HRƆMU 4

Abrahamu wí nyɛ lɛŋɛ

1Pa wo nyaʔa yo wò tokpɔ Abrahamu wi kala na le? Wi dá nyaʔa ta? 2Nàʔa po Nyɛʔɛlɛ li dá Abrahamu co we hɛnsinŋi wi kahranʔa kee na, wi dá bì gban bì da wì kpɔʔɔ. Di wòo gban bì wì kpɔʔɔ Nyɛʔɛlɛ li yɛʔɛ̀ na ge. 3Mɛjɛn Nyɛʔɛlɛ li sɛbɛ wí naʔa nyu mà yo: Abrahamu wi da bá Nyɛʔɛlɛ na le. Nyɛʔɛlɛ à li noo cun hɛnsinŋi wi pama kala na le.#4:3 ma wèle wa Hli 15:6; Gal 3:6 ni wè.

4Tungɔɔ wi în na sràʔà taʔa. Pé ín jé daʔa yeri nadanma yraʔa. Kí ma yala wí ni. 5Di Nyɛʔɛlɛ lí na kapere fɛɛ cun be hɛnsinbee. Nà hɛn wà bi bá lí na, sanni wí bi da tunŋu ko bì náa li glanʔa ge, li naa wi cun hɛnsinŋi wi pama kala na. 6Ki pomo na Nyɛʔɛlɛ lí na hɛn ŋa cun sinŋi, áʔa po wi kahranʔa fanŋa ban ge. Dafide wí na nyu ki woo wi frɛmɛ na me mà yo:

7 Frɛmɛ nyɛ bee ma

Nyɛʔɛlɛ lí ma pe kakloʔo yaʔa ge

pé kan mâ pe kapere laʔa de. # 4:7-8 ma wèle wa Ŋuʔu 32:1-2 ni wè.

8 Frɛmɛ nyɛ hɛn ŋa ma

wò fɔlɔ woò na

wi kapere cun de wi na ge.

9Hɛɛn bee pe legé ge ki frɛmɛ mí nyɛ pee nigbe ma yo? Bee pe ìn je lege ge moò nyɛ pé ma kpo yo? Mɛjɛn wó maʔa yo kɔ mà yo: «Nyɛʔɛlɛ li dá Abrahamu wi pama co me wi sinmi kala.» 10Ki woʔo ga ki dá hanri nyaʔa nyiŋi na? Abrahamu wi dá bo wi legé kɔ dee di wi dá bo wi ìn je lege kpɛn, wɔ́ɔ ki woʔo ga ta ge? Ayo, ki ìn dà bo wí ma lege kpɛn, di ki dá hanri, wɔ̀ɔ po wi ìn je lege kpɛn. 11Ki kruʔu ma wɔ̀ɔ na bâ lege. Ki legeme à mi po wí ma nɛ pa jɛnlɛ nyɛ le, la li dáa ki teri hɛɛn na be mâ yo Nyɛʔɛlɛ li dɔɔ́ co sinŋi wi pama kala na, wi ní balege. Ki pomo na me, Abrahamu wí nyɛ pè bɛfu to bee pe pá Nyɛʔɛlɛ na le mâ po pe ìn je lege, á li na pe cun hɛnsinbee ge.#4:11 ma wèle wa Hli 17:10 ni wè. 12Wɔ̀ɔ ní mà po nɛ bee pé ma lege pe to, bee poò nyɛ lafiʔimi nì dron ga na pé ma lege ge, di á pe na tanri Abrahamu wi pama kloʔó na ge, ma mi dá bo wí ma wi ní balege ge.

Abrahamu wí pa Nyɛʔɛlɛ na ma li nofele ta le

13Nyɛʔɛlɛ li dá ki nofele kon Abrahamu ma we ní wi kluʔu pii ní be mà yo drunya wí bi ba glɛn bì pee kan. Ki nofele li ìn dà gon ga na wi dá Nyɛʔɛlɛ li furu kayoro kpɔʔɔ de, di li da gón ga na Nyɛʔɛlɛ li dáa wi cun sinŋi wi pama kala na le.#4:13 ma wèle wa Hli 17:4-6; 22:16-18; Gal 3:29 ni wè.

