JAN 4
4
Jesu wí ma yo Samari klo woo cɔ wà nì
1 Farisiyee pe daʔa loʔó mà yo Jesu wí ma ploʔofɛɛ fafaʔa ta mà pe batise, à pe nyɛʔɛ mà toro Jan wi woo na be. 2Ɛɛn di, wiì tapolo ban wi dáa hɛɛn batise ge. Wi ploʔofɛɛ bɛ pe dáa ki hanri ge. 3Jesu wi gâ ki woʔo ga loʔo nyiŋi ga na, wɔ̀ɔ jɛ wa Jude klo ni mà hru na sye wa Galile klo ni le. 4Ki dá yala wi Samari klo pari le, wi li kon, jango wi no wa Galile klo na le.
5Wɔ̀ɔ yâ no wa Samari klo kàʔà kà na, pé naʔa yeri Sikari. Ki kàʔà kí nyɛ wa kere da tanla Jakɔbe wi dá gan wi pyɔ Josɛfu ma we.#4:5 ma wèle wa Hli 33:19; Jos 24:32 ni wè.
6Jakɔbe wi kɔ̀lɔ́ wi dá bo wa kpo. Jesu pɔɔ da gâ danʔa mâ te ge, wɔ̀ɔ yâ glɛn be ki kɔ̀lɔ́ tanla we. Ki dá bo yaagbanʔa na.
7À Samari klo woo cɔ wà mà pan jango bì ba go. Jesu wɔ̀ɔ bɔ́ɔ̀ po: «Nyumu mà kan ná ma bì jɔ.» 8Mɛjɛn wi ploʔofɛɛ pe dá bo pe kɛrí wa kàʔà ni ge jango bì yà akaʔa kà syɔ. 9Samari klo woo cɔ wɔ̀ɔ wí po: «Mo má nyɛ Juwifiyee naŋa mì mí nyɛ Samari klo woo cɔ. Nyaʔa ma kan á ma na nyujɔmo nyɛri ná ma ge?» Mɛjɛn Juwifiyee ní, Samari klo woo ní poò na yala.#4:9 ma wèle wa Ɛsid 4:1-5; Neʔe 3:33-34 ni wè.
10Jesu wɔ̀ɔ wí po: «Nàʔa po mo ma dí Nyɛʔɛlɛ li akanʔa cɛn ge ní ŋa nì wí yo ma nyumu kan ná ma bi jɔ ge, ma dí bì gban bùu nyɛri kpo nyumu mà nì, ma mí na nyuwyeʔe kanʔa ge. Wi dí bi gban bì mi kân má ma.» 11Cɛlɛ wɔ̀ɔ wí po: «Kundiʔi, kɔ̀lɔ́ ŋa wí nyɛ ticuʔuŋu. Kɔ̀lɔ́ akoʔo wò nyɛ má ma. Pa ma ki nyumu ta me hanbe ma mí na nyuwyeʔe kanʔa ge? 12Wò tokpɔ Jakɔbe wi dá ki kɔ̀lɔ́ ŋa kan we wo ma. Wii nì, wi pii ní, ní wi ajobo nì pe dáa ki nyumu ma jo me. Má yo má ma kpɔʔɔ mà toro wiì na we yo?»
13Jesu wɔ̀ɔ wí po: «Hɛn o hɛn ŋa wí na ki nyumu ma jo me, nyujɔʔɔ pa kuu co nɛ. 14Di hɛn ŋa wí bi nyumu ma jɔ mí bi gan wí ma ge, nyujɔʔɔ kòo ga ki woo co we adi fyeu. Ɛɛn di, nyumu ma mí bi gan wí ma ge, pa mi bo wa wi nî nyumu wyele la lí na nyuwyeʔe kanʔa wí ma ga kí nyɛ bajegɔ woʔo ge.» 15Cɛlɛ wɔ̀ɔ wí po: «Kundiʔi, ki nyumu mà kan ná ma jango nyujɔʔɔ kò je ga ná co adi, bì ban naʔa nɛ bì ba go.»
