YouVersion Logo
Search Icon

HRƆMU 2

2
Nyɛʔɛlɛ li kiti tomo
1Mo ŋa má na kiti kon hɛɛn pe tɔɔ na be, tanʔa wò nyɛ má ma. Mɛjɛn, nàʔa po má na pe tɔɔ sa be ga na, áʔa po má na ki tege hanri ge, paʔa bo má na mà sa mà yɛ.#2:1 ma wèle wa Mat 7:1; Luk 6:37 ni wè. 2Wó maʔa cɛn mà yo Nyɛʔɛlɛ lí na kiti kon mà yala kanyɛmɛ nì bee na pé na ki kaʔa ke nyoʔo hanri ge. 3Mo ŋa má na kiti kon hɛɛn bee na pé na ki kaʔa gee hanri ge, áʔa po má na ki kategee hanri ge, má naʔa honri mà yo mo má bi ba syɔ Nyɛʔɛlɛ li kiti ma we yo? 4Dee di má na Nyɛʔɛlɛ li nyugara nì, ní li lagmama faʔara me ní li lagunmu ní me. Mɛ ìn ki cɛn bì yo Nyɛʔɛlɛ li lagmama mí bi gban bì ma kân ma kruʔu wa ma kapere ma de yo? 5Di pa má nyɛ naguglonʔo fɔlɔ ge, kiì ma kan á ma na kà hari wa ma cɔlɔʔɔ na ge fɔ bì yà no wa wlɛʔɛ ga na Nyɛʔɛlɛ li nafunŋu kí bi ba do hɛɛn na be, pa liʔi tyɛʔɛ pé na peʔe cɛn li kiti wí nyɛ sinŋi. 6Ki wlɛʔɛ na lí bi ba hɛɛn pè bɛfu nigbe nigbe sari bì yala pe kahranʔa ní ge.#2:6 ma wèle wa Ŋuʔu 62:13; Yom 24:12 ni wè.
7Pèè nyɛ wa pé ma ko na kasingee hanri naʔa ca bì kpangbanma ta me ní sonmo nì, ní wre da nì toò na fonri ge. Nyɛʔɛlɛ lí bi ba nyuwyeʔe bajegɔ kan pé ma. 8Pèè nyɛ wa nɛ pé na can pe yɛsinmi miì nì mà na ceʔe ga ma kí nyɛ sinŋi ge na pa kakloʔo kee na. Nyɛʔɛlɛ li kiti ní li nafunŋu nì pa pi ba do pé na. 9Cɔlɔʔɔ ní yɛgbanʔa nì pí bi ba do hɛɛn pè bɛfu na bee pé na tipeʔe hanri ge: Juwifiyee yoo, klòʔo ke tɔɔ hɛɛn yoo. 10Di Nyɛʔɛlɛ lí bi ba kpangbanma ní sonmo nì, ní nyimi kan hɛɛn pè bɛfu ma bee pé na kakmaʔa hanri ge: Juwifiyee yoo, klòʔo ke tɔɔ hɛɛn yoo. 11Mɛjɛn Nyɛʔɛlɛ loò na hɛn wà ponro wà na.#2:11 ma wèle wa Lado 10:17 ni wè.
12Hɛɛn bee pé na kapere hanri mâ po pe ìn Nyɛʔɛlɛ li furu kayoro cɛn de, pé bi ba gu Nyɛʔɛlɛ li furu kayoro fun. Di hɛɛn bee pé na kapere hanri mâ po pé ma Nyɛʔɛlɛ li furu kayoro cɛn de, kiti wí bi ba gon pé na bì yala Nyɛʔɛlɛ li furu kayoro ní de. 13Mɛjɛn hɛɛn bee pé na Nyɛʔɛlɛ glanʔa le pee ban pé na pè kpɔʔɔ ga na pé na Nyɛʔɛlɛ li furu nuru de ge, di bee pé na ga kpɔʔɔ tí na nyu ge. 14Nyɛʔɛlɛ li furu kayoro toò nyɛ klòʔo ke tɔɔ hɛɛn ma be. Di nyiŋi o nyiŋi ga pé na ga kpɔʔɔ tí ma yo ge pee pa pe grɛʔɛ ki furu kayoro tiì tapolo pee pè ma, ali nàʔa ja bo Nyɛʔɛlɛ li furu kayoro toò nyɛ pé ma ge. 15Ki pomo na me pé naʔa teri hɛɛn na mà yo ga Nyɛʔɛlɛ li kayoro tí na nyu mâ yo kí da hanri ge, kí nyɛ wa nyoŋoʔo pe dihon ni we. Pe honriʔi àʔa na kayotege nyu. Nyiŋi kà na kí na ákpolo kanʔa pé ma. Nyiŋi kà na àʔa na tanʔa kanʔa pé ma nɛ. 16Kí bi ba hanri ban wlɛʔɛ ga na Nyɛʔɛlɛ lí bi ba kiti kon hɛɛn pe kahranʔala kè bɛfu na. Paʔa ba hanri Jesu Krisi wiì fanŋa ni bì yala kayotanʔa nì ga mí na nyu ge.
