MATHIE 10

Krisi-mranchɛ́mán áwɔ́-mɔn

(Ɔ́n wú Mák 3.13-19; Ɔ́n wú Lwik 6.12-16)

1Jezwi che mɛ́n yíchwɛmán áwɔ́-mɔn bha, ńse wo sɛ́npɛ́ sa wo tranmán nánnánmi phromɛn phromɛnhɔn, ló wo tɛ́ néphan álɔ́ yábhɛ yábhɛ bha phɔ le ńnɛ́nɛ-phɔmán ɔ́nmɔn khúnbrɛn phɔ ojan. 2Nɛn Krisi-mranchɛ́mán áwɔ́-mɔn lókɔn hɛ́n ali o: mɛ́n ńthwási hɛ́n nɔn ali Simɔn (óche Piɛ) le mɛ́n hɔnsɛ́n Andre; Jakhi le mɛ́n hɔnsɛ́n Jan ali Zebede miɔn. 3Filíphu le Batelemi, Toma le Mathie ali la-nphodówo; Jakhi ali Alfe mi le Tade. 4Simɔn ali lephan ákhúbhɛ́ bhwe phé le Judasi Sikariɔ́thi aphɛ Jezwi li.

Jezwi chɛ áwɔ́-mɔnmán yí

(Ɔ́n wú Mák 6.7-13; Ɔ́n wú Lwik 9.1-6)

5Jezwi chɛ néphan áwɔ́-mɔn lókɔn yí, ló ábidí ńmo se wo nɔn ali sa:

– Ɔ́n ne ló néphan aleli Jwifunɛ́n gotho, saji ɔ́n ne lɛ́ Samari khúbhɛ́ brɛ hromɛn. 6Khɛ́n Izraɛ khúbhɛ́nɛ́n gbankhran alia ɔn, wo yé nɔn ɔ́n no. 7Ásitó hrómɛn, Yankan bhwe khɛ́n ɔ́n ma tɔ nɔn ali salé: “Átho Bhringbi khúbhɛ́ gbali phɔ phu!” 8Tɛmɛ ɔ́n tɛ́ lɔ́phɔmán phɔ jan, ɔ́n chɛ́ mɔngumán ochán khúnɔn mɛn fe, ɔ́n tɛ́ khokhóbhé-phɔmán phɔ ochán, ló ɔ́n tranmán nánnánmi phromɛn phromɛnhɔn. Hɔ́n yí ɔ́n pɛ, wɛ́-nwɛ́ ose hɔ́n, ló hɔ́n lɔ tɛmɛ ɔ́n mó sé néphan wɛ́-nwɛ́. 9Ɔ́n ne do ncí, ákhwɛbhí le jɛtɛn bhiɔ́ obho ádonɛn nannan mɛn tɛ há hɔ́n phɔ́su mɛn. 10Lóka hɔ́n eló hu, ɔ́n ne sranmán khókhóthu le átho ntráliɛ́ mɔn, ɔ́n ne sranmán ngbawa le áyágrɛ ɔ́nmɔn. Áyɔn salé júmánlíwo ogɛ mɛ́n nɛnlí.

11Ákhúbhɛ́ tɛɛ ɔ́n di, khɔ ló nkhó o, khɔ lómri o, ɔ́n nɛn lephan ábha gɛ do hɔ́n, ló ɔ́n chré mɛ́n hwan kábrɛ kábrɛ odi lóka ɔ́n ma chán lóne lo. 12Ábháthó tɛɛ ɔ́n nɛ, ɔ́n mɔ́ néphan yí, ló ɔ́n tɔ salé: “Ńthɛ́nkhwálé ogɛ hɔ́n.” 13Kasé ábháthónɛ́n do hɔ́n, hɔ́n thɛ́nkhwálé yí ɔ́n mɔ, ogɛ wo. Khɛ́n kasé wo le do hɔ́n, hɔ́n thɛ́nkhwálé yí ɔ́n mɔ osáji bha gɛ hɔ́n. 14Kasé khɔ ábháthó bɛn o, khɔ ákhúbhɛ́ bɛn o, khɛ́n wo le dɛn do hɔ́n, khɛ́n wo le dɛn ye hɔ́n bhwe, ɔ́n chán lóne féne, ló ɔ́n phan hɔ́n ntathé núlu khwá. 15Mímí mɛɛ́n kranmán hɔ́n: ákwabhɔ́ cí, óbha tɛ́ yí dri ákhúbhɛ́nɛ́n lókɔn phɔ brɛn Sodɔmɛn le Gomɔ ɔ́nmɔn khúbhɛ́nɛ́n yí otɛ.

