JAN 5

Jesu wí ma lemloʔoŋo pwɔʔɔ

1Ki kruʔu ma, Jesu wɔ̀ɔ kɛri wa Jerusalɛmu kàʔà ni ge. Mɛjɛn Juwifiyee pe dáa srɛʔɛ fɛti wà hanri wa. 2Kotɛʔɛ kà dà bo wa Jerusalɛmu kàʔà ni ge mbara goyɛʔɛ tanla, à pe naʔa yeri Bɛtisata Ebruyee hɛnrɛ ni de. Gopleʔe kɔgunnu dà bo be ki kotɛʔɛ tanla ge. 3Yabaa fafaʔabaa dá bo na syɛn wa ki gopleʔe ni ge. Pèè dá bo fyoon mà plɛn cyeʔe yafɛɛ ní be, ní lemloʔomoo ní be. [À pe na nyumu mi kpoʔoromo hanni me. 4Mɛjɛn Nyɛʔɛlɛ mlɛŋɛ wà dà bo na jrɛʔɛ wa namuru ni de mà báa ki nyumu kpoʔoro me nyiŋi kà na. Nyumu nà mi ga gboʔoro nyiŋi ga na, yajɛnlɛ la fɔlɔ bi glù bì je wa mi nî ge, wi yara ti na laʔá wí na.] 5Naŋa wà dà bo wa, yara tà dà do wí na. Wɔ̀ɔ ta yɛʔɛ fonɛrɛ mà kɛ kɛ̂ mà kɛ natanri. 6Jesu wi gaâ wi nya syɛnhaʔa ge, wɔ̀ɔ ki cɛn mà yo wi yara tí ma mo wí na. Wɔ̀ɔ wi yugu mà yo: «Má cori bì bwɔʔɔ yo?» 7Yaŋa wɔ̀ɔ wí po: «Na fɔlɔ, hɛn wò nyɛ ná na ŋa wí bi na kpe bi ná le wa kotɛʔɛ ni, nyiŋi ga na nyumu mí bi da gboʔoro ge. Mɛjɛn sanni mí bi flolo bì no waʔa na ge, wà na po wi di jé waʔa nî kɔ na yɛʔɛ̀.» 8Jesu wɔ̀ɔ wí po: «Jɛ̀, ma ma fruʔu kpe ge, maa danrí, maa sye.» 9Ki nyidege na, naŋa wɔ̀ɔ taʔa mà pwɔʔɔ mà wi fruʔu kpe ge na tanri na sye. Ɛɛn di, ki wlɛʔɛ ki dá bo Juwifiyee pe fyonriwlɛʔɛ. 10Ki kala na, Juwifiyee pe lagwɔɔ pe dá naŋa po we: «Alaʔa wí nyɛ fyonriwlɛʔɛ gi. Di mo à ma ma asyɛnʔɛ kpe ge mà na nyariʔi ni, ga ki ìn yala kí da hanri fyonriwlɛʔɛ na ge.»#5:10 ma wèle wa Neʔe 13:19; Jer 17:21 ni wè. 11Wɔ̀ɔ pé po: «Ŋa wí ma na pwɔʔɔ ge wiì wi wí yo bìʔi kpe bì da danri ge.» 12À poo yugu mà yo: «Han wi wí yo ma asyɛnʔɛ kpe ge, ma da danrí ge?» 13Di ŋa wi dá bwɔʔɔ, wi ìn Jesu cɛn we. Mɛjɛn pe dá bo fafaʔabaa ki deʔe na ge. Jesu fanna, wɔ̀ɔ jɛ be ticaʔaga.

14Ki kruʔu ma, Jesu wɔ̀ɔ gaâ wi nya wa Nyɛʔɛlɛ li sràʔá go ni ge, wɔ̀ɔ wí po: «Wele, má ma pwɔʔɔ kɔ. Mò gáa kapere hanri adi, jango yraʔa ga kí nyɛ tipeʔe mâ toro ga na ge, kò gá ba ma ta.» 15Ki naŋa wɔ̀ɔ kɛri mà yáʔà yo Juwifiyee kan be mà yo: Jesu wi wi dɔɔ́ pwɔʔɔ ge. 16Ki kala na, Juwifiyee pe lagwɔɔ pe dáa Jesu teʔe we, mɛjɛn wi dáa ki kaʔa hanri ge pe fyonriwlɛʔɛ na. 17Jesu wɔ̀ɔ pé po: «Na To wí na hɛɛn hari be fɔ ma bâ no alaʔa na ge. Mì fanna, kí ma yala bì da pe hari kpo.»

