HRƆMU 1

Syeriʔi

1Mì Pɔli ŋa mí nyɛ Jesu Krisi wi tungɔɔ we, mí na yè bɛfu syeri yèé bee yé nyɛ wa Hrɔmu kàʔà ni ge. Nyɛʔɛlɛ lí ma na tɛnŋɛ bì bo li pitunŋu nɛ pa lí ma na fara bí da li kayotanʔa jari ge.

2Ki kayotanʔa kiì gi ga Nyɛʔɛlɛ li da glú mâ ki nofele kon wa li nyoŋomo kayokmara ni li leyoo pe noro na de. 3Ki kayotanʔa kí na nyu Nyɛʔɛlɛ li Pyɔ kala na. Pe dɔɔ́ he wa Dafide kluʔu ni wre namyɛlɛ na le. 4Di Nyɛʔɛlɛ à luu nyɛ mòo yrígi kuu ni be màʔa tyɛʔɛ hɛɛn na be fangbɔʔɔ ní mà yo wí nyɛ li Pyɔ Nyɛʔɛlɛ li Nyìli li namyɛlɛ na le. Wiì wi ŋa wí nyɛ wò fɔlɔ Jesu Krisi we. 5Wiì fanŋa ni Nyɛʔɛlɛ lí ma kmaʔa hanri na na mà na tɛnŋɛ bì bo li pitunŋu wi kala na le, jango, wa klòʔo kè bɛfu ni, hɛɛn pèè bi bá wí na pe dɔɔ kpɔʔɔ. 6Yèé bee yé nyɛ wa Hrɔmu kàʔà ni ge yèé fanna yé nyɛ wa ki hɛɛn ni be, bee Nyɛʔɛlɛ lí ma fara mâ yo pe po Jesu Krisi wi woolo ge.

7Mí na yè bɛfu syeri, yèé bee yé nyɛ wa Hrɔmu kàʔà ni ge. Yé na Nyɛʔɛlɛ glanʔa le. À li ye fara mà yo ye po li wotaala. Wò To Nyɛʔɛlɛ ní wò fɔlɔ Jesu Krisi nì pe frɛmɛ ní nyimi kan ye ma.

Hrɔmu kàʔà sɛrifɛɛ pe laa kí ma Pɔli co we

8Ki kplɛʔɛ na mí na Nyɛʔɛlɛ syeri le Jesu Krisi wi yele na yè bɛfu kala na, mɛjɛn yé ma pa Jesu na we pomo ma na kí na jari drunya wì bɛfu ni. 9Nyɛʔɛlɛ lí maʔa cɛn mà yo ga mí na nyu ge kayocɛnŋɛ gi. Liì li la mí na li tunŋu ko ge na dihon wì bɛfu ní mâ na kayotanʔa jari ga kí na nyu li Pyɔ na we. À liʔi cɛn mà yo mí na honri yè kala na le su, 10nyiŋi o nyiŋi ga na mí na Nyɛʔɛlɛ nyɛri le. Mí na li nyɛri jango nàʔa po lí biʔi ta ŋaŋa ni ge ga na mí ma han mâ mo ge, li kloʔò nyɛʔɛ ge na kân jango bì gɛrí wa yè krugu. 11Mɛjɛn yè laa kí ma na co. À mi cori bì yà nyiŋi kà kɔ wa ye nì jango bì Nyɛʔɛlɛ li Nyìli akanʔa kà kan ye ma, ga kí bi gban bí fanŋa kan ye ma ge. 12Kiì nigbe ban di wó bi fanŋa kan wò ma teme na. Mí ma pa Jesu na pomo ma na, nà ye gaʔa cɛn, pa ye fanŋa ta. Yé ma pa Jesu na pomo ma na, nà mi gaʔa cɛn, pa mi fanŋa ta kpo.

13Na woolo, mí ma cori yeʔe cɛn ye yo nyifafaʔa na mi da glú naʔa ca bì gɛri wa yè krugu jango bì yà na tunŋu ki tonro wà ta wa ye ni nɛ pa mí noo taʔa wa kpo klòʔo gee ni Juwifiyee ban ge. Di mi ìn gban bìʔi hanri fɔ mà bâ no alaʔa na.#1:13 ma wèle wa Pit 19:21 ni wè.

14Kí ma yala bì da sye hɛɛn pè bɛfu krugu. Bee pé nyɛ wa kàpleʔe ni ge yoo, bee pé nyɛ wa kàkpɔ̀rɔ́ ni de yoo, sɛbɛ cɛnfɛɛ yoo, sɛbɛ bajɛnyee yoo, pe fwɔʔɔ nyɛ ná na. 15Kiì ma kan ki laa áʔa ná co gbanʔa ceŋge bi yá kayotanʔa yo ge wa ye ma kpo, yèé bee yé nyɛ wa Hrɔmu kàʔà ni ge.

Kayotanʔa ki fanŋa

16Ho na fɛrɛ taʔa kayotanʔa ki yomo na me, mɛjɛn ki fanŋa kiì gi Nyɛʔɛlɛ lí na hɛɛn pè bɛfu syo bee pé na paʔa na ge. Kplɛɛlɛ pee bɛ Juwifiyee be. Ki kruʔu ma àʔa na bâ no klòʔo ke tɔɔ hɛɛn na be.#1:16 ma wèle wa Mar 8:38 ni wè. 17Ki kayotanʔa kiì gi kí naʔa teri wo na mâ yo Nyɛʔɛlɛ lí na hɛɛn cun be sinbee li yɛʔɛ̀ na pe pama fanŋa ní ge. Kí nyɛ nɛ pa ga nyɛ wa nyoŋoʔo Nyɛʔɛlɛ li sɛbɛ ni we mâ yo: Nyɛʔɛlɛ lí na hɛn ŋa cun hɛnsinŋi li yɛʔɛ̀ na wi pama kala na le, pɔɔ nyuwye ta.#1:17 ma wèle wa Abak 2:4 ni wè.