14Nàʔa po bee pé na Nyɛʔɛlɛ li furu kayoro kpɔʔɔ de pee nigbe dá bo Nyɛʔɛlɛ li krɔʔɔ lifɛɛ, pama mi dí bì bo waʔafe, Nyɛʔɛlɛ li nofele pa li ja kpo.#4:14 ma wèle wa Gal 3:18 ni wè. 15Mɛjɛn Nyɛʔɛlɛ li furu kayoro tí na pan li nafunŋu nì. Di deʔe ga na furu kayoro toò nyɛ wa ge, ti ceme mí jé bo wa kpo.

16Ki pomo na me nofele li da gón pama kala na jango li po nadanma yraʔa, Abrahamu wi kluʔu pii pè bɛfu pé gbàn pe li ta. Lò gá bo li furu kloʔó tanʔafɛɛ pee nigbe wolo, di li po bee wolo pé na pa Nyɛʔɛlɛ na le nɛ pa Abrahamu wi dá bo na pa lí na pomo ma na ge. Wiì wi ŋa wí nyɛ wò bɛfu wò to we, 17nɛ pa Nyɛʔɛlɛ li nyoŋomo mí naʔa nyu ge mâ yo: Mí ma ma tɛnŋɛ ma po klòʔo fafaʔa to. Wí nyɛ wò to, Nyɛʔɛlɛ li yɛʔɛ̀ na ge, la na wí ma pa ge. Liì li lí na kuu nyɛni ná pe yrigi ge. À li ní na yrɛbɛ ba yrigi pi ìn dà glu bí bo naʔa fan ge.#4:17 ma wèle wa Hli 17:5 ni wè.

18Ali nàʔa ja bo honriʔi pahaʔa ìn dà bo wa ki kala na le, Abrahamu wɔ̀ɔ wi honriʔi pa ge li na mà pa Nyɛʔɛlɛ na le. Ki pomo na me wɔ̀ɔ krɛʔɛ klòʔo fafaʔa to mà yala ga nì Nyɛʔɛlɛ li dá yo wí kan ge mâ yo: Ma kluʔu pii pé bi ba bo banmɛ ge.#4:18 ma wèle wa Hli 15:5 ni wè. 19Wi dá bo na cɛn bì yɛʔɛ́ too kɔgunnu kɔ we kɔ, di wi pama mi ìn dà jɛrɛ nyiŋi ga na wi dáa honri wi wre kala na da ti dá bo nɛɛ tí ma ku kɔ ge mà plɛn Sara nì ŋa wi dá bo wòo gban bí pyɔ ta adi ge.#4:19 ma wèle wa Hli 17:17 ni wè.

20Di Abrahamu wɔ̀ɔ na pa Nyɛʔɛlɛ na le su. Wi lama mi ìn dàá wi kon syɛn syɛn Nyɛʔɛlɛ li nofele kala na le. Di wi pama mi dá fanŋa kan wí ma, wɔ̀ɔ na Nyɛʔɛlɛ sonni le. 21Wi da báʔá na ceŋge mà yo Nyɛʔɛlɛ lí nyɛ fanŋa nì, lí bi gban bì li nofele funŋu le. 22Kiì ma kan Nyɛʔɛlɛ á li Abrahamu co we hɛnsinŋi wi pama kala na le. 23Di ki ìn dà nyoŋo wiì nigbe kala na mâ yo: À li noo cun hɛnsinŋi ge. 24Ki da nyoŋó wòó kan kpo wòó bee wó ma yala bí da jun hɛnsinbee ge, wòó bee wó ma pa ŋa na wi dá wò fɔlɔ Jesu nyɛ móò yrígi kuu ni be ge. 25Nyɛʔɛlɛ li dá Jesu kan we kùʔù ma ge wò kapere ti kala na. À luu nyɛ́ mòo yrígi jango wo krɛ̀ʔɛ̀ sinbee li yɛʔɛ̀ na ge.#4:25 ma wèle wa Esa 53:4-5 ni wè.

Currently Selected:

HRƆMU 4: NLK10

Highlight

Copy