HRƆMU 3
3
1Ki kala na Juwifiyee pe ponrohaʔa ki nyɛ hanbe? Legeme mi tonro wí nyɛ nyaʔa ní? 2Ee, Juwifiyee pé ma ponro kafafaʔagaa ni pomo mì bɛfu na. Ki kplɛʔɛ na Nyɛʔɛlɛ li dá li kayoro kan de Juwifiyee pee ma. 3Nàʔa po pèè nyɛ wa pe nî pe ìn ba tí na, pa wo gban bì yo pe babama mí ma Nyɛʔɛlɛ li kanyɛmɛ ja me yo? 4Ayo dɛ. Ali hɛɛn pè bɛfu nà pe ja bo akpoflɛɛn ge, kí ma yala peʔe cɛn pe yo Nyɛʔɛlɛ lí nyɛ kanyɛmɛ fɔlɔ su. Kí nyɛ nɛ pa ga nyɛ kí nyɛ wa nyoŋoʔo mâ yo:
Nà ma da nyu pé ni
nyiŋi ga na ge,
pa ma tanʔa ta pé na.
Nà pe da kiti kon má na
nyiŋi ga na ge,
pa ma yo bì pe ja. # 3:4 ma wèle wa Ŋuʔu 51:6 ni wè.
5Nàʔa po tipeʔe ga wó na hanri kí naʔa teri wo na mà yo Nyɛʔɛlɛ lí nyɛ sinli ge, pa wo nyaʔa yo? Pa wo gban bìʔi yo bì yo Nyɛʔɛlɛ loò nyɛ sinli ga na lí na wo cɔlɔ ge yo? Mí na ki woʔo ga nyu ge hɛɛn yomo na. 6Ayo dɛ. Nàʔa po Nyɛʔɛlɛ li ìn dì bo sinli, paʔa bo mɛlɛ lí kiti kon drunya hɛɛn na be?
7Di nàʔa po na klomo mí na Nyɛʔɛlɛ kpɔʔɔ le mà na li sinmi yrigi me finmi na, nyaʔa kala na li kiti pɔɔ do mì na we nɛbo kapere hanrifɔlɔ wi? 8Nàʔa po ban ge, nyaʔa kala na hɛɛn pòo gban bí yo: «Ye pan wo da kapere hanri jango ti da kmaʔa yrigi ge?» Ali pèè nyɛ wa pé na na yele cɔʔɔ le mà yo mí naʔa nyu ban. Kiti bi do pé na nɛ pa kí ma yala ge.
Hɛn wà wò sinŋi
9Pa wo gban bì nyaʔa yo? Wòó bee wó nyɛ Juwifiyee be wó ma ponro hɛɛn pe tɔɔ na be yo? Ayo, kiì ban. Mi di glú màʔa tyɛʔɛ ye na kɔ mà yo Juwifiyee yoo, klòʔo ke tɔɔ hɛɛn yoo, pè bɛfu pé nyɛ wa teme na kapere ŋklomo ni me. 10Kí nyɛ wa nyoŋoʔo ban Nyɛʔɛlɛ li sɛbɛ ni we mà yo:
Hɛn wà wò naʔa
ŋa wí nyɛ sinŋi
Nyɛʔɛlɛ li yɛʔɛ̀ na ge
ali nigbe. # 3:10-12 ma wèle wa Ŋuru 14:1-3; 53:2-4 ni wè.
11 Kacɛnŋɛ wà wò naʔa.
Hɛn wà wò na Nyɛʔɛlɛ ca le.
12 Hɛɛn pè bɛfu pé ma laʔa
Nyɛʔɛlɛ na le.
Pè bɛ à pe plɛn
mà po kabanoyee.
Hɛn wà wò naʔa
ŋa wí na kmaʔa hanri,
ali wà nigbe.
13 Pe akpoklanʔa kí nyɛ nɛ
pa fanwyeʔe nyɛʔɛgɛ nyɛ ge.
Pé na hɛɛn fanla
pe nonɛlɛ ní le.
Kayoro da tí na nyini wa
pe noro ni de tí nyɛ nɛ pa
wɔgɔ honro nyɛ de. # 3:13 ma wèle wa Ŋuru 5:10; 140:4 ni wè.
14 Pé na hɛɛn danŋa be su
kayopere ní de. # 3:14 ma wèle wa Ŋuʔu 10:7 ni wè.
15 Pe kyɛʔɛ kí nyɛ ticaʔaga
hɛnkpoʔo na ge. # 3:15-17 ma wèle wa Esa 59:7-8 ni wè.
16 Nà pe da doro deʔe o deʔe
pe naa tipeʔe hanri
hɛɛn na mà na pe cɔlɔ.