Hɛɛn pe kapeʔe hranma

18Nyɛʔɛlɛ lí naʔa teri wo na wa namuru ni de pomo ma na li nafunŋu kí na tanri hɛɛn bee na poò na Nyɛʔɛlɛ fyaʔa le, á pe na kapere tì bɛfu hanri ge. Pee bɛ pé na kapere hanri mâ na kanyɛmɛ tonni me. 19Nyɛʔɛlɛ lí naʔa hanri ban, mɛjɛn ga hɛɛn pé bi gban bi jɛ́n Nyɛʔɛlɛ li namyɛlɛ na le kí ma tyɛʔɛ pé na. Nyɛʔɛlɛ liì tapolo maʔa tyɛʔɛ pé na. 20Mà kpe Nyɛʔɛlɛ li dá drunya hanri we, hɛɛn pé maʔa cɛn kmaʔa mà yo li fanŋa koò na ko. À peʔe cɛn kpo mà yo lí nyɛ Nyɛʔɛcɛnlɛ. Hɛɛn poò na ki pomo nyaʔa me, di pé na mi cɛnni yrɛbɛ ba na li dá hanri ge. Ki kala na, tanʔa wò nyɛ pé ma.

21Pé ma Nyɛʔɛlɛ cɛn le, di pe ìn ki ta bì da li kpɔʔɔ bì yo lí nyɛ Nyɛʔɛlɛ. Pe ìn ki ta bì da li syeri. Di pe honriʔi àʔa krɛʔɛ yugu fun. Pe ticlimi fun lama à mi krɛʔɛ yeblimi.#1:21 maʔa tonli Efɛ 4:17-18 ni wè.

22Pé na pè yeri ticlibee, di pé nyɛ letɔɔlɔ. 23Sanni pé bi da Nyɛʔɛlɛ kpɔʔɔ le, la loò na kun ge, à pe na yrɛbɛ ba kpɔʔɔ pí ma hɛn lɛ́ we, ŋa wí na kun ge, ní kajɛnʔɛ ní ge, ní cyeʔe ticɛɛjɛɛ ajobo ní, ní ba nì pí na flolo ge.#1:23 ma wèle wa Lado 4:16-18 ni wè. 24Kiì gi kí ma kan Nyɛʔɛlɛ á li pé yaʔa pé da tipere tyɛnʔɛ kè bɛfu hanri bí yala ke laa ga nì kí na pe cun ge, pe nì pe da fɛrɛ fun kaʔa hanri pè ní pe wre ní de. 25Pee bɛ pé na ceʔe kanyɛmɛ ma ma mí na nyu Nyɛʔɛlɛ na le na ákpolo kpin mi nolo ni le. Yrɛbɛ ba Nyɛʔɛlɛ li dá hanri ge pé na piì kpɔʔɔ na tunŋu ko pí kan mà toro pi hanrifɔlɔ na we. Wiì wi ŋa wí ma yala hɛɛn pé dɔɔ sonni nyiŋi kì bɛfu na. Ki po ban.

26Ki kala na Nyɛʔɛlɛ lí ma pe yaʔa fɛrɛ fun kaʔa ke laa ki da pe cùn. Ali pe cɛɛ poò naʔa taʔa nabii pe da syɛ̀n pé ni adi, di pee à pe na syɛn pè ní, ga ki ìn yala kí da hanri ge. 27Ki podeme miì na, nabii poò na syɛn cɛɛ ní be adi. Pe nabinyɛɛ pe laa kí na pe cun gbanʔa ceŋge. À pe na fɛrɛ fun kaʔa hanri pè ní fɔ mà na cɔlɔʔɔ ga taʔa kí ma yala pee tapoboo pe kapere nì de.

28Pa pe ìn ki ta bì da honri Nyɛʔɛlɛ na le, Nyɛʔɛlɛ à li pé yaʔa wa pe fɛrɛ funmu kaʔa honriʔi ki fanŋa ni ge, pe da kaʔa gee hanri ki ìn yala pé hanri ge. 29Pé na kakloʔo kè bɛfu hanri mà plɛn tipere ní de. Pé nyɛ fungbɔʔɔ nì, tihromo ní, ní yejaʔa nì. Pé na hɛɛn kpun be mà na mlara kmo de na hɛɛn fanla be. Pé nyɛ honribere nì mà po yonɛʔɛŋɛ fɛɛ. 30Pé na hɛɛn yegee cɔʔɔ mà Nyɛʔɛlɛ cɛ le mà na hɛɛn teri be, di pé na pè kpɔʔɔ mà plɛn pe kayoro ní de. À pe na pomo mà ca bì da kapefonro hanri. Poò na pe hefɛɛ kpɔʔɔ be. 31Poò na honri. Poò na pe nofegee funŋu ge. Hɛɛn poò na pe glanʔa. Poò na nyugara taʔa hɛn na. 32Pé ma ga cɛn Nyɛʔɛlɛ li dá yo ge mâ yo hɛɛn bee pé na ki kaʔa ke nyoʔo hanri ge pé ma yala kùʔù nì ge. Di kiì nì kì bɛfu ní pé na ke hanri su. Ali hɛɛn bee pé na ki kaʔa hanri ge pé na pe glanʔa.

Currently Selected:

HRƆMU 1: NLK10

Highlight

Copy