JAN 3

Nikodɛmu wí ma kɛri Jesu krugu

1 Farisiyee naŋa wà dà bo wa à pe noo yeri Nikodɛmu. Juwifiyee pe lagwɔɔ wà wi. 2Yebliʔi kà na, wɔ̀ɔ kɛri Jesu krugu we mà yɔ́ɔ̀ po: «Krɛʔɛfɔlɔ, wó maʔa cɛn mà yo Nyɛʔɛlɛ liì li lí ma ma tun naʔa jango ma baa wo krɛʔɛ ge. Mɛjɛn hɛn wà wóo gban bì da kafonŋoo gee hanri má na hanri kí po Nyɛʔɛlɛ loò wi ní ge.» 3Jesu wɔ̀ɔ wí po: «Mí biʔi yo má ma kanyɛmɛ na, nàʔa po hɛn wi ìn he fonŋo, ki woo wòo gban bì bo Nyɛʔɛlɛ li masaʔa pyɔ.» 4Nikodɛmu wɔ̀ɔ wí po: «Hɛn ŋa wí ma lɛ kɔ ge, ki woo wí biʔi po mɛlɛ bí he nɛ ge. Kanyɛmɛ na, wòo gban bì je wa nɛ wi no lama ni poo he nɛ.» 5Jesu wɔ̀ɔ wí po: «Mí biʔi yo má ma kanyɛmɛ na, hɛn nà wi ìn he nɛ wa nyumu ní, Nyɛʔɛlɛ li Nyìli ní piì fanŋa ni, wòo gban bì je wa Nyɛʔɛlɛ li masaʔa ni ge.

6Ga kí ma he wre fanŋa ni ge, kí nyɛ wre. Ga kí ma he Nyɛʔɛlɛ li Nyìli fanŋa ni, kí nyɛ nyìli. 7Kò ga má fo ga na mí maʔa yo má ma mâ yo: ‹Kí ma yala yè bɛfu ye he fonŋo ge.› 8Tiflɛʔɛ ki hîn na funnu na sye deʔe ga na kí ma cori ge. Ma naa ki tunnumu nuru me. Di má jé ki jɛhaʔa ní, ní ki kɛrihaʔa cɛn ge. Kí nyɛ ban kpo hɛn ŋa ma wí ma he Nyɛʔɛlɛ li Nyìli fanŋa ni ge.»

9Nikodɛmu wɔ̀ɔ yo: «Ki kaʔa pa ke gban bì hanri mɛlɛ si?»

10Jesu wɔ̀ɔ wí po: «Mo má nyɛ Israyɛli woo pe krɛʔɛfɔlɔ, di mɛ ìn ki kaʔa gee cɛn ge yo? 11Mí biʔi yo má ma kanyɛmɛ na, ga wó ma cɛn ge, kiì gi wó na nyu ge. Ga wó ma nya ge, wó na kiì kayoʔo nyu. Di kiì nì kì bɛfu ní, ye ìn ki ta bì ba wò kayoro na de. 12Mí ma yo ye nì kaʔa gee na ké na hanri naʔa tra na de, di ye ìn ba ké na. Nàʔa po ban, nà mi yo ye nì kaʔa gee na ké na hanri wa Nyɛʔɛlɛ kaʔa ni ge, pa yeʔe po mɛlɛ bi ba ké na ge? 13Hɛn wɛ̀ ìn je luʔu wa nyɛʔɛlɛ na le, nà ki ìn bo ŋa wí ma jɛ wa nyɛʔɛlɛ na mâ trigi naʔa tra na de. Wiì wi ŋa Hɛn Pyɔ ní we. 14Mowisi wi da kanyɛrɛ wɔgɔ jrɛʔɛ namuru wa tiʔi na sinbriʔi ni pomo ma na ge, kí ma yala pe Hɛn Pyɔ jrɛʔɛ we ki podeme miì na,#3:14 ma wèle wa Ton 21:9 ni wè. 15jango hɛn o hɛn ŋa wí bi ba wí na, wi nyuwyeʔe bajegɔ ta. 16Mɛjɛn drunya wi da glan Nyɛʔɛlɛ ni le ceŋge fɔ à li li Pinigbele kan le wi ma, jango hɛn ŋa wí bi ba wí na, wò gá gu, di wi nyuwyeʔe bajegɔ ta. 17Nyɛʔɛlɛ li ìn dà li Pyɔ tun we naʔa drunya ni, jango wi ba kiti kon drunya hɛɛn na be. Di li dɔɔ́ tun, jango drunya hɛɛn pe ba syɔ wi fanŋa ni ge. 18Kiti woò na tun hɛn ŋa na wí ma pa Pyɔ na we. Di kiti wí ma to kɔ hɛn ŋa na wi ìn ba wí na ge, mɛjɛn wi ìn ba Nyɛʔɛlɛ li Pinigbele na le. 19Kiti wí ŋa: Kpɛnmɛ mí ma pan naʔa drunya ni we. Di yeblimi mí na hɛɛn glanʔa be mà toro kpɛnmɛ na me, mɛjɛn pe kahranʔa ké nyɛ tipeʔele.