Ágbrelí atre hɛ́nmɛn ebhá

(Ɔ́n wú Mák 13.9-13; Ɔ́n wú Lwik 21.12-17)

16– Ɔ́n wu a! Mɛn chɛ hɔ́n élo sa ńgbankhran eló ńphópho thethé. Tɛmɛ ɔ́n thi sa ńdumán, ló ɔ́n phɛ sa bhwebhwe a. 17Ɔ́n há hɔ́n phɔ mwanhɛ́n, átɛsalé néphan bha khwɛ́n hɔ́n sé kwabhɔ́mán, ló wo bhá bhra hɔ́n mɛ́ wo hɛ́nbhúrɛ si. 18Mɛn hɛ́nthé, wo bhá bhɔlíkɔn sé hɔ́n athemánhɔn le mringbilímán ɔ́nmɔn yé, ochɛ́sé ɔ́n ní hɔ́n ndalefɛ wo hɛ́nmɛn le néphan aleli Jwifunɛ́n ɔ́nmɔn hɛ́nmɛn. 19Lóka wo bhá khwɛ́n hɔ́n ɔ́nmɔn ló ákwabhɔ́ gɔn, hɔ́n si ɔ́n ma khɔ́ tɔ bhwe le hɔ́n bhwe ɔ́n ma tɔ ɔ́nmɔn thɛ́n olelí hɔ́n, átɛsalé lóka yábhɛ brɛ tɛɛ nɔn wo bhá tɔ lóbhwe khúnbrɛn lókɔn há hɔ́n míthé: 20léli hɔ́n bɛn nbrɛn yé nɔn lóbhwe bha chán, khɛ́n hɔ́n The Nánnánmi nɔn ábha khɔ́ hɔ́n phɔ tɔ bhwe.

21Néphan bha khwɛ́n wo bɛn nbrɛn wo hɔnsɛ́nhɔn sé owɛ́n, nthemánhɔn lɔ bha tɛ́ wo miɔn lóyí yábhɛ brɛ, ńmiɔ́ lɔ bha gɛ wo themánhɔn ɔ́nmɔn swan, ló wo bhá khwɛ́n nkɔn lo sé owɛ́n. 22Mɛn hɛ́nthé, néphan khúnbrɛn bha sa hɔ́n mɛ. Khɛ́n lephan tɛɛ ábha gɛlé ya kábrɛ kábrɛ ábha di lómɛ́n, lephan lókɔn ɔn, mɛ́n, wo bhá swa nkɛ. 23Kasé wo élri hɔ́n gbre ákhúbhɛ́ bɛn hromɛn, tɛmɛ ɔ́n wáló lónánkhɛ hromɛn. Mímí mɛɛ́n kranmán hɔ́n: ɔ́n ma lé jékhali Izraɛ khúbhɛ́ khúnbrɛn hrómɛn phú lɔ khɛ́n Lephan Mi bha sáji bhá.

24Álepɛ lephan échwɛ yí abanbrɛn lephan élie yí, lóyábhɛ brɛ, álepɛ nɛnkhwɛ́nwo abanbrɛn mɛ́n hwánthe. 25Lóyí ógɛ tɛ́ nɔn ali salé lephan échwɛ yí otɛ́sa lephan élie yí, ló nɛnkhwɛ́nwo lɔ otɛ́sa mɛ́n hwánthe. Ló kasé ábháthó-óthe mɛ́n wo éche nkɛ Bɛzebu ɔn, ńhɛ́n khɛ́n óbha sé mɛ́n bháthónɛ́n, ló-ɛ bha yan brɛn lókɔn!

Lephan khɛ́n ayɔn se sa osó

(Ɔ́n wú Lwik 12.2-7)

26– Ɔ́n ne só néphan. Álepɛ yí ahrɔman tre, khɛ́n abha le ká nphrámɛn, saji álepɛ yí abha kpɔ́thé, khɛ́n obha le yɛ́n. 27Ábhwe khɛ́n mɛɛ́n tɔ sé hɔ́n dubhlékhu hromɛn ɔn, ɔ́n tɔ lóbhwe ńcrɔ́n khrákhrá, ló ábhwe khɛ́n hɔ́n eyé ákpɔ́thé, tɛmɛ ɔ́n ya nkhú tho lú lóphɔ khwɛ́. 28Ɔ́n ne só néphan awɛ́n nánmí, khɛ́n ále gɛ wɛ́n hɛ́nfan. Khɛ́n lephan ɔ́n gɛ só nɔn ali Yankan, átɛsalé mɛ́n mɔn ángɛ wɛ́n nánmí le hɛ́nfan ɔ́nmɔn ágbrelí si. 29Wú léli kɔphrɛchí brɛ obhó phɛ́ ngbi mɔn? Lótɛ khɛ́n kasé hɔ́n The le se mɔ́nsi, brɛ bha le hálé yítathé bhrɔ́ɔ́. 30Hɔ́n nbrɛn lɔ, hɔ́n hɛ́nyro wɛ́-nwɛ́ khúnbrɛn lɔ okan phu. 31Ɔ́n ne sókhú a: hɔ́n jɛ khɔnman brɛn ngbi búdúbúdú jɛ!