16Jesu wɔ̀ɔ wí po: «Ta sye, ma ya ma Pɔlɔ yeri we ye pan.» 17Cɛlɛ wɔ̀ɔ wí po: «Naŋa wò nyɛ ná ma.» Jesu wɔ̀ɔ yo: «Má ma kayocɛnŋɛ yo mâ yo naŋa wò ma ma ge. 18Mɛjɛn ma dá bo na kori nabii ma fɔ mà bâ da kɔgunnu. Ali má nyɛ ŋa ma ŋaŋa ni ge, ma pɔlɔ ban. Ma ma kayocɛnŋɛ yo.» 19Cɛlɛ wɔ̀ɔ wí po: «Kundiʔi, mí maʔa nya má nyɛ Nyɛʔɛlɛ leyoo wi má ni. 20Fanfan ni we, wò tokpɔɔ pe dáa Nyɛʔɛlɛ kpɔʔɔ le naʔa ki angogo ga kiì na. Di yèé Juwifiyee, à ye bâ yo kí ma yala hɛɛn pe da Nyɛʔɛlɛ kpɔʔɔ le wa Jerusalɛmu kàʔà kiì ni.» 21Jesu wɔ̀ɔ wí po: «Cɛlɛ, ma pà ga na mí bi yo má kan ge. Nyiŋi kà na pan wa hɛɛn pé bi baa To Nyɛʔɛlɛ kpɔʔɔ le, di kòo bo ki angogo ga kiì na, ní Jerusalɛmu kàʔà ni ge. 22Ga yé na kpɔʔɔ ye ìn ki cɛn. Di ga wòó wó na kpɔʔɔ ge, wó maʔa cɛn mɛjɛn syɔmo mí ma jɛ wa Juwifiyee ma. 23Di nyiŋi kà na pan wa, ali kí ma no kɔ, ga na hɛɛn pe báa To Nyɛʔɛlɛ kpɔʔɔ li pomo na kanyɛmɛ na Nyɛʔɛlɛ li Nyìli li fanŋa ni, mɛjɛn To Nyɛʔɛlɛ lí ma cori li kpɔʔɔfɛɛ pe da li kpɔʔɔ ki pomo ma miì na. 24Nyɛʔɛlɛ lí nyɛ nyìli. Kí ma yala hɛɛn pe da li kpɔʔɔ nɛ pa lí nyɛ kanyɛmɛ na Nyɛʔɛlɛ li Nyìli li fanŋa ni.»
25Cɛlɛ wɔ̀ɔ wí po: «Mí maʔa cɛn mà yo Nyɛʔɛlɛ li wofràa wí bi ban. Ki na po pé yo Krisi we. Nòo gá ban, pɔɔ ba kaʔa kè bɛfu tyɛʔɛ wo na.» 26Jesu wɔ̀ɔ wí po: «Mì wi Nyɛʔɛlɛ li wofràa we ŋa wí na nyu má ni ge.»
27Ki nyiŋi na, wi ploʔofɛɛ à pe taʔa mà pan kpo. Pe gá bɔ́ɔ̀ nya wí na nyu cɛlɛ nì we, àʔa pé fo. Di kiì nì ki bɛfu ní, wɛ̀ ìn ki ta bùu yugu bì yo má na nyaʔa ca ki woo ŋa ma we? Wɛ̀ ìn gban bùu yugu nɛ bì yo nyaʔa ma kan á ma na nyu ki cɔ ŋa nì we?
28Cɛlɛ wɔ̀ɔ cɔlɔ yaʔa le be kɔ̀lɔ́ tanla we mà kɛri kàʔà ni mà yáʔà yo hɛɛn ma be mà yo: 29«Ye pan, ye ba naŋa wà wele ná kan. Kaʔa kè bɛfu gee mi dá hanri ge, wí ma kè bɛfu cɛn mà ke yo ná kan. Kana wí nyɛ Nyɛʔɛlɛ li wofràa wi yo?» 30À pe nyini wa kàʔà ni mà kɛri Jesu krugu we.
31Ki nyiŋi na, wi ploʔofɛɛ à pe noo fɛn mà yo: «Krɛʔɛfɔlɔ, kí ma yala ma ba lì ban.» 32Wɔ̀ɔ pé po: «Hro tà nyɛ ná ma, da yèé ye ìn je jɛn kpɛn ge.» 33Wi ploʔofɛɛ à pe naʔa nyu pè ma mà yo: «Paʔa bo hɛn wà ma bâ hro tà kan wí ma dee?»
34Jesu wɔ̀ɔ pé po: «Bì dá na tunfɔlɔ wi nadanma hanri bì nì bì da tunŋu ga funŋu wi dá gan ná ma biʔi kɔ́ ge, ki woʔo ga kí nyɛ nɛ pa na hro nyɛ de. 35Yèé yoò naʔa nyu mà yo: ‹Kí ma ko yere ticɛrɛ akaba pi konnyiŋi ki na bo ki tyɛʔɛ ge yo?› Di ye wèlé, mí biʔi yo ye kan, ye yè yuru jrɛʔɛ de, ye kere wele de. Akaba pí ma lɛ kɔ. Pi konnyiŋi àʔa no kpo. 36Ŋa wí na akaba kon be wí na wi sràʔà taʔa ge mà na akaba kpoʔolo ba nyuwyeʔe bajegɔ wobo be, jango akaba pi falifɔlɔ nì, ní pi konfɔlɔ nì pe lama mi fiʔi nyidege na. 37Yomɛlɛ la pé na kmo ge mâ yo: ‹Wà na akaba fali. Wà na pi kon ge, lí nyɛ kayocɛnŋɛ.› 38Mí ma ye tun jango ye ya akaba kon wa kere da ni ye ìn dà fali ge. Hɛɛn pèè da ti fali. Yèé à ye bâ tonro ta wa pe tunŋu kala na le.»