18Ki kayoʔo ki kala na, Juwifiyee pe lagwɔɔ à pe noo ca gbanʔa ceŋge bùu kpo, mɛjɛn wi ìn dà fyonriwlɛʔɛ kiì cɔʔɔ dron, di wi dá yo Nyɛʔɛlɛ lí nyɛ wi To taʔa mà na wì hanri teme na Nyɛʔɛlɛ ní le.

Nyɛʔɛlɛ Pyɔ wi fanŋa

19Jesu wɔ̀ɔ pé po: «Kanyɛmɛ na, Pyɔ wòo gban bì yraʔa kà hanri wì yɛ. Pɔɔ gban bì ga hanri dron wí nya wi To ma we, mɛjɛn yraʔa o yraʔa ga wi To wí na hanri wiì wí na ki woʔo hanri ge kpo. 20Mɛjɛn Pyɔ wí na wi To glanʔa we. To wɔ̀ɔ na kaʔa kè bɛfu teri wí na, gee wiì wí na hanri ge. Kaʔa gee ké ma kpondo mâ toro gee na ge, wí bi da ke teri wi Pyɔ na we, jango ki ye fo. 21To wí na kuu nyɛni na pe yrigi mà na nyuwyeʔe kanʔa pé ma pomo ma na ge, wi Pyɔ wí na nyuwyeʔe kanʔa wi nadanma woo ma be kpo. 22To fanna, woò na kiti kon hɛn wà na. Di wí ma kiti konmo mì bɛfu yaʔa wi Pyɔ wi kyɛrɛ̀ ni de, 23jango hɛɛn pè bɛfu pe da Pyɔ kpɔʔɔ we, nɛ pa pé na To kpɔʔɔ we. Nà hɛn ŋa ìn da Pyɔ kpɔʔɔ we, paʔa bo ki woo woò na To kpɔʔɔ we kpo, ŋa wí ma Pyɔ tun we.

24Mí biʔi yo ye ma kanyɛmɛ na, hɛn ŋa wí bi da na kayoro nuru de bì ba Nyɛʔɛlɛ na la lí ma na tun ge, nyuwyeʔe bajegɔ nyɛ wí ma. Kiti wòo ba do ki hɛn ŋa na we, di wí ma syɔ kùʔù ma ge kɔ mà nyuwyeʔe ta ge. 25Mí biʔi yo ye ma nɛ kanyɛmɛ na bì yo, nyiŋi kà na pan wa ali kí nyiŋi kí ma no kɔ, ga na kuu pé bi Nyɛʔɛlɛ Pyɔ wi àkpolo loʔo le. Bee pé bi li loʔo ge, ki woo pa pe nyuwyeʔe ta. 26Pa To wí nyɛ nyuwyeʔe ki kanfɔlɔ we, wí maʔa kân Pyɔ ma wi po nyuwyeʔe kanfɔlɔ kpo. 27Wɔ̀ɔ ní mà fanŋa kan wí ma jango wi da kiti kon we, mɛjɛn wí nyɛ Hɛn Pyɔ. 28Ki woʔo ga kò gá ye fo, kí ga: Nyiŋi kà na pan wa, nàʔa gá ba no ge, bee pè bɛfu pé nyɛ wa fanra ni de, pa pe wi àkpolo loʔo le, 29bì nyíni wa ti nî. Bee pé nyɛ kmaʔa hanrifɛɛ be, pé bi ba nyɛ bì nyíni jango bì nyuwyeʔe ta. Bee pé nyɛ kapere hanrifɛɛ be, pé bi ba nyɛ bì nyíni jango kiti wi to pé na.#5:29 ma wèle wa Dan 12:2 ni wè.

