PITUNBEE 28

Pɔli wí ma yere tanri kɔ Malite klo ni

1Wo gâ syɔ kɔ ge, à woʔo nya pé na ki klo yeri le Malite. Nyumu mi da lí kɛli. 2Ki klo woo à pe wo co kmaʔa ceŋge, ali ki kakmaʔa ki nyoʔo koò na taʔa ticaʔaga. Pa hɔgɔ ki dá bo na pan, wyere á ti na kun ge, à pe kwɔkpɔʔɔ kmoli mà wò bɛfu yeri mà yo wo klɛn kì tanla. 3Pɔli wɔ̀ɔ kɛri mà yâ kɛnhɛnbibi pà koli. Wi báa pi ni wa kwɔʔɔ nî nyiŋi ga na ge, wɔgɔ à kà ma nyini wa pi nî kwɔʔɔ ki tifumu mi kala na le mòo no wa kyɛʔɛ na ge mà panri waʔa na. 4Ki klo woo pe gâ wɔgɔ nya, kí ma panri wa Pɔli wi kyɛʔɛ na ge, à pe naʔa nyu pè ma mà yo: «Kanyɛmɛ na, ki naŋa ŋa wí nyɛ hɛɛn kpofɔlɔ, mɛjɛn wi syɔmo mì bɛfu ní wa nyugbɔmo ni me, nyɛʔɛlɛ la wó na yeri Sinmi ge, li ìn jori wi po nyuwyeʔe na.» 5Di Pɔli wi gâ wɔgɔ yaʔara ge máʔà wa wa kwɔʔɔ ge, yrafyɛn wɛ̀ ìn wi ta. 6Ki hɛɛn pe dá bo naʔa honri mà yo wi wre tí bi dìn wí na, ná kiì ban, wí bi do bì gu be ki dedege na ge. Di pe gáa wi wele, áʔa mo, á peʔé nya yrafyɛn wɛ̀ ìn wi ta ge, ɛɛn pe honriʔi àʔa krɛʔɛ pè na. À pe yo nyɛʔɛlɛ là li wí ni.

7Naŋa wà kere dá bo wa ki deʔe tanla ge, pe dáa ki naŋa yeri we Publiyusi. Wɔ̀ɔ po ki klo li lagwɔ. Wɔ̀ɔ wo co kmaʔa ceŋge mà wo trigi wa wi kasyɛn ma ge wlɛrɛ tanri kpafoʔo ni. 8Publiyusi wi to wi dá bo syɛnhaʔa. Wre ti dá bo wí na tifuru. Lama namoʔo àʔa po wí na kpo noo cɔlɔ. Pɔli wɔ̀ɔ je wa wì krugu mà yâ Nyɛʔɛlɛ nyɛri le wi kân mà kyɛrɛ̀ pa de wi na mòo pwɔʔɔ. 9Ki woʔo ga ki hranla kruʔu ma ge, ki klo li yabaa pe tɔɔ fanna à pe na pan mà báa bori. 10Pee fanna à pe wo kan nadanma yrɛbɛ fafaʔa nì. Nyiŋi ga na wo da gáa jin nyumu kɔrɔ ni bí da sye ge, wó na cori yrɛbɛ ba na, à pe pì bɛfu kan wo ma.

Pɔli wí ma je Hrɔmu kàʔà ni

11Di ki ní wo dá yere tanri kɔ be ki klo ni le, ki kruʔu ma, à wo na bâ je ki Alɛkisandre kàʔà nyumu kɔrɔ ga ni, ki dá wyere nyiŋi kɔ ge wa ki klo la ni le ge. Pe dá bo na ki nyumu kɔrɔ yeri ge Nyɛʔɛŋɛɛ Pigaanla. 12Wo gâ no wa Sirakusi kàʔà ni ge, à wo wlɛrɛ tanri kɔ wa. 13Wo gâ jɛ be ki deʔe na ge, à wo na traʔa na sye mà yâ no wa Hregiyo kàʔà na ge. Ki gâ wlɛʔɛ nigbe kɔ ge, àʔa po tiflɛʔɛ kà ma jɛ wa yaa ki jrɛhaʔa kamolo namyɛʔɛ na ge. À wo jɛ be mà na sye. Wlɛrɛ syɛnwoʔo na ge, à wo yâ je wa Pusɔli kàʔà ni ge. 14À wo sɛrifɛɛ pèè nya wa ki deʔe na ge. À pe wo nyɛri mà yo wo wlɛrɛ nasyɛn kɔ wa pe ní. À wo na sye ki pomo ma miì na Hrɔmu kàʔà ni ge. 15Sɛrifɛɛ pe gâ wò mɛʔɛ ta ge, à pe jɛ wa Hrɔmu kàʔà ni bì ba wo flin. À pèè ma yâ wo flin wa kàʔà ga ni pé na yeri Apiyusi Caan ge. À pèè ma yâ wo flin wa deʔe ga na pé na yeri Nabonmoo Trigihaʔa Goro Tanri ge. Nyiŋi ga Pɔli wi gâ pe nya ge, wɔ̀ɔ Nyɛʔɛlɛ syeri le mà dihon ta. 16Wo yâ je wa Hrɔmu kàʔà ni ge, à peʔe ta mà yo Pɔli pɔɔ gban bì go wì yɛ, wiì nì sorasinaŋa ŋa nì wí na wele wí na ge.