Jezwi-Krisi si okhɔ yɛ́n, Jezwi-Krisi si óle khɔ́ yɛ́n

(Ɔ́n wú Lwik 12.8-9)

32– Lephan khɛ́n néphan hɛ́nmɛn ábha tɔ gbée salé mɛn ni mɛ́n lephan, mɛn lɔ mɛn Nthe abha tho hɛ́nmɛn, mán tɔ gbée salé ńni mɛn lephan. 33Khɛ́n lephan tɛɛ néphan hɛ́nmɛn ábha tɔ mɛ́n khrákhrá mɛn salé mɛ́n nɛ́n yɛn mɛn, mɛn lɔ, mɛn Nthe abha tho hɛ́nmɛn, mán tɔ mɛ́n khrákhrá mɛn salé mɛn nɛn yɛn.

Mɛn nɛn sranman ńthɛ́nkhwálé, átha nɔn mɛn sranman

(Ɔ́n wú Lwik 12.51-53; 14.26-27)

34– Ɔ́n ne bhú salé mɛn sranman thɛ́nkhwálé ma áthéji: léli thɛ́nkhwálé mɛn sranman, khɛ́n átha nɔn mɛn sranman. 35Mɛn ma salé mɛɛ́n múri sɛ le mɛ́n the ɔ́nmɔn, bhiebhri le mɛ́n man ɔ́nmɔn, sɛ mia le mɛ́n ca man ɔ́nmɔn, 36ló lephan bha sa mɛɛ́n nbrɛn bháthónɛ́n mɛ.

37Lephan khɛ́n ábha pɔ, khɔ mɛ́n the o, khɔ mɛ́n man o, brɛn mɛn, lephan lókɔn ɔn, ńnɛn yɔn se mɛn. Mɛ́n ánman pɔ, khɔ mɛ́n bhi sɛ o, khɔ mɛ́n bhi bhie o, brɛn mɛn, lephan lókɔn ɔn, ńnɛn yɔn se mɛn. 38Lephan khɛ́n ale hɔn mɛ́n yábhletre khɛ́n ángɛ mɛn thá, lephan lókɔn ńnɛn yɔn se mɛn. 39Lephan ábha nɛn salé mɛ́n bo mɛ́n mɛpɔ́bhá ɔn, mɛ́n mɛpɔ́bhá bha liá; lókhɛ́n mɛ́n, mɛn hɛ́nthé ánman nɛn salé mɛ́n mɛpɔ́bhá oliá, mɛ́n-ɛ, ánman sáji gɛ mɛ́n mɛpɔ́bhá.

Ápɛnsɔ́n óbha gɛ

(Ɔ́n wú Mák 9.41)

40– Kasé lephan do hɔ́n, átɛsalé mɛn nɔn ńdo mɛn. Ló lephan khɛ́n ado mɛn, átɛsalé lephan achɛ mɛn ma nɔn ńdo. 41Lephan khɛ́n ado Yankan bhwetɔ́tréwo bɛn, nkɛ Yankan bhwetɔ́tréwo nkɛ li hɛ́nthé, lephan lókɔn ɔn, ánman gɛ ápɛnsɔ́n ali bhwetɔ́tréwo pɛnsɔ́n. Ló lephan khɛ́n ado lephan apriman Yankan hɛ́nmɛn, Yankan hɛ́nmɛn nkɛ priman hɛ́nthé, lephan lókɔn ɔn, ánman gɛ ápɛnsɔ́n obhó sé lephan apriman. 42Mímí mɛɛ́n kranmán hɔ́n: lephan khɛ́n akhɔ ńdu nrwɛ́n nrwɛn grásɛn brɛ nwɛ́ se ńmiɔ́ chɛ́-nchɛ́ lókɔn hromɛn lephan brɛ nan, mɛn yíchwɛ́wo ńni hɛ́nthé, mɛ́n lephan lókɔn, ánman gɛ mɛ́n pɛnsɔ́n.

Currently Selected:

MATHIE 10: ENT96

Highlight

Copy