Juwifiyee ní Nyɛʔɛlɛ furu kayoro ní
17Di mo we má na mà yeri Juwifiyee woo mà ma honriʔi pa ge Nyɛʔɛlɛ li furu kayoro na de. À ma na mà kpɔʔɔ mà yo Nyɛʔɛlɛ li klɛ́n mà mo kan. 18Má ma Nyɛʔɛlɛ li nadanma cɛn me. Mɛjɛn Nyɛʔɛlɛ li furu kayoro tí ma ma ploʔo pomo ma na má bi gban bí ga cɛn kí nyɛ kmaʔa ge. 19Má ma paʔa na mà yo má nyɛ nɛ pa fyoon pe kloʔò cɛʔɛfɔlɔ nyɛ we mà nì mà po nɛ pa kpɛnmɛ nyɛ bee kan pé nyɛ wa yeblimi ni me. 20À ma yo má nyɛ letɔɔlɔ pe cligifɔlɔ mà po pii pe krɛʔɛfɔlɔ, mɛjɛn Nyɛʔɛlɛ li furu sɛbɛ ŋa wí nyɛ má ma ge, kacɛngmama nì kanyɛmɛ mì bɛfu ní mí nyɛ wa wi nî. 21Ɛɛn di, mo ŋa má na hɛɛn pe tɔɔ krɛʔɛ be, nyaʔa ma po moò na mà krɛʔɛ ge? Mo ŋa má na Nyɛʔɛlɛ kayoro jari de mâ yo pò gáa yu ge, nyaʔa ma po má na yu ge? 22Mo ŋa má naʔa nyu mâ yo ki ìn yala hɛn wí da cɛkpere hanri de, nyaʔa ma kan mo á ma na ti hanri ge? Mo ŋa asunmu pí na ma bɛnʔɛ ge, nyaʔa ma kan á ma na pi go yrɛbɛ yu be? 23Má na mà kpɔʔɔ ga na Nyɛʔɛlɛ li furu kayoro tí nyɛ má ma ge. Di nyaʔa ma kan á ma na Nyɛʔɛlɛ faʔara le ná ceʔe li furu kayoro ma de? 24Mɛjɛn kí nyɛ wa nyoŋoʔo Nyɛʔɛlɛ li kayoro sɛbɛ ni we mà yo: Yèé Juwifiyee be yèé kala li lí ma kan klòʔo ke tɔɔ hɛɛn á pe na Nyɛʔɛlɛ li yele cɔʔɔ le.#2:24 ma wèle wa Esa 52:5 ni wè.
25Nà ma da Nyɛʔɛlɛ li furu kayoro kpɔʔɔ de, legeme pa mi bo má ma tonro nì, di nà mɛ ìn da ti kpɔʔɔ ge, paʔa bo nɛɛ pe ìn dà ma lege. 26Hɛn ŋa wí ìn lege ge, nòo da Nyɛʔɛlɛ li furu kayoro kpɔʔɔ de, mɛ ìn ki cɛn bì yo Nyɛʔɛlɛ pa li da ki woo cun we nɛ pa hɛn ŋa nyɛ wí ma lege ge yo? 27Hɛn ŋa wí ìn lege wre ti namyɛlɛ na le, di wɔ́ɔ na Nyɛʔɛlɛ li furu kayoro kpɔʔɔ de, ki woo pɔɔ ba kiti kon mo ŋa na moò na ti kpɔʔɔ ge, ali nàʔa ja bo Nyɛʔɛlɛ li furu sɛbɛ wí nyɛ má ma, á ma lege ge. 28Mɛjɛn ŋa wí nyɛ Juwifi hɛɛn yɛʔɛ́ na dron ge, Juwificɛnŋɛ ban. Kiì tege gi legeme ma mí hanri wre na dron ge, legejɛnmɛ ban. 29Di ŋa wí nyɛ Juwifi wa wi lama ni me ki woo wí nyɛ Juwificɛnŋɛ. Wɔ̀ɔ po wí ma lege wa wi dihon ni we Nyɛʔɛlɛ li Nyìli liì fanŋa ni. Nyɛʔɛlɛ li furu sɛbɛ fanŋa ban. Ki hɛn ŋa wi sonmo mí ín jé dá jrɛʔɛ hɛɛn ma, di mi naa jrɛʔɛ Nyɛʔɛlɛ liì ma.#2:29 ma wèle wa Lado 30:6 ni wè.

Currently Selected:

HRƆMU 2: NLK10

Highlight

Share

Copy

None

Want to have your highlights saved across all your devices? Sign up or sign in