Jesu wi nyɛ Sye wì bɛfu fɔlɔ

30Mí ín jé gban bì yraʔa kà hanri na fandaʔa ni. Mí na kiti kon na yala ga nì mí na nuru Nyɛʔɛlɛ ma le. Ki pomo na me, na kiti wí nyɛ sinŋi, mɛjɛn mi ìn jori bì da na nadanma hanri, fɔ ŋa wí ma na tun, mí ma cori bì da wiì nadanma hanri. 31Nà mi da nyu domi na kala na le, na kayoʔo kòo bo fanŋa nì. 32Di wà na na kayoʔo nyu ge. À miʔi cɛn mà yo ga wí na nyu ge kí nyɛ fanŋa nì. 33Ye dá hɛɛn pèè tun Jan ma we. Wɔ̀ɔ bâ kanyɛmɛ yo ye ma. 34Do mi mi ìn jori hɛn wà bí na kayoʔo yo ge. Di mí ma ki woʔo yo ge ye kan jango ye gbàn, ye syɔ. 35Jan wi dá bo nɛ pa lamba nyɛ ŋa wí na nyi ná kpɛnmɛ tun me. À yeʔe ta nyiŋi cɛnri na mà po lafiʔigbɔmo nì wi kpɛnmɛ kala na le. 36Di kayoʔo kà nyɛ mì ma we ga kí ma kpɔʔɔ mâ toro Jan wi woʔo na ge. Ki kayoʔo kiì gi ga kaʔa gee ní To wí ma kan ná ma, mâ yo bì ke hanri ke kɔ ge. Ee, kaʔa gee mí na hanri ge ké na nyu na kala na le, jango hɛɛn peʔe cɛn pe yo To wiì ma na tun. 37To ŋa wí ma na tun ge, wiì fanna, wí na na kayoʔo nyu ge. Ye ìn je glu bì wi àkpolo loʔo le nyiŋi kà na. Ye ìn wi pomo cɛn me.#5:37 ma wèle wa Mat 3:57; Mar 1:11; Luk 3:22 ni wè. 38Wi kayoro toò na klɛnhaʔa taʔa wa yè lama ni me. Mɛjɛn ŋa Nyɛʔɛlɛ lí ma tun ge, yoò na pa wí na. 39Yé na Nyɛʔɛlɛ li kayoro ploʔo de kmaʔa ceŋge, mɛjɛn yé naʔa honri mà yo ti fanŋa ni yé bi ba nyuwyeʔe bajegɔ ta we. Àʔa hín bo tiì di tí na na kayoʔo nyu ge. 40Di kiì nì kì bɛfu ní, ye ìn ki ta bì da ban nà krugu, jango ye gbàn, ye nyuwyecɛnŋɛ ta ge.

41Mi ìn jori hɛɛn bí da na kpɔʔɔ. 42Di mí ma ye cɛn kmaʔa mà yo Nyɛʔɛlɛ loò na ye glanʔa wa yè dihonyee na be fyeu. 43Mì mí ma pan na To wi yele na. Di ye ìn baʔa ta bì ba ná na. Nàʔa po wà dì ban wi yetala na ge, paʔa bo ye diʔí ta mà pa wí na kɔ. 44Yé naʔa taʔa na yè kpɔʔɔ àʔa hín bo kpɔʔɔmo ma mí na jrɛʔɛ wa Nyɛʔɛlɛ la ma lí nyɛ nigbe ge, yoò na mi ca. Nàʔa po ban, paʔa bo mɛlɛ ye gbàn, ye pa ná na ge? 45Yò gáa ki honri bì yo mí bi yà kiti kon ye na To wi yɛʔɛ̀ na ge. Mowisi ŋa na yé ma yè honriʔi pa ge, wiì wi wí bi yà kiti kon ye na ge. 46Nàʔa po ye da bá Mowisi na we, ye dí bì ba domi na we kpo, mɛjɛn wi dá na kayoʔo nyoŋo ge. 47Di pa ye ìn ba wi sɛbɛ kayoro na de, yé biʔi po mɛlɛ bi ba na kayoro na de?»

Currently Selected:

JAN 5: NLK10

Highlight

Copy