17 Pe ìn nyimi mi kloʔò cɛn ge.
18 Poò na fyaʔa Nyɛʔɛlɛ na le fyeu. # 3:18 ma wèle wa Ŋuʔu 36:2 ni wè.
19Wó maʔa cɛn mà yo yraʔa o yraʔa ga Nyɛʔɛlɛ li furu kayoro tí na nyu ge tí naʔa nyu hɛɛn bee ma pé nyɛ li furu kayoro kloʔó ni ge, jango nyinihaʔa wò gá bo hɛn wà ma, Nyɛʔɛlɛ li kiti wi to drunya wì bɛfu na. 20Mɛjɛn Nyɛʔɛlɛ li ìn bi hɛn wà co sinŋi li yɛʔɛ̀ na ge, ali nòo ja ga hanri li furu kayoro tí na nyu ge. Li furu kayoro ti tunŋu yugu kí ga: Jango bìʔi tyɛʔɛ hɛɛn na be peʔe cɛn pe yo pé nyɛ kapere hanrifɛɛ.#3:20 ma wèle wa Ŋuʔu 143:2; Gal 2:16 ni wè.
Nyɛʔɛlɛ lí na hɛn syo we pomo ma na ge
21Di ŋaŋa ni ge Nyɛʔɛlɛ lí maʔa tyɛʔɛ wo na lí na wo cun sinbee pomo ma na ge. Nyɛʔɛlɛ li furu kayoro tòo gban bì ki woʔo ga hanri ge. Di li furu kayoro ní leyookplɛɛ ní pee naʔa nyu. 22Nyɛʔɛlɛ lí na hɛɛn cun be sinbee pe pama fanŋa ni Jesu Krisi na we. Lí naʔa hanri pè bɛfu kan bee pe pá Krisi na we. Li ìn wà ponro wà na. 23Hɛɛn pè bɛ pé ma kapeʔe hanri. Ga Nyɛʔɛlɛ li honrí pé kan, pe ìn gban bì noʔo na. 24Di Nyɛʔɛlɛ lí nyɛ kmala. À li na pe cun sinbee nadanma na Jesu Krisi fanŋa ni, ŋa wí na pe syo ge. 25Nyɛʔɛlɛ li dɔɔ́ fara sraʔá, jango wi kùʔù kɔsɔ na wi po kapere ti yaʔafɔlɔ hɛɛn bee kan pe pá wí na ge. Ki pomo na me Nyɛʔɛlɛ li dá jori bì li sinmi tyɛʔɛ me hɛɛn na be. 26Fanfan ni ge hɛɛn pe dá bo kapere ni, di Nyɛʔɛlɛ li dá lagunmu co. Li ìn pe cɔlɔ. Di ŋaŋa ni ge lí naʔa teri hɛɛn na be lí na pe cun sinbee pomo ma na ge. Mɛjɛn lí nyɛ sinli. Hɛɛn bee pe pá Jesu na we à li na pe cun sinbee.
27Tanʔa nyɛ hɛɛn ma be nɛ pe gbàn pe da pè kpɔʔɔ yo? Ayo, kà nigbe wò wa. Nyaʔa kala na? Ga pé na Nyɛʔɛlɛ li furu kayoro kpɔʔɔ de kiì gi yo? Ayo dɛ. Ga pé ma pa Krisi na we kiì gi. 28Mɛjɛn wó naʔa honri mà yo hɛn wí na pin sinŋi Nyɛʔɛlɛ li yɛʔɛ̀ na ge wi pama kala na dron. Kí ín jé jɛ ga na wí na Nyɛʔɛlɛ li furu kayoro kpɔʔɔ de. 29Ná kiì ban Nyɛʔɛlɛ lí nyɛ Juwifiyee pee nigbe wolo yo? Loò nyɛ klòʔo ke tɔɔ hɛɛn pe Nyɛʔɛlɛ kpo yo? Kayocɛnŋɛ na, lí nyɛ klòʔo ke tɔɔ hɛɛn pe Nyɛʔɛlɛ. 30Nyɛʔɛlɛ pa lí nyɛ nigbe pomo ma na, lí bi da Juwifiyee cun be sinbee bì yala pe pama ní me bì nì bì da klòʔo ke tɔɔ hɛɛn cun be sinbee pe pama kala na kpo.#3:30 ma wèle wa Lado 6:4; Gal 3:20 ni wè.
31Paʔa gban bì bo wó ma Nyɛʔɛlɛ li furu kayoro ja de pama miì kala na yo? Ayo dɛ. Wó na ti fanŋa kanʔa ge ti ma.
Currently Selected:
HRƆMU 3: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