39Samari klo woo fafaʔabaa da bá wí na wa ki kàʔà ni ge, mɛjɛn cɛlɛ wi daʔá yo pé ma mà yo: «Jesu wí ma na kahranʔa kè bɛfu cɛn mà ke yo ná ma.» 40Pe gaâ no wa Jesu na we, à pe noo nyɛri mà yo wi wlɛrɛ tà kɔ wa pe ní. Wɔ̀ɔ wlɛrɛ syɛn kɔ wa pe ní. 41À pèè ma pa nɛ mà nyɛʔɛ mà toro kplɛʔɛ woo na be Jesu wi kayoro fanŋa ni ge. 42À pe cɛlɛ po we: «Ki tɔ na, wo ìn ba ma kayoro fanŋa ni. Mɛjɛn wòó wò tala wó ma bâ loʔo wí ma màʔa cɛn mà yo: Wí nyɛ drunya wi Syɔfɔlɔ.»
Hɛnkpangbanŋa wà pyɔ pwɔʔɔmo
43Ki wlɛrɛ syɛn ti gâ gɔ kɔ ge, Jesu wɔ̀ɔ jɛ be ki deʔe na mà kɛri Galile klo ni. 44Mɛjɛn wiì tapolo, wi daʔá hanri màʔa yo mà yo: «Nyɛʔɛlɛ leyoo na jé tɔdanra ta wa wi klo tala ni le.»#4:44 ma wèle wa Mat 13:57; Mar 6:4; Luk 4:24 ni wè. 45Wi da gâ je wa Galile klo ni nyiŋi ga na ge, ki klo woo à pe noo cun kmaʔa ceŋge wi kaʔa gee kala na wi dá hanri wa Jerusalɛmu kàʔà ni fɛti nyiŋi na ge. Pe da ké nya, mɛjɛn pe dá bo wa kpo Juwifiyee pe Toromo srɛʔɛ fɛti na we.#4:45 ma wèle wa Jan 2:23 ni wè.
46Wɔ̀ɔ kɛri wa nɛ Kana kàʔà ni wa Galile klo ni le. Ki kàʔà kiì gi wi da yâ nyumu krɛʔɛ dufɛn ge. Klo fɔlɔ wi hɛnkpangbanŋa wà dà bo wa. Wi pyɔ wi dá bo yaŋa wa Kapɛrinamu kàʔà ni ge.#4:46 ma wèle wa Jan 2:1-11 ni wè. 47Ki naŋa wi gáʔà loʔo mâ yo Jesu wí ma jɛ wa Jude klo ni mâ pan Galile klo ni le, wɔ̀ɔ kɛri wì krugu mà yáa wi nyɛri mà yo wi kɛri wa Kapɛrinamu kàʔà ni, wi ya wi pyɔ pwɔʔɔ, ŋa wí na cɛn bì gu ge. 48Jesu wɔ̀ɔ wí po: «Nà ye ìn bo yé ma kanfonŋoo ní kakpɔʔɔ nya yòo ba ná na.» 49Ki hɛnkpangbanŋa wɔ̀ɔ yo: «Kundiʔi, ma kɛri wa, sanni na pyɔ wí bi gu ge.» 50Jesu wɔ̀ɔ wí po: «Ta sye, ma pyɔ wí ma pwɔʔɔ.» Naŋa wɔ̀ɔ pa Jesu wi kayoro na da wí yo wí kan ge, mà na sye kpo. 51Pɔɔ gáa sye, wɔ̀ɔ yâ flin wi tungɔɔ pèè ní wa kloʔò ni ge. À poo po: «Ma pyɔ wí ma pwɔʔɔ.» 52Wɔ̀ɔ pe yugu mà yo: «Wi di bonró nyaʔa nyiŋi na?» À poo po: «Ki dí bo yaaga yaagbanʔa na, wre tifumu á mi laʔa wí na ge.» 53Pyɔ wi to wɔ̀ɔ kí nya nyiŋi ga na Jesu wi dɔɔ́ po: «Ma pyɔ wí ma pwɔʔɔ ge,» ki nyidege kiì gi. Wɔ̀ɔ pa Jesu na we wi go woo pè bɛfu ní.
54Kafonlo la Jesu wi da yâ hanri syɛnwolo wa Galile klo ni nyiŋi ga na wi dá jɛ wa Jude klo ni le, liì li.
Currently Selected:
JAN 4: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