20Hɛn o hɛn ŋa wí na kapere hanri ge, kpɛnmɛ mí ín je dɔɔ glanʔa fyeu. Wí ín jé da nyini kpɛnmɛ na jango hɛɛn pò gá wi kahranʔa nya ge. 21Di ŋa wí na kaʔa gee hanri ké ma yala kanyɛmɛ nì me wi naa nyini kpɛnmɛ na jango wi kahranʔa ke daʔa teri hɛɛn na be peʔe cɛn pe yo ki kaʔa ké ma jɛ Nyɛʔɛlɛ liì ma.»

Jan wí ma Jesu kpɔʔɔ we

22Ki kruʔu ma, Jesu ní, wi ploʔofɛɛ ní à pe kɛri wa Jude klo ni le. Wɔ̀ɔ yâ nyiŋi ka kɔ wa pe ní mà na hɛɛn batise. 23Jan fanna wi dáa hɛɛn batise wa Eno deʔe na, ga wa Salimi kàʔà tanla ge, mɛjɛn nyumu mi dá bo wa fafaʔa. Hɛɛn à pe na sye wì krugu. Wɔ̀ɔ na pe batise. 24Ki nyiŋi na, ki da bo pe ìn jé Jan le wa kaso nî we kpɛn.#3:24 ma wèle wa Mat 14:3; Mar 6:17; Luk 3:19-20 ni wè.

25Jan wi ploʔofɛɛ ní, ní Juwifiyee naŋa wà nì pe dáa kakara wa konjeʔeme kala na wa srɛʔɛ kloʔó ni ge. 26À pe kɛri Jan krugu we mà yɔ́ɔ̀ po: «Krɛʔɛfɔlɔ, ŋa wí dá bo má ni wa Jurudɛn lɔʔɔ namyɛʔɛ gegee na ge, á ma wi kayoʔo yo ge, wí nyɛ wa mà na hɛɛn batise. Pè bɛfu à pe na sye wì krugu.» 27Jan wɔ̀ɔ pé po: «Hɛn wòo gban bì yele là ta kí po Nyɛʔɛlɛ li ìn li kân wí ma ge. 28Yèé tapoboo, yé maʔa cɛn mà yo mi daʔá yo mà yo: ‹Mì ban Nyɛʔɛlɛ li wofràa we, di Nyɛʔɛlɛ li da ná tun wi yɛʔɛ̀ ma.›#3:28 ma wèle wa Jan 1:20 ni wè.

29Ŋa wí ma fonŋo co wiì wi cɛlɛ fɔlɔ we. Di fonŋo wi pɔlɔ nagoro ŋa wí nyɛ be wì tanla yerehaʔa mâ na nuru wí ma ge, lafiʔimi na po wí ma ceŋge fonŋo pɔlɔ wi kayoro kɔsɔ na. Ki lafiʔimi ma mí nyɛ ná ma ceŋge, à mi funŋu.

30Kí ma yala wiì wi yele li da gbɔʔɔ, domi na wolo li da jɛrɛ́.

Ŋa wí ma jɛ wa nyɛʔɛlɛ na mâ pan ge

31Ŋa wí ma jɛ wa nyɛʔɛlɛ na mâ pan ge wiì wi wí nyɛ hɛɛn pè bɛfu pe yugu na ge. Ŋa wí nyɛ naʔa tra na de, wí nyɛ tra woo. Wɔ̀ɔ na tra kaʔa nyu. Di ŋa wí ma jɛ wa nyɛʔɛlɛ na le, wiì wi wí nyɛ hɛɛn pè bɛfu pe yugu na ge. 32Ga wí ma nya ní ga nì wí ma loʔo ge, kiì gi wí na nyu ge. Kiì nì kì bɛfu ní, hɛn wɛ̀ ìn ki ta bì ba wi kayoro na de. 33Ŋa wí ma pa wi kayoro na de, ki woo wí ma yereʔe na mà yo ga Nyɛʔɛlɛ lí ma yo ge, kayocɛnŋɛ gi. 34Nyɛʔɛlɛ li dá hɛn ŋa tun wiì wi wí na li kayoro nyu de. Mɛjɛn Nyɛʔɛlɛ li dɔ́ɔ nyi Nyìli ní le kanla fun.

35Pyɔ wí na To Nyɛʔɛlɛ glanʔa le. À li sye wì bɛfu kan wí ma.#3:35 ma wèle Mat 11:27; Luk 10:22 ni wè.

36Hɛn ŋa wí ma pa Nyɛʔɛlɛ li Pyɔ na we, nyuwyeʔe bajegɔ nyɛ wí ma. Di ŋa woò na li Pyɔ honri we, wòo ba ki nyuwyeʔe nya ge. Di Nyɛʔɛlɛ li nàʔà paʔa danʔa wí na.»

Currently Selected:

JAN 3: NLK10

Highlight

Copy