Pɔli wí ma Nyɛʔɛlɛ kayoro yo Hrɔmu kàʔà ni

17Wlɛrɛ tanri gâ doro kɔ ge, Pɔli wɔ̀ɔ Hrɔmu kàʔà Juwifiyee pe yɛkluu yeri be. Pe bâ gboʔolo nyiŋi ga na ge, wɔ̀ɔ kí yo pé ma mà yo: «Na woolo, do mì we mi ìn kala là po tipele wò klo hɛɛn na be. Mi ìn wò tokpɔɔ pe kalɛʔɛ cɔʔɔ ge. Di kiì nì kì bɛfu ní, à pe ná co wa Jerusalɛmu kàʔà ni ge mà na le Hrɔmu kàʔà woo pe kyɛrɛ̀ ni de. 18Ki woo pe gâ na yugu nyiŋi ga na ge, à pe cori pé bi na wa, mɛjɛn pe ìn dà kala là nya ná na la lí bi gân pe na kpó ge. 19Di pa Juwifiyee pe ìn dà gáʔà ta ge, àʔa yala bì na kayoʔo kân Sesare ma we. Di ki ìn nà ná go nɛɛ pe yo di mí ma baʔa na klo woo na be dɛ. 20Kiì ma kan á mi ye yeri bí ba ye nya bí yo ye nì ge, mɛjɛn Israyɛli klo woo pé na honri ná pa kala la na ge, liì ma kan á pe na pwɔ ki timoro nyoʔomo ba nì be.» 21À poo po: «Wòó, wo ìn jé sɛbɛ wà ta kpɛn ki po wí ma jɛ wa Jude klo ni le pe ma kayoʔo yo wa wi nî. Wò woo bee wa ge, wɛ̀ ìn jé jɛ wa bì ban naʔa bì ba jase wà yo, ná kiì ban, bì ba ma kayopeʔe yo wo kan. 22Di ga má na honri wa ki srɛʔɛ kloʔó ki namyɛʔɛ na ge, wó ma cori bìʔi loʔo má ma, mɛjɛn wó maʔa cɛn mà yo hɛɛn pé na ki srɛʔɛ kloʔó ga ki yele cɔʔɔ le deʔe kì bɛfu na.»

23À pe wlɛʔɛ kà kon wí kan mà bâ ban be wì krugu wi trigihaʔa na ge fafaʔabaa mà toro kplɛʔɛ na ge. Wɔ̀ɔ Nyɛʔɛlɛ li masaʔa tyɛʔɛ ge pe na mà naʔa fligi pé kan. Mà kpe jɛfanʔa na fɔ yaa àʔa yâ hanʔa mà kɔ, wi dáa ki ca bì pe lama krɛʔɛ me pe na Jesu wi namyɛʔɛ na ge mà na nyu pé ni Mowisi wi kayoro ní Nyɛʔɛlɛ leyoo pe woro ti fanŋa ni ge. 24À pèè ma pa wi kayoro da na wi dáa nyu ge. Di à pèè ma kori pe ìn ba tí na. 25Pe ìn dà bo kayotege na. À pe na canmu. Di sanni pé bi da sye ge, Pɔli wɔ̀ɔ kayoʔo nigbe haʔa wa pe ma mà yo: «Nyɛʔɛlɛ li Nyìli li dá ga yo yè tokpɔɔ kan be Nyɛʔɛlɛ leyoo Esayi wi nò nî ge, kayocɛnŋɛ gi, 26mâ yo:

‹Ta sye wa ki klo hɛɛn

bee krugu be ma ya pe po:

Yé gà baa nuru kmaʔa,

di yòo da ki kɔ̀rɔ́ cɛnni we.

Yé gà baa wele kmaʔa,

di yoo da nyaʔa.#28:26-27 ma wèle wa Esa 6:9-10 ni wè.

27Mɛjɛn ki klo hɛɛn bee be

pe dihon wí ma ton pé na.

Pé ma krɛʔɛ gbeeyee

wa pe naakpoʔo ni ge.

Pé ma pe nyɛʔɛ ton ge,

jango pò gáa nyaʔa wa ke nî,

pò gáa nuru wa pe naakpoʔo ni ge,

pò gaʔa cɛ́n wa pe dihon na we,

jango pò gá yɛʔɛ̀ kan

mì Nyɛʔɛlɛ ma le bì pe pwɔʔɔ.› »

28Ki tɔ na ge, yeʔe cɛn ye yo Nyɛʔɛlɛ lí ma li syɔmo kayoʔo troʔo ge wa klòʔo ke tɔɔ ke hɛɛn ma be. Pee be pé bi ba loʔo ki kayoʔo ma ge.

29[Nyiŋi ga na wi gâ ki woʔo ga yo kɔ ge, Juwifiyee à pe na kakara wa pè ní gbanʔa na sye.]

30Pɔli wɔ̀ɔ ko wa go ga ni wi dá gbe sràʔà na ge mà ta wa yɛpogoo syɛn. Hɛɛn pè bɛfu bee pe dáa nyini wa wi na ge, wɔ̀ɔ na pe cun kmaʔa. 31Wɔ̀ɔ na Nyɛʔɛlɛ li masaʔa kayoro jari de mà po dihon nì na hɛɛn ploʔo be wò fɔlɔ Jesu Krisi wi pomo ní me. Hɛn wɛ ìn dɔɔ fanna.

Currently Selected:

PITUNBEE 28: NLK10

Highlight

Copy