buni bukaaba kwaa muti wa kaya?» 32Babeyi mu taanga dii, biwulu bioolo bikimi, mu udusu bio na Yiisu. 33Bu batoori nha mbuu yi bu baa ta «Iteenge kia mutswe», bo bakomi nde nhaa, na biwulu bio bia bioolo. Mosi nha koo kia babaala na wu mumosi nha koo kia bakaasa. 34Yiisu aleeli: «Taata, sa bo kolokolo, ka aba yaba pe mi bali mu uyiluu.» Bo bati nzeke mu ukaba bikutu bia nde. 35Baata batemini nhaa na bakitala. Ka bakuutu bakisa nde saa, baleeli: «Nde avuusu bakimi; nyaala avuu ndeme akulu, mbii ti nde Kristo, wu Nziaambi asoolo!» 36Masodaare ka masi nde saa, bo baswesii na bahi nde viinyi la nhanyi. 37Na baleeli: «so we ni mutini a Bayuudayo, vuusu nyutu a we!» 38Nha yulu a mutswe a nde, mwali na bisonii bi: «Wuunawu ni mutini a Bayuudayo.» 39Mosi mu biwulu bi bakomi nha kuruwa atuuyi Yiisu wamuleeli: «We a ni Kristo pe? Vuu mu iweme na vuusu bisi ka!» 40Ka wu mu mosi asieembi mbaayi na wamuleeli: «We a ubaabata Nziaambi boomo pe? Bunu weli kutso tsieembili moosi na nde. 41Kwaa we na me, tsieembili a bisi yasuungunu, ni mubuu dili mu ufutu ma mabi ma diayiluu, ka wuunawu a ayiluu ndaa so mosi yimbi pe.» 42Na nde abwileele: «Yiisu libili me moonyi mu taanga di we kaayira mu ipfumu kia we.» 43Yiisu avutili kwaa nde: «Ngwanya, me ni leele kwaa we lolo li: we saba na me ku paradiso.»

Likwa la Yiisu

(Mataayi 27.45-56; Malako 15.33-41; Yowani 19.28-30)

44Taanga dia nzanga bu diali ka bebele, pimisi diabwi mu tsi yoosi natee mu nguungu ya mutata nha mbisi a nzanga. 45Nyanga bu yali keni yasweeme, ngumbu ya Nzo a Nziaambi yakakii nha kati a kati. 46Yiisu aloyi mu ndaa yi inene, aleeli: «Taata, nha mioo mia we me nzieelili muwuumu a me.» Bu aleeli buu, asieeli muwuumu. 47Mukuutu a masodaare bu amoni moosi mayilimi, akiinzi Nziaambi, aleeli: «Ngwanya! Wuunawu beeri muutu wa libweeye.» 48Baata boosi ba bakukini mu umono mandaa maa, bu bamoni mayilimi, bavutii na bakiyene a kubulu mapfuuku mu minyoongo. 49Banduu ba Yiisu na Bakaasa bakiduku nde umata ku Ngalili, batemini nha lilala, mu utalila makilabu.

Yiisu basuusi mu ngila

(Mataayi 27.57-61; Malako 15.42-47; Yowani 19.38-42)

50Mwali muutu mosi mu pfuundu a bakuutu ba banzioonzi ba Bayuudayo, kuumbu a nde Yoosefi, muutu wu mubwe na wa libweeye, 51nde a asiingi pe kesilili na biyiluu bia bambaayi. Nde ni musi Arimataya, ngaanda a Bayuudayo, na nde akikebe Ipfumu kia Nziaambi. 52Nde ayeni kwaa Pilato, na aloombi nyutu a Yiisu. 53Nde asutili yo nha kuruwa, adii yo tsaanda a liino, na asuusi yo mu ngili yi basootolo mu manya, mwali keni a badii muutu pe. 54Ali iluumbu kia uyilimi mu saba, na hoolo yasiaali ti saba yibaanduu. 55Bakaasa ba baduki Yiisu, umata ku Ngalili, bayeni na Yoosefi, bo bamoni ngila a Yiisu na mbii bu basuusi nyutu a nde. 56Na bo bavutii, mu uyiluu mananaasa na maari, tumake mu iluumbu kia saba, bo bawuumi mbii bwali mikele.

Currently Selected:

Luka 23: iyxYAK

Highlight